1. To nikech ochwewa e kit Nyasaye, wan gi nyalo mar timo ang’o?

JI MANG’ENY ohero goyo ngero ni “awendo ok we yiere.” E yo machalo kamano, thoth nyithindo chalga gi jonyuolgi. Donge en adier ni kinde mang’eny wuoro gi miyo nyuologa nyithindo ma nigi kido machal gi mekgi? Jehova, Wuonwa manie polo e Soko mar ngima. (Zab. 36:9) Kendo wan kaka nyithinde, wachal kode e yo moro. To nikech nochweyowa e kite, wan gi nyalo mar nono wach moro e yo matut mondo wang’ad paro makare, kendo loso osiep e kindwa gi jomoko.—Chak. 1:26.

2. Ang’o manyalo miyo Jehova obed Osiepwa?

² Jehova nyalo bedo Osiepwa maduong’. Osiep machalo kamano nyalore nikech hera ma Nyasaye oherowago kaachiel gi yie ma wan-go kuome koda kuom Wuode. Yesu nowacho kama: “Nyasaye nohero piny ahinya, omiyo nochiwo Wuode ma miderma, mondo ng’a ma oyie kuome kik lal, to obed gi ngima mochwere.” (Joh. 3:16) Nitie ranyisi mang’eny mag joma nosemako osiep motegno gi Jehova. We wanon ane ariyo kuomgi.

3, 4. Osiep ma ne nie kind Jehova gi Ibrahim, opogore nade gi osiep ma ne nie kind Jehova gi nyikwa Ibrahim?

³ Jehova noluongo Ibrahim kwar Jo-Israel machon ni “osiepna.” (Isa. 41:8) E bug 2 Weche mag Ndalo 20:7, iluongo Ibrahim  ni osiep Nyasaye. Ang’o ma nokonyo Ibrahim mondo omak osiep motegno kamano gi Jachwechne? Ibrahim ne nigi yie motegno.—Chak. 15:6; som Jakobo 2:21-23.

⁴ Jehova nobedo Wuoro kendo Osiep oganda Jo-Israel machon ma ne gin nyikwa Ibrahim. Kata kamano, gima lit en ni Jo-Israel noketho osiep ma ne nie kindgi gi Nyasaye. Nikech ang’o? Nikech ne ok gidhi nyime keto yie kuom gik ma Jehova nosingonegi.

5, 6. (a) Ne imako osiep gi Jehova e yo mane? (b) Gin penjo mage monego wanon?

⁵ Kaka imedo puonjori kuom Jehova, e kaka yie mari koda hera ma iherego medo bedo motegno. Par ane kinde ma ne ikwongo ng’eyo ni Nyasaye en Ng’ato sie minyalo makogo osiep. E wi mano, ne ipuonjori ni waduto nonyuolwa e richo nikech Adam noketho chik Nyasaye. Ne ifwenyo ni oganda dhano duto ne onge gi winjruok maber gi Nyasaye. (Kol. 1:21) Kae to ne ifwenyo bende ni Wuonwa me polo ok ni mabor ahinya kodwa kendo odewowa gadier. Kane wapuonjore kaka nochiwo Yesu mondo obed misango mar rawar ma wachako bedo gi yie kuom misangono, ne wachako mako osiep gi Nyasaye.

⁶ Sani ka waparo kaka ne wang’eyo Jehova, onego wapenjre niya: ‘Be amedo tego osiep manie kinda gi Nyasaye? Be geno ma an-go kuom Jehova koda hera ma aherego, medo bedo motegno pile ka pile?’ Jal machielo ma nomako osiep motegno gi Jehova ne en Gideon. Koro wanon ane kido mabeyo ma ne en-go mondo waluw ranyisi mare maberno.

7-9. (a) Ang’o ma notimore ne Gideon, to mano nokonye nade? (Ne picha manie chak sulani.) (b) Wanyalo timo ang’o mondo wabed osiepe Jehova?

⁷ Gideon ma ne en jang’ad bura, notiyo ne Jehova e kinde ma tungini ne ng’eny e piny Israel, bang’ kane gisedonjo e Piny Manosingi. Bug Jobura sula mar 6 nyisowa ni malaika mar Jehova nolimo Gideon ka en Ofra. E kindego, Jo-Midian ne gin wasigu ma ne dwaro monjo Jo-Israel. Nikech mano, Gideon ne dino ngano kama ibiyoe mzabibu ma ne en kama opondo mondo ka ng’ato biro to opand nganogo mapiyo. Kane malaika obiro ire moluonge ni “jachir,” nowuoro wachno ahinya. Noketo kiawa kabe adier Jehova ma nogolo Jo-Israel e piny Misri, ne dhi konyogi e lweny ma nochomogi. Kowuoyo e lo Jachwech, malaikano nokonyo Gideon mondo ong’e ni adier Jehova ne dhi konye e lwenyno.

⁸ Gideon ne parore ahinya kaka ne odhi ‘reso Jo-Israel e lwet Jo-Midian.’ Jehova nomiye dwoko ma achiel kachiel niya: ‘Adier anabed kodi, ma inineg Jo-Midian ka gima gin ng’ato achiel.’ (Bura 6:11-16) Nikech chunye ne pod parore ahinya, Gideon nokwayo mondo Jehova otimne ranyisi mondo obed gadier ni ne odhi konye. Kaluwore gi mbakani, onge kiawa ni Gideon ne neno Jehova kaka Ng’at mantie adier.

⁹ Gima notimore bang’e notego yie ma Gideon ne nigo kendo nomiyo osudo machiegni gi Nyasaye. Gideon noloso chiemo ma omiyo malaikano. Kane malaika orieyo luth momulo chiemono mowang’, eka Gideon nofwenyo ni malaikano ne en jaote ma Jehova nooro. Nikech wachno nomako dho Gideon, nokok niya: “Yaye, Jehova Nyasacha! . . . aseneno jamalaika mar Jehova wang’ gi wang’.” (Bura 6:17-22) Be gik ma notimorego noketho osiep mane nitie e kinde gi Nyasaye? Ooyo! Mano nomiyo Gideon omedo ng’eyo Jehova ma obedo gi kuwe e kinde kode. Mano en adier nikech kendo mar misango ma nogero ne oluongo ni “Jehova-shalom.” Kaluwore gi dho-Hibrania nyingno tiende en “Jehova En Kuwe.” (Som Jobura 6:23, 24.) Ka waparo matut gik ma Jehova timonwa pile kapile,  wanyalo fwenyo ni kare en Osiepwa madier. Ka wawuoyo gi Nyasaye e lamo pile, wamedo bedo gi kuwe kendo medo tego osiep manie kindwa kode.

10. Kaluwore gi Zaburi 15:3, 5, Jehova dwaro ni watim ang’o eka wabed osiepene?

¹⁰ Mondo Jehova obed Osiepwa, nitie gik ma nyaka watim. Mana kaka ondiki e Zaburi 15, Daudi nower konyiso gik madwarore watim eka wabed ‘welo e tabanakel mar Jehova,’ matiende ni wabed osiepe Nyasaye. (Zab. 15:1) We wanon ane ariyo kuom gik madwarorego. Mago gin, bedo joma ok hang wach ne jomoko kendo bedo joratiro e weche duto. Daudi nowacho kama kuom ng’ato ang’ata madwaro bedo e tabanakel mar Jehova: ‘Jalno maok hang wach gi dhoge, kata maok kaw asoya mar timo marach ne ng’at maonge gi bura.’—Zab. 15:3, 5.

11. Ang’o momiyo ok onego wabed johang wach?

¹¹ E zaburi machielo, Daudi nochiwo siem kama: “Geng’ lewi kuom richo.” (Zab. 34:13) Kaok waluwo siemni, to ok wabi bedo gi winjruok maber gi Wuonwa manie polo. Ka kuom adier, hango wach en achiel kuom kido mag Satan ma en jasik Nyasaye. Wach motigo ni “Jachien” olok kowuok e dho-Grik matiende en “jahang wach,” kata jaketh nying. Ka wabedo motang’ gi gik ma wawacho ne jomoko, kata gik ma wawacho kuomgi, mano konyowa rito winjruokwa gi Jehova. To moloyo, onego watang’ ahinya gi weche ma wawacho e wi owete matayo kanyakla.—Som Jo Hibrania 13:17; Juda 8.

12, 13. (a) Ang’o momiyo onego wabed joratiro e weche duto? (b) Ka wan joratiro, mano miyo jomoko otim ang’o?

¹² Jotich Jehova ong’ere kaka joma joratiro. Jaote Paulo nondiko kama: “Meduru lamonwa, nimar wang’eyo adier ni waonge gimoro ma chunywa ketonwae bura; wadwaro wuotho makare e weche duto.” (Hib. 13:18) To nikech wang’ado e chunywa ni wadwaro ‘wuotho kare e weche duto,’ watemo ahinya mondo kik wawuond Jokristo wetewa. Kuom ranyisi, kapo ni gitiyonwa tich moro, watemo ahinya mondo watimnegi maber kendo chulogi kaluwore gi kaka ne wasewinjore kodgi. Wan kaka Jokristo, onego wabed joratiro gi joma wandiko tich koda gi joma moko bende. To kapo ni Jakristo wadwa ondikowa tich, kik wabed joma dwaro ni odhialwa moloyo jotich mamoko.

¹³ Kinde mang’eny donge wasebedo ka wawinjo ka joma ok Joneno wuoyo maber e wi Joneno mag Jehova matiyonegi? Kuom ranyisi, jatend kambi moro maduong’ mar gedo nofwenyo ni Joneno mag Jehova timo kaka giwacho, ma owacho kama: “Kinde duto usebedo kutimo mana kaka wawinjore.” (Zab. 15:4) Bedo joratiro kamano konyowa mondo wamed bedo osiepe Jehova. To moloyo, bedo joratiro miyo Wuonwa manie polo yudo pak.

14, 15. Ka wan e tij lendo, ere kaka wanyalo konyo jomoko mondo obed osiepe Jehova?

¹⁴ Kata obedo ni ji mang’eny ma waromogo e tijwa mar lendo oyie ni Nyasaye nitie, pod ok gikawe kaka Osiepgi. Wanyalo konyogi nade? Ne ane gima Yesu nowacho ne jopuonjrene 70 kane oorogi ji ariyo ariyo mondo gidhi gilend. Nowachonegi niya: “Ot mudonjoe, wachuru mokwongo ni, ‘Kuwe obed ni odni.’ Ka ng’at kuwe ni e odno, kuweu nobed kuome; to ka ng’at kuwe ongee, eka kuweu noduognu.” (Luka 10:5, 6) Ji nyalo chako puonjore adiera, kapo ni wawuoyo kodgi maber. Sama wawuoyo gi ng’ato to okwedowa gi gero, wuoyo kode e yo mang’won nyalo konyo mondo kuwe  obedi e kindwa kode kendo onyalo winjo adiera kinde mabiro.

¹⁵ Sama waromo gi joma omakore motegno gi puonj mag din, kata joma omakore ahinya gi timbe mag anyuola, onego wadhi nyime wuoyo kodgi e yo mang’won. Wamorga rwako jogo duto mabiro e chokruogewa nikech gisin gi gik maricho matimore e piny, mamiyo gidwaro puonjore adiera e wi Nyasaye ma walamo. Sula mayudore e gasedewa ma wiyegi wacho ni “Muma Loko Kit Ngima Ji” miyowa ranyisi mang’eny mag joma kamago.

16. Wanyalo bedo osiepe Jehova kendo bedo “jotich kaachiel” kode e yo mane?

¹⁶ Joma tiyo kanyachiel thothne jobedo osiepe mati mata. Jogo duto mochiwore tiyo ne Jehova nigi thuolo majaber mar bedo osiepene kendo bedo “jotich kaachiel” kode. (Som 1 Jo Korintho 3:9.) Kaka wamedo dhi nyime tiyo tij lendo kaachiel gi timo ji obed jopuonjre, wamedo ng’eyo kendo nyago kido mabeyo mag Wuonwa manie polo. Waseneno kaka roho maler konyowa e tij lando wach maber.

17. Chiemb chuny ma wayudo e chokruogewa mag alwora koda mag distrikt nyiso nade ni Jehova en Osiepwa maduong’?

¹⁷ Kaka wamedo timo kinda e tij puonjo ji wach Nyasaye, e kaka wamedo bedo machiegni gi Jehova. Kuom ranyisi, wajoneno kaka Jehova loyonwa wasigu makwedo tijwa mar lendo. Tem ane paro kaka Jehova osetimonwa kuom higini mosekalo. Donge waseneno maler kaka otayowa? Wamor ahinya kuom chiemb chuny mosebedo komiyowa. Chenro mag chokruogewa mag distrikt koda mag alwora nyiso ayanga kaka Wuonwa ma jahera ong’eyo chandruoge ma waromogo. Joot moro nondiko barua ka ginyiso kaka ne gimor gi chokruog-distrikt. Ne giwacho kama: “Twege ma ne ogol e chokruogno nomulo chunywa ahinya. Ne waneno kaka Jehova ohero ng’ato ka ng’ato kuomwa kendo kaka odwaro ni gik moko odhinwa maber.” Bang’ dhi e chokruog-distrikt ma ne otim e piny Ireland, owadwa moro gi jaode mawuok Jerman ne mor ahinya gi kaka ne orwakgi koda kaka ne oritgi kuno. Ne giwacho niya: “Wadwoko erokamano maduong’ moloyo ne Jehova kod Ruodhwa Yesu Kristo. Girwakowa mondo wabed jokanyo mag riwruok achiel mar Jokristo madier mayudore e piny mangima. Ok wawuo mana kuom kaka wan e riwruok achiel, to wawuoyo kuom mor ma wayudo pile kapile e riwruogni. Gik mabeyo ma ne waneno e chokruog-distrikt ma ne otim Dublin, kinde duto biro paronwa kaka wan gi thuolo  makende mar tiyo ne Nyasaye kanyachiel kodu.”

18. En penjo mane mwanyalo penjore kaluwore gi tudruokwa gi Jehova?

¹⁸ Osiep medo bedo motegno sama osiepe wuoyo maber e kindgi. Tudruok e Intanet koda oro ote machwok e simo gin gik monya ahinya e teknoloji ma kindegi. Wanyalo wacho ang’o kuom kaka wajowuoyo gi Jehova ma en Osiepwa maduong’? En adier ni Jehova en Nyasaye ‘mawinjo kwayo mag ji.’ (Zab. 65:2) Kata kamano, be wan wawegi wajokawo okang’ mar wuoyo gi Nyasaye kinde duto?

19. Kapo ni wayudo ka teknwa nyiso Jehova weche matut machandowa, ang’o manyalo konyowa?

¹⁹ Moko kuom jotich Nyasaye winjoga ka teknegi yawo chunygi mondo ginyis Jehova weche matut machandogi. To mago e moko kuom gik ma Jehova dwaro ni wawach sama walemo. (Zab. 119:145; Yua. 3:41) Kata kapo ni ok yotnwa nyiso Jehova weche moko, pod wanyalo yudo kony. Paulo nondiko ne Jokristo ma ne ni Rumi kama: ‘Kamano bende roho konyo nyawowa; nikech ok wang’eyo lemo kaka owinjore; to roho owuon kwayonwa kochur ahinya ma tamore wacho. Kendo Jal ma nono chuny ong’eyo paro mar roho, nikech okwayo ne jo maler kaka Nyasaye dwaro.’ (Rumi 8:26, 27) Ka waparo matut kuom weche mondiki e Muma mayudore e buge kaka Ayub, Zaburi, kod Ngeche, mano biro konyowa ng’eyo kaka wanyalo nyiso Jehova weche machandowa.

20, 21. Weche ma Paulo nowacho e Jo Filipi 4:6, 7 hoyowa e yo mane?

²⁰ Seche ma wayudo chandruok, ber ka waluwo puonj ma Paulo nochiwo ne Jo-Filipi kotelne gi roho mar Nyasaye. Nojiwogi niya: “Kik uparru e wach moro, to e weche duto umi Nyasaye ong’e gik mudwaro, kulemo, kusayo, kendo kugoyone erokamano.” Wuoyo gi chuny man thuolo kamano gi Jehova nyalo hoyo chunywa gadier. Paulo nomedo wacho kama: “Mi kuwe mar Nyasaye, modhierore ng’eyo, norit chunyu gi parou e Kristo Yesu.” (Fili. 4:6, 7) Weuru mondo kinde duto wadwok erokamano kuom “kuwe mar Nyasaye modhierore ng’eyo” marito chunywa kod pachwa.

²¹ Wuoyo gi Jehova e lamo konyowa mondo wabed osiepene. Omiyo kinde duto ‘walemuru maok wawe.’ (1 Thes. 5:17) Weuru mondo weche ma wapuonjore e sulani okonywa mondo wamed tego osiep manie kindwa gi Nyasaye kendo wang’ad e chunywa mar luwo chikene makare. E wi mano, wadhiuru nyime paro matut gweth ma Jehova miyowa nikech en e Wuonwa, Nyasachwa kendo Osiepwa.