Tang’ Kik Iti gi Muma Kaka Bilo

‘WACH Nyasaye ngima, kendo tiyo.’ (Hib. 4:​12) Mago e weche ma jaote Paulo notiyogo konyiso kaka wach Nyasaye nigi teko mar mulo chuny dhano kendo loko kit ngima ji.

Kata obedo ni weche manie Muma nigi teko kamano, puonjno ne onjaw kane jopuonj mag miriambo osieko bang’ tho joote. (2 Pet. 2:​1-3) Bang’ kinde, jotelo mag kanise nochako puonjo ni Muma inyalo tigo kaka bilo. Profesa moro miluongo ni Harry Y. Gamble, nondiko ni ji “tiyo gi ndiko mag Jokristo kaka bilo.” Profesano nonyiso kaka e higini mag 200, Origen ma ne en jatend kanisa, nokelo paro moro kowacho ni “winjo kisomo wach Nyasaye nyalo kelo gweth moko: to ka weche miwacho gi ajuoga nigi teko, to kare wach Nyasaye mondiki nigi teko moloyo.” Jatelo machielo miluongo ni John Chrysostom ma nodak e higini mag 300 nondiko ni “jachien ok nyal sudo machiegni gi ot moro amora ma Muma nitie.” Nomedo wacho ni jomoko ne liero otese moting’o wach Nyasaye e ng’utgi ka ginenogi kaka bilo ma nigi teko. Profesa Gamble medo wacho ni Augustine ma ne en japuonj mar Jo-Katholik bende “ne oyie ni owinjore ahinya sama ng’ato wiye baro, to oyaw Muma e Injili mar Johana kae to oket e bwo pilo motenogo wiye sama onindo”! Omiyo ndiko mag Muma ne itiyogo kaka bilo. Be owinjore ine Muma kaka bilo, kata nene kaka gimoro makeloni hawi maber, kata manyalo geng’i kik gik maricho timoreni?

Tim machielo mitiyoe gi Muma e yo marach, en tim miluongo ni bibliomancy. Mano en tim mane? En tim mar elo kamoro ei Muma, kae to ng’ato somo ndiko ma wang’e okwongo romogo kogeno ni ndikono ema biro taye kata nyise gima onego otim. Profesa Gamble nomedo wacho ni kinde moro kane Augustine owinjo dwond nyathi modak machiegni kode kawacho ni: “Kaw isom, kaw isom,” Augustine nokawo ni mano ne en dwond Nyasaye ma ne nyise mondo oyaw Muma osom ndiko ma wang’e ne dhi kwongo romogo.

Be isewinjo jomoko ma ka nie chandruok moro, to gilemo kae to gikawo Muma, gielo kamoro dichiel, to ndiko ma gikwongo rodhnogo, ema gisomo ka giparo ni biro konyogi nyagruok gi chandruogno? Kata obedo ni samoro gitimo kamano gi chuny maler, mano ok e kaka Jokristo onego omany kony koa e Ndiko.

Yesu nosingo ne jolupne ni ne odhi oronegi ‘jakony, ma en roho maler.’ Ne odhi nyime wachonegi niya: ‘Enopuonju weche duto, kendo noparnu duto ma nawachonu.’ (Joh. 14:26) Mopogore gi mano, kodok korka bibliomancy, ok ochuno ni ng’ato obed gi lony e wi Ndiko.

Yawo Muma apoya koda timbe mamoko mitiyoe gi Muma e yo machalo kamano, osenya ahinya. Kata kamano, Wach Nyasaye kwedo timbe juok moriwo nyaka bilo. (Lawi 19:26; Rapar 18:​9-​12; Tich 19:19) En adier ni ‘wach Nyasaye ngima, kendo tiyo,’ to mak mana ni nyaka wabed gi lony e tiyo gi Muma. Bedo gi ng’eyo makare mowuok e Muma, maok wati gi Muma kaka bilo, osekonyo ngima ji ahinya. Bedo gi ng’eyo makare kamano osekonyo ji mang’eny onyag timbe mabeyo, owe dak e ngima mar anjawo, kendo bedo gi ngima maber mar joot, kendo bedo gi winjruok maber gi Nyasaye ma nondiko Muma.

[Picha e ite mar 3]