AN KAACHIEL gi Gwen ne wachako puonjore miel ka wan johigni abich. Noyudo pok waromo. Kata kamano kane wadongo, ne wan gi gombo mar bedo joma mielo miend ballet. Kane wasebedo jomiel mang’ula michulo, waduto ne waweyo tijno. Ang’o momiyo ne wang’ado mar weyo miel?

David: Nonyuola e higa mar 1945 e kaunti mar Shropshire, e piny England. Wuonwa ne nigi puodho e gweng’no. Bang’ a skul, nahero miyo gwen chiemo, kwanyo tong’ ma gisenywolo kendo rito dhok kod rombe. Ndalo molor skul, nakonyoga jonyuolna kayo cham kendo seche moko nariemboga tinga.

Kata kamano, nachako bedo gi paro machielo e ngimana. Wuonwa nofwenyo ni ahero miel ahinya, nikech sa asaya ma nawinjo thum moro amora nadwaro ni amiel. Omiyo ka naromo jahigni abich, nonyiso minwa mondo otera e skul moro e gweng’ kanyo mondo apuonjra miel. Japuonjna ne paro ni an gi nyalo mar mielo miend ballet, omiyo notiega mielo miendno bende. Ka nachopo jahigni 15, nayudo sponsa ma adhi e Royal Ballet School man London. Kanyo e kama naromoe gi Gwen, kendo nokete kaka jabatha ma ne wabiroga mielgo.

Gwen: Nonyuola e boma mar London e higa mar 1944. Kane pod an nyako matin, nahero Nyasaye ahinya. Natemoga somo Muma kata kamano, ne ok awinj tiend gik ma nasomo. Motelo, kane an jahigni abich, nadhiga puonjora miel. Higni auchiel bang’e, ne wadhi e piem moriwo jomiel duto ma wuok e piny Britain, kendo an e ma nayombo kuom nyithindo. Nyathi moyombo ne yudo thuolo mar donjo e skul mar The Royal Ballet man London ma puonjo nyithindo miel. Skundni ne yudore White Lodge, ot ma jaber man Richmond Park e tong’ mar London. Ka an kuno ne asomo to bende atiegora e miel mar ballet ma ne itimo gi jopuonj molony ahinya. Kane achopo higni 16, ne adhi e Royal Ballet School moger e chuny London ne rowere madongo, to kanyo e kama narome gi David. Bang’ dweche manok, ne wachako miel kanyachiel miende mag ballet kama iluongo ni Royal Opera House ma yudore Covent Garden, e boma mar London.

David: Mana kaka Gwen nosewacho, ne wajodhi miel e Royal Opera House koda e London Festival Ballet (ma sani iluongo ni English National Ballet). Achiel kuom jopuonjwa ma ne ni Royal Ballet noyawo kambi mare mar jomiel ma wuok e piny mangima kama iluongo ni Wuppertal, e piny Jerman kendo noyierowa an gi David mondo wabi wamiel e kambineno. Kinde ma ne wan jomiel  michulo, ne wamiel kuonde sinema e piny mangima, kendo ne wamiel gi jomiel mang’ula kaka Dame Margot Fonteyn kod Rudolf Nureyev. Dak e ngima mar piemno miyo ng’ato paro ni ober moloyo jomoko, kendo ne wachiwore ahinya ne tijno.

Gwen: Nachiwora gi pacha koda chunya duto ne miel. An kaachiel gi David ne wagombo bedo jomiel man malo mogik moloyo ji duto. Namorga ahinya goyo sei e gige joma ne pakowa, kawo mich mag maua, kendo nawinjoga maber kane ji pakowa sama wamiel. Joma ne olwora ne gin joma timo timbe mag chode, joma madho ndawa kendo mer. Mana kaka jopiem mamoko, nahero dhi ir ajuoke mondo okonya.

David: Bang’ miel kuom higni mang’eny, naol gi ngima mar wuotho koni gi koni. Nikech nadongo dala, nachako gombo dak e gweng’. Omiyo e higa mar 1967, naweyo tij miel kae to nachako tiyo e puodho moro ma ne ni machiegni gi dala jonyuolna. Wuon puodhono noyiena dak e ot moro matin to achule. Bang’e nagoyo ne Gwen simo kakwaye mondo koyie to akende. Noseidho ngas e tij miel ma koro ne en achiel kuom joma miel kendgi. Lony ma ne en-go nomedore mokalo, omiyo ne en-gi yiero maduong’ kendo mapek ahinya ma nonego otim. Kata kamano, noyie gi kwayona kendo nobiro dak koda dala kata obedo ni onge gima nong’eyo e wi kit ngima ma chalo kamano.

Gwen: Kuom adier, ng’iyo gi ngima mar japur ok ne yot. Nyiedho, miyo anguro kod gwen chiemo ne gin gik ma wendo kuoma. David nochako timo kos moro ma ne dhi kawe dweche ochiko e kolej moro mar jopur mondo okonye ng’eyo yore mitiyogo sani mag pith kod pur. Mano ne miyo adong’ kenda e ot nyaka oduogi gotieno. Kindeno, noyudo ka asenyuolo nyarwa maduong’ miluongo ni Gilly. David nosejiwa ma apuonjora riembo mtoka, kendo chieng’ moro ka ne adhi taon, naromo gi Gael. Noyudo aseng’eye nikech notiyoga e achiel kuom duke man e gweng’wano.

Gael nogwela e ode mondo adhi amadhie chai. Ne wamor neno kode pichene mag arus, kendo pichane moro ne nigi joma ochokore e laro mar kama iluongo ni Kingdom Hall. Napenje ni mano to kanisa mane. Ka nonyisa ni en kaachiel gi jaode gin Joneno mag Jehova, namor ahinya. Anyalo paro ni achiel kuom weynina ne en Janeno. Bende naparo kaka wuonwa ne gerga kode, ma kinde moro nowito nyaka bugene mag lemo e kar wito yugi. Nawuoroga ahinya gimomiyo wuonwa ma  ne en ng’at mohero ji, ne bedoga mager gi waywa ma muolni.

Gikone nafwenyo gimomiyo waya noyie kuom puonj mopogore ahinya gi puonj mag dinde mamoko. Gael nonyisa gima Muma puonjo. Nokawa gi wuoro ng’eyo ni puonj mathoth, kaka ma wacho ni Nyasaye en didek kod ma wacho ni chuny ok tho, ne gin puonj ma ok osir gi Muma kata matin. (Ekl. 9:5, 10; Joh. 14:28; 17:3) Bende mano e kinde ma nakwongo nenoe nying Nyasaye ma en Jehova ei Muma.—Wuok 6:3.

David: Gwen nonyisa gik ma ne opuonjore. Anyalo paro ni kane pod atin wuonwa ne nyisaga ni asom Muma. Kuom mano, an gi Gwen ne wang’ado e chunywa mar chako puonjore Muma kaachiel gi Gael gi Derrick jaode. Dweche auchiel bang’e ne wadhi dak e taon miluongo ni Oswestry, e kaunti mar Shropshire nikech nomiwa thuolo mar bedo gi puothwa moro matin ma wachulo. Ka wan kuno, miyo moro ma Janeno miluongo ni Deirdre nodhi nyime puonjowa Muma. Mokwongo, ne watimo dongruok mos mos. Rito jamni ma ne wan-go ne miyo wabedo modich ahinya. Kata kamano, weche ma ne wapuonjore ne donjo e chunywa mos mos.

Gwen: Chandruok maduong’ ma ne nyaka akedgo ne en weyo dhi ka ajuoke. Isaiah 65:11 nokonya ng’eyo kaka Jehova neno jogo “mapedho mesa” ne nyiseche ma nono. Nokawa kinde malach kod lamo mondo akwed timbego kendo ketho gige juok ma ne ajatiyogo. Kane apuonjra ni “ng’at ma ng’awore malo owuon noduoke piny to ng’at ma duokore piny owuon nong’awe malo,” nokonya ng’eyo kit jogo ma Jehova dwaro. (Math. 23:12) Nagombo tiyo ne Nyasaye ma dewowa ahinya kendo ma nochiwo Wuode mondo obednwa rawar. Kindego noyudo ka koro wan gi nyarwa machielo, kendo ne morowa ng’eyo ni waduto kaka joot ne wanyalo dak e paradis e piny.

David: Winjo tiend weche ma nokor manie Muma kaka ma yudore e bug Mathayo sula 24 kod mar Daniel, nomiyo abedo gadier ni ma e adiera. Nafwenyo ni onge gimoro amora e pinyni ma ne nyalo loyo bedo gi winjruok maber gi Jehova. Omiyo, kaka kinde ne medo kalo, gombona mar bedo gi huma nodok chien. Nafwenyo bende ni Jehova ne ogena kaachiel gi chiega gi nyithinda e yo machal. Jo-Filipi 2:4 nomiyo aloko chunya ma aweyo keto pacha ahinya kuoma awuon kata gombo bedo gi puodho maduong’. Kar mano, ndikono nojiwa mondo aket tiyo ne Jehova obed motelo e ngimana. Naweyo madho ndawa. Timo ikruok mondo wachop e chokruok ma ne itimo Ngeso godhiambo ok ne yot nikech mago e seche mag nyiedho, to chokruok bende ne en wuodh kilomita 10. Kata kamano Gwen ne konya ahinya kendo ok ne wabare e chokruoge kata chweyo ma ok wadhi gi nyithindwa ariyo ma nyiri e tij lendo Jumapil gokinyi bang’ nyiedho.

 Wedewa ne ok mor kod lokruok ma ne watimono. Wuon Gwen ne okun kode kuom higni auchiel. Jonyuolna bende notemo geng’owa ahinya mondo kik watudre gi Joneno.

Gwen: Jehova e ma notayowa e kindego duto. To kaka ndalo ne medo kalo, owete gi nyimine e kanyakla mar Oswestry noherowa kendo ne gibedonwa kaka joodwa ma konyowa sama pek moro amora oyudowa. (Luka 18:29, 30) Ne wachiwo ngimawa ne Jehova ma obatiswa e higa mar 1972. Nadwaro tiyo matek mondo akony ji mathoth kaka nyalore mondo ong’e adiera. Omiyo nachako tij painia.

David: Tije ma ne watiyo e puothwa ok ne yot kata kamano, ne waketo chenro koda ranyisi maber ne nyithindwa e tiyo ne Nyasaye. Bang’ ndalo, ne omawa puothwa koda odwa. Ne waonge gi tij andika kendo ne wan gi nyathi machielo ma jahiga achiel. Omiyo ne wakwayo Jehova e lamo mondo okonywa kendo otawa. Ne wang’ado mar chako tiyo gi lony marwa e wach miel mi wayawo kama wapuonjoe ji miel mondo okonywa rito nyithindwa. Kinda ma ne waketo mar tiyo ne Nyasaye obed motelo nokelonwa gueth modhuro. Gima ne omorowa moloyo, en ni nyithindwa adek ma nyiri, nochako tij painia bang’ tieko skul. Gwen bende ne en painia, omiyo ne onyalo konyo nyithindwago odhi nyime bedo jopainia.

Kane nyiwa ariyo madongo, Gilly gi Denise okendi, ne waweyo wach puonjo ji miel. Ne wandiko ne ofis mondo onyiswa kama ne wanyalo dhie mondo wakony tij lendo. Ne ginyisowa taonde moko ma yudore yo milambo mar piny England. Ka koro wan mana gi Debbie nyarwa matin, an bende nabedo painia. Bang’ lendo e alworano kuom higni abich, ne okwawa kendo mondo wadhi walend yo nyandwat mar England. Bang’ kane Debbie osekendi, nwayudo thuolo makende ahinya mar dhi konyo tije gedo e pinje kaka Zimbabwe, Moldova, Hungary, kod Côte d’Ivoire. Ne watimo kamano kuom higni apar. Bang’e ne wadok England mondo wakony e tij gero Bethel man London. To nikech ne an gi lony e tij pur, ne okwaya mondo akony e tij rito puoth Bethel ma ne nitie e kindeno. Gie sani walendo kaka jopainia yo nyandwat mar piny England.

Gwen: Chiwruok ma ne watimo mokwongo mar mielo ballet ne mit mak mana ni ne en gima kadho bang’ kinde machwok. Chiwruokwa mar ariyo ma en tiyo ne Jehova, e ma duong’ie moloyo, kendo osekelonwa mor mogundho kendo masiko. Pod David en jabatha, ok e miel to e tij painia. Kinda ma wasetimo e konyo ji mathoth mondo ong’e adiera ma biro reso ngimagi osekelonwa mor ma ok nyal pim. Joma wasepuonjo adiera chalo kaka ‘barupe ma wapwoyorego’ kendo gibeyo moloyo huma mag pinyni. (2 Kor. 3:1, 2) Dine bed ni ok wang’eyo adiera, dikoro waparo apara kaka ne wamiel chon, kata neno pichewa machon, kata neno programbe ma nyiso kaka chon ne wamiel.

David: Tiyo ne Jehova osekelo lokruoge madongo e ngimawa. Mano osekonya bedo dichwo kendo wuoro maber. Muma nyisowa ni Miriam, Ruoth David, kod jotich Jehova mamoko ne omiel ka ginyisogo ni gimor. To wan kaachiel gi jomamoko bende wagombo kindego ma wanamiel ne Jehova e piny manyien.—Wuok 15:20; 2 Sam. 6:14.