Joma “Welo” Riwore e Lamo Madier
Joma “Welo” Riwore e Lamo Madier
‘Jo moa e pinje maoko nobednu jopur kod jo malwero muzabibu mau. To un noluongu ni jodolo mag Jehova.’—ISA. 61:5, 6.
INYALO DWOKO NADE?
Jomoko neno nade welo moa e pinje maoko, Muma to puonjo ang’o e wi wachni?
Dhano mowuok e ogendini duto igwelo mondo otim ang’o?
Ang’o momiyo wanyalo wacho ni Joneno mag Jehova onge gi jodak e kindgi?
1. Ere kaka jomoko neno welo moa e pinje maoko, to ang’o momiyo timno ok nikare?
MANA kaka nonyis e sula mokalo, thoth ji ok ohero ‘jo moa e pinje maoko’ mobiro dak e pinygi. Ginyalo jaro welogo ka ginyisogi achaye ka giparo ni gin gibeyo moloyogi. Bedo gi chuny ni joma oa e pinje mamoko gin joma nono, ok en gima nyiso luor. To moloyo, bedo gi paro ma kamano en tim fuwo nimar onge dhano maber moloyo nyawadgi. Buk miluongo ni The Races of Mankind wacho ni oganda dhano duto gin owete mana kaka Muma wacho. Kata mana owete monyuol e ot achiel nyalo bedo joma kitgi opogore, to pod gin mana owete.
2, 3. Jehova neno nade jodak moa e pinje moko?
2 En adier ni kata bed ni wadak kanye, jo moa e pinje maoko, kinde duto osebedo kodak e dierwa. Mano e gima notimore e kinde Jo-Israel machon, ma ne nigi winjruok makende gi Jehova Nyasaye kokalo kuom singruok mar Chik. Jogo ma ne oa e pinje maoko ne ok omi ratiro mang’eny ahinya e piny Israel, kata kamano Jehova pod ne dwaro ni Jo-Israel omigi luor kendo kik obwon-gi. Donge mano en ranyisi maber monego waluw! Jokristo madier ok onego ojar kata bwono ng’ato ang’ata manie diergi. Nikech ang’o? Jaote Petro nowacho niya: “Adier, aneno ka Nyasaye ok odewo wang’ ji; to kuom ogendini duto ng’at moluore, kendo ma timo tim makare, e moyiego.”—Tich 10:34, 35.
3 Joma noa e pinje maoko ne yudo gweth mang’eny kuom dak e dier Jo-Israel. Nikech ang’o? En nikech Jehova norwako welo ma gin jodak. Bang’e jaote Paulo nojiwo wachno kopenjo niya: “Nyasaye en Nyasach jo Yahudi kende koso? Ok en mar jo ma ok jo Yahudi bende koso? Ee, mar jo ma ok jo Yahudi bende.”—Rumi 3:29; Joel 2:32.
4. Ang’o momiyo onge ng’at monego okaw ni en japiny moro ei kanyakla mar “Israel mar Nyasaye”?
4 Bang’ timo singruok manyien gi kanyakla mar Jokristo mowal, winjruok makende ma Jo-Israel masie ne nigo gi Nyasaye koro norumo. Omiyo koro kanyakla mar Jokristo mowalgo, ne omi nying ni “Israel mar Nyasaye.” (Gal. 6:16) Mana kaka Paulo nolero, ei oganda manyienno koro ne “onge ja Yunani kata ja Yahudi, onge tero nyangu kata bet ma ok oter nyangu, onge jamwa kata ja wakele, onge misumba kata ng’a man thuolo; to Kristo en duto, kendo en e i duto.” (Kol. 3:11) Nikech mano, onge ng’at ma nonego okaw ei kanyakla mar Jokristo ni en japiny moro.
5, 6. (a) Ng’ato nyalo bedo gi penjo mane kaluwore gi Isaiah 61:5, 6? (b) “Jodolo mag Jehova” gin ng’a gini, to ‘joma oa e pinje maoko’ ma Isaya nowuoyo kuomgi gin jomage? (c) “Jodolo mag Jehova” kod ‘joma oa e pinje maoko’ tiyo kanyachiel e yo mane?
5 To komachielo, ng’ato nyalo bedo gi penjo e bug Isaya sula 61, moting’o wach moro mokor masani chopo kare ei kanyakla mar Jokristo. Ei sulano, kwan matindo 6 wuoyo kuom jogo ma ne dhi bedo “jodolo mag Jehova.” Kata kamano, kwan matindo 5, to wuoyo kuom ‘jo moa e pinje maoko’ ma ne dhi riwo ‘jodologo’ lwedo. Mano tiende en ang’o?
6 Wang’eyo ni “jodolo mag Jehova” ochung’ne Jokristo mowal mayudo ‘chier mokwongo,’ kendo “ginibed jodolo mag Nyasaye kod mag Kristo, kendo giniloch kode kuom higini gana achielgo.” (Fwe. 20:6) E wi mano, nitie Jokristo mathoth mochung’ motegno ma nigi geno mar dak e piny. Kata obedo ni gitiyo kanyachiel gi Jokristo mabiro dhi e polo, gichalo joma oa e pinje maoko. Gimor tiyo kanyachiel gi “jodolo mag Jehova,” kendo gitiyonegi kaka “jopur” kendo ‘joma lueronegi muzabibu.’ Ka kuom adier, gikonyo ahinya e tij keyo kendo nyago olemo e tije Nyasaye mondo Nyasaye oyud duong’. Ee, Jokristo mowal kaachiel gi ‘rombe mamoko’ manyo kendo puonjo ji adiera ka gikonyogi mondo gidag kaluwore gi adierago.—Joh. 10:16.
“GIN WELO” MANA KAKA IBRAHIM
7. Jokristo ma kindegi chalo gi Ibrahim koda jotich Nyasaye mamoko machon e yo mane?
7 Mana kaka ne waneno e sula mokalo, Jokristo madier gin kaka welo moa e pinje maoko, kata jodak e piny marach ma Satan oteloeni. Gichalo gi Ibrahim kod jotich Jehova machon ma ne ‘gin kaka welo kendo jowuoth e piny ka,’ ka gichung’ motegno maok giriw lwedo piny Satan. (Hib. 11:13) Kata bed mana ni wan gi geno mane e kinde mabiro, pod wanyalo bedo gi winjruok maber gi Jehova mana kaka Ibrahim. Jakobo lero kama: “Ibrahim noyie Nyasaye, kendo yiene nokwanne ka wach makare; kendo noluonge ni, ‘Osiep Nyasaye.’”—Jak. 2:23.
8. Ang’o mane Jehova osingo ne Ibrahim, to Ibrahim ne nigi paro mane kuom kaka singogo ne dhi chopo?
8 Nyasaye nosingo ni kokalo kuom Ibrahim kod kothe, dhoudi duto mag piny ne idhi gwedhi to ok mana oganda achiel kende. (Som Chakruok 22:15-18.) Kata obedo ni singoni ne dhi chopo bang’ ka Ibrahim osetho, ne en gadier ni Nyasaye ne dhi chopo singono. Kuom higini mang’eny Ibrahim kaachiel gi joode nodak e ngima mar dar. To kuom higinigo duto norito osiep mane nie kinde gi Jehova.
9, 10. (a) Wanyalo luwo ranyisi mar Ibrahim e yore mage? (b) Wanyalo riwo lwedo nade tij gwelo ji?
9 Kata obedo ni Ibrahim ne ok ong’eyo ni ne dhi kawo kinde maromo nade mondo singono ochopi, hera mane oherogo Jehova kod kaka nochiworene ne ok odok chien. Nikech kinde duto Ibrahim nong’eyo ni ne en mana jadak, ok nodak kaka jomamoko e pinje mane odhiyego. (Hib. 11:14, 15) Donge en gima nyiso rieko ka waluwo ranyisi mar Ibrahim ka wadak e ngima mayot, maok waparre ahinya ne gige ringruok, kata manyo bedo gi huma, kata gombo bedo gi tije madongo dongo! Onge tiende manyo kit ngima man malo ahinya, ma jomoko neno ni ema ber, to pinyni chiegni rumo. Ere tiende makruok gi gik maok bi siko? Mana kaka Ibrahim wan bende warito gik mabeyo man nyime. Wadwaro bedo gi horruok ka warito kinde ma Nyasaye nochopie singo mage.—Som Jo Rumi 8:25.
10 Jehova pod dhi nyime gwelo ji mawuok e ogendini duto mondo obi oyud gweth kokalo kuom koth Ibrahim. Kendo Jokristo mowal ma gin “jodolo mag Jehova,” kaachiel gi rombe mamoko ma gin kaka welo ‘moa e pinje maoko’ lando ne ji ni Jehova gwelogi kendo gitimo mano e dhok mokalo 600.
HER JI MAWUOK E OGENDINI DUTO
11. Suleman nonyiso nade ni ok ne ohero mana oganda Jo-Israel kende?
11 Kane iwalo hekalu e higa 1026 Ka Ndalowa Podi, kendo kaluwore gi singo ma Jehova nonyiso Ibrahim, Suleman nowacho ni ogendini mamoko bende ne dhi pako Jehova. Suleman nokwayo kama kowuok e chunye: “To bende kuom ng’a mawendo ma ok ng’at jogi Israel, kobiro koa e piny mabor nikech nyingi; (nikech giniwinj huma mar nyingi maduong’, kendo kuom lueti matek, gi badi morie): kobiro molamo komanyo odni, mondo iwinji gi e polo kar dakni, kendo itim kaka ng’a ma wendo okwayoi; ni mondo ogendini duto manie piny ong’e nyingi kendo giluori, mana kaka jogi Israel.”—1 Ruo. 8:41-43.
12. Ang’o momiyo jomoko nyalo neno Joneno mag Jehova kaka joma welo e pinje ma gidakie?
12 Jadak en ng’at modak e piny maok mare kata odak e oganda kata anyuola maok mare. Kamano e kaka Joneno mag Jehova chalo. Kata obedo ni gidak e pinje mang’eny mopogore opogore giriwo lwedo mana Pinyruodh Nyasaye manie polo kaachiel gi ruodhe, ma en Yesu Kristo. Omiyo, ok gidonjre gi weche siasa e pinje ma gidakie, kata ka jomoko paro ni onego gitim kamano.
13. (a) En paro mane manyalo konyowa mondo kik wane dhano wadwa kaka jadak? (b) Jehova ne dwaro mondo dhano obed gi paro mane kuom dhano wadgi? Ler ane.
13 Welo moa e pinje maoko thothne inyalo fwenyo gi kitgi. Mano nyalo luwore gi dhok ma giwacho, timbe mag anyuolagi, kaka dendgi chalo, kit lewni ma gihero kata yo ma girwakore godo. Kata kamano, gik mamiyo joma wuok e ogendini duto bedo machalre e gima duong’, moloyo ng’iyo pogruok matindo tindogo. Omiyo, kapo ni wanyalo puonjore neno ng’at moa e piny machielo ni en mana dhano kaka wan, kendo ok waket e pachwa yorego ma gipogorego kodwa, ok wabi nene kaka jadak. Ka dabed ni piny ngima nigi sirkal achiel moriwo ji duto, paro mar neno jomoko kaka jodak dobedo maonge. Chakre chwe dhano, Jehova ne dwaro mondo dhano duto modak e piny obed kaka joot achiel manie bwo lochne. To gie sani, be nyalore mondo dhano mowuok e ogendini duto e piny mangima owe neno jomoko kaka jodak?
14, 15. En ang’o ma Joneno mag Jehova osepuonjore ka gin kaka kanyakla?
14 Wadak e piny ma ji mang’eny oherore giwegi, kendo paro ni pinje ma giwuokie e pinje mabeyo moloyo mamoko. En adier ni dwarore watim kinda ahinya mondo walok yo ma wanenogo jomoko. Jal moro ma nyinge Ted Turner, ma en wuon kambi mar televison miluongo ni CNN, osetiyo gi ji mang’eny ma nigi talanta mopogore opogore kendo ma wuok e pinje mang’eny. Owacho niya: “Tiyo gi jogi duto nopuonja gimoro maduong’. Nachako nenogi, ok kaka ‘welo moa e pinje maoko,’ kata jodak, to kaka jothurwa mwadakgo e pinywa achielni ma Nyasaye nochweyo. Nachako neno ni wach ma ji tiyogo ni ‘jadak’ en wach manyiso achaya kendo ne agolo chik moro ni e kambi mar CNN, onge ng’at ma ne idhi luong ni jadak, obed sa lendo e studio kata e mbaka ma ji goyo pile ka pile e ofis.”
15 E piny mangima, Joneno mag Jehova kende ka gin kanyakla ema oserwako paro ma Nyasaye nigo kuom kaka oneno ogendini duto. Gisepuonjore neno dhano duto kaka Jehova nenogi, to nikech timo kamano giseloko pachgi kuom kaka gineno jomoko. Ok gikwed ogendini mamoko moriwo koda joma wuok e pinje moko, kata paro ni welo ma jodak ok gin joma inyalo gen. Gimor kendo bernegi ahinya bedo gi joma wuok e pinje mopogore opogore kendo ma nigi nyalo mopogore opogore. Be isegaparo kaka en gima kende ahinya ni Joneno mag Jehova nyalo timo kamano, kendo paro ber miseyudo nikech bedo gi paro mowinjore e wi jomoko?
PINY MAONGE NG’AT MA NOLUONG NI JADAK
16, 17. Piny biro chalo nade e kinde ma weche ma ne okor e Fweny 16:16 kod Daniel 2:44 chopo kare?
16 E kinde mokayo machiegni, ogendini duto biro kedo gi Yesu Kristo kaachiel gi oganda lweny mage manie polo e lweny mogik “miluongo gi dho Hibrania ni Har–Magedon.” (Fwe. 16:14, 16; 19:11-16) Higini 2,500 mosekalo, janabi Daniel ne okoro gima ne dhi yudo sirkande duto mag dhano nikech ok gitim dwaro mar Nyasaye. Nondiko kama: “E ndalo ma ruodhigo nobedie, Nyasaye manie polo nochung piny ruoth moro ma ok norum nyaka chieng’, onge oganda moro ma nobedi gi loch kuom piny ruodhno; to enong’iny pinje ruodhigi duto, mi notiekgi, kendo nobedie nyaka chieng’.”—Dan. 2:44.
17 Be inyalo paro kaka piny biro chalo, ka weche ma ne okorgo ochopo kare? Tong’ mag pinje duto ma dhano noketo, mamiyo jomoko iluongo ni jodak moa e pinje maoko biro bedo maonge. Pogruok moro amora mabiro bedo kuom dhano, nobed mana gima nyiso ber mopogore opogore mag chwech Nyasaye. Geno majaber kamano onego ojiwwa waduto mondo wadhi nyime pako kendo miyo Jachwechwa, ma en Jehova Nyasaye duong’ e yo maber kaka nyalore.
18. En ranyisi mane manyiso ni Joneno mag Jehova ok ne jowadgi kaka jodak?
18 Be kinde nochopi ma ji duto modak e piny nowe neno jomoko kaka jodak? Wanyalo bedo gadier ni mano biro timore. Kata mana sani, Joneno mag Jehova ok ne jomoko mana kaka jodak. Kuom ranyisi, nyocha machiegni, moko kuom ofise matindo ne oriw e bwo ofise moko manie pinje mamoko. Ne otim kamano mondo omi tij lando wach maber mar Pinyruoth obed mayot kaka nyalore. (Math. 24:14) Parogo ne ong’ad maok odew chal mar tong’ mag pinje mak mana ka chik moro mar sirkal ema ne dwaro kamano. Yesu Kristo, ma en Ruoth mar Pinyruodh Nyasaye, konyo Joneno mag Jehova mondo kik ginyis akwede nikech tong’ mag pinje. E kinde mokayo machiegni, Yesu Kristo biro golo tong’ mag pinje duto e kinde ‘lochne’!—Fwe. 6:2.
19. Ang’o ma Joneno mag Jehova osetimo nikech ng’eyo adiera mar Wach Nyasaye?
19 Joneno mag Jehova wuok e pinje mang’eny kendo wacho dhok mopogore opogore. Kata kamano, adiera mayudore e Wach Nyasaye oriwogi, kendo onge gimoro amora ma nokel pogruok e kindgi. (Som Zefania 3:9.) Gin ei riwruok achiel mar owete e piny mangima. Kata obedo ni gie sani chunogi ni gidag e piny marachni, ok gibed mag pinyni. Bedo ni sani gin e riwruok mar owete nyiso gadier ni e piny manyien, onge ng’at ma nobed jadak. Kae to ng’ato ka ng’ato ma nodag e piny e kindeno, biro neno jo mowuok e pinje mamoko koda dhoudi mopogore opogore kaka owetegi.
[Penjo mag Puonjruok]
[Picha e ite mar 24]
[Picha e ite mar 25]
Be ibiro siko kigeno neno kaka singo mag Nyasaye chopo, mana kaka Ibrahim notimo?
[Picha e ite mar 27]
Jehova ok ne ng’ato ang’ata moa e piny machielo kaka jadak
[Blab e ite mar 28]
Be in gi siso mar dak e piny maonge gi tong’ kendo maonge ng’at mineno kaka jadak moa e piny machielo?
