Ginyalo bedo gi gombo mar dhi nyime dak gi chwogi kata mondegi mochier e piny manyien. Dichwo moro ma chiege ne otho nowacho kama: “An kaachiel gi chiega ne ok wayiero mondo kend marwa orum. Chunywa ne gombo ahinya mondo wasik e lamo madier kaka dichwo gi dhako nyaka chieng’. Mano e gombo mapod an-go nyaka sani.” Be nitie gimomiyo wanyalo bedo gi geno ni joma ochier biro donjo e kend kendo? Kokete e yo mayot, dwoko en ni ok wanyal wacho.

Kuom higini mang’eny, bugewa osebedo ka wacho ni weche ma Yesu nowacho e wi chier kod donjo e kend, nyalo bedo ni otudore gi wach jogo mibiro chier mondo odag e piny manyien. Bugewago bende osebedo ka wacho ni joma ibiro chiergo nyalo bedo ni ok bi donjo e kend. * (Math. 22:29, 30; Mari. 12:24, 25; Luka 20:34-36) Kata kamano, be dibed ni Yesu ne wuoyo e wi joma ibiro chier mondo odhi odag e polo? We wanon ane matut gima Yesu nowacho ma ok wang’ado chuth paro moro amora kuom wachni.

Non ane joma Yesu ne wuoyogo e ndikono. (Som Luka 20:27-33.) Jo-Saddukai ma ne gin joma ok oyie kuom chier, ne temo gajo Yesu gi penjo e wi chier, kaachiel gi wach dhako ma ne ikendo gi owadgi chwore bang’ tho chwore. * Yesu nodwokogi kama: “Nyithind pinyni kendo, bende ikendogi; to jo mokwan ni owinjore chopo e piny cha, kendo ochier a kuom jo motho, ok gikendi, kendo ok kendgi. Adier ok ginyal tho kendo, nikech gichal gi malaika, kendo gin nyithind Nyasaye, nimar ginie kanyakla mar jo mochier.”—Luka 20:34-36.

Ang’o momiyo bugewa osebedo ka wacho ni nyalo bedo ni Yesu ne wuoyo e wi joma ibiro chier mondo odag e piny? Gisebedo ka giwacho kamano nikech weche moko ariyo. Mokwongo, nyalo bedo ni Jo-Saddukai ne wuoyo e wi chier mar joma biro dak e piny, omiyo nenore ni Yesu nodwokogi kowuoyo e wi chier mar joma ne dhi dak e piny. Mar ariyo, Yesu notieko dwoko jogo kowuoyo e wi Ibrahim, Isaka, gi Jakobo ma ne gin jotich Nyasaye kendo ma ne nigi geno mar dak e piny.—Luka 20:37, 38.

Kata kamano, nyalo bedo ni Yesu ne wuoyo e wi chier mar joma dhi dak e polo. Ang’o momiyo wanyalo wacho kamano? We wane ane weche moko ariyo e dwoko ma Yesu nochiwono.

“Jo mokwan ni owinjore . . . ochier a kuom jo motho.” Jokristo mowal ‘ikwano ni gin joma owinjore donjo e Pinyruodh Nyasaye.’ (2 Thes. 1:5, 11) Nikech misango mar rawar ma Kristo nochiwo, Nyasaye kwano Jokristo mowal kaka joma kare. Ka githo, Nyasaye ok kwan-gi kaka joricho. (Rumi 5:1, 18; 8:1) Iluongogi ni “jo moguedhi kendo maler” kendo inenogi kaka joma owinjore ochier mondo odhi odag e polo. (Fwe. 20:5, 6) Mopogore kodgi, joma ibiro chier mondo odag e piny, oriwo “jo ma ok kare.” (Tich 24:15) Be gin bende  inyalo wach ni gin “jo mokwan ni owinjore” ochier?

“Ok ginyal tho kendo.” Yesu ok nowacho niya: “Ok gibi tho kendo.” Kar mano, nowacho kama: “Ok ginyal tho kendo.” Loko moko mag Muma keto wechego ni “tho ok nyal loyogi kendo” kod “tho onge gi teko kuomgi.” Bang’ Jokristo mowal tieko wuodhgi e piny ka gichung’ motegno, ichierogi mondo gidhi e polo kendo imiyogi ngima maok nyal tho—ngima maok rum kendo maok nyal kethi. (1 Kor. 15:53, 54) Tho onge gi teko moro amora kendo e wi joma ibiro chier odhi e polo. *

Wanyalo wacho ang’o kaluwore gi weche mwasenonogo? Nyalo bedo ni weche ma Yesu nowacho e wi donjo e kend kod chier otudore gi joma ibiro chier odhi e polo. Ka en kamano, to kare wechenego nyalo puonjowa gik mathoth e wi jogo mibiro chier odhi e polo: Ok gidonj e ngima mar kend, ok ginyal tho kendo, kendo gichalo gi malaike e yo moro, ma gin chwech mag roho modak e polo. Kata kamano, ng’ado paro ma kamano, kelo penjo momedore.

Mokwongo, ang’o momiyo Yesu ne nyalo wuoyo e wi joma biro chier mondo dhi e polo ka nodwoko Jo-Saddukai ma nenore ni nopenjo wach chier mar joma biro dak e piny? Kinde duto, Yesu ok ne chiw dwoko kaluwore gi kaka joma ne kwede paro. Kuom ranyisi, kane Jo-Yahudi okwaye mondo otimnegi hono, Yesu nonyisogi niya: “Mukuru Hekaluni, kendo nachunge gi ndalo adek.” Nyaka bed ni Yesu nong’eyo ni jogo ne paro mana wach hekalu masie, “to en nowuoyo kuom hekalu mar ringre.” (Joh. 2:18-21) Nyalo bedo ni Yesu bende noneno ni onge tiende dwoko Jo-Saddukai ma ne ok oyie kata kuom chier, kendo ok ne oyie ni malaike nitie. (Nge. 23:9; Math. 7:6; Tich 23:8) Kar mano, nyalo bedo ni nodwaro elo adiera e wi jogo mibiro chier odhi e polo mondo okony jopuonjrene madier ma kinde moko ne dhi yudo chier mar dhi e polo.

Mar ariyo, ang’o momiyo Yesu notieko wechego kowuoyo e wi Ibrahim, Isaka, kod Jakobo, ma ne ibiro chier mondo odag e piny? (Som Mathayo 22:31, 32.) Ne ni kapok ne Yesu owuoyo e wi jotich Nyasaye machon-go, nochako niya: “To kuom wach chier a kuom jo motho.” Wechego nyalo nyiso ni Yesu koro ne dwaro chako wuoyo kuom wach machielo mopogore. Kae to kotiyo gi ndiko mag Musa ma Jo-Saddukaigo ne wacho ni oyiego, Yesu notiyo gi weche ma Jehova nonyiso Musa e bungu ma ne liel mondo omed jiwo ni chier mar joma biro dak e piny en dwaro mar Nyasaye adier.—Wuok 3:1-6.

Mar adek, kapo ni weche ma ne Yesu owacho e wi chier kod donjo e kend otudore mana gi joma biro dhi e polo, be mano koro nyiso ni joma biro chier mondo odag e piny biro donjo e kend? Muma ok chiw dwoko ma achiel kachiel e wi penjono. Kapo ni adier Yesu ne wuoyo e wi chier mar joma biro dhi dak e polo, kare wechenego ok nyis wach moro amora e wi joma ibiro chier mondo odag e piny manyien, kendo ok nyis kabe gibiro donjo e kend kata ooyo.

Kata kamano, gie sani wang’eyo maler ni Wach Nyasaye wacho ratiro ni tho tieko singo mar joma okendore. Kuom mano, dichwo kata dhako ma jaode otho ok onego opar ni otimo richo kapo ni oyiero mar donjo e kend machielo. Mano en yiero ma ng’ato timo owuon kendo ng’ato ang’ata ok onego ojare kuom yiero donjo e kend gi ng’at machielo.—Rumi 7:2, 3; 1 Kor. 7:39.

En adier ni wanyalo bedo gi penjo turi e wi kaka ngima biro chalo e piny manyien. Kar temo paro apara dwoko mag penjo machalo kamago, nyalo bedo maber ka warito mondo wabi wane. Kata kamano, wanyalo bedo gadiera e wi wachni: Ji duto ma winjo Jehova biro bedo mamor nikech obiro chopo dwaro kod gombo duto mag jotichne e yo maber chuth.—Zab. 145:16.