KA KUOM adier, golo twak e nyim jo matin-go e higa 1957 ok nomiya kibaji. An ng’at mosebedo ka oluoro wang’ ji ahinya. Kane atin, ne ajapondo ka welo obiro limowa e odwa, kata bed mana ni gin joma ang’eyo.

Inyalo wuoro ahinya ni migepe mathoth masebedo kayudo e riwruok mar oganda Jehova osechuna ni nyaka atudra gi ji mang’eny moriwo osiepe koda joma moko ma bende ok ang’eyo. Kata kamano, pod adhi nyime kedo matek mondo awe luoro wang’ ji, omiyo ok anyal pakora ni asebedo ka atimo migepena e yo maber nikech nyalona awuon. Kar mano, aseneno adiera mag weche ma Jehova nosingonwa niya: “Anamii teko; ee, nakonyi; ee, nasiri gi lueta marachwich, an matimo kare.” (Isa. 41:10) Achiel kuom yore madongo ma Jehova osekonyago en kokalo kuom Jokristo wetena mosebedo ka jiwa ahinya. We anyisi moko kuomgi, ka achako gi kinde ma ne pod atin.

Chieng’ Jumapil moro gonyango e higni mag 1940, nyaminwa moro miluongo ni Elsie Huntingford nolimowa e dalawa man yo milambo mar Ontario. Minwa ne odhi yawone dhoot ka an gi wuonwa ma  bende noluoro wang’ ji wadong’ e ot ka wachiko itwa. Koparo ni Nyaminwa Huntingford ne en mana jalok ohala kendo ni Minwa ne dhi nyiewo gimoro maok ne wadwar gie sano, Wuonwa nodhi e dhoot mondo okwer nyaminwano ni ok wadwar nyiepo. Nyaminwa Huntingford nopenjo niya: “Ok duher puonjoru Muma?” Wuonwa nodwoke niya: “Mano to dwaher timo.”

Nyaminwa Huntingford nolimowa mana e kinde mowinjore. Noyudo jonyuolna lemo e kanisa miluongo ni United Church of Canada to ne giweyo. Nikech ang’o? En nikech pasta nomwono otas moting’o nyinge ji e dhood kanisa kaluwore gi kwan mar sadaka ma ne gisebedo ka gigolo. Nyinge jonyuolna ma nodhier ne ni piny mar otas ka dhi rumo, to jodong kanisa ne pod thung’ogi ni gimed golo pesa mathoth. To nikech pasta machielo bende ne dwaro dhi nyime bedo gi telo e kanisano, noyie ni nosebedo kopuonjo gik ma kata en owuon ne ok oyiego. Omiyo ne waweyo lemo e kanisano, kae to wamanyo yo machielo mar yudo chiemb chuny.

Nikech e kindeno tij Joneno mag Jehova ne ogo marfuk e piny Kanada, Nyaminwa Huntingford ne puonjo joodwa wach Nyasaye kotiyo gi Muma kod weche moko ma nondiko e buk moro matin marateng’. Bang’e ka nofwenyo ni ok wanyal fule ir josirkal, nochako miyowa buge malero Muma. Bang’ puonjruok ka puonjruok, ne wajapando bugego mabor ahinya. *

Kata obedo ni ne nitie akwede kod pek mamoko, Nyaminwa Huntingford nolando wach maber gi kinda. Kindaneno nomora ahinya ma an bende arwako adiera. Bang’ higa achiel kosebatis jonyuolna mondo gibed Joneno mag Jehova, an bende nachiwora ne Nyasaye. Ne obatisa tarik 27 dwe mar ariyo, higa 1949, e besen moro molos gi mula ma jopur ne modhoe jambgi. Ne ajahigini 17. Bang’ mano nang’ado mar tiyo ne Nyasaye kuom thuolona duto.

Ne ok achako tij painia bang’ batiso. Kuom kinde moko natiyo e bengi kendo bedo karan e ofis kaparo ni nyaka amany pesa mondo okonya kabedo painia. To nikech ne an rawera mapod onge  gi lony e ngima, najatiyo gi pesana mapiyo bang’ yudogi. Omiyo owadwa miluongo ni Ted Sargent nojiwa ni mondo abed gi chir kendo aket geno kuom Jehova. (1 Weche 28:10) Nikech jipno, nabedo painia e dwe mar apar gachiel higa 1951. Ne an mana gi dola 40, ndiga mosetigo, kod bag manyien. Kata kamano, kinde duto Jehova ne miya gik ma ne dwarore. Mano kaka amor ni Ted nojiwa ma abedo painia! Mano nomiyo ayudo gueth momedore.

Chieng’ moro e dwe mar aboro, higa 1952, ne ogona simo kowuok Toronto. Ofis Joneno mag Jehova man Kanada nogwela mondo adhi ati e Bethel chakre dwe mar ochiko. Kata obedo ni ne aluoro wang’ ji kendo ne pok adhiga e Bethel nyaka nene, namor nikech jopainia mamoko noseganyisa gik mabeyo kuom Bethel. Mapiyo nono, ne ang’iyo gi ngima ma Bethel.

Higini ariyo bang’ donjo e Bethel, nakawo kar Bill Yacos kaka jatij kanyakla (masani iluongo ni jachan bura mar jodongo) e kanyakla moro miluongo Shaw Unit e taon mar Toronto. * Nikech ne an mana jahigini 23, naluor ahinya. Kata kamano, Owadwa Yacos nonyisa e yo mamuol kendo e yor hera gima nonego atim. To adier Jehova nokonya ahinya.

Owadwa Yacos ne en ng’at mogangore, mohero bwonjo kendo mohero ji. Nohero owete, kendo owete bende nohere. Nojalimogi kinde ka kinde e utegi, to ok mana e kinde ma ne gin gi chandruok. Bill Yacos nojiwa mondo an bende atim kamano kendo alend kanyachiel gi owete gi nyimine. Nonyisa niya: “Ken, we mondo owete ong’e ni idewogi ahinya. Mano biro konyo umo chwanyruok matindo tindo mang’eny.”

Jehova osekonya e yo makende ahinya chakre Januar 1957. Mano e dwe ma ne wakendore gi Evelyn, ma noyudo osedhi e Skund Gilead e klas mar 14. Kapok ne wakendore, notiyo ne Jehova e provins mar Quebec, ma en alwora ma ji wachoe dho-Faransa. E kindego, kanisa mar Roman Catholic Church ema ne chiko ahinya gik matimore Quebec. Omiyo Evelyn ne nigi migawo matek ahinya. En mana ni nomakore gi migawono kendo noketo geno chuth kuom Jehova.

Evelyn bende osesiko koda kinde duto. (Efe. 5:31) Ka kuom adier, herane madier nonenore bang’ kane wakendore! Noyudo wasechano dhi bayo Florida, e piny Amerka bang’ aruswa, kata kamano, odiechieng’ ma ne luwo arus, ofis nokwaya mondo adhi e romo moro ma ne dhi kawo juma achiel e Bethel ma Kanada. En adier ni romono noketho chenrowa, kata kamano, an gi Evelyn ne waikore timo gimoro amora ma Jehova ne dwaro ni mondo watim. Kuom mano, ne waketho chenrowa mar dhi bayo bang’ timo arus. E jumano, Evelyn ne tiyo tij lendo machiegni gi Bethel. Kata obedo ni alworano nopogore ahinya gi alwora ma ne ni Quebec, notimo sinani.

 E giko jumano, nayudo wach moro ma nobwoga ahinya. Nomiya migawo mar bedo jarit-alwora e alwora moro manie kind masawa gi yimbo mar Ontario. Noyudo eka aa kendo to an mana jahigini 25, kendo naonge lony moromo. Kata kamano, ne wadhi e migawono ka wan gadier ni Jehova ne dhi konyowa. Ne waidho gach reru gi moko kuom jorit-alwora moko molony mane dok e migepegi. Ne gijiwowa ahinya! Kindego piny ne ng’ich ahinya Kanada. Owadwa moro nochiwore mar weyonwa kar nindo maber ma noyudo osechulo mondo waninde kar bedo piny otieno mangima. Kinyne gokinyi, ne wachopo e grup matin ma ne ni Hornepayne ndalo 15 bang’ aruswa mana kaka ne asewacho motelo.

Pod ne nitie lokruok moko ma ne ritowa an gi Evelyn. Kane wan e migawo mar jarit-distrikt e giko higa mar 1960, ne ogwela mondo adhi e Skund Gilead, e klas mar 36 ma ne dhi kawo dweche apar kochakore dwe mar ariyo, e higa 1961 Brooklyn, New York. En adier ni namor, mak mana ni ne aluor matin nikech Evelyn ne ok ogwel. Kar mano, ne okwa Evelyn mondo ondik barua manyiso ni oyie dong’ kuom dweche apar, mana kaka nyimine mamoko ma bende ne nie chal ma kamano ne timo. Evelyn noywak, kata kamano, noyie mondo adhi e skundno kendo nomor ni ne idhi tiega ahinya e Gilead.

Gie kindeno, Evelyn nodong’ e ofis man Kanada. Mano ne en thuolo majaber ahinya nikech nokete mondo odag gi nyaminwa Margaret Lovell ma ne en Jakristo mowal gi roho. En adier ni ne wagombo nenore ahinya gi Evelyn. Kata kamano, kokalo kuom kony ma Jehova miyowa, ne wachopo migepe ma ne omiwago. Nikech Evelyn noyie mondo wati ne Jehova e okang’ momedore gi thuolo ma dine wabedogo kanyachiel, mano nomulo chunya ahinya.

Bang’ bedo e Gilead kuom dweche adek, Owadwa Nathan Knorr, ma ne tayo tij lendo e piny mangima, nokwaya mondo atim gimoro ma nobwoga ahinya. Nopenja kabe nanyalo weyo Skund Gilead gie kore mondo adog Kanada adhi apuonj e Skul mar Tij Pinyruoth ma ne idhi tim e Bethel. Owadwa Knorr nonyisa ni ok nochuno ni nyaka ayie gi migawono. Ne anyalo yiero mar tieko Skund Gilead kae to bang’e ne inyalo miwa migawo mar bedo jomisonari. Bende nonyisa ni kang’ado mar dok Kanada, to samoro ok ne dhi gwela e Gilead kendo e kindeno, to ne inyalo mana miya migawo mar dok dhi lendo Kanada. Nomiya thuolo mar ng’ado paro mogik bang’ wuoyo gi jaoda.

Nikech Evelyn noseganyisa ni okawo mapek migepe mowuok kuom Jehova, nanyiso Owadwa Knorr niya, “Waikore timo gimoro amora ma riwruok mar oganda Jehova dwaro ni watim.” Kinde duto wasebedo ka waneno ni onego wadhi kamoro amora ma riwruok mar oganda Jehova omiyowae migawo, kata dabed mana ni wan to wan gi paro mopogore.

Omiyo, e dwe mar ang’wen higa 1961, nawuok  Brooklyn kadok Kanada mondo adhi apuonj e Skul mar Tij Pinyruoth. Bang’e ne wabedo jood Bethel ma kuno. Bang’e nabwok ahinya kane ogwela mondo adhi Gilead e klas mar 40 e higa 1965. Omiyo ne dwarore kendo ni Evelyn ondik barua manyiso ni oyie dong’ ka an adhi e skundno. Kata kamano, bang’ jumbe matin, ne wamor ka Evelyn bende nogwel mondo wadhigo e skundno.

Bang’ chopo e Skund Gilead, Owadwa Knorr nonyisowa ni joklas duto ne dhi puonjore dho-Faransa nikech ne idhi orwa e pinje mag Afrika. Kata kamano, e program ma ne watiekogo e skundno, ne oduokwa mana Kanada! Noketa jarit mar ofis (masani iluongo ni jal matayo Komiti mar Bad Ofis). Nikech ne an mana jahigini 34, nanyiso Owadwa Knorr niya, “Yawa, pod atin ahinya.” Kata kamano nojiwa. Kuom mano, kinde duto ne ajakwongo wuoyo gi owete ma hikgi ng’eny kendo molony ma ne nie Bethel kapok ang’ado paro mogik e wi weche moko mapek.

Tiyo e Bethel osemiya thuolo mang’eny mag yudo puonj kuom jomoko. Achiwo luor ahinya ne owete mamoko ma bende nie Komiti mar Bad Ofis kendo kido ma gin-go bende mora miwuoro. Owete gi nyimine bende osekonya e yore mathoth, bed ni hikgi ng’eny kata gin rowere, bedni ne wadak kodgi e Bethel kata ne wan kodgi e kanyakla achiel.

Tiyo e Bethel bende osemiya thuolo mar puonjo jomoko kendo tego yie margi. Jaote Paulo nonyiso Timotheo niya: “Siki e wechego misepuonjori.” Bende nonyise niya: “Weche duto ma niwinjo kuoma e nyim joneno mang’eny, inyis ji migeno ma nyalo puonjo jo moko bende.” (2 Tim. 2:2; 3:14) Seche moko Jokristo wetena penjaga gik masepuonjora kuom higini 57 masebedogo e Bethel. Dwoko mayot ma ajamiyogi en ni, “Tim gi chunyi duto gimoro amora ma riwruok mar oganda Jehova dwaro ni itim, kendo gen kuom Jehova mondo okonyi.”

Chalona ni nyoro eka adonjo e Bethel ka an ng’at moluoro wang’ ji kendo maonge lony. Kata kamano, kuom higinigo duto, Jehova osebedo ‘ka mako lweta ma korachwich.’ To ahinya wuon, kokalo kuom kony ma Jokristo wetena miya kod ng’wono ma ginyisa, Jehova pod dhi nyime jiwa kama: “We luoro nakonyi.”—Isa. 41:13.