Gima duong’ manyalo konyowa nyagore gi tuwo, en hoch mwayudo kowuok kuom joodwa, osiepewa, kod owetewa.

Weche mang’won mowuok kuom osiepni nyalo chalo gi mor kich mamit kendo mathietho. (Nge. 16:24; 18:24; 25:11) Kata kamano, Jokristo madier ok rit mana ni mondo gin ema obi ohogi. Gikawo okang’ mokwongo mondo ‘kuom hoch ma Nyasaye hoyogigo, gin bende giho jogo ma neno masira moro.’ (2 Kor. 1:4; Luka 6:31) Ma e gima notimore ne Antonio, ma ne en jarit malworo e distrikt e piny Mexico.

Kane Antonio oyud gi tuwo mar kansa mar remo miluongo ni lymphoma, chunye nochako chandore. Kata kamano pod norianore ka dichwo mondo kik paro maricho oloye. Notimo mano nade? Nojawero wende mag pinyruoth maok ong’i buk kendo kotemo paro weche manie wendego e yo matut. Lemo gi dwol maduong’ kaachiel gi somo Muma bende nohoye ahinya.

Bang’e Antonio nofwenyo ni kony maduong’ ma noyudo, noa kuom Jokristo wetene. Owacho kama: “E kinde ma an gi jaoda ne wawinjo ka chunywa nyosore, ne wajokwayo jaduong’ kanyakla moro ma en watwa mondo obi olemnwa. Mano nohoyowa kendo nomiyo wabedo gi kuwe e chunywa.” Omedo wacho kama, “Wagoyo erokamano ne joodwa kaachiel gi owetewa ma jokristo kuom kony mane gimiyowa, nikech kuom thuolo matin kende ne wabedo gi paro makare.” Mano kaka nomor bedo gi osiepe ma johera kendo madewe gadier!

Kony machielo ma nitie e kinde mag chandruok en roho maler. Jaote Petro nowacho ni roho maler en mich ma Nyasaye “chiwo.” (Tich 2:38) Mano notimore chieng’ Pentekost higa 33 kane roho maler ool kuom ji mang’eny. Kata kamano roho maler en mich ma Nyasaye miyowa waduto. Ma en mich ma Nyasaye chiwo maonge gikone, omiyo ber wakwaye maok waluor mondo omedwa rohono.—Isa. 40:28-31.

Jaote Paulo nonano e bwo chandruoge mang’eny kendo kinde moro notony e lak tho. (2 Kor. 1:8-10) Kata kamano wach tho ok ne lichne Paulo ahinya. Gima ne hoye en ni nong’eyo ni Nyasaye nikode. Nondiko kama: “Opak Nyasaye ma Wuon Ruodhwa Yesu Kristo, Wuon ng’wono, kendo Nyasach hoch duto. Ohoyowa e masiche duto.” (2 Kor. 1:3, 4) Paulo ok noweyo mondo chandruoge mane oyudo onyos chunye. Kar mano, chandruogego nokonye bedo gi chuny mar hero owete kendo nonyalo miyogi hoch mane dwarore e kinde mane gin e chandruok.

Bang’ kane Antonio osechango, nodok e tije mar jarit malworo. Kane pok tuwo ogoyo Antonio, ne en ng’ama ohero owete to bang’ tuwono, en kaachiel gi jaode koro ne gidewo owete e yo makende ka gilimo jomatuwo kendo jiwogi. Kuom ranyisi, bang’ limo Jakristo moro ma ne nyagore gi tuwo moro marach, Antonio nofwenyo ni owadwano ne ok dwar dhi e chokruoge. Antonio wacho kama: “Ok ni owadwani ok nohero Jehova kata owete, to en mana ni tuwono nonyoso chunye ahinya makoro obedo gi paro ni en ng’ama nono.”

Gimoro achiel ma Antonio notimo mondo ojiwgo owadwa matuwono, ne en kwaye mondo ochiw lamo e nyasi moro ma ne gintie. Kata obedo ni owadwano ne neno ni ok oromo lemo e nyim ji, ne oyie timo kamano. Antonio wacho ni: “Ne ochiwo lamo e yo maber, ma bang’e owinjo ka en gi pogruok ahinya. Chakre kanyo, nochako winjo ni kare ok en ng’ama nono.”

Kuom adier, waduto wanyalo bedo ni wasekalo e chandruoge machalo gi mago. To mana kaka Paulo nowacho, chandruoge mwasekaloego nyalo konyowa ng’eyo kaka onego waho jomoko e kinde ma gin bende gin gi chandruok. Omiyo, weuru wabed moikre neno kendo konyo Jokristo wetewa sama gikalo e chandruok moro, kwaluwo ranyisi mar Nyasachwa Jehova, ka wabedo joma chiwo hoch ne jomoko.