Sinema moro miluongo ni A Trip Down Market Street chako gi nyiso piche mopogore opogore mabeyo mamako pach ji. Onyiso kaka ngima ne chalo e taon mar San Francisco manie piny Amerka e higini mag 1900. Jolos sinemano nomako pichego ka gitiyo gi kamera mong’aw malo e wi waya kendo maringo kochomore gi ndara maduong’ manie taondno. Piche mag sinemano ne nyiso geche miywayo gi farese, mtokni machon, jouso koda jonyiepo madhi nyime gi tijegi mapile.

Gima miyo sinemani kelo kuyo madier, en nikech ne olose e dwe mar April higa 1906 mana kodong’ odiechienge matin to yiengni piny koda masira mar mach timore April 18. Masichego nonego dhano alufe kendo nochiegni ketho chuth bath taon maduong’no. Nyakabed ni joma ne onyis e sinemano ka nigi mor, ne dhi bedo mangima mana kuom odiechienge matin kende. Scott Miles, ma en achiel kuom nyikwa joma noloso sinemano wacho kama: “Kang’iyo joma nie sinemano, awinjo malit e chunya nikech ok ne ging’eyo ni masira moro ne chiegni yudogi apoya.”

Masira machalo gi mano chiegni timore e ndalowagi. Wan bende wanyalo winjo malit e chunywa ne joma wadakgo machiegni. Gidhi nyime gi ngimagi mapile maok ging’eyo ni masira moro ochomogi nyime kae. Ok ging’eyo ni kethruok mar piny marachni osekayo machiegni. Mopogore gi masira mar yiengni piny majabiro apoya, sani pod wan-gi thuolo machwok mwanyalo tiyogo e chiwo siem ne joma odak e alworawa e wi odiechieng Jehova mobiro ng’adoe bura ne ji duto. En adier ni nyalo bedo ni iketo tenge thuolo moro mar lendo ne ji ot ka ot. Kata kamano, be inyalo timo mathoth moloyo kaka itimo sani mondo imed chiwo siem ne ji?

Yesu noketonwa ranyisi maber nimar kinde duto notiyo gi thuolone e chiwo siem ne ji maok oweyo. Nolendo ne ng’ato ang’ata ma noromogo, obed jasol osuru ma noromogo e ndara, kata dhako ma noromogo ka umbo pi. (Luka 19:​1-5; Joh. 4:​5-​10, 21-​24) Kata e thuolo ma noketo mag yweyo, pod nonyalo weyo luwo chenro mage mondo opuonj jomoko. Hera ma noherogo ji ema nomiyo opuonjogi gik mang’eny. (Mari. 6:​30-​34) Wanyalo luwo nade ranyisi mar Yesu mar lendo ne ji e kindewagi?

Melika odak e ot kama omi rit makende ahinya. Toth jo modak machiegni kode gin nyithind skul  mawuok e pinje mamoko to nembni mag simbegi ok ochan e buk michanoe nembe mag simu mag joma odak kanyo. Kata kamano pod otiyo gi thuolo moro amora moyudo mondo olendne joma odak kanyo sama giidho lift kata ka gin kar rwako welo. Owacho niya, “An akawo ni kuondego e alwora mara mar lendo.” Melika ohero ting’o bugewa koda trakt gi gasede mogo e dhok mopogore opogore, kendo ji mang’eny jokawogi. Bende ojanyisogi kama Websait marwa mar jw.org yudoree. Timo kamano osemiyo ochako puonjore Muma gi jomoko.

Sonia bende ohero lendo ne ng’ata ang’ata manyalo yie chikone ite. Otiyo e klinik mar laktar moro, kendo otemo matek mondo olend ne ng’ato ang’ata ma gitiyogo. Mokwongo nokawo thuolo mondo ong’e chal mar jotich wetenego. Kae to, ne otiyo gi thuolone seche mag chiemo mondo olendne ng’ato ka ng’ato ka ni kar kende. Kuom timo kamano, Sonia nochako puonjore Muma gi ji ariyo. Ochano mar tiyo gi thuolone moko mondo olendne joma obiro e klinik to pod obet karito neno laktar.

Achiel kuom joma ne otony e masira mar yiengni piny e higa 1906, nowacho kama: “Mano ne en masira marachie moloyo ma ne pok otimore e taon moro amora.” Kata kamano, masira mabiro yudo “jo ma dagi ng’eyo Nyasaye,” to nobed maduong’ kendo malich miwuoro. (2 Thes. 1:8) Jehova gombo ahinya ni ji otim lokruok e pachgi koda chunygi, mondo giwinj siem ma Joneno mage chiwo.​—⁠2 Pet. 3:​9; Fwe. 14:​6, 7.

In gi thuolo majaber mar yawo wang’ ji one kinde mabiro kendo konyogi mondo gitim lokruok giwe luwo gombogi giwegi to gimany Jehova. (Zef. 2:​2, 3) Be inyalo tiyo gi thuolo moro amora miyudo mondo ilend ne jotich wadu, joma odak e alworau, koda jogo ma ijaromogo sama idhi e yoreni mapile? Be inyalo medo timo mathoth mondo ichiw siem ne ji?