Chandruoge mopogore opogore nyalo nyoso chunywa ahinya. Ginyalo lalo pachwa, dwoko tekowa chien, kendo miyo wachak neno ngima e yo mopogore. Ruoth Daudi noyudo chandruoge mang’eny. Nonyagore nade gi chandruogego? Nowacho kama e zaburi: “Aywak gi dwonda ni Jehova: gi dwonda asayo Jehova. Agolo ywakna e nyime; e nyime anyiso chandrwokna. Ka ne chunya ool, ning’eyo yora.” Ee, Daudi nokwayo Nyasaye e lamo mondo okonye.—Zab. 142:1-3.

Daudi bende nowero kama e zaburi machielo: “Wach achiel asekwayo Jehova, mano e ma nadwar; mondo adag e i od Jehova ndalo duto mag ngimana, ane ber maler mar Jehova, kendo apenj e i hekalune.” (Zab. 27:4) Daudi ne ok en Ja-Lawi, kata kamano, par ane kaka nyalo bedo ni ne ojachung’ e laru maler mar hekalu kama ne itimoe lamo madier. Nikech chuny Daudi nopong’ gi mor mogundho, mano emomiyo ne odwaro dak e hekalu ndalo duto mag ngimane mondo ‘one ber maler mar Jehova.’

Wach motigo ni “ber maler” otudore gi gima ng’ato “oyiego e chunye koda e pache.” Kinde duto Daudi nokawo mapek chenro mar lamo ma Nyasaye noketo. Omiyo wanyalo penjore kama, ‘Be an bende an gi paro ma Daudi ne nigo?’

E kindewagi, chenro ma Jehova oketo mar wuoyo kode ok otenore kuom hekalu moger. Kar mano, otenore kuom hekalu maduong’ mar ranyisi, tiende ni chenro maler moketi ne lamo madier. * Ka wan joma ‘neno’ kaka chenroni ber, wan bende wanyalo ‘neno ber maler mar Jehova.’

Par ane altar mar wang’o misango molos gi mula ma ne nie nyim dho tabernakel. (Wuok 38:1, 2; 40:6) Altarno ne nyiso ni Nyasaye ne dhi yie gi ngima Yesu ma ne idhi chiw mondo obed misango. (Hib. 10:5-10) Parie kaka mano konyowa! Jaote Paulo nondiko niya: “Ka ne pod wan wasik Nyasaye, noketwa wawinjore gi Nyasaye kuom tho mar Wuode.” (Rumi 5:10) Kuom keto yie e remb Yesu ma nochuer, wanyalo bedo osiepe Nyasaye moyiego kendo mogeno. To nikech mano, wabedo ‘osiepe Jehova.’—Zab. 25:14, The Bible in Luo, 1976.

To nikech ‘richowa osewany,’ wabedo gi ‘ndalo mag duogo chuny’ kowuok kuom Jehova. (Tich 3:19, 20) Wachalo gi ng’at motwe e jela maloko chunye kendo weyo timbene maricho to pod orito chieng’ minegee mondo ochop. Bang’ neno kaka ng’atno oloko chunye, jang’ad bura ma en ng’at mang’won rucho ketho duto mag ng’atno kendo ogolo kuome buch tho. Mano kaka ng’atno bedo mamor e chunye! Mana kaka jang’ad burano, Jehova nyiso ng’wono ne jogo moloko chunygi kendo ogolo kuomgi buch tho.

Moko kuom gik ma ne timore e lamo madier ma Daudi ne nyalo neno sama odhi e od Jehova, ne gin oganda maduong’ mar Jo-Israel mochokore kawinjo kisomo kendo ilero Chik e lela, wang’o ubani, kendo neno kaka jodolo gi Jo-Lawi ne timo migepegi. (Wuok 30:34-38;  Kwan 3:5-8; Rapar 31:9-12) Gik ma Jo-Israelgi ne timo e lamo margi bende itimo kindewagi.

Mana kaka chon, e kindewagi bende en gima ‘ber kendo long’o neno owete kobet kanyachiel’ gi kuwe. (Zab. 133:1) Kwan mar “owete” osemedore ahinya e piny mangima. (1 Pet. 2:17) Isomoga kendo ilero Wach Nyasaye ayanga e chokruogewa. Kokalo kuom riwruok mare, Jehova miyowa puonj modhuro. Bende nitie buge mang’eny mosego mondo okonywa e timo puonjruok ma marwa wawegi kata mar joot. Achiel kuom jokanyo manie Bura Maduong’ nowacho niya: “Paro Wach Nyasaye e yo matut, kendo timo nonro mondo awinj tiend gik ma asomo osemiyo apuonjora gik mathoth kendo mamoro chunya.” Ee, ‘rieko nyalo moro chunywa.’—Nge. 2:10.

E kindegi bende, Jehova winjo lamo mag jotichne pile kapile. Oneno lamogo kaka ubani madum suya mamit. (Zab. 141:2) Donge chunywa bedo mamor ahinya ng’eyo ni Jehova Nyasachwa mor kodwa sama wawuoyo kode e lamo ka wabolore?

Musa nolamo kama: “Ber malich mar Jehova Nyasachwa obedi kuomwa: mi tich lwetwa bende mondo osik kodwa; ee, mi tich lwetwa mondo osiki.” (Zab. 90:17) Sama watiyo ne Jehova gi kinda, ogwedho tijwa. (Nge. 10:22) Nyalo bedo ni wasekonyo jomoko mong’eyo adiera. Samoro wasenano e tij lendo kuom higini mang’eny e bwo chal matek kaka lendo kuonde ma ji ok dwar winjowae, dhi lendo sama wan gi tuwo moro, kata ka wan gi lit moro e chunywa, kata lendo e bwo akwede. (1 Thes. 2:2) Kata kamano, donge ‘waseneno ber mar Jehova’ kendo ng’eyo ni Wuonwa manie polo mor gi kinda ma watimo?

Daudi nowero kama: ‘Jehova en gikeni maga mopogna: osiro gik maseyudo. An gi gweth, tinde piny runaga maber.’ (Zab. 16:5, 6) Daudi ne goyo erokamano ahinya nikech “gikeni” mare ma en bedo gi winjruok maber gi Jehova kendo bedo gi thuolo mar tiyone. Mana kaka Daudi, wan bende wanyalo yudo pek moko, kata kamano, pod Jehova gwedhowa e okang’ malach. Kuom mano weuru wadhi nyime bedo mamor gi lamo madier kendo kinde duto ‘wane ber’ hekalu mar Jehova mar ranyisi.