HIGNI manok mosekalo, Cesar kod chiege miluongo ni Rocio, nodak maber e boma mar California. Kuno, Cesar ne tiyo tich moro mar miyo muya manie udi obed ma liet kata mang’ich moromo, Rocio to ne tiyo e ofis laktar moro kuom seche manok e odiechieng’ kata ndalo manok e juma. Ne gin gi odgi, kendo ne gionge gi nyithindo. Kata kamano, gimoro notimore ma noloko ngimagi. Mano ne en ang’o?

E dwe mar Oktoba 2009, ofis Joneno man Amerka nooro barupe ne kanyakla duto e pinyno ka gikwayo joma olony e tije mopogore opogore opong’ fom mondo gichiwre tiyo Bethel kuom kinde mondo gikony tij yaro ofis man Wallkill, New York. Kata mana joma hikgi nokalo hik joma igweloga Bethel, ne nyalo oro kwayono. Cesar gi Rocio wacho kama: “Nikech hikwa oniang’ moromo, ne wang’eyo ni ma e thuolo kende ma wanyalo yudo e ngimawa mar tiyo Bethel. Ne ok wanyal weyo thuolo makendeno obawa!” Omiyo ne gipong’o fom mi giore mapiyo.

Higa achiel gi dire nokalo ka pok ogwelgi Bethel. Kata kamano, ne gikawo okenge momedore mondo gichop chenro ma ne giseketo kuom miyo ngimagi obed mayot. Cesar wacho niya: “Ne waloko garaj marwa obed ot ma ok ong’ad iye mondo wadagie, kendo ne waweyo odwa mondo ng’ato opang.” Ne gidar ma giweyo ot maduong’ mar gorofa monga’d iye dibiriyo ma ne en ot ma ne gisegombo bedogo. Ne gigere higni manok ma nosekalo omiyo pod ne onyien, kendo ne gidhi dak e ot matin ma ne gilosono. Cesar dhi nyime wacho kama: “Timo lokruogegi ne miyowa thuolo maber mar dhi tiyo Bethel kapo ni ogwelwa.” Ang’o ma notimore bang’ mano? Rocio pimonwa kama: “Dwe achiel kende e ma nokalo ka wadak e ot matinno, kae to ogwelwa mondo wadhi wati Wallkill kaka joma ochiwore tiyo Bethel kuom kinde. Ne waneno maler ni kuom keto ngimawa obed mayot, ne wamiyo Jehova gima nonyalo guedho.”

Mana kaka Cesar gi Rocio, nitiere owete gi nyimine miche mochiwore mondo gikony tij gedo ma dhi nyime New York State. Moko kuomgi konyo tij  yaro ofis man Wallkill, to thothgi oseyudo thuolo makende mar konyo gero ofis maduong’ mar Joneno man Warwick. * Thoth owete gi nyimine mokendore oweyo utegi mabeyo, tijegi, kod le ma gipidho mondo giti ne Jehova gi thuologi mang’eny. Be Jehova oseguedho chuny mar chiwruok ma gisenyiso? Osetimo kamano ma onge kiawa!

Kuom ranyisi, owadwa moro miluongo ni Way ma osomo tij sitima kod jaode Debra, ma hikgi hawo 60, nouso odgi kod thoth gik ma ne gin-go e taon mar Kansas ma gidar gidhi Wallkill mondo gichiwre tiyo Bethel kuom kinde. * Kata obedo ni timo kamano ne chuno ni gitim lokruoge moko e ngimagi, gineno ni lokruoge ma ne gitimogo nowinjore ndi. Debra wacho kama kowuoyo e wi tich motimo Bethel: “Seche moko awinjo mana ka gima an achiel kuom joma nie piche ma yudore e bugewa ka gedo e Paradiso!”

Melvin kod jaode Sharon ma nodak South Carolina, nouso odgi gi mwandugi mondo gikony tich ma ne dhi nyime Warwick. Kata bedo ni chiwruok kamano ne ok yot, gineno ni en thuolo makende tiyo tich ma ibiro par ahinya kuom higni mang’eny. Giwacho kama: “Mor ma yudore kuom ng’eyo ni itimo gimoro ma biro konyo riwruok mar owete me piny ngima, en mor ma ok pimre.”

Kenneth, ma nosebet ka tiyo tij gedo kendo koro noseritaya, kod Maureen jaode, ma gin johigni 50 gi dire, nodar oa California mondo gidhi gikony tich ma ne dhi nyime Warwick. Mondo ne gidar, ne gikwayo nyaminwa moro e kanyakla ma ne gintie oritnegi dala kendo ne gikwayo mondo joodgi Kenneth okony wuon-gi ma koro hike noniang’. Be giyuago ang’e nikech ne gichiwore dhi tiyo Bethel? Ooyo! Ken wacho kama: “Ber ma wayudo ok wachre. To be mano koro nyiso ni onge pek moro amora ma waromogo? Ooyo. Kata kamano, wadak e ngima mopong’ gi mor malich, kendo ma e tich ma wanyalo jiwo ng’ato mondo oyier.”

Thoth joma osechiwore tiyo tich ma dhi nyimeno, nyaka ne lo pek moko mogwaro. Kuom ranyisi, William gi Sandra, ma sani johigni 60 gi wiye, nodak Pennsylvania ka gimong’o ngima malich. Ne gin gi kambi ma ne loso gik mopogore opogore mag masinde kendo ne gindiko ji 17. Kanyakla ma ne gintiere e ma ne gisebedoe chakre tin-gi, kendo thoth wedegi odak machiegni kanyo. Omiyo ka thuolo noneno mar dhi tiyo Wallkill, ne ging’eyo ni mano ne dhi chunogi weyo thoth joma ne ging’eyo kod gik ma ne ging’iyogo. William wacho kama: “Gima ne teknwa ahinya ne en weyo alwora  ma ne wang’iyogo.” Kata kamano, bang’ lemo nyading’eny, ne ging’ado mar dhi nyime gi yiero ma ne gisetimo, kendo ok giyuag ang’e kata matin. William medo wacho niya: “Mor ma ng’ato yudo ka otiyo achiel kachiel gi jood Bethel ok nyal pim gi gimoro amora. An kaachiel gi jaoda Sandra wamor gi mor ma pok nwabedogo!”

Ricky, ma ne en maneja mar tij gedo e boma mar Hawaii, ne ogwel mondo obed achiel kuom joma nochiwore tiyo Bethel kuom kinde, ka okonyo tich man Warwick. Chiege miluongo ni Kendra, ne oyie mondo jaode odhi oti kuro. Kata kamano, ne nitie wach moro mapek ma pod ne chando pachgi. Ne gin gi wuowi ma jahigni 11 ma ne iluongo ni Jacob. Ne gipenjore kabe dibed maber dhi New York State, kendo kabe nyathigino ne dhi ng’iyo gi ngima ma kuno.

Ricky wacho niya: “Achiel kuom gik ma ne wagombo ahinya ne en yudo kanyakla ma nigi rowere ma timo maber e weche Nyasaye. Ne wadwaro mondo Jacob obed gi osiepe mang’eny mabeyo.” Gima notimore en ni kanyakla ma ne gidhiye nyithindo ne nok ahinya, to jo Bethel ne bet ogwaro. Ricky wacho kama: “Bang’ dhi e chokruogwa mokwongo, napenjo Jacob kaka noneno kanyakla manyienno, to ahinya ahinya bedo ni ne onge mbesene. Nonyisa niya, ‘Kik idew baba. Osiepega biro bedo owete matindo ma tiyo e Bethel.’”

To mana kaka Jacob nowacho, jo Bethel matindogo e ma nobedo osiepene. Mano nokelo ber mane? Ricky wacho niya: “Chieng’ moro gotieno, ka nakalo machiegni gi kama nyathiwa ne ninde, nawuoro ahinya neno ka taya pod liel. Naparo ni adhi juke kotugo tuke kompyuta, to nayude kosomo Muma! Kane apenje ni otimo ang’o, Jacob nonyisa ni, ‘Atemo bedo ja Bethel matin, kendo adwaro tieko somo Muma gi higa achiel.’” Mano ne omoro Ricky gi Kendra ahinya, ok mana ni nikech Ricky nyalo konyo tije gedo man Warwick, to bende nikech dargino osemiyo winjruok me kind wuodgi gi Nyasaye omedo bedo motegno.—Nge. 22:6.

Tij gedo ma dhi nyime Wallkill kod Warwick gikone biro rumo. Omiyo joma ne orwak mondo okony tich ong’eyo ni tich ma gitimo Bethel chieng’ norum. Be owete gi nyiminego nigi kibaji ni gibiro chomo kanye kata gibiro timore nade bang’e? Ooyo ngang’! Thothgi nigi paro machal gi ma owadwa moro gi chiege ma johigni 50 ma wuok Florida nigo. John, ma en maneja mar tij gedo, kod chiege miluongo ni Carmen, ma tiyo Warwick kaka joma ochiwore  tiyo Bethel wacho kama: “Nyaka chop sani, waseneno kaka Jehova oseritowa e yore mopogore opogore. Wawachoga ni Jehova ok nyal bet ni okelowa kae sani to bang’e obiro jwang’owa.” (Zab. 119:116) Luis, ma nigi lony e loso kuonde milieroe gige nego mach, kaachiel gi jaode Quenia tiyo Wallkill. Giwacho niya: “Waseneno lwet Jehova kaka lach nikech osebedo komiyowa gik ma wadwaro e ngima. Kata obedo ni ok wang’eyo kaka obiro ritowa, kinde mobiro ritowae, kod kama obiro timoe kamano, wan gadiera chutho ni obiro dhi nyime ritowa.”—Zab. 34:10; 37:25.

Nitie gik ma ne nyalo mono thoth joma ochiwore konyo tij gedo ma dhi nyime New York kik ochiwre timo tijno. Kata kamano, ne ging’ado mar temo Jehova mana kaka ogwelogi mondo gitim kowacho niya: “Temieuru timo kamano ane, ka ok nayaw dirise mag polo, kendo amiu gik mabeyo mogundho, ma onge kama ikete.”—Mal. 3:10, The Bible in Luo, 1976.

Be in be iikori temo Jehova mondo iyud gueth mage mogundho? Lem kendo non gima inyalo timo mondo iriw lwedo tich ma jaber ma pod dhi nyime sani, bed ni en tij gedo ma dhi nyime New York kata tij gero ute mamoko ma siro tij Nyasaye, mondo ine gi wang’i iwuon kaka Jehova biro guedhi.—Mari. 10:29, 30.

Dale, ma en injinia molony e loso gik machalo ndara, olalo, gi gik ma kamago, kaachiel gi Cathy jaode ma nodak Alabama, mor ahinya gi tich ma gitiyono. Gichiwore tiyo Wallkill, kendo giwacho niya: “Ka inyalo choko chir mar weyo gik mabeyo ma ing’iyogo, ibiro bedo gi thuolo mar neno kaka roho mar Jehova tiyo.” To en ang’o ma dwarore mondo ichiwri? Dale wacho kama: “Ket ngimani obed mayot, mayot kaka nyalore. Ok iniyuag ang’e ngang’!” Gary, ma wuok North Carolina, osebedo maneja e tij gedo kuom higni 30 kama. En kaachiel gi chiege Maureen, giwacho ni achiel kuom gueth ma gimorgo ka gitiyo Warwick en “romo kendo tiyo gi owete gi nyimine mang’eny mosetiyo ne Jehova ka gin Bethel.” Gary medo wacho niya: “Mondo iti Bethel, dwarore iket ngimani obed mayot, kendo mano e yo maberie mogik mar dak e piny masanini.” Jason, ma ne tiyo e kambi molony e weche sitima, kaachiel gi Jennifer, ma wuok Illinois, wacho ni tiyo tije mag Bethel ka in Wallkill, en “achiel kuom yore minyalo nenogo kaka ngima nochal e piny manyien.” Jennifer medo niya: “En gima ber miwuoro ng’eyo ni Jehova mor gi gimoro amora ma itimo, kendo tijno ikowa ne tich mobiro miyowa kinde mabiro. Jehova biro neno ni iyudo gueth mogundho ma ok pimre.”