Donge inyalo yie ni kuom ji duto mosedak e pinyni, Yesu ema ne en Japuonj maduong’ie moloyo? Samoro nyalo bedo ni isegatemo luwo yore ma notiyogo e puonjo, machalo kaka tiyo gi penjo, ranyisi koda ngeche. Kata kamano be isegang’eyo ni kinde mang’eny bende nojatiyo gi yo machielo mar pimo weche ariyo mopogore kolero gimowinjore jowinjo otim?

Ji mang’eny jatiyoga gi yorno sama gigoyo mbaka. Nyalo bet ni in bende isetiyo gi yorno to ikiya. Samoro isegawacho kama, “Giwacho ni olemogi duto osechiek to magi to pod numu.” Kata ni, “Nyakoni chon ne oluoro wang’ ji kata kamano tinde to ogo mbaka gi ji maber.”

Sama itiyo gi yorni e puonjo, dwarore mokwongo ni iwach wach moro kae to iwacho machielo mopogore kode kichako gi weche machalo kaka kata kamano, to, komachielo, kata obedo ni, gi mamoko. Seche moko bende kidwaro tiyo gi yorni, nyalo dwarore ni iti gi weche momedore mondo iler wachno. Kitimo kamano ibiro konyo jowinjo mondo owinj tiend wach miwacho.

Kata obedo ni ok yot tiyo gi weche ariyo mopogore e dhok mamoko kilero wach moro, ber mondo wang’e ni mano en yo maber ahinya mar puonjo. Nikech ang’o? Nikech oti kode ahinya e Wach Nyasaye ma en Muma. Kinde mang’eny Yesu ne ohero pimo weche ariyo mopogore kopuonjo. Ranyisi moko gin magi: “Ji ok mok taya, kendo ume gi atonga, to gikete e rachung taya.” “Kik upar ni nabiro mondo agony Chik kata weche mag Jonabi; ok nabiro mondo agonygi, to mondo achopgi.” “Usewinjo ka nowachi ni, ‘kik iterri.’ An to awachonu ni, ng’ato ka ng’ato mong’iyo dhako. . . ” “Usewinjo ka nowachi ni, ‘Wang’ kar wang’, kendo lak kar lak.’ An to, awachonu ni, kik utam ng’at marach; to ng’atno ma thalo lembi ma korachwich, lokne machielo bende.”—Math. 5:15, 17, 27, 28, 38, 39.

Ei buge mamoko mag Muma bende inyalo yudo weche moko motigo e pimo weche ariyo mopogore. Ginyalo konyi winjo tiend gimiwacho kata ginyalo konyi e winjo maber tiend wach mokwongo e weche ariyo mipimogo. Kapo ni in janyuol, tem ane paro matut kuom weche ariyo mipimogi: “Un wuone, kik umi mirima mako nyithindu, to upidhgi kurieyogi kendo puonjogi kuom Ruoth.” (Efe. 6:4) Ka dine Paulo ndik andika ni wuoro (kata miyo) onego opidh nyithindgi ka girieyogi kendo puonjogi kuom Ruoth, pod dine owacho gimadier kendo makare. Kata kamano, weche ma notiyogo nomiyo wachno owinjore maber nyowuoyo. To mano en nikech notiyo gi wechegi “kik umi mirima mako nyithindu, to upidhgi kurieyogi kendo puonjogi kuom Ruoth.”

E sula mar auchiel nogo, Paulo nowacho kama: “Nikech wasikwa mwakedogo ok gin ringruok gi remo, to wakedo kod . . . lang chuny maricho ma ok mag pinyni.” (Efe. 6:12) Weche ariyo mopimgo miyo wawinjo e yo maler kaka wan gi lweny maratego. Ok wago lweny gi  dhano adhana, to kar mano wan gi lweny kod chwech maricho mag roho ma ok ne.

Ei bug Jo Efeso, ibiro yudo weche mamoko ma Paulo notiyogo e pimo weche ariyo mopogore. Paro matut kuom wechego biro konyowa waduto mondo wawinj tiend gima Paulo ne puonjo, kendo yango maler okang’ mowinjore wakaw.

Ibiro yudo ka en gima konyo ahinya ka inono chat manie sulani mawuoyo kuom weche mopogore opogore mipimo kaka giyudore e bug Jo Efeso sula mar 4 kod 5. Sama isomo moro ka moro kuom wechego, par matut kuom ngimani. Kendo ipenjri kama: ‘Ka kuom adier, kita chalo nade? Anyalo timo ang’o, ka weche machalo gi magi oyuda? Kuom weche ariyo mopogoregi ji nyalo wacho ni an kon mane?’ Kapo ni inonori ma iyudo ni kuom weche mopogorego nitie moro ma dwarore ni itimie lokruok, to tim kamano. We mondo weche manyiso pogruok okonyi.

Kihero bende inyalo tiyo gi chat manie sulani e timogo lamo mar joot. Mokwongo, joot duto nyalo somo weche manie chatno. Bang’ mano, achiel kuomu nyalo wacho weche mondik e bat koracham kae to oweyo bathe modong’no mondo joot mamoko otemane paro gi wigi. Mano nyalo miyo ubed gi lamo mar joot mamorou kendo ng’eyo kaka unyalo tiyo gi puonj mayudore e ndiko manie bat korachwichgo. En adier ni ka wanonore e yo machalo kamano ka watiyo gi weche manie chatno, biro konyowa waduto, bed ni wan joma tindo kata madongo mondo wabed gi kido mag Jakristo e odwa kata kamoro amora ma wantie.

Kapo ni ing’eyo ber mar tiyo gi weche ariyo mopogore e puonjo, ibiro fwenyogi e yo mayot kaka oti kodgi e Muma, kendo ibiro fwenyo ni gikonyowa ahinya e tijwa mar lendo. Kuom ranyisi, inyalo wachone wuon ot kama: “Ji mang’eny wacho ni ng’ato ka ng’ato nigi chuny ma ok tho, kata kamano nee gima Wach Nyasaye wacho kae.” Kata sama itayo puonjruok mar Muma inyalo penjo japuonjre kama: “Ji mang’eny e gweng’ni paro ni Nyasaye gi Yesu en ng’ato achiel; kata kamano, wayudo ni Muma to puonjo wachno nade? To in to iparo ang’o kuom wachno?”

En adier ni Muma miyowa puonj mang’eny kotiyo gi weche mopogore mipimo gi wadgi mondo mi wadag kaka Nyasaye dwaro. Kendo wanyalo tiyo gi yorno bende e konyo jomoko mondo ong’e adiera manie Muma.