PETRO noywak malit bang’ kwer ni ok ong’eyo Yesu. Kata obedo ni jaoteno ne nyaka ti matek mondo obed gi yie motegno kendo, Yesu ne dwaro tiye kode e konyo jomoko. Kuom mano, Yesu nonyise niya: “Ka iselokori ma idwogo, ijiw joweteni.” (Luka 22:32, 54-62, Luo, 2003) Bang’e Petro nobedo achiel kuom joma nosiro kanyakla mar Jokristo mokwongo. (Gal. 2:9) E yo machalo kamano, owadwa ma kinde moko nosebedo jaduong’-kanyakla nyalo yudo migawono kendo, ma oyud mor mogundho kuom jiwo Jokristo wetene kendo.

Moko kuom owete ma nosebedo jodong-kanyakla ne ogol e migepego, kendo mano ne nyalo miyo gibed gi paro ni gin joma nono. Julio, * ma kinde moko ne en jaduong’-kanyakla e pinje mag South America kuom higini mokalo 20, nowacho kama: “Iko twege, limo owete, kendo timo limbe kaka jakwath ne Jokristo wetena manie kanyakla ne gin gik ma nang’iyogo. Apoya nono, mago duto nolal moweyo bugo moro maduong’ e ngimana. Kawacho e yo machwok, higinigo ne gin higini ma nawinjo matek ahinya.” Sani, Julio en jaduong’-kanyakla kendo.

Jakobo nondiko niya: “Owetena, kwanuru ni en mor lilo, kuyudo temruok mayoreyore.” (Jak. 1:2) Jakobo ne wuoyo e wi tembe ma ne wadhi yudo nikech sand kod bedo ni wan dhano morem. Nowuoyo e wi gombo maricho, dewo wang’ jomoko, gi gik ma kamago. (Jak. 1:14; 2:1; 4:1, 2, 11) Sama Jehova omiyowa kum moro, wanyalo winjo malit. (Hib. 12:11) Kata kamano, tembe ma wayudo ok onego omi mor ma wan-go olal.

Kata kapo ni ogolwa e migawo moro e kanyakla, pod wan gi thuolo mar nono yiewa kendo nyiso ni wahero Jehova. Wanyalo paro matut bende  gimomiyo ne wayie timo migawono. Dibed ni ne wadwaro yudo ber moro wawegi, koso ne watimo dongruok mondo wayud migawono nikech ne wahero Nyasaye kendo ne wan gadier ni kanyakla en mare ma dwarore ni orit e yo mang’won? (Tich 20:28-30) Owete ma kinde moko ne gin jodong-kanyakla kendo sani pod dhi nyime tiyo ne Nyasaye e migepego, nyiso ji duto moriwo koda Satan ni hera ma giherogo Jehova en hera madier.

Kane orie Ruoth Daudi bang’ timo richo moko madongo, noyie gi kum ma nomiye kendo mano nomiyo owene ketheno. Daudi noduogo ower kama: “Ojahawi ng’atno ma timne marach owene, ma kethone oum. Ojahawi ng’atno ma Jehova ok nyal nwang’o tim mamono kuome, kendo ma onge wuond e chunye.” (Zab. 32:1, 2) Kum ma ne omi Daudi nokonye kendo wan gadier ni mano nomiyo omedo bedo jal ma norito oganda Nyasaye e yo maber.

Thothne, owete miketo jodong-kanyakla kendo, bedoga jokwath mabeyo ahinya moloyo kaka ne gin chon. Achiel kuom owadwa ma nodwok mobedo jaduong’ wacho kama: “Sani ang’eyo maber ahinya kaka onego arit kendo ata jogo ma timo ketho moko e kanyakla.” Jaduong’ machielo to wacho niya: “Sani koro tiyo ne owetena en gima akawo mapek ahinya.”

Jandik-zaburi nowacho ni ‘Jehova ok sik kamanyo ketho kuom ji.’ (Zab. 103:9, Luo, 2003) Omiyo kik wapar ni Nyasaye ok nochak ogen ng’at ma notimo ketho moro maduong’. Ricardo, ma nosebedo jaduong’-kanyakla kuom higini mang’eny to nogole e migawono, nowacho kama: “Iya nowang’ ahinya gi kethona awuon. Kuom kinde malach nikech naparo ni ok awinjora bedo jaduong’, nomona duogo tiyo ne owete. Nanenoga ni ok nanyal bedo ng’at migeno kendo. To nikech konyo ji ne mora, ne ajatayo jopuonjre mag Muma, jiwo owete mobiro e Od Romo, kendo lendo kodgi. Timo kamano osemiyo abedo gi chir kendo sani an jaduong’-kanyakla kendo.”

Mako sadha kendo bedo gi ich wang’ nyalo miyo ng’ato kik otim kinda mar bedo jaduong’. Donge  nyalo bedo maber ka waluwo ranyisi mar Daudi ma noringo kane Ruoth Saulo lawe ka dwaro nege nikech nyiego! Daudi notamore chulo kuor kata obedo ni noyudo thuolo mang’eny mar timo kamano. (1 Sam. 24:4-7; 26:8-12) Kane oneg Saulo, Daudi noywak kadengo kendo nowacho ni Saulo kaachiel gi wuode ma Jonathan ne gin joma ‘long’o kendo mabeyo.’ (2 Sam. 1:21-23) Daudi ok nomako ne Saulo sadha.

Kapo ni ineno ni ne ok otimni gik moko e yo maber, kik iwe sadha oloyi. Kuom ranyisi, kane ogol William owe bedo jaduong’ to noyudo osebedo jaduong’-kanyakla kuom higini 30 e piny Britain, nomako sadha gi jodongo moko. Ang’o ma nokonyo William mondo obed gi paro mowinjore? Owacho kama: “Somo bug Ayub nojiwa ahinya. Ka Jehova nokonyo Ayub mondo olos kuwe e kinde gi osiepene adek-ka, donge an bende onyalo konya mondo alos kuwe gi jodong-kanyakla?”—Ayub 42:7-9.

Kapo ni ne iyiero iwuon weyo bedo jaduong’-kanyakla, nyalo bedo gimaber chako nono gimomyo ne itimo kamano. Dibed ni chandruogeni iwuon ema nobembi? Dibed ni gik mamoko nono ema niketo obedo mokwongo e ngimani? Dibed ni nyawo mag jomoko e kanyakla ema nonyoso chunyi? Kata bed ni ang’o ma notimore, ng’e ni bedo jaduong’-kanyakla ne miyi thuolo mar konyo ji e yore mang’eny. Twege ma nigolo ne tegogi, ranyisi maber ma ne iketo ne jiwogi, kendo limbe mag kwath ma ne itimonegi ne konyogi nano e masiche ma ne giromogo. Tich ma ne itimo ka in jaduong’ ne moro chuny Jehova, kendo in bende tiji ne mori.—Nge. 27:11.

Jehova osekonyo owete mang’eny mondo obed mamor, kendo gibed gi gombo mar duogo konyo kanyakla. Kapo ni ne iweyo bedo jaduong’ kata ne ogoli, pod inyalo timo kinda mondo ‘ibed jakwath.’ (1 Tim. 3:1) Paulo ‘ok noweyo lamo’ ne Jokristo ma ne ni Kolosai mondo ging’e chuth dwach Nyasaye. Mano ne dhi konyogi ‘giwuoth mowinjore ne Ruoth, kendo bet ma long’one chuth.’ (Kol. 1:9, 10) Kapo ni iyudo thuolo mar bedo jaduong’-kanyakla kendo, kwa Jehova mondo omiyi teko koda chuny mar horuok mondo ichop migawono kimor. E ndalo mag gikogi, dwarore ni jokwath ma nigi hera orit oganda Nyasaye. Be inyalo jiwo oweteni? To be iikori timo kamano?