Be isesomo adimba gocho mosekalo mag Ohinga mar Jarito? Ka en kamano, ne ane kabe inyalo dwoko penjo maluwogi:

Nyarombo mar Pasaka ne onego oyang’ sa adi e odiechieng’ mar Nisan 14?

Loko moko mag Muma wacho ni ne onego oyang’ nyarombono “godhiambo,” matiende ni odhiambo ka piny miri miri kata sama chieng’ podho—to ka mudho pok ochako betie. (Wuok 12:6)​—12/15, ite mag 18-19.

Gin puonj mage mayudore e Muma manyalo konyo rawera otim yiero maber?

Adek kuomgi gin (1) Dwar mokwongo Pinyruodh Nyasaye gi wachne makare. (Math. 6:19-34) (2) Yud mor kuom tiyo ne jomoko. (Tich 20:35) (3) Bed mamor tiyo ne Jehova kapod in rawera. (Ekl. 12:1)​—1/15, ite mag 19-20.

Farese ang’wen mosebedo ka nie ng’wech chakre higa mar 1914 gin mage?

Yesu ma e jal mariembo faras marachar, osekawo okang’ mar golo Satan gi jochiendene oa e polo. Jariemb faras ma silwal nyiso lwenje mosebedo ka igoyo e piny. Jariemb faras marateng’ ochung’ ne kech. Jariemb faras mobokore ochung’ ne masiche makelo ne dhano tho kendo nego dhano milionde mang’eny. (Fwe. 6:2-8)​—2/1, ite mag 6-7.

“Kend mar Nyarombo” timore karang’o? (Fwe. 19:7)

“Kend mar Nyarombo” timore bang’ ka Ruoth Yesu Kristo otieko loyo wasike duto, matiende ni bang’ ka Babulon Maduong’ osekethi kendo lweny mar Har–Magedon oserumo.​—2/15, ite mar 10.

Ang’o momiyo Jo-Yahudi e kinde Yesu ne “kiyo” biro mar Mesia? (Luka 3:15)

Ok wanyal wacho gadier ni Jo-Yahudi e kinde Yesu nong’eyo tiend weche ma Daniel nokoro e wi Mesia kaka sani wang’eyo. (Dan. 9:24-27) Kata kamano, nyaka bed ni ne giwinjo ni malaike nolando ne jokwath moko wach nyuol Yesu, kata winjo gima Anna janabi ma dhako nowacho bang’ neno Yesu ka en nyathi e hekalu. E wi mano, jo mariek nobiro Jerusalem ka gipenjo “jalo monywol Ruodh Jo Yahudi.” (Math. 2:1, 2) Bang’e, Johana Jabatiso nonyiso ni Kristo ne chiegni biro.​—2/15, ite mag 26-27.

Wanyalo timo ang’o mondo kinde duto Ee marwa kik olokre bed Ooyo? (2 Kor. 1:18)

En adier ni seche moko nitie gik manyalo timore ma chuno ni waketh gima ne wasewacho. Kata kamano, ka wasingore timo gimoro, onego watim kar nyalowa duto mondo wachop singono.—3/15, ite mar 32.

Ere kaka wanyalo loyo tem mar ng’iyo ponografi?

Okenge adek manyalo konyowa gin (1) Loko wang’wa mapiyo kapo ni piche mochido obiro e nyimwa. (2) Rito pachwa kuom paro gik mabeyo kendo makare kaachiel gi wuoyo gi Nyasaye e lamo. (3) Tang’ gi gik manyalo rwakowa e tem kaka sinembe kata websait manyiso ponografi.​—4/1, ite mag 10-12.

Sama Jakristo oweyo jaode gi nyithinde chien kodhi manyo pesa e taon kata e piny machielo, gin hinyruok mage manyalo betie?

Sama jonyuol ok odak kanyachiel kaka joot, nyithindo bedo gi lit mang’eny e chunygi kendo timbegi bedo moyombore. Chunygi nyalo chako bedo mabor gi jonyuolgi. Kendo dichwo kata dhako modak mabor gi jaode nyalo donjo e tem mar terruok.​—4/15, ite mag 19-20.

Ang’o momiyo ne ituro tiende jo mahundu ma ne inego kong’aw e yath?

Jo-Rumi ne jonego jo mahundu moko ka gilierogi e yath. Jo-Yahudi nokwayo mondo otur tiende jo mahundu ma ne ogur e bath Yesu. Mano ne miyo gamo muya obed mateknegi kae to ne githo mapiyo. Kae to, joma otur tiendegigo ok ne dhi tieko otieno mangima kapod gin e wi yath. (Rapar 21:22, 23)​—5/1, ite mar 11.

Sama walendo ne ji e alworawa, gin penjo mage ang’wen monego waket e paro?

Alendo ne jomage? Alendonegi kanye? Gin seche mage mowinjore alendnegie? Ere kaka anyalo chako wuoyo gi ji?​—5/15 ite mag 12-15.

Madho ndawa osekelo hinyruok e okang’ maromo nade?

Kuom higni 100 mosekalo, ndawa osenego ji 100,000,000. Ndalogi onego ji 6,000,000 higa ka higa.​—6/1, ite mar 3.