1, 2. Ang’o momiyo miriambo tinde onya ahinya e piny, to ilandogi e yore mage? (Ne picha manie chak sulani.)

WACHO miriambo, kaachiel gi timbe mag wuond tinde onya ahinya e piny masani. Mano ok onego okawwa gi wuoro. Muma nyiso maler ni Satan Jachien nigi lony mamalo e wuondo ji kendo en e jaloch mar pinyni. (1 Tim. 2:14; 1 Joh. 5:19) Kaka wamedo sudo machiegni gi giko mar piny marachni, e kaka Satan bende medo bedo gi mirima nikech ong’eyo ni “ndalone tin.” (Fwe. 12:12) Omiyo en adier ni jogo ma Satan chiko, biro medo wacho miriambo to ahinya wuon e wi Joneno mag Jehova.

² Kinde ka kinde redio gi televison jowacho miriambo manenore ayanga e wi jotich Jehova koda yie margi. Weche mindiko e gasede, program minyiso e televison koda Websait moko manie Intanet itiyogo e wacho miriambo kuom jotich Jehova. Nikech mano, jomoko yie gi miriambogo kapok ginono adiera mag wechego.

3. Ang’o manyalo konyowa mondo kik wuondwa?

³ Kata kamano, mondo okonywa kwedo riekni ma Satan tiyogo e nyoso chunywa, wamor ni wan gi Wach Nyasaye ma “konyo . . . kuom rieyo ji.” (2 Tim. 3:16) Dwarore ahinya mondo wang’e ni kaluwore gi gima jaote Paulo nondiko ne Jokristo man Thessalonika, moko kuomgi noyudo osewuondi ma oyie gi miriambo. Nojiwogi ni ‘kik giyie ng’ato ochoch pachgi e yo mayot.’ (2 Thes. 2:1, 2, NW) Gin puonj mage mwanyalo yudo kuom weche ma Paulo nojiwogo Jokristogo, to wanyalo tiyo nade gi wechego ndalowagi?

4. Ne okony nade Jokristo ma Thessalonika mondo oikre ne ‘odiechiengno mar Jehova,’ to wan ikonyowa nade mondo waikre ne odiechiengno?

⁴ E barua ma nokwongo ndiko ne kanyakla mar Thessalonika, Paulo noparonegi wach ‘odiechiengno  mar Jehova.’ Ne ok odwar ni owetene obed e mudho kendo maok giikore. Nojiwogi ni kaka “nyithind ler” gibed ‘ka gineno kendo ka giritore maber.’ (Som 1 Jo Thessalonika 5:1-6.) E kindewagi, warito neno kethruok mar Babulon Maduong’, ma en riwruok mar dinde duto mag miriambo. Kethruokno ema biro bedo chakruok mar odiechieng’ maduong’ mar Jehova. Wamor ni wamedo ng’eyo kaka Jehova chopo dwache. E wi mano, kokalo kuom kanyakla, kinde ka kinde iparonwa gik manyalo konyowa mondo wabed moikore ne odiechieng Jehova. Ka wachiko itwa malong’o ne siem misiko inwoyonwa, wanyalo medo chung’ motegno ka wadhi nyime “pogo e kind gik mabeyo kod gik maricho.”—Hib. 5:14.

5, 6. (a) En wach mane ma Paulo nowuoyoe e barua mar ariyo ma ne ondiko ne Jo-Thessalonika? (b) En ang’o ma Nyasaye chiegni timo kokalo kuom Yesu, to gin penjo mage monego wapenjre?

⁵ Mapiyo bang’ kane Paulo oseoro barupe mokwongo ne Jo-Thessalonika, nooronegi kendo barua mar ariyo. Ei baruano, nowuoyo e wi masira ma ne dhi timore ka Ruoth Yesu okawo okang’ ne “jo ma dagi ng’eyo Nyasaye, kendo ni jo ma ok oyie winjo Wach Maber.” (2 Thes. 1:6-8) Weche manie sula mar 2 ei baruani, fwenyonwa ni jomoko ei kanyaklano ne siko ‘bwogore’ nikech luoro ka ne giwinjo ni odiechieng Jehova okayo machiegni. (Som 2 Jo Thessalonika 2:1, 2.) Jokristo machon-go nong’eyo mana e okang’ matin dwach Jehova ma ne oelo mosmos ne jotichne. Mano ne en adier nikech bang’e Paulo nowacho kama: “Wang’eyo morem, kendo wahulo wach morem; to ka mano mogik kare obiro, eka mano morem norum.” (1 Kor. 13:9, 10) Kata kamano, ne ginyalo dhi nyime bedo gi yie motegno kuom winjo siem ma Paulo, jaote Petro, kaachiel gi jotich Nyasaye mamoko mowal kuom roho ne miyogi.

⁶ Mondo orie pach Jokristogo, Paulo nolero kotelne gi roho maler ni ng’anyo maduong’ ne dhi timore ma jomoko we puonj madier mag Kristo, kendo ni “dhano ma chayo chik” ne dhi fwenyore kapok odiechieng Jehova ochopo. *  Bang’ mano, Ruoth Yesu ne dhi ‘tieko’ jogo duto moseweyo luwo adiera. Jaote Paulo nowacho ni ne gidhi yudo kumno nikech ne “gidagi hero adiera.” (2 Thes. 2:3, 8-10) Ber mondo ng’ato ka ng’ato openjre niya: ‘Ahero adiera e okang’ maromo nade? Be ajasomo gasedewa duto kaachiel gi bugewa mamoko malero Muma mondo abed molony gi adiera mag Muma kaka imedo lernwagi e yo manyien e kanyakla duto mag jotich Nyasaye?’

7, 8. (a) Gin pek mage ma Jokristo mokwongo ne nyaka nyagrego? (b) En ang’o ma Jokristo nyaka tang’go ahinya e kindegi?

⁷ Mopogore gi puonj mag joma nong’anyo moweyo adiera, Jokristo ne dhi romo gi pek mamoko bende. Paulo nondiko ne Timotheo ni “hero pesa en chakruok mar richo duto.” Jaoteno nomedo jiwo ni ‘jomoko, kosegombo bedo jomwandu, gibaro giweyo yie, kendo gichwowo chunygi gi chandruoge mathoth.’ (1 Tim. 6:10) Pek machielo ne dhi bedo ‘timbe mag ringruok’.—Gal. 5:19-21.

⁸ Paulo nochiwo siem ne Jo-Thessalonika mondo obed motang’ gi joma noluongo ni “joote ma riasore.” Moko kuom jootego ne “puonjo weche ma ketho adiera, ni mondo giywago jopuonjre bang’gi.” (2 Kor. 11:4, 13; Tich 20:30) Bang’e, Yesu nopwoyo kanyakla mar Jo-Efeso nikech ne ‘ok ginyal yie gi jomaricho.’ Jo-Efeso ‘ne temo’ joma luongore ni joote, to ok gin joote nikech ne gin joma riambo. (Fwe. 2:2) E barua mar ariyo ma nondiko ne Jo-Thessalonika, Paulo nojiwogi kama: “Owetewa, wachikou e nying Ruodhwa, Yesu Kristo ni upogru kuom ng’a ma owadu ma budho nono ka ok oluw tim ma nuyudo kuomwa.” Kae to bang’e nowuoyo achiel kachiel e wi joma ne ‘ok dwar tich.’ (2 Thes. 3:6, 10) Kuom mano, ka Jokristogo nonego otang’ gi jonyawo maok dwar tich, donge mano nyiso ni nonego gitang’ ahinya bende gi owete ma nosechako ng’anyo kaweyo adiera? Ka kuom adier, bedo gi tudruok gi joma kamago ne nyalo miyo ng’ato oketh winjruokne gi Nyasaye, omiyo Jokristo ne nyaka tang’ kodgi. Kata mana wan bende e kindegi nyaka watang’ gi joma kamago.—Nge. 13:20.

9. Ang’o momiyo onego watang’ gi joma rwakowa e mbaka kuom gik ma giparo apara to Muma ok olero, kata joma wuoyo marach e wi jotich Nyasaye?

⁹ Nikech wamedo sudo machiegni gi masira maduong’ kaachiel gi giko mar pinyni, dwarore ni wachik itwa kendo waluw siem ma Jehova nochiwogo. Ok dwaher ni ‘wayud ng’wono mar Nyasaye kayiem nono’ kae to bang’e walal gweth mar yudo ngima mochwere e polo kata e piny kae. (2 Kor. 6:1) Kuom mano onego watang’ gi ng’ato ang’ata mobiro e chokruogewa to temo rwakowa e mbaka moko e wi gik moparo apara owuon to ok yudre e Muma, kata owuoyo marach e wi jodong-kanyakla kaachiel gi jotich Nyasaye mamoko.—2 Thes. 3:13-15.

10. Ne ojiw Jokristo ma nodak Thessalonika mondo omakre gi puonj mage?

¹⁰ Paulo nojiwo owetene ma ne ni Thessalonika ni ‘gichung’ matek’ kendo gimakre gi gik ma ne opuonjgi. (Som 2 Jo Thessalonika 2:15.) Gik ma ne ‘opuonjgi’ ne gin mage? Paulo ok ne wuo kuom puonj mayudore e dinde mag miriambo. Nowuoyo e wi puonj mag Yesu kaachiel gi weche ma en koda jomamoko ne gindiko e Muma  kotelnegi gi roho maler. Paulo nopwoyo owetene ma ne nie kanyakla man Korintho ka nondikonegi niya: “Upara e weche duto, kendo nikech umako matek puonjgo, kaka namiyougi.” (1 Kor. 11:2) Puonjgo ne gin minyalo gen nikech ne giwuok kuom joma Jehova ne tiyogo.

11. Ang’o manyalo timore ne jomoko kapo ni giyie mondo owuondgi?

¹¹ Ka nondiko ne Jo-Hibrania, Paulo nonyisogi yore ariyo manyalo miyo Jakristo oketh yie mare ma odog chien e winjruokne gi Nyasaye. (Som Jo Hibrania 2:1; 3:12.) Nowuoyo e wi ‘bayo yo’ kata ‘weyo Nyasaye mangima.’ Ok yot fwenyo sama yie sudo kende mos mos kowuok e dho wath. Onyalo medo sudo kamano ma odhi mabor. Kata kamano, ng’ato nyalo yiero mar dhiro yie mondo owuog e dho wath. Ranyisi ariyogo nyiso gimanyalo timore ka ng’ato oyie mondo owuonde, ma hera ma ne oherogo adiera mag Muma ochak dok chien.

12. Gin gik mage e kindegi manyalo ketho winjruokwa gi Nyasaye?

¹² Mano e gima nyalo bedo ni ne otimore ne Jokristo moko ma Thessalonika. Be gima kamano nyalo timorenwa e kindegi? Ee, nikech nitie gik mathoth manyalo mana kethonwa kinde. Par ane thuolo ma ji tiyogo sama gitudore gi jomoko e Intanet, gisomo kendo oro ote machuok e simo, kata nono weche manyien mag tuke. Gik machalo kaka magi, nyalo dwoko chien kinda ma ng’ato nigo. Ang’o manyalo timore? Ng’ato nyalo chako weyo wuoyo gi Nyasaye e lamo, weyo puonjruok Wach Nyasaye, kendo weyo dhi e chokruoge kaachiel gi tij lendo. Wanyalo timo ang’o mondo kik wawe gimoro amora ochoch pachwa e yo mayot?

13. Mana kaka nokor e Muma, ji mang’eny nigi chuny machalo nade, to ang’o manyalo konyowa mondo warit yie marwa?

¹³ Gimoro achiel monego waket e pachwa kinde duto en ni piny marachni ochiegni kethi kendo ni bedo gi osiepe maok dew ni wadak e “ndalo giko,” nyalo hinyowa. Jaote Petro nondiko e wi kinde mwadakiegi niya: “Jong’a wach nobi kod ng’ayi, ka giluwo gombogi giwegi, ka giwacho niya, ‘Ere singruok mar birone? Nikech nyaka ne nindo ter kwere, gik moko duto ochwere kaka ne gibet nyaka a chakruok mar chuech piny.’” (2 Pet. 3:3, 4) Somo Muma pile ka pile kendo timo puonjruok maok wabare biro paronwa kinde duto ni wadak e “ndalo giko.” Tim ng’anyo ne adiera ma ne okor nochako nenore chon kendo pod dhi nyime e kindewagi. “Dhano ma chayo chik” Nyasaye pod dhi nyime kwedo jotich Nyasaye. Kuom mano, wiwa ok onego owil kata matin ni odiechieng Jehova osekayo machiegni.—Zef. 1:7.

14. Bedo modich e tij lendo konyowa e yo mane?

¹⁴ Yo machielo manyalo konyowa mondo watang’ kik choch pachwa en kuom lando wach maber mar Pinyruoth. Kuom mano, kane Yesu Kristo, ma en e Wi kanyakla ogolo chik ne jolupne ni otim ogendini obed jopuonjrene ka gipuonjogi rito weche duto ma nochikogi, mano ne en chik ma ne dhi ritogi. (Math. 28:19, 20) Mondo omi wamak chikno, dwarore ni wabed gi kinda e tij lendo. Be iparo ni owetewa ma nodak Thessalonika ne lendo kendo puonjo ji gi kinda koso ne gilendo mana ka gichunorego? Wanyalo paro weche ma Paulo nonyisogi niya: “Kik usind roho tiyo. Kik ucha  weche mag jo ma hulo wach.” (1 Thes. 5:19, 20) Weche mokor ma wapuonjore e Muma kendo puonjo jomoko gin mamoro chunywa gadier.

15. Moko kuom gik mwanyalo tiegoree sama watimo lamo marwa mar joot gin kaka mage?

¹⁵ En adier ni wadwaro konyo joodwa mondo obed jomolony e tij lendo. Owete gi nyiminewa mang’eny konyo joodgi obed gi lony ma kamano, kuom tiyo gi thuolo moko sama gitimo lamo margi mar joot mondo gitiegre e yore mag lendo. Unyalo wuoyo kuom kaka ng’ato nyalo dok timo limbe. Ng’ato nyalo wacho ang’o sama odok timo limbe? Gin weche mage manyalo miyo weg udi molimgo omed dwaro ng’eyo mathoth? Gin seche kata kinde mage mowinjore dok timo limbe? Owete gi nyimine mang’eny bende tiyo gi thuolo moko mayudore sama gitimo lamo mar joot mondo giikre ne chokruoge. Be joodi nyalo temo timo ikruok ma kamago? Sama uchiwo paro e chokruoge, mano jiwo yie maru kendo konyou mondo ubed Jokristo motegno. (Zab. 35:18) Kuom adier, timo lamo mar joot biro konyowa bedo gadier kuom gik mwapuonjo mondo kik wabed gi kiawa kuom adiera mag Muma.

16. En ang’o majiwo Jokristo mowal mondo gisik maok ochoch pachgi?

¹⁶ Ka waparo kaka kuom higini mang’eny Jehova osebedo kagwedho joge omed ng’eyo tiend weche mokor e Muma, mano miyo wabedo gadier ni wabiro yudo mich majaber ahinya e kinde mabiro. Jokristo mowal nigi geno mar locho gi Kristo e polo. Genono miyo Jokristo mowalgo kwedo gimoro amora manyalo chocho pachgi ma giwe bedo gi yie kuom Jehova! Weche ma Paulo nondiko ne Jo-Thessalonika, bende nyalo tiyo kuom Jokristo mowal. Nondiko niya: “Onego wago ni Nyasaye erokamano pile nikech un, owetewa ma Ruoth ohero. Nimar Nyasaye noyierou . . . kopwodhou gi Roho, kendo kuyie adiera.”—2 Thes. 2:13.

17. En jip mane mwayudo e ndiko mar 2 Thessalonika 3:1-5?

¹⁷ Jokristo ma nigi geno mar yudo ngima mochwere e pinyka nyaka tem ahinya mondo gin bende gichung’ motegno maok ochoch pachgi. Kapo ni in gi geno mar dak e piny nyakachieng’, ne ane weche ma Paulo nondiko kojiwogo Jokristo wetene ma ne ni Thessalonika. (Som 2 Jo Thessalonika 3:1-5.) Waduto onego wadwok erokamano ahinya kuom weche mabeyo kendo majiwowa kaka mago. Kuom adier, barupe ma ne ondikne Jo-Thessalonika, chiwonwa siem mowinjore ahinya mondo kik wabed joma thoro wuoyo e wi gik mwaparo apara to Muma ok owacho ayanga. To nikech wadak machiegni gi giko, wamor ahinya kuom siem ma imiyowa.