Be isesomo adimba gocho mosekalo mag Ohinga mar Jarito? Ka en kamano, ne ane kabe inyalo dwoko penjo ma luwogi:

Be en gima owinjore wang’o ringre Jakristo mosetho?

Bed ni ringre ng’at motho ibiro wang’ kata ok bi wang’, luwore gi yiero ma ng’ato owuon notimo kapok otho. Kata obedo ni Muma ok wuo achiel kachiel e wi wachni, ber ng’eyo ni ringre Ruoth Saulo kod mar Jonathan wuode ne ji owang’o kae to oyiko. (1 Sam. 31:2, 8-13)—6/15, ite mar 7.

Ere kaka wanyalo bedo gadier ni Nyasaye ok ema kel gik maricho?

Yore Nyasaye duto ochikore tir. En jaadier, kendo en Nyasaye makare. Jehova ogundho gi hera matut kendo okecho ji. (Rapar 32:4; Zab. 145:17; Jak. 5:11)—7/1, ite mar 4.

Gin pek mage ma ng’ato nyalo romogo sama odhi lendo e piny ma jolendo dwarore ahinya?

Pek moko adek ma ng’ato nyalo romogo gin (1) dak e kit ngima ma ne ok ing’iyogo chon, (2) gombo pacho, kod (3) yudo osiepe e kanyakla ma odhiyeno. Joma osenyagore gi pekgi oseyudo gueth mang’eny.—7/15, ite mar 4-5.

Ang’o momiyo owete Josef nolokore kode?

Mokwongo, Jakobo nohero Josef ahinya kendo notwang’one law ma jaber. Nyiego nomako owete Josef ma giuse obed misumba.—8/1, ite mar 11-13.

Ang’o momiyo trakt magwa manyien kelo nyak kendo yot tiyogo?

Giduto olosgi e yo machalre. Moro ka moro olos e yo ma miyo wanyalo somo Muma kendo penjo wuon ot penjo. Kata bed ni wuon ot ochiwo dwoko mane, inyalo elo i traktno kendo nyise gima Muma wacho. Wanyalo nyiso wuon ot penjo manie traktno ma wabiro dwoko ka wadok lime.—8/15, ite mar 13-14.

Buk miluongo ni Peshitta ma nondik e Dho-Suria en ang’o?

Muma molok e dho-Suria ne ochak tigo e kind higni mag 100 nyaka 300 E Ndalowa. Nenore ni Ndiko moko mag dho-Grik mag Jokristo, nokwong lok e dho-Suria. Muma ma ne ondik e dho-Suria ne iluongo ni Peshitta.—9/1, ite mar 13-14.

Jonyuol ma Jokristo nyalo timo ang’o mondo girit nyithindgi kaka jokwath mabeyo?

Chiknegi iti sama giwuoyo kodi mondo ing’egi maber. Pidhgi gi chiemb chuny. Tagi e yo manyiso ni iherogi kata mana sama giketo kiawa e wi puonj mag Jokristo.—9/15, ite mag 18-21.

Gin gik mage maok nochak obedie kendo e bwo loch mar Pinyruodh Nyasaye?

Tuoche, tho, nok mar tich gi nok mar chiemo, lweny, kod dhier ok nobedie kendo.—10/1, ite mar 6-7.

En singruok mane ma yudore e Muma ma miyo jomoko thuolo mar dhi locho gi Kristo?

Bang’ chamo Pasaka mogik gi jootene, Yesu notimo singruok gi jopuonjrene ma nomakore kode. Singruogno iluongo ni singruok mar Pinyruoth. (Luka 22: 28-30) Singruogno nomiyo gibedo gadier ni gibiro locho gi Yesu e polo.—10/15, ite mar 16-17.

Chiw ane ranyisi ariyo ma nyiso ni Satan nitie adier.

Muma wacho ni Satan nowuoyo gi Yesu koteme mondo owuonde. E wi mano, e ndalo Ayub, Satan nowuoyo gi Nyasaye. Wechegi nyiso ni Satan nitie adier.—11/1, ite mar 4-5..

Gin jomage ma ‘iluongo gi nying Jehova’ ma Jakobo nowuoyo kuomgi e Tich Joote 15:14? (New World Translation)

Magi ne gin Jo-Yahudi kod joma ok Jo-Yahudi ma noloko yie margi, kendo ma Nyasaye noyiero mondo obed ogandane ma ‘lando tije madongo’ mag Jal ma noluongogi. (1 Pet. 2:9, 10)—11/15, ite mar 24-25.

Wanyalo konyo nade Jokristo ma kend margi okethore chuth?

Bed ng’at ma chiko ite maber. (Nge. 16:20, 23) Nyis ni idewogi gadier. (Fili. 2:4) Jiw Jakristo ma kendne okethore ni Jehova ong’eyo chal mare. Jiwe mondo obed machiegni gi kanyakla kendo mondo oteg winjruokne gi Nyasaye kokalo kuom lamo, puonjruok, kod paro matut e wi gik mopuonjore. (Jak. 4:8) Chiwri mar lendo kode kata iko kode chokruoge.—6/15, ite mar 10-11.