WADAK e kinde matek ahinya moloyo kinde moro amora ma dhano osedakgo e piny. (2 Tim. 3:1-5) Waromo gi tembe pile ka pile matemo yiewa kabe wabiro dak ka waluwo chike makare mag Jehova kwanyisogo ni wahere. Yesu nong’eyo ni ngima ne dhi bedo matek kindegi, omiyo nosingo ne jolupne ni ne gidhi yudo jip ma ne dwarore mondo ginan nyaka giko. (Math. 24:3, 13; 28:20) Mondo mi nojiwgi, noketo jatich mogen mondo ochiw “chiemo e kinde makare.”—Math. 24:45, 46.

Chakre ne ket jatich mogenno e higa mar 1919, ‘jood’ Yesu tara gi tara mawuok e ogendini duto oserwak e riwruok mar oganda Jehova kendo ipidhogi maber gi chiemb chuny. (Math. 24:14; Fwe. 22:17) Kata kamano, chiemb chuny duto ok yudre e dhok moko, kendo ok ji duto ma nigi nyalo mar yudo chiemb chuny manie Intanet. Kuom ranyisi, ji mang’eny onge gi vidio kod weche mamoko mayudore mana e jw.org kende. Be mano koro nyiso ni jogo ok yud chiemb chuny ma dwarore mondo gisik ka gin gi yie motegno? Mondo wayud dwoko, we wanon ane penjo moko ang’wen madongo ma luwogi.

Kane Satan otemo Yesu mondo olok kite obed kuon, Yesu nonyise niya: “Dhano ok nobed mangima gi kuon kende, to gi weche duto mowuok e dho Nyasaye.” (Math. 4:3, 4) Weche Jehova ondiki e Muma. (2 Pet. 1:20, 21) Kuom mano, Muma e gima duong’ mogik mitiyogo e losonwa chiemb chuny.—2 Tim. 3:16, 17.

Riwruok mar oganda Jehova oseloko Muma mar New World Translation of the Holy Scriptures e dhok mokalo 120, kendo imedo loke e dhok mamoko bende higa ka higa. E wi mano, loko moko mag Muma bilionde mogwaro bende yudore e dhok gana gi gana. Dongruok mosetim e pogo Muma e okang’ malach kamano, luwore gi dwach Jehova ma dwaro ni “ji duto okwo, kendo ging’e adiera chuth.” (1 Tim. 2:3, 4) To nikech “onge gimoro mochue ma nyalo pondo ni Nyasaye,” wanyalo bedo gadiera ni obiro neno “jo man gi chan e chunygi” kendo rwakogi ei ogandane kama obiro miyogie chiemb chuny.—Hib. 4:13; Math. 5:3, 6; Joh. 6:44; 10:14.

Mondo ng’ato obed gi yie motegno, dwarore mondo otim gik mathoth moloyo somo asoma Muma. Nyaka owinj tiend gik mosomo kendo tiyo gi puonjgo. (Jak. 1:22-25) Ja-Ethiopia moro e kinde Jokristo mokwongo noyie gi wachno. Noyudo osomo Wach Nyasaye kane jaland injili miluongo ni Filipo openje niya: “Iwinjo tiend gi misomo koso?” Nodwoke niya: “Dawinj nadi, ma ok ng’ato onyisa?” (Tich 8:26-31) Filipo nokonye mondo ong’e Wach Nyasaye e yo makare chuth. Wach Nyasaye nomulo chuny Ja-Ethiopiano mochiwore mondo obatise. (Tich 8:32-38) E yo machalo kamano, bugewa malero Muma osekonyowa mondo wang’e adiera e yo makare. Bugego osechiwo weche mamulo chunywa kendo osemiyo wakawo okang’ mar tiyo gi gik mwapuonjore.—Kol. 1:9, 10.

Kokalo kuom bugego, jotich Jehova yudo chiemb chuny mogundho. (Isa. 65:13) Kuom ranyisi, Ohinga mar Jarito ma yudore e dhok mokalo 210, lero weche mokor e Muma, miyo wawinjo tiend adiera man e Muma e yo matut, kendo jiwowa mondo wadag ka waluwo puonj mag Muma. Gaset mar Amkeni! ma yudore e dhok mokalo 100, yawo pachwa mondo wang’e tije Jehova mopong’ gi rieko kendo gasedno nyisowa kaka wanyalo tiyo gi puonj ma nigi rieko manie Muma e ngimawa mapile. (Nge. 3:21-23; Rumi 1:20) Jatich mogen iko buge kod gasede malero Muma e dhok mokalo 680! Be ijabedo gi thuolo mar somo Muma pile ka pile? Be isomo gasede manyien duto kaachiel gi buge mamoko manyien ma yudore e dhou higa ka higa?

Mopogore gi buge gi gasede, riwruok mar oganda Jehova loso twege migolo e chokruoge mag kanyakla, kod chokruoge madongo. Be imor gi twege, drama, ranyisi mitimo, kaachiel gi paro ma joma ipenjo penjo sa twak chiwo? Kuom adier, Jehova oseguedhowa gi chiemb chuny mogundho.—Isa. 25:6.

Ooyo, kendo ok onego okawwa gi wuoro ni moko kuom jotich Jehova samoro nigi chiemb chuny mang’eny moloyo jowetegi. Nikech ang’o? Ne ane ranyisi mar joote Yesu. Yesu nopuonjogi weche mathoth moloyo jopuonjre mamoko ma ne nitie e kinde Jokristo mokwongo. (Mari. 4:10; 9:35-37) Kata nobedo kamano, jopuonjrego ok noremo chiemb chuny kata matin; ne giyudo gik ma ne dwarore.—Efe. 4:20-24; 1 Pet. 1:8.

En gima ber ng’eyo ni thoth gik ma Yesu nowacho kendo timo kane en e piny, ok nondiki duto e buge Injili. Jaote Johana nondiko niya: “To nitie bende gik mang’eny ma Yesu notimo; ka da ondikgi giduto achiel achiel, agalo ka piny ngima ok dirom kanoe kitepe ma dondiki.” (Joh. 21:25) Kata obedo ni Jokristo mokwongo ne ong’eyo weche mathoth e wi Yesu moloyowa, ok waremo chiemb chuny e yo moro amora. Jehova osetimo duto mondo wang’e Yesu e okang’ maber manyalo konyowa bedo jolupne.—1 Pet. 2:21.

Par ane bende barupe ma ne joote ooro ne kanyakla mopogore opogore e kinde Jokristo mokwongo. Nitie barua achiel ma jaote Paulo nondiko maonge e Muma. (Kol. 4:16) Be mano nyiso ni wan gi chiemb chuny manok nikech baruano onge? Ooyo. Jehova ong’eyo gik ma dwarore kendo osemiyowa moromo mondo yiewa osik kotegno.—Math. 6:8.

E kindegi, jotich Jehova moko nigi chiemb chuny mogundho moloyo jowetegi. Dibed ni dhou nigi mana buge manok? Ka en kamano, ng’e ni Jehova dewi. Som buge ma in-go kendo ka nyalore dhi e chokruoge mitimo e dhok miwinjo maber. Kendo bed gadier ni Jehova biro konyi mondo yieni obed motegno.—Zab. 1:2; Hib. 10:24, 25.

Websait marwa oting’o gasede koda buge mamoko makonyowa puonjore Muma. Websaitno bende oting’o weche manyalo konyo joma okendore, rowere koda nyithindo matindo. Joot yudo kony ahinya sama gitiyo gi gik moket e Websaitgo e Lamo mar Joot. E wi mano, Websaitwa chiwoga ripode mag program makende mosetim machalo kaka romo mitimo gi joma tieko Skul mar Gilead, romo mitimoga higa ka higa, kendo nyiso owete manie piny ngima masiche kod kes mopogore opogore mayudo owetewa kuonde mamoko. (1 Pet. 5:8, 9) Websaitno bende konyo ahinya e lando wach maber ka miyo wach maber chopo nyaka e pinje ma tijwa ogoye marfuk.

Kata kamano, pod inyalo bedo gi yie motegno bed ni itiyo gi Websaitwano kata ooyo. Jatich mogen osetiyo matek mondo one ni chiemb chuny yudore moromo pidho jotich Nyasaye duto. Kuom mano, ok onego ipar ni nyaka to inyiew masin moro mana mondo iti gi jw.org. Jomoko nyalo timo chenrogi giwegi mar goyo weche man e Websaitwa mondo gimi jomoko maok nyal yudogi. Kata kamano, ok omi kanyakla chik mondo gitim kamano.

Wadwoko ne Yesu erokamano ahinya kuom chopo gima nosingonwa ni obiro miyowa chiemb chuny. Kaka kinde matekgi medo ruyore ka rumo, wanyalo medo bedo gadier ni Jehova biro dhi nyime chiwonwa “chiemo e kinde makare.”