Tarik 5 dwe mar ochiko e higa 2012, ma ne en chieng’ Tich Adek, ne oland e Bethel ma Amerka kod Kanada ni nitie owadwa mobedo jakanyo manyien mar Bura Maduong’ mar Joneno mag Jehova. Owadwano iluongo ni Mark Sanderson, kendo nochako tiyo kaka jakanyo mar Bura Maduong’ tarik 1 dwe mar ochiko higa 2012.

Owadwa Sanderson nodak gi jonyulne e provins miluongo ni San Diego, California, e piny Amerka kendo nobatise tarik 9 dwe mar ariyo, e higa 1975. Nochako tij painia tarik 1 dwe mar ochiko e higa 1983 kama iluongo ni Saskatchewan, e piny Kanada. E dwe mar apar gariyo e higa 1990, notieko tiegruok e Skul mar Tiego Owete ne Tije Kanyakla (masani iluongo ni Skund Muma ne Owete Maok Nie Kend). Mano ne en klas mar abiriyo ma ne otim Amerka. Owadwa Sanderson noket pania makende e dwe mar ang’wen e higa mar 1991 e chula mar Newfoundland, Kanada. Bang’ bedo jarit-alwora makonyo, ne ogwele mondo obed achiel kuom jood Bethel ma Kanada e dwe mar ariyo e higa mar 1997. E dwe mar apar gachiel e higa mar 2000, ne oluonge e Bethel ma Amerka mondo oti e Migawo mar Weche Osiptal (Hospital Information Services) kae to bang’e notiyo e Migawo Mochung’ne Tije Lendo (Service Department).

E dwe mar ochiko e higa 2008, Owadwa Sanderson ne odhi e Skul mar Jokomiti Matayo Bad Ofis kae to bang’e ne okete kaka achiel kuom jakanyo mar Komiti Matayo Bad Ofis ma Philippines. E dwe mar ochiko e higa 2010, ne oluonge kendo e Bethel ma Amerka mondo obed jakony e Komiti mar Lendo manie bwo Bura Maduong’.