MANO gima “wich ok nowilgo!” Kamano e kaka jomoko nowacho e wi sinema miluongo ni “Creation Drama.” Ne olose e kinde mowinjore kendo nomulo chuny ji ahinya. Ka kuom adier, sinema mar “Creation Drama” nochiwo neno e okang’ malach komiyo Jehova pak kodong’ kinde matin to loch mar Hitler chako kelo ne oganda Nyasaye modak Ulaya sand mager. Kata kamano “Creation Drama” ne en ang’o?

E higa mar 1914 ofis maduong’ mar oganda Jehova man Brooklyn, New York, Amerka, nogolo sinema miluongo ni “Photo-Drama of Creation.” Ne en sinema makawo seche aboro, kendo ma nigi piche mag rangi kod dwol. Dhano tara gi tara e piny mangima noneno sinema mar “Photo-Drama.” Drama moro machuok miluongo ni “Eureka Drama” bende nogol e higa 1914. Kata kamano e higini mag 1920, gige nyiso sinemano ne oti maok ne ginyal konyo ahinya. Kata kamano ji mang’eny to pod ne dwaro neno “Photo-Drama.” Kuom ranyisi, joma nodak e dala mar Ludwigsburg, e piny Jerman, ne japenjo niya, “Ubiro nyiso ji sinema mar Photo-Drama’ karang’o kendo?” Ang’o mane inyalo tim?

Mondo mi ne gimed nyiso ji Drama e higni mag 1920, owete ma ne tayo Bethel ma Magdeburg e piny Jerman, nonyiewo gige nyiso sinema kowuok kuom riwruok moro man Paris e piny Faransa, to moko ne gigolo e kembe man Leipzig kod Dresden. Ne gikiko gik manyien-go kaachiel gi mamoko machon mapod ne inyalo tiyogo e nyiso “Photo-Drama.”

Owadwa Erich Frost, ma ne olony ahinya e weche mag thum, noloso thum mane wer ei sinema seche ma inyiso piche. Weche mane otigo ei sinemago moko ne ogol e bugwa mar Creation. Mano e momiyo sinema manyien mar “Photo-Drama” ma ne otimne lokruok ne omi nying manyien ni “Creation Drama.”

Drama manyienni bende ne kawo seche aboro mana kaka “Photo-Drama” kendo ne inyise e kidienje mopogore opogore moro bang’ machielo. Nochiwo weche matut e wi odiechienge mag chwech kendo poro gima Muma wacho e wi chwech kod gik ma sigendini mag jopiny wacho, kendo keto maler ni dinde mag mirambo osewuondo ji. Sinema mar “Creation Drama” ne onyis e pinje mag Austria, Jerman, Luxemburg, kod Switzerland, koda ne joma wacho dho-Jerman modak e pinje moko.

Erich Frost wacho kama: “Kinde duto kane wadhi nyiso ji Drama, ne ajajiwo jowetena, to ahinya wuon joma ne gocho e okestra mondo seche ma ochung sinema matin kiwilo machielo, to  giwuoth e kind jowinjo ka gipogogi bugewa mabeyogi. Kuom timo kamano ne wapogo buge mang’eny moloyo kaka dine wachiwogi ot ka ot.” Johannes Rauthe, ma ne chano kaka inyiso sinemani e piny Poland koda e piny masani iluongo ni Czech Republic, paro kaka ji mang’eny ne weyonegi adres maggi mondo gibi gitudre kodgi bang’e. Adresego ne keto mise maber chuth mar dok timo limbe ma nigi nyak.

E higini mag 1930, ji ne pong’o kuonde mane inyisoe sinema mar “Creation Drama” kendo ji ne wuoyo e wi Joneno mag Jehova e taon mangima. Kane ochopo 1933, chiegni ji milion achiel noyudo oseneno sinema ma ofiswa man Jerman ne ochano. Käthe Krauss wacho kama: “Pile ka pile kuom odiechienge abich, ne wawuotho kilomita 10 (mael 6) dhi kende, ka wakalo bunge, gode, koda aoche mana mondo mi wane Dramano.” Nyaminwa moro miluongo ni Else Billharz wacho kama: “Sinema mar ‘Creation Drama’ noketona mise maber mar hero adiera.”

Alfred Almendinger wacho ni kane min-gi oneno Dramano, “nobedo mamor ahinya ma onyiewo Muma mondo omany kama ondikie ni ‘purgatori’ ei Muma.” To nikech ne ok oneno kamoro amora mondik kamano e Muma, mano nomiyo oweyo dhi e kanisa ma ne olemoe chon, mi bang’e ne obatise kaka Janeno. Erich Frost wacho kama: “Ji mang’eny nobiro e adiera nikech sinema mar ‘Creation Drama.’ ”​​—⁠3 Joh. 1-3.

Kinde ma koro sinema mar “Creation Drama” ne chopo e ng’iende, mano e kinde ma chama mar Jo-Nazi bende ne yudo ji mang’eny ma riwe lwedo e piny Ulaya kendo kelo tungni. Chakre higa mar 1933, tije mag Joneno e piny Jerman ne ogo marfuk. Chakre kindeno nyaka giko lweny mar ariyo e higa 1945, Joneno ma Ulaya noyudo sand malit. Erich Frost notieko chiegni higini aboro e jela. Kata kamano nowuok mi bang’e otiyo e Bethel man Wiesbaden, e piny Jerman. Mano kaka ne en gima ber ni sinema mar “Creation Drama” nobiro e kinde mowinjore mondo mi oteg Jokristo mang’eny mane chiegni yudo tem mar yiegi e kinde Lweny mar Ariyo mar Piny!​​—⁠Moa e giwa machon e piny Jerman.