1. Paulo ne neno nade joma tiyo ne Jehova gi kinda?

JAOTE Paulo noparo joma ne timo kinda mondo oland wach maber. Nondiko kama: “E nyim Nyasachwa kendo Wuonwa, wiwa ok nyal wil gi tim ma yieu osetimo, gi tich matek musetiyo nikech herau, kendo gi kinda ma un go nikech ugeno Ruodhwa Yesu Kristo.” (1 Thes. 1:3) Jehova paro jotichne ma tiyone gi kinda nikech gihere, bed ni gitiyone e okang’ malach kata e okang’ matin.—Hib. 6:10.

2. Wabiro nono ang’o e sulani?

² Jokristo wetewa mathoth e kinde machon kod kindegi bende oseweyo gik mang’eny mondo giti ne Jehova gi thuologi duto. We wane ane kaka moko notiyo ne Jehova e kinde machon. E wi mano, wabiro nono moko kuom yore ma ji tiyonego Nyasaye gi thuologi duto e kindegi kendo neno kaka wanyalo paro owete gi nyimine mochiwore mondo oti ne Nyasaye e yore makendego.

3, 4. (a) Jomoko notiyo ne Nyasaye nade e kinde machon? (b) Ne giyudo nade gige ringruok?

³ Kane osebatis Yesu, mapiyo nono nochako tich moro ma ne idhi tim e piny mangima. (Luka 3:21-23; 4:14, 15, 43) Bang’  thone, jootene nochako tayo tij lendo ka gitime e okang’ malach. (Tich 5:42; 6:7) Jokristo mamoko kaka Filipo nobedo joland injili kod jomisonari e piny Palestina. (Tich 8:5, 40; 21:8) Paulo kaachiel gi jomamoko, nolando wach maber e pinje mang’eny ma ne bor gi thuchegi. (Tich 13:2-4; 14:26; 2 Kor. 1:19) Kuom ranyisi, jomoko kaka Mariko, gi Luka nondiko buge Muma, ka moko kuomgi kaka Silvano (Sila) nobedo jogoro mag jondik Muma. (1 Pet. 5:12) Nyimine ma Jokristo noriwo owetego lwedo ka gitiyo kanyachiel. (Tich 18:26; Rumi 16:1, 2) Gik ma notimore ne Jokristogi miyo somo Ndiko mag dho-Grik bedo mamit, kendo nyiso ayanga ni Jehova paro jotichne kendo dewogi ahinya.

⁴ Joma ne tiyo ne Nyasaye gi thuologi duto e kinde machon, ne yudo nade gige ringruok? Seche moko Jokristo wetegi ne rwakogi e utegi kendo ne konyogi e yore mopogore opogore. Kata kamano ne ok gichun ji mondo okonygi. (1 Kor. 9:11-15) Jokristo moko kod kanyakla moko bende ne chiwore mar konyogi. (Som Tich Joote 16:14, 15; Jo Filipi 4:15-18.) Paulo gi joma ne tiyo kode tij misonari ne tiyo tije lwedo moko mondo giyud kaka ne ginyalo konyore.

5. Owadwa moro gi jaode nowacho ang’o e wi tiyo ne Nyasaye gi thuologi duto?

⁵ E kindegi, Jokristo mathoth tiyo ne Nyasaye gi thuologi duto e yore mopogore opogore. (Ne sanduk mawacho ni “ Yore ma Jokristo Tiyogo ne Nyasaye gi Thuologi Duto.”) Giwinjo nade kuom yiero ma ne gitimono? Nyalo bedo maber kipenjogi, kendo ibiro wuoro ahinya kaka gibiro jiwi. Ne ane ranyisini: Owadwa moro mosebedo painia mapile, painia makende, jamisonari, kendo tiyo e Bethel e piny moro wacho niya: “Tiyo ne Nyasaye gi thuolona duto e yiero maberie mogik ma asegatimo e ngimana. Kane ajahigni 18, ne akia ni adhi e yunivasiti, koso amany tij andika, koso abed painia. Gik maseneno e ngimana osekonya ng’eyo ni wi Jehova ok nyal wil gi gik ma waseweyo mondo watine. Asetiyo gi talanta kod nyalo ma Jehova nomiya e yo maber, moloyo kaka datiyo kodgi ka dine ayiero tiyo tij andika.” Jaode be wacho kama: “Moro ka moro kuom migepe mwasebedogo, osekonya timo dongruok. Waseneno kaka Jehova ritowa kendo tayowa kinde duto kendo e yore ma dine ok oritowago ka dine wayiero luwo tijewa wawegi. Ajadwoko ne Jehova erokamano pile kuom thuolo ma wan-go mar tiyone gi kindewa duto.” Be diher ni mondo ngimani ochal kamano?

6. Jehova neno nade tich ma watiyone?

⁶ En adier ni nitie jomoko ma ngimagi ok nyal yienegi tiyo ne Nyasaye gi thuologi duto gie sani. Wanyalo bedo gadier ni Jehova neno kinda duto ma watiyonego kaluwore gi chalwa. Tem ane paro moko kuom joma Paulo noluongo nyinggi e bug Filemon 1-3, moriwo jogo ma ne nie kanyakla mar Kolosai. (Som.) Paulo nogenogi kendo Jehova bende nogenogi. E yo machalo kamano, Wuonwa me polo ogeno kinda ma un-go kutiyone. To ere kaka inyalo jiwo kendo siro jogo ma sani tiyo ne Nyasaye gi thuologi duto?

7, 8. Tij painia oriwo timo ang’o, to ere kaka jomoko e kanyakla nyalo konyo jopainia?

⁷ Mana kaka joland injili e kinde Jokristo mokwongo, jopainia ma nigi kinda jiwo kanyakla ahinya. Thothgi lendo kuom seche 70 dwe ka dwe. Ere kaka inyalo konyogi?

⁸ Nyaminwa moro ma painia miluongo ni Shari nowacho kama: “Jopainia  nenorega kaka joma otegno nikech gidhiga lendo pile ka pile. Kata kamano, pod dwarore ni ojiwgi.” (Rumi 1:11, 12) Nyaminwa machielo ma kinde moro ne en painia nowacho kama e wi jopainia mang’eny manie kanyaklagi: “Gitiyo matek kinde duto. Gijadwoko erokamano ahinya ka jomoko okowogi gi mtoka, ogwelogi e gago, omiyogi pesa moro matin mar petrol kata makonyogi e yore moko. Mano nyisogi ni kare idewogi ahinya.”

9, 10. En ang’o ma jomoko osetimo mondo gikony jopainia ma gin-go e kanyakla?

⁹ Be diher konyo jopainia e tij lendo? Painia moro miluongo ni Bobbi nokwayo kama: “Wagombo ahinya yudo joma walendogo e kor juma.” Painia wadgi e kanyaklano nomedo wacho kama: “Yudo joma walendogo bang’ sa auchiel, ok yot.” Nyaminwa moro masani tiyo Bethel man Brooklyn paro kinde ma ne en painia kowacho kama: “Nyaminwa moro ma ne nigi mtoka nonyisa niya, ‘Sa asaya miyudo ni onge ng’at minyalo dhigo lendo, gochna mondo abi wadhi walendi.’ Nokonya ahinya kane an painia.” To Shari wacho kama: “Bang’ lendo, jopainia mapok odonjo e kend dong’ga mana kendgi. Kinde ka kinde, inyalo gwelo owete gi nyiminego e lamo maru mar joot. Bedo kodgi bende sama utimo gik mamoko nyalo jiwogi gidong’ ka gitegno.”

¹⁰ Nyaminwa moro mosebedo ka tiyo ne Nyasaye kuom thuolone duto kuom higni ma dirom 50 wacho kama koparo kinde ma ne en painia gi nyimine wetene ma ne pok okendi: “Jodongo e kanyaklawa ne jalimo jopainia kinde ka kinde. Ne gipenjowaga kaka ngimawa chalo, kaka tije andika ne dhi kodwa, kod kabe ne nitie gik machandowa. Ne gidwaro ng’eyo gigo gadier. Ne gibiro kama wadakie mondo gine kabe ne wanyalo dwaro ni gikonywa e yo moro amora.” Mani nyalo paronwa kaka jaote Paulo nodwoko erokamano ne Onesiforo ma nokonye kane en Efeso kata obedo ni ne en gi ting’ mar rito joode.—2 Tim. 1:18.

11. Bedo painia makende oriwo timo ang’o?

¹¹ Kanyakla moko nigi gueth mar bedo gi jopainia makende. Thoth owete gi nyiminegi  temo ahinya lendo kuom seche 130 dwe ka dwe. To nikech gitiyo gi seche mang’eny kamano e tij lendo kod e tije moko e kanyakla, gionge thuolo moromo mar tiyo tije andika. Ofis mar Joneno jamiyogi gimoro matin dwe ka dwe mondo omi giket pachgi e tij lendo.

12. Jodong-kanyakla gi jomamoko nyalo konyo jopainia makende nade?

¹² Wanyalo konyo nade jopainia makende? Jaduong’-kanyakla moro matiyo e ofis Joneno kendo mosewuoyo gi thoth jopainia makende wacho kama: “Onego jondongo owuo kodgi, onon chal margi, kendo ofweny kaka ginyalo konyogi. Joneno moko paro ni jopainia makende winjo maber ahinya nikech ofis miyogiga gimoro matin. Kata kamano, joma paro kamano ber mondo ong’e ni owete manie kanyakla onego okony jopainiago e yore mang’eny.” Mana kaka jopainia mapile, jopainia makende be morga ahinya ka giyudo joma gilendogo. Be inyalo riwogi lwedo e tij lendo?

13, 14. (a) Ang’o monego wapar e wi jorit-alwora kod mondegi? (b) Iparo ni inyalo timo ang’o mondo ikony jorit-alwora?

¹³ Jokristo mang’eny nenoga jorit-alwora kod mondegi kaka joma nigi winjruok motegno gi Nyasaye, kendo monego ojiw jomoko. Mano en adier, kata kamano, pod dwarore ni ojiwgi, olend kodgi, kendo ogwelgi e budho moro matin ka giyueyogo gi Jokristo wetegi. To nade kapo ni gibedo matuo ma orwakgi e wod kata seche moko otimnegi yeng’o moro kata dwarore ni othiedhgi e yore moko? Gijobedo mamor ahinya sama owete gi nyimine konyogi kendo dewogi. Wanyalo temo paro kaka Paulo gi jowetene ma ne gilimogo kanyakla mopogore opogore, ne mor gi kony ma Luka ‘jathieth moher’ ma bende nondiko bug Tich Joote nomiyogi.—Kol. 4:14; Tich 20:5–21:18.

¹⁴ Jorit-alwora kaachiel gi mondegi gombo ni gibed gi osiepe moherogi kendo mogenogi. Jarit-alwora moro nondiko niya: “Chal ka gima osiepega ong’eyo kinde monego ojiwae. Gijopenja penjo moko e yo mariek, to mano konya mondo awachnegi gima nie chunya. Bedo ni giyie winjo gima chanda, konya malich.” Jorit-alwora kaachiel gi mondegi morga ahinya gi hera ma owete gi nyimine nyisogi.

15, 16. Gin tije mage ma jo Bethel kaachiel gi joma tiyo e Ute Chokruok mag Alwora timo, to ere kaka wanyalo riwogi lwedo?

¹⁵ E piny ngima, jogo matiyo e Bethel kod Ute Chokruok mag Alwora riwo lwedo ahinya tij lando Pinyruoth mitimo e pinje ma gidakie mitayo gi bad ofis. Kapo ni un gi joma tiyo Bethel e kanyaklau, inyalo nyiso nade ni iparogi?

¹⁶ Sama gihango dhi Bethel, thothgi jogomboga pacho nikech giweyo joodgi kod osiepegi. Gijobedo mamor ka jo Bethel wetegi kaachiel gi joma gin-go e kanyakla obedo osiepegi. (Mari. 10:29, 30) Tich ma gitiyo miyogiga thuolo mar dhi e chokruoge kod tij lendo juma ka juma. Kata kamano, nitie kinde ma jo Bethel bedoga gi tije momedore. Ber ka joma gin-go e kanyakla ong’eyo mano, kendo nyiso ni gimor gi tich ma gitimo.—Som 1 Jo Thessalonika 2:9.

17, 18. Gin migepe mage ma joma ochiwore tiyo ne Nyasaye e pinje mamoko yudo?

¹⁷ Joma ochiwore tiyo ne Nyasaye e pinje maok mekgi, nyalo romo gi kit chiemo, dhok miwacho, timbe, kod gik mamoko kopogore ahinya gi ma ne ging’iyogo e pinjegi. Ang’o momiyo giyie dhi e pinje  mamoko to ging’eyo ni gidhi romo gi pek ma kamago?

¹⁸ Moko kuomgi gin jomisonari ma thothne tiyo tij lendo kendo mano miyogi thuolo mar tiego jomoko kaluwore gi lony ma giseyudo. Ofise Joneno ema chiwo kata chulo ne jomisonari kuonde dak kendo miyogi gimoro matin ma ginyalo konyorego. Jomoko matiyo e pinje mamoko, tiyo e ofise mag Joneno, ka moko to konyo tij gero bad ofise moriwo ofise milokoe buge e dhok mamoko, Ute Chokruok mag Alwora, kata Ute mag Romo. Imiyogi chiemo, kar nindo, kod gik mamoko madwarore. Mana kaka jo Bethel, gin bende giyudo thuolo mar dhi e chokruoge kod lendo. Omiyo gikonyo e yore mopogore opogore e kanyakla ma gintiere.

19. Gin yore mage mwanyalo nyisogo ni wadewo joma tiyo ne Nyasaye gi thuologi duto e pinje maok mekgi?

¹⁹ Inyalo timo ang’o mondo inyis ni iparo owete gi nyiminegi? Mokwongo, ber ng’eyo ni thothgi pok ong’iyo gi chiemo michamo e pinje ma gidhiyego. Omiyo sama igwelogi e gago, ber mondo ikwong ipenjgi ni chiemo mane ma degiher chamo kata bilo. Ber mondo wabed gi horuok sama gipuonjore dhowa kaachiel gi kit ogandawa. Nyalo kawogi kinde mondo giwinj tiend gik moko duto miwacho, kendo inyalo konyogi ng’eyo kaka iluongo weche moko. Gigombo ahinya ng’eyo dhokgo!

20. Gin yore mage mabeyo ma wanyalo parogo joma tiyo ne Nyasaye gi thuologi duto kaachiel gi jonyuolgi?

²⁰ Jotich Nyasaye ma tiyone gi thuologi duto tekogi dokga chien, kendo jonyuolgi bende bedo moti. Sama jonyuolgi gin Joneno, ginyalo gombo ahinya mondo nyithindgi odhi nyime e migepegigo. (3 Joh. 4) Sama jonyuolgi dwaro rit e yo makende, nyithindgi konyogi kendo limogi kinde ka kinde. Kata kamano, joma odak pacho pod nyalo konyo jonyuolgo mondo nyithindgi matiyo ne Nyasaye e pinje maoko odhi nyime timo kamano. Kinde duto ng’e ni owete gi nyimine matiyo gi thuologi duto e tij Nyasaye konyo ahinya tich maduong’ ma dhi nyime e piny mangima sani. (Math. 28:19, 20) Be kanyaklau kata mana in nyalo siro jonyuol ma nyithindgi tiyo ne Nyasaye gi thuologi duto e pinje mamoko?

21. Joma tiyo ne Nyasaye gi thuologi duto winjoga nade sama jomoko konyogi kendo jiwogi?

²¹ Joma tiyo ne Nyasaye gi thuologi duto timo kamano nikech gidwaro tiyo ne Jehova kaachiel gi jomamoko, to ok ni mondo ochulgi. Gimor gi kony moro amora ma imiyogi. Nyaminwa moro matiyo ne Nyasaye e piny machielo wacho paro ma joma ng’eny nigo niya: “Kata mana ote machuok ma ng’ato ooroni nyiso ni odewi, opari, kendo omor gi tich mitiyo.”

22. In iwuon ineno nade tiyo ne Nyasaye gi thuoloni duto?

²² Adier, tiyo ne Jehova gi thuolowa duto e tich maberie mogik kendo makelo gueth mathoth e ngima ng’ato. En migawo ma nigi pek ma mage. Kata kamano, opuonji gik mathoth, kendo okelo mor mogundho. E wi mano, en e yo maber ahinya ma jotich Nyasaye duto ikorego tiyo ne Jehova e kinde mabiro ka gin e bwo Pinyruodhe. Omiyo, wadhiuru nyime paro “tich matek” ma joma tiyo ne Nyasaye gi thuologi duto timo nikech ‘hera margi.’—1 Thes. 1:3.