NG’ATO mulo gok Kingsley, kae to Kingsley chako somo Muma. Mano e twage mokwongo e Skul mar Tij Nyasaye. Osomo wechego mana kaka ondikgi ma ok okal kata wach achiel. To nitie gimoro miwuoro! Ang’o momiyo osomo ma ok ong’i Muma?

Kingsley odak Sri Lanka, kendo en muofu. E wi mano, ite nok, kendo ong’ol ma chuno ni nyaka obed e ndiga midhiro eka odhi kamachielo. Ere kaka Kingsley nokelo ng’eyo Jehova ma chop kama koro onyalo golo twak e Skul mar Tij Nyasaye? We mondo alernu.

Ka nakwongo romo gi Kingsley, ne awuoro ahinya siso ma ne en-go mar ng’eyo adiera mag Muma. Noyudo osepuonjore gi Joneno mag Jehova mang’eny, kendo buge mar Ujuzi Uongozao Kwenye Uhai Udumuo Milele e Braille ne koro oti ahinya. * Noyie mondo achak puonje kendo, kata kamano ne wan gi pek moko ariyo.

Mokwongo, Kingsley nodak kama iritoe jomoti kod ma ong’ol e yore mopogore opogore. Nikech koko ne ng’eny kama gidakieno to Kingsley be ne ite nok, ne chuna ni ating’ dwonda malo kendo wuoyo matek. Mano ne miyo joma ne ni kanyo duto winjowa seche ma ne wapuonjore juma ka juma!

 Mar ariyo, Kingsley ne nyalo somo kendo mako mana weche manok kuom gik ma wapuonjore. Mondo Kingsley oyud ber kuom gik ma ne wapuonjore, notimoga ikruok maber. Ne osomoga nyadinwoya weche ma onego wapuonjre ka pok abiro, osom ndiko e Mumbe mar Braille, kendo notemo paro dwoko mag penjo duto. Tiyo gi yorni ne konyo ahinya. Sama ne wapuonjore, nojapedho law moro kae to obetie koluowo tiendene. Sama ne olero gima opuonjore, nowuoyo gi dwol maduong’ komor malich ka koni tiendene pamo dier ot. Mapiyo nono, ne wachako puonjore diriyo e juma kendo puonjruok ka puonjruok ne kawo seche ariyo!

Kingsley ne gombo ahinya dhi e chokruoge e Od Romo, to timo kamano ne ok yot. Ne dwarore ni okonye bet kendo wuok e ndike midhiro, donjo kendo wuok e mtoka, kaachiel gi Od Romo. Kata kamano, owete gi nyimine e kanyakla ne chiwore mar konye ka giwilore, kendo ne gineno mano kaka thuolo makende ahinya. Sama chokruoge ne dhi nyime, Kingsley ne ketoga spika machiegni gi ite, nochiko ite maber, kendo nochiwoga nyaka paro!

Bang’ puonjruok kuom kinde, Kingsley nong’ado mar donjo e Skul mar Tij Nyasaye. Jumbe ariyo ka pok ogolo twage mokwongo mar somo Muma, napenje ka be otimoga ikruok. Nodwoka gi chir niya: “Kamano Owadwa, asenwoye chiegni nyadi 30.” Napwoye kuom kinda ma noketo, kae to akwaye mondo osom ka awinje. Noelo Mumbe, moketo lith lwetene e weche mondik e dho Braille, kae to ochako somo. Kata kamano, nafwenyo ni lwetene ok ne sud sama osomo kaka nosebedoga kotimo. Noyudo osemako gi wiye weche duto ma nonego osom!

Nang’iye ka koni to pi wang’a chuer, kendo ne chalona ka lek moro. Napenjo Kingsley kaka nomako wechego duto bang’ somogi mana nyadi 30 kende. Nodwoka niya: “Ok kamano, asebedo ka asome nyadi 30 odiechieng’ kodiechieng’.” Kuom kinde mokalo dwe achiel, Kingsley ne bedoga e law ma nojapedhogacha, kosomo nyadinwoya wechego mochopo kama omakogi gi wiye.

Odiechienge mar golo twak e Od Romo nochopo. Kane Kingsley otieko migape, ji duto e kanyakla nopamo matek gi ilo, kendo ng’enygi noywak kane gineno kinda ma japuonjre manyienno nigo. Achiel kuom jolendo ma noseweyo golo twak e Skul mar Tij Nyasaye nikech luoro, nokwayo mondo ochak orwake e skul kendo. Nikech ang’o? Nyaminwano nowacho kama: “Ka Kingsley nyalo, kare an be anyalo!”

Bang’ puonjruok Muma kuom higni adek, Kingsley nochiwore ne Jehova, kendo nobatise tarik 6 dwe mar Septemba, e higa mar 2008. Kingsley nodhi nyime chung’ motegno ka en Janeno nyaka chieng’ ma nothoe tarik 13 e dwe mar Mei, higa mar 2014. Ne en gi geno ni kodonjo e Paradiso, to obiro dhi nyime timo dwach Nyasaye ka koro en gi teko kod ngima makare. (Isa. 35:5, 6)—Kaka ileronwa gi Paul McManus.