‘Chiemba En Timo Dwach Nyasaye’
En ang’o ma keloni mor moloyo? Be dibed ni en kend, rito joodi koso bedo gi osiep? Samoro ijabedo mamor sama ichiemo kanyachiel gi jogo mihero. Kata kamano, in kaka jatich Jehova, donge ijabedo mamor ahinya sama itimo dwach Nyasaye, sama isomo Wachne, kendo sama ilando wach maber?
Ruoth Daudi nowacho kama e wer ma noloso kopakogo Jachwech: “A Nyasacha, amor ahinya timo gi midwaro; ee, chikni ni e i chunya.” (Zab. 40:8) Kata obedo ni ne oyudo chandruoge moko e ngimane, pod nomor gadier timo dwach Nyasaye. En adier ni nitie jotich Jehova mamoko ma bende ne mor tiyone mopogore gi Daudi.
Jaote Paulo notiyo gi weche mag Zaburi 40:8 kowuoyo e wi Mesia, kata Kristo. Nondiko niya: ‘Kane Kristo biro e piny, nowacho niya, “Ok nidwaro misango kod chiwo, to ringruok ema niikona. Ne ok imor gi chiwo miwang’o kod misengini migologo richo.” Eka nawacho ni, “Era e! asebiro mondo atim dwaroni, A Nyasaye, kaka nondik kuoma e kitabu.”’—Hib. 10:5-7.
Kane Yesu nie piny, nohero rango chwech, bedo gi osiepene, kendo chiemo kanyachiel gi jomoko. (Math. 6:26-29; Joh. 2:1, 2; 12:1, 2) Kata kamano, gima nokawo maduong’ ahinya e ngimane ne en timo dwaro mar Wuon-gi manie polo. Nowacho niya: “Chiemba en timo dwaro mar Jal ma noora, kendo tieko tichne.” (Joh. 4:34; 6:38) Jopuonjre Yesu nofwenyo kuom Ruodhgi gima miyo ng’ato bedo gi mor madier. Ka gin gi ilo, ne gilando wach Pinyruoth ne jomoko gi kinda maok ochun-gi.—Luka 10:1, 8, 9, 17.
“DHIURU UTIM OGENDINI DUTO JOPUONJRENA”
Yesu nochiko jolupne kama: “Dhiuru utim ogendini duto jopuonjrena, kubatisogi e nying Wuoro gi Wuowi gi Roho Maler; kupuonjogi rito weche duto ma nachikou; kendo neuru, an kodu ndalo duto nyaka giko mar ndalo.” (Math. 28:19, 20) Mondo wachop chikni, mano nyiso ni nyaka walend ne ji kamoro amora ma giyudoree, wadog limo jogo morwako wach, kendo wapuonjre kodgi Muma. Tiyo tijni nyalo miyo wabed gi mor madier.
Hera miyo wadhi nyime lendo kata bed ni jomoko ok dwar winjowa
Kata bed ni ji rwako wach kata ooyo, paro ma wan-go kuom tij lendo ema biro miyo wabed mamor. Ang’o momiyo wadhi nyime gi lando wach maber kata obedo ni jomoko ok dwar winjowa? En nikech wang’eyo ni lando wach Pinyruoth kendo puonjo ji Muma nyiso ni wahero Nyasaye kod dhano wadwa. Ngima ji ni kama rach, to mano oriwo ngimawa kod ngima jomamoko. (Eze. 3:17-21; 1 Tim. 4:16) We wane ane weche moko mosekonyo jolendo mathoth mondo osik gi kinda kata ochier kinda ma ne gin-go e alwora ma lende tek.
TI GI THUOLO MORO AMORA
Tiyo gi penjo mowinjore e tij lendo nyalo miyo wayud nyak. Chieng’ moro gokinyi, nyaminwa miluongo ni Amalia noneno ng’at moro ka somo gaset e pap (park) kama ji yueyoega. Ne odhi ire mopenje kabe osesomo wach moro amora maber e gasedno. Kane ng’atno odwoke ni podi, Amalia nowachone niya, “Akeloni wach maber mar Pinyruodh Nyasaye.” Ng’atno nobedo gi chuny mar dwaro ng’eyo wachno, omiyo noyie puonjore Muma. Amalia nochako puonjruoge adek mag Muma kolendo e park.
Nyaminwa machielo miluongo ni Janice osebedo ka lendo kama otiye. Kane jotich moko ariyo omor gi sula moro ma ne nie Ohinga mar Jarito, nochiwore mar kelonegi gasede manyien dwe ka dwe maok obare. E wi mano, ne oyie kelo gesede ne jatich machielo ma bende ne mor gi sula mopogore opogore mayudore e Ohinga mar Jarito kod Amkeni! Mano nomiyo ng’at machielo bende okwayo gasedego. Janice wacho niya, “To mano kaka Jehova noguedha!” Gikone noyudo ji 11 ma ne oteronegiga gasede kama otiye.
KIK IOL GI DOK TIMO LIMBE
Jarit-alwora moro nowacho ni sama jolendo lendo ot ka ot, ok ber ka gitieko mbaka gi wuon ot mana ka ginyise ni gibiro duogo chieng’ machielo. Kar mano, ginyalo penjo wuon ot kama: “Be diher mondo anyisi kaka wajapuonjorega Muma gi ji?” kata, “En odiechieng’ mane gi seche mage ma diher ni aduogi mondo wamed wuoyo matut e wi wachni?” Jarit-alworano nowacho ni e kanyakla moro ma ne odhi limo, owete gi nyimine nochako puonjore Muma gi ji 44 mana e juma achielno.
Dok timo limbe maok wabare, kata mana kuom odiechienge moko bang’ lendo mokwongo, nyalo kelo nyak. Nikech ang’o? Nikech timo kamano nyiso ni wan gi chuny mar konyo jogo ma diher puonjore Muma. Miyo moro nowacho kama kane openje gimomiyo noyie puonjore Muma gi Joneno mag Jehova: “Ne achako puonjora nikech ne ginyiso gadier ni gihera kendo gidewa.”
Inyalo penjo wuon ot kama: “Be diher mondo anyisie kaka wajapuonjorega Muma gi ji?”
Bang’ kinde matin kosea e Skul mar Jopainia, nyaminwa miluongo ni Madaí nochako tayo jopuonjre 15 mag Muma, to noyudo osechiwo moko 5 ne jolendo mamoko. Moko kuom jopuonjrenego nochako biro e chokruoge maok gibare. Ang’o ma nojiwo Madaí mondo ochak puonjore gi ji mang’eny kamano? Skundno nojiwe mondo odog timo limbe nyaka oyud joma noserwako wach kane olendonegi. Nyaminwa machielo mosekonyo ji mang’eny mondo opuonjre Muma bende nowacho niya: “Asefwenyo ni bedo gi kinda mar dok timo limbe en gima dwarore ahinya e konyo joma dwaro ng’eyo Jehova.”
Dok timo limbe mapiyo nyiso adier ni wadwaro konyo jogo madwaro puonjore Muma
Dok timo limbe kendo tayo jopuonjre mag Muma en gima dwaro kinda ahinya. Kata kamano, guedh ma wayudo thoth moloyo kinda ma watimo. Ka watimo kinda e tij lando wach Pinyruoth, wanyalo konyo jomoko mondo ‘ong’e adiera chuth,’ to mano nyalo miyo gikwo. (1 Tim. 2:3, 4) To wan wanyalo yudo mor maonge gimoro amora minyalo pimgo.
