KANE osebatis Anita * mobedo Janeno mar Jehova, chwore nochako kwede kendo bedo mager kode. Anita wacho niya: “Notamaga dhi e chokruoge kendo ne okwera ni kik aluong kata mana nying Nyasaye. Luongo aluonga nying Jehova, ne miyo chwora iye wang’ koda matek.”

Pek machielo ma Anita noromogo ne en puonjo nyithinde ong’e Jehova. Owacho kama: “Nogoya marfuk e oda awuon. Ne ok anyal puonjora gi nyithinda e lela kendo ne ok anyal dhi kodgi e chokruoge.”

Gima notimore ne Anita, nyiso maler ni akwede ma wuok kuom joodwa nyalo temo yiewa kaka Jokristo. Mano bende e gima nyalo timore ka tuwo moro oyudo ng’ato, ka nyathine otho, ka chiege kata chwore otho, kata ka achiel kuom joodgi oweyo Jehova. Omiyo, en ang’o ma nyalo konyo Jakristo mondo odhi nyime tiyo ne Jehova kochung’ motegno?

Kapo ni gik ma chalo kamagi oyudi, ibiro timo ang’o? Jaote Paulo nowacho niya: ‘Dwarore ni ibed gi sinani.’ (Hib. 10:36) Kata kamano, en ang’o ma nyalo konyi mondo ibed gi sinani?

Achiel kuom yore madongo ma nyalo miyowa teko mar nano e tembe ma waromogo, en wuoyo gi Nyasaye e lamo ka wakwaye mondo okonywa. Wane ane ranyisi ma luwoni. Chieng’ Wuok Tich moro, nitie gimoro marach ma notimore ne Ana. Chwore ma ne gisedakgo kuom higni 30 notho apoya nono. Ana wacho niya: “Chieng’no nodhi tich to ok noduogo. Ne en mana jahigni 52 kende.”

Ana nonyagore nade gi masirano? Tich ma notiyo nomiyo obedo modich nikech tijno ne dwaro ni oket pache duto e tich. Kata kamano, mano ok notiekone lit ma ne en-go. Owacho kama: “Nanyiso Jehova weche te manie chunya ka akwaye mondo okonya anyagra gi lit ma ne an-gono.” Be Jehova nodwoko kwayoneno? En gadier ni Jehova nodwoke. Owacho niya: “Kuwe ma Nyasaye kende e ma chiwo nohoya kendo nomiyo abedo gi paro mokuwe. An gadier ni Jehova biro chiero chwora.”—Fil. 4:6, 7.

Jehova ma en Jawinj “kwayo mar ji,” osesingore ne jotichne ni obiro miyogi gimoro amora ma dikonygi siko ka gitiyone ka gichung’ motegno. (Zab. 65:2) Donge iyie ni mano en singo ma jiwo yiewa gadier? Donge singono konyi neno ni kata mana in bende inyalo nano?

Jehova osebedo ka tego joge kotiyo gi kanyakla mag Jokristo. Kuom ranyisi, e kinde ma kanyakla man Thesalonika ne kalo e bwo sand mager, Paulo nojiwogi niya: “Dhiuru nyime kujiworu e kindu kendo gerreuru ng’ato gi ng’ato mana kaka adier sani utimo.” (1 Thes. 2:14; 5:11) Kuom bedo machiegni kendo konyore ng’ato gi ng’ato, Jokristo man Thesalonika nonano e bwo tem mager. Sinani ma ne gitimo ketonwa ranyisi maber e kindegi kendo fwenyonwa gimoro ma nyalo konyowa nano.

Bedo gi osiepe mabeyo e kanyakla nyalo konyowa mondo watim “gik ma gerowa waduto.” (Rumi 14:19) To mano en gima dwarore ahinya sama masira moro oneno. Paulo owuon noromo gi chandruoge mang’eny kendo Jehova nomiye teko mar nano. Seche moko Nyasaye ne jajiwe ahinya kotiyo gi Jokristo wetene. Kuom ranyisi, kane Paulo ooro barua ne kanyakla man Kolosai, nondiko nyinge owete moko e baruano ma be nooro ne kanyaklano mos. Nowacho kama kuom owete ma nooro mosgo: “Gisebedo joma kelona hoch ahinya.” (Kol. 4:10, 11) Ee, hera ma ne giherogo Paulo nomiyo gihoye kendo gijiwe kane en e chandruok. Nyalo bedo ni in bende Jokristo ma un-go e kanyakla osejiwi kendo osetegi e yo ma chalo kamano.

Yo machielo ma Nyasaye konyowago e kanyakla mar Jokristo en miyowa jodong-kanyakla. Owete ma nigi yie motegnogi, chalo “kaka kar buto ka yamo kudho matek, kendo kaka ka mogeng’ore ni koth maduong’; kaka aore mag pi e gweng’ motuwo, kaka tipo mar luanda maduong’ e piny ma onge pi.” (Isa. 32:2) Mano doko wach ma duogo chuny! Be idhiga irgi mondo gikonyi? Jodong-kanyakla nyalo jiwi kendo siri mondo inan.

En adier ni jodong-kanyakla ok nyal timo honni mondo gitieknwa chandruoge duto ma wan-go. Girem kendo gin “mana dhano ma nigi nyawo kaka [wan].” (Tich 14:15) Kata kamano, lamo margi nyalo konyowa ahinya. (Jak. 5:14, 15) Owadwa moro modak e piny Italy kendo mosedak kuom higni mang’eny gi tuwo moro ma nyoso leche (muscular dystrophy) nowacho niya: “Hera ma owete noherago kod kaka ne gilimaga nokonya nano.” Nikech Jehova omiyowa jodong-kanyakla mondo ojiwwa, donge inyalo dhi irgi kapo ni iyudo chandruok moro?

Nitie yore mamoko ma nyalo konyowa dhi nyime timo sinani. Achiel kuomgi en luwo chenro moketi mar yudo chiemb chuny. Wane ane gima notimore ne owadwa moro miluongo ni John ma jahigni 39, ma noyud gi tuwo mar kansa. Owacho niya: “Naparo ni tuwono ne ok nyal maka nikech hika ne pod tin.” Gie kindeno, wuod John ne en mana jahigni adek kende. John medo wacho kama: “Mano ne nyiso ni koro jaoda ne nigi ting’ mar rito wuodwa, rita, kendo konya seche ma adhi e thieth.” Thieth miluongo ni chemotherapy ne weyoga John ka ool malich kendo ka chunye siko lewe. To ok mago kende. Wuon John bende noyudo tuwo moro ma ok thiedhre kendo ma gikone ne dhi nege, omiyo ne nyaka ng’ato rite.

John gi joodgi ne dhi nyagore nade gi weche matekgo? Owachonwa niya: “Kata obedo ni naolga, najatimo kinda mondo joodwa oluw chenro duto mag lamo. Ne wadhiga e chokruoge duto, ne walendoga juma ka juma, kendo timo lamo marwa mar joot kata bed ni seche moko weche ne tek.” John nofwenyo ni en gima dwarore ahinya mondo ng’ato obed gi winjruok motegno gi Jehova. Be nitie paro ma onyalo ng’ado ne joma bende romo gi pek moko e ngimagi? Owacho niya: “Ka kibaji ma kwongoga bedo oserumo, teko ma Jehova chiwo kod herane pong’oga chuny kendo gologa paro ma ok owinjore. Jehova nyalo miyi ibed motegno mana kaka osetimona.”

Onge kiawa ni ka Nyasaye osirowa, to wanyalo nano e tembe kata e chandruoge ma wanyalo romogo sani kata e kinde mabiro. We wadhiuru nyime geno Jehova ka walemo mondo okonywa, wamak osiep gi owete gi nyimine e kanyakla, wawe jodong-kanyakla ojiwwa, kendo waluw chenro duto moketnwa mag lamo. Ka watimo kamano, wabiro nyiso ni watimo kaka jaote Paulo nojiwowa ka nowacho niya: “Dwarore ni ubed gi sinani.”