1, 2. (a) Yesu noelo wach mane e wi ndalo mag giko? (b) Gin penjo mage ma wabiro nono?

NYAKA bed ni ne en thuolo makende bedo e Got Zeituni ma nomanyore gi hekalu mar Jerusalem sama Yesu ne koro weche moko ma morowa. Petro, Andrea, Jakobo, gi Johana nochiko itgi adimba sama nowuoyo e weche ma ne dhi timore kinde mabiro. Nonyisogi gik mathoth e wi ndalo giko mar piny marachni, ma gin kinde ma ne odhi locho e Pinyruodh Nyasaye. Noluwonegi ni e kindego, “jatich mogen kendo mariek” ne dhi tiyo e loye e pinyka, komiyo jotichne chiemb chuny ma ne dhi dwarore.—Math. 24:45-47.

² Bang’ mano, e weche ma nokorogo e ma bende nogoyoe ngero mar nyiri apar ma silili. (Som Mathayo 25:1-13.) We wanon ane penjogi: (1) Ngerono wuoyo e wi ang’o? (2) Jokristo mowal osetiyo nade gi puonj manie ngeroni, to timo kamano osekonyogi nade? (3) Ng’ato ka ng’ato kuomwa nyalo puonjore ang’o kuom ngerono?

3. Chon, bugewa ne lero nade ngech nyiri apar ma silili, to mano ne nyalo miyo ang’o otimre?

³ E sula mokalo, ne waneno ni jatich mogen osebedo ka timo lokruok mos mos e yo ma ilerogo Ndiko ka ijiwo puonj ma yudore e iye moloyo jiwo gima weche manie Ndikono nyalo bedo ni ochung’ne e kinde mabiro. Chon, bugewa seche moko ne lero tiend gik moko ma tindo tindo ma yudore e ngero ma Yesu nogoyo e wi nyiri apar ma silili moriwo teyni, mafuta, chupni, gi gik ma kamago. Be nyalo bedo ni wuoyo e wi gik ma tindo tindo kamano ne umo puonj maduong’ monego ji oyudi? Mana kaka wabiro neno, dwoko mar penjono en gima duong’ ahinya.

4. E ngero ma Yesu nogoyo, wanyalo fwenyo nade (a) wuon kisera? (b) nyiri ma silili?

⁴ Weuru wane ane puonj maduong’ ma Yesu ne chiwo e ngerono. Mokwongo, we wanon ane joma iwuoyo kuomgi. Wuon kisera en ng’a e ngerono? Kaendi, Yesu ne wuoyo kuome owuon. Wang’eyo mano nikech nitie kamachielo ma noluongore ni wuon kisera! (Luka 5:34, 35) To nade nyiri ma silili? E ngerono, Yesu nowacho ni nyirigo nigi ting’ mar bedo moikore ka teynigi liel sama wuon kisera ochopo. Ne ane ting’ ma chalo kamano ma Yesu nomiyo “kueth matin” mar Jokristo mowal. Nowachonegi kama: “Rwakreuru kendo beduru moikore, bende teyni magu obed ka liel, kendo onego ubed kaka joma rito ruodhgi monego oduog koa e nyasi mar kend.” (Luka 12:32, 35, 36) E wi mano, roho maler notayo jaote Paulo kaachiel gi jaote Johana mondo ondik ni Jokristo mowal ipimo gi nyiri ma silili. (2 Kor. 11:2; Fwe. 14:4) Omiyo, nenore maler ni ngero ma yudore e Mathayo 25:1-13 ne en puonj kod siem ma Yesu ne miyo Jokristo mowal.

5. Yesu nonyiso nade kinde ma ngero ma nogoyo ne dhi chako tiyoe?

⁵ Par ane bende kinde ma ngerono wuoyoe. Puonj ma Yesu nochiwo e ngerono ne dhi tiyo e kinde mane? Yesu konyowa ng’eyo kinde sie ka ngerono dhi ka rumo. Nowacho kama: “Wuon kisera nobiro.” (Math. 25:10) Mana kaka ne waneno e Ohinga mar Jarito ma Julai 15, 2013, weche ma Yesu nokoro e Mathayo 24 kod 25 wuoyo diboro e wi ‘biro’ mare ka itiyo gi wach achiel ma ogol e dho-Grik. E moro ka moro kuom bironego, Yesu ne wuoyo e wi kinde masira maduong’ kane odhi biro mondo ong’ad bura kae to oketh piny marachni. Omiyo, nenore maler ni puonj manie ngerono itiyogo e ndalo mag giko, to ahinya ahinya e kinde masira maduong’.

6. En wach mane maduong’ ma ngero mar nyiri ma silili wuoyoe?

⁶ Ngerono wuoyo e wi ang’o? Par ane weche molworo ngerono. E Mathayo sula mar 24, Yesu nowuoyo e wi jatich mogen kendo mariek. Jatijno ne dhi bedo grup moro matin mar owete mowal ma ne dhi tayo Jokristo mamoko e kinde mag giko. Yesu nochiwo siem ne owetego mondo gisik ka gichung’ motegno. Kae to e Mathayo sula mar 25, otiyo gi ngero mar nyiri ma silili e chiwo puonj ne Jokristo mowal duto modak e ndalo giko kojiwogi mondo ‘gisik ka gineno,’ nono to pokgi ma jaber ne dhi bayogi. (Math. 25:13) Koro we wanon ngeroni mondo wane kaka Jokristo mowal osetiyo gi puonj manie iye.

7, 8. (a) Gin kido ariyo mage ma nokonyo nyiri mariek? (b) Jokristo mowal osenyiso nade ni giikore?

⁷ Ngero ma Yesu nogoyono nyiso maler ni nyiri mariek nokiyo biro mar wuon kisera, to mofuwo ok notimo kamano. Nitie kido ariyo ma nokonyo nyiri mariekgo orit wuon kisera. Kidogo gin: ne giikore maber kendo ne gibedo motang’. Nyiri ma ne omi migawo mar rito wuon kisera e otienono, ne dwarore ni owe teynigi ka liel kendo nonego gibed motang’ e seche duto mag otienono nyaka chop kama wuon kisera moloe gi mor. Mopogore gi nyiri mofuwo, nyiri abich noikore maber gadier nimar bang’ olo mafuta moromo e teynigi, ne giting’o moko e chupni. Be Jokristo mowal osenyiso ni giikore e yo ma kamano?

⁸ Gisetimo kamano gadier! E kinde duto mag ndalo giko, Jokristo mowal osechalo gi nyiri abich mariekgo, ka giikore chopo migawo momigi nyaka giko. Ging’eyo ni tiyo ne Nyasaye biro chunogi ni giwe manyo mwandu mag piny Satan. Gichiwore chuth tiyo ne Jehova nikech gihere kaachiel gi Wuode kendo gimakore kodgi, to ok ni nikech giko chiegni. Girito timgi makare e nyim Nyasaye, kendo ok wuondgi gi paro kod chuny mar pinyni ma jiwo ji obed gi mwandu, oluw timbe maricho, kendo obed joma oherore giwegi. Omiyo, gidong’ ka giikore, ka girieny kaka ler, ma kata ka Wuon kisera nenore ka gima odeko, to ok gigalre e yo moro amora.—Fili. 2:15.

9. (a) Yesu nochiwo siem mane kuom wach nong’no? (b) Jokristo mowal osetimo ang’o bang’ winjo dwol ma kok ni “Wuon kisera osechopo”? (Ne bende weche moler piny.)

⁹ Kido mar ariyo ma nokonyo nyiri mariekgo en ni ne gibedo motang’. Be en gima nyalore mondo nong’no oter Jakristo ka Jakristo mowal e otieno ma rabora sama girito wuon kisera? Mano nyalore! Ne ni Yesu nowacho ni “nong’no noterogi giduto” kargi nyiri apar “mi ginindo” e kinde ma ne nenore ni wuon kisera deko. Yesu nong’eyo maber ni kata ng’ato oikore maber ma chalo nade, pod nindo nyalo tere nikech ringruok nyap. Jokristo mowal osetemo matek ahinya mondo gisik ka gineno mondo nindo kik tergi. E ngerono, nyiri apargo duto noa malo bang’ winjo dwol ma nokok niya: “Wuon kisera osechopo!” To mana nyiri mariek kendo motang’ e ma nonano nyaka giko. (Math. 25:5, 6; 26:41) To nade Jokristo mowal e kindegi? E kinde duto mag ndalo giko, gisebedo ka ginyiso ni giwinjo dwol ma wacho ni “Wuon kisera osechopo.” Giseyie gi gik ma nyiso maler ni Wuon kisera chiegni biro, kendo giikore ne biro mare. * Kata kamano, weche ma Yesu tiekogo ngerono nyiso gik ma ne dhi timore kinde moro sie. E yo mane?

10. Bedo ni nyiri mofuwo kwayo mariek mafuta to ituonogi miyo wapenjore penjo mane?

¹⁰ Sama ngerono dhi ka rumo, nyiri mofuwo kwayo nyiri mariek mafuta to mariekgo tuonogi. (Som Mathayo 25:8, 9.) Mano miyo wapenjore niya: “Gin kinde mage ma Jokristo mowal biro  tamore konyo jomamoko ma kwayogi kony?” Dwoko mar penjono nyalo yudore ka wanono kinde ma wechegi ne dhi timoree. Par ni nyocha olernwa machiegni ni Yesu ma e Wuon kisera nobi ng’ado bura ka masira maduong’ chiegni rumo. Kuom mano, donge wanyalo wacho ni bath ngeroni biro timore kodong’ mana kinde matin to masira maduong’ rumo? Nyalo bedo kamano nikech kochopo kindeno biro yudo ka Jokristo mowal oseketnegi kido kata alama mogik.

11. (a) Ang’o ma biro timore matin nono kapok masira maduong’ ochakore? (b) Nyiri mariek ne temo wacho ang’o kane ginyiso mofuwo ni odhi onyiew mafuta?

¹¹ Omiyo, kapok masira maduong’ ochakore, Jokristo mowal duto momakore gi Nyasaye ma pod nie piny biro yudo ka oseketnegi alama mogik. (Fwe. 7:1-4) Bang’ mano, gibiro bedo gadier ni gidhi e polo. To tem ane paro higni moko kapok masira maduong’ ochakore. Ang’o ma biro timore ne Jokristo mowal ma ok ochung’ motegno nyaka giko? Ok gibi yudo pokgi mar dhi e polo. Mano nyiso maler ni ok bi ketnegi alama mogik kapok masira maduong’ ochakore. E kindego, Jokristo mamoko mochung’ motegno ibiro wal gi roho mondo okaw kargi. Sama masira maduong’ chakore, Jokristo mowal ma chalo gi nyiri mofuwoka, biro bwok neno ka iketho Babilon Maduong’. Nyalo bedo ni kindeno e ma gibiro fwenyo ni kare ok ne giikore ne biro mar Wuon kisera. E sama koro sa osedekono, ang’o ma biro timore ka gikwayo kony? Dwoko yudore e ngero ma Yesu nogoyono. Nyiri mariek notamore pogo ne mofuwo mafuta, ka ginyisogi ni gidhi ginyiew mekgi giwegi. Kik wiyi wil ni gigi timore “e dier otieno tir.” Be ne gidhi yudo joma usonegi mafuta adier? Ooyo. Ne giselewo.

12. (a) Kinde masira maduong’, ang’o ma biro yudo joma ne gin Jokristo mowal to noweyo tiyo ne Nyasaye kapok oketnegi alama mogik? (b) Ang’o ma biro timore ne joma ket gi nyiri mofuwo?

¹² E yo ma chalo kamano bende, kinde ma masira maduong’ dhi nyime, Jokristo mowal mochung’ motegno ok bi konyo ng’ato ang’ata moweyo makore gi Nyasaye. Onge kony moro amora ma biro bedoe. Biro yudo ka sa oselewo ahinya. To koro, ang’o ma biro timorenegi? Yesu nolero gima notimore ne nyiri mofuwogo kane gidhi nyiewo mafuta ma be ne onge: “Wuon kisera nobiro. Nyiri ma noseikore nodonjo kode e nyasi mar kend, kae to ne olor dhoot.” Sama Kristo obiro e duong’ne ka masira maduong’ chiegni rumo, obiro choko Jokristo mowal momakore kode mi otergi e polo. (Math. 24:31; 25:10; Joh. 14:1-3; 1 Thes. 4:17) Ibiro lor dhoot ne Jokristo ma nowal to ok nomakore kode, ma be chalo gi nyiri mofuwo. Gibiro chalo ka joma ywagore niya: “Jaduong’, Jaduong’, yawnwae!” Kata kamano, gibiro yudo dwoko ma chalo gi ma ibiro mi ji mathoth ma ipimo gi diek sama giyudo kum. Yesu biro nyisogi niya: “Awachonu adier, ok ang’eyou.” Lit yawa!—Math. 7:21-23; 25:11, 12.

13. (a) Ang’o momiyo ok dwawach ni thoth Jokristo mowal biro weyo makore gi Nyasaye? (b) Ang’o momiyo siem ma Yesu nochiwono nonyiso ni en gadier gi jolupne mowal? (Ne picha manie chak sulani.)

¹³ Kaluwore gi weche ma wanonogo, wanyalo ng’ado paro mane? Be Yesu ne wacho ni thoth jolupne mowal ne dhi ng’anyo ma Jokristo mamoko kaw kargi? Ooyo. Kapok nogoyo ngerono,  nosechiwo siem ne “jatich mogen kendo mariek” mondo kik obed jatich marach. Mano ok nyis ni nogeno ni mano e gima ne dhi timore. E yo ma chalo kamano, ngero mar nyirigo chiwo mana siem motegno. Mana kaka abich nofuwo to abich ne riek, Jakristo ka Jakristo mowal nigi thuolo mar yiero kabe obiro bedo moikore kendo motang’, kata obiro bedo mofuwo koweyo tiyo ne Nyasaye. Notel ne jaote Paulo gi roho maler mondo ondik wach ma kamano kane ondiko ne Jokristo wetene mowal. (Som Jo-Hibrania 6:4-9; pim gi Rapar mar Chik 30:19.) Ne ni Paulo nochiwo siem mager, to pod nowacho ni en gadiera chuth ni Jokristo wetene ne dhi yudo gik ‘mabeyo moloyo’ ma ne ni nyimgi. Kamano bende, siem ma Kristo nochiwo e ngerono, ne nyiso ni noherogi kendo ne en gadier kodgi. Kristo ong’eyo ni moro ka moro kuom jotichne mowal nyalo chung’ motegno mi yud pok mare!

14. Ang’o momiyo ngero mar nyiri apar ma silili konyo nyaka Jokristo ma gin “rombe mamoko”?

¹⁴ Nikech Yesu nogoyo ngero mar nyiri apar ma silili ne jolupne mowal, be mano koro nyiso ni ngerono ok omako “rombe mamoko” mag Kristo? (Joh. 10:16) Ok en kamano kata matin! Par ni puonj maduong’ ma yudore e ngerono en ni, “Sikuru ka uneno.” Be wachno omako mana Jokristo mowal kende? Kinde moro Yesu nowacho niya: “Gima awachonu awacho ne ji duto niya: Sikuru ka uneno.” (Mari. 13:37) Yesu dwaro ni jopuonjrene duto oik chunygi ne tich momigi kendo gin bende gisik ka gineno. Omiyo, Jokristo duto luwo ranyisi maber mar Jokristo mowal mar keto tij Nyasaye obed mokwongo e ngimagi. Ng’ato ka ng’ato kuomwa bende onego opar ni nyiri mofuwo nokwayo mariek mafuta, to nyirigo notuonogi. Mano konyowa ng’eyo ni onge ng’ato ang’ata ma nyalo tiyo ne Nyasaye e lowa, bedonwa e adiera, kata ikore ne odiechieng Jehova e lowa. Ng’ato ka ng’ato kuomwa biro chung’ owuon e nyim Jang’ad-bura ma Jehova osepwodho. Nyaka waikre, nimar Kristo chiegni biro!

15. Ang’o momiyo keny ma Kristo biro timo gi miahane en gima moro Jokristo duto madier?

¹⁵ Jokristo duto biro yudo ber ma keny ma biro timore e ngero ma Yesu nogoyono nokel. Be nitie ng’ato ang’ata kuomwa ma ok mor gi keny ma biro timoreno? Biro yudo ka Jokristo mowal nie polo; bang’ Har–Magedon, gibiro bedo miaha mar Kristo. (Fwe. 19:7-9) Keny ma notimre e polono biro konyo ji duto manie piny nikech obiro kelo sirkal makare. Bed ni wabiro yudo pok e polo kata e piny, we wang’aduru waduto mar dhi nyime tiyo gi puonj maduong’ ma yudore e ngech nyiri apar ma silili. Weuru wanyis ni waikore, kendo wabed motang’ sama warito gik mabeyo ma Jehova osingonwa!