1, 2. (a) Gin gueth mage ma igeno yudo e Paradiso? (Ne picha manie chak sulani.) (b) Gin gueth mage motudore gi lamo Jachuechwa ma bende wabiro neno e piny manyien?

THOTHWA kowinjo kiwuoyo kuom “ngima madier,” to gima biro e pachwa en geno mar dak nyaka chieng’ e Paradiso e piny. Jaote Paulo nolero ni “ngima madier” en “ngima ma nyaka chieng’.” (Som 1 Timotheo 6:12, 19.) Wageno dak e ngima ma biro dhi nyime nyaka chieng’ kendo ma nokelnwa mor kod ber mosiko. Ok yot ng’eyo chuth kaka ngima nobed e kindego, ka wachiewo pile ka pile ma onge midekre ma chandowa kata gima chando pachwa kod chunywa. (Isa. 35:5, 6) Tem ane paro kaka wabiro bedo mamor ka wan kanyachiel gi wedewa kod osiepewa moriwo nyaka mochier! (Joh. 5:28, 29; Tich 24:15) Bende, wabiro bedo gi thuolo mar medo lony e weche sayans, thum, gedo, kendo lony e yore mamoko.

² Kata obedo ni wageno yudo gueth ma chalo kamago e piny manyien, gueth maduong’ie moloyo ma wabiro bedogo otudore gi lamo Jachuechwa. Mano kaka wabiro bedo mamor ng’eyo ni nying Jehova osepwodhi kendo ni chuech duto riwo ratiro mare mar bedo jaloch e wi gik moko duto! (Mat. 6:9, 10) Neno kaka Jehova chopo dwaro ma ne en-go ne dhano kod piny a chakruok biro morowa sidang’. Tem ane paro kaka sudo machiegni gi Jehova biro bedo  mayot kaka wamedo bedo dhano makare chuth!—Zab. 73:28; Jak. 4:8.

3. En ang’o monego waikrene sani?

³ Wanyalo yudo guethgo duto nikech Yesu nowacho ni “kuom Nyasaye gik moko duto nyalore.” (Mat. 19:25, 26) Kata kamano, kapo ni wadwaro dak e piny manyien kendo dhi nyime dak bang’ Loch Kristo mar Higni Aluf Achiel, nyaka wakaw okang’ sani mondo ‘wamak matek’ ngima ma nyaka chieng’. Nyaka wadag ka wang’eyo ni piny marachni chiegni rumo kendo onego watim gik ma biro miyo wabed moikore dak e piny manyien. Wanyalo timo mano nade ka sani to pod wadak e piny marachni?

4. Chiw ane ranyisi ma nyalo konyowa ng’eyo kaka wanyalo ikore ne dak e piny manyien.

⁴ Ere kaka wanyalo ikore sani ne dak e piny manyien ma Nyasaye osingonwa? Tem ane paro ni ichano dar mondo idhi idag e piny machielo. Ere kaka inyalo ikori ne lokruok ma kamano? Inyalo chako puonjori dhok ma ji wacho e pinyno. Ng’eyo kitgi gi timbegi bende nyalo konyi. Inyalo kata chako chamo chiembgi. E yo moro, inyalo chako dak ka gima inie pinyno, nikech kamano e kaka ibiro dak kisedhi kuno. Kamano bende, wanyalo chako ikore ne dak e piny manyien ka watemo kar nyalowa sani mondo wadag mana kaka wabiro dak kuno. We wane ane ranyisi moko ma nyalo konyowa timo kamano.

5, 6. Ere kaka luwo yo ma Jehova chikowago kotiyo gi riwruok mare sani, tiegowa ne ngima e piny manyien?

⁵ E piny manyien, chuech duto biro riwo lwedo chuth ratiro ma Nyasaye nigo mar locho e wi gik moko duto. Mano biro pogore ahinya gi kaka ji timo e piny ma Satan lochieni ma ng’ato ka ng’ato chikore kende. Thoth ji ok dwar ni Nyasaye ochikgi kendo giramo mar timo dwachgi ka gineno ni mano en gima owinjore. To mano osekelo ang’o? Mano osekelonegi chandruoge, kuyo, kod masiche mathoth. (Yer. 10:23) To mano kaka warito kinde ma ji duto biro bolore e bwo loch maber mar Jehova!

⁶ Luwo chenro ma Jehova biro keto e piny manyien, biro kelonwa mor mogundho sama waloso piny obed ma jaber, sama wapuonjo joma ochier, kendo sama watimo dwach Jehova. To nade kapo ni ibiro nyiswa ni watim tich moro ma chunywa ok ohero? Be wabiro yie timo gima onyiswa kendo time gi chunywa duto ka wamor? Thothwa nyalo yie! Ka en kamano, to be sani wayie timo kaka ichikowa? Kapo ni watimo kamano, mano nyiso ni waikore ne ngima mochwere e bwo loch mar Jehova.

7, 8. (a) Ang’o momiyo onego wabed gi chuny mar luwo kaka ichikowa? (b) Gin lokruoge mage ma Jokristo moko oseyudo? (c) Wanyalo bedo gadiera kuom wach mane motudore gi piny manyien?

⁷ Wanyalo timo ikruok mar dak e piny manyien kuom luwo chenro moket e riwruok mar oganda Jehova e kindegi, kendo kuom timo kinda mar bedo joma nyiso chuny mar tiyo kanyachiel gi jowetewa, kod bedo mamor gi gik ma wan-go. Ka wariwo lwedo joma tayowa, samoro kuom bedo mamor gi migepe manyien ma omiwa, biro bedo mayot mondo wanyis chuny ma kamano e piny manyien. (Som Jo-Hibrania 13:17.) Kane Jo-Israel odonjo e Piny Manosingi, ne opognegi kama ne onego gidagie kitiyo gi ombulu. (Kwan 26:52-56; Josh. 14:1, 2) Kindegi, ok wang’eyo kama ibiro pognwa mondo wadagie e piny manyien. Kata kamano, luwo gima ibiro nyiswa ni watim biro miyo  wabed mamor timo dwach Jehova kata bed ni onyiswa ni wadag kanye.

⁸ Kinda ma watimo mondo wachop migepe momiwa kendo luwo kaka Jehova chikowa gi riwruokne, tin ka opim gi gueth ma wabiro yudo e bwo loch mar Pinyruoth. En adier ni lokruok moko nyalo betie e ngimawa kaka ndalo medo kalo. Kuom ranyisi, owete gi nyimine moko ma ne nie Bethel ma Amerka nomi migepe mar dhi tiyo tij lendo kendo sani giyudo gueth mogundho ka gidhi nyime tiyo ne Nyasaye gi thuologi duto. Owete moko ma chon ne gin jorit-alwora osemi migepe mag bedo jopainia makende nikech tinde hikgi oniang’ kata nikech weche mamoko. Ka wayie gi migawo moro amora momiwa, kendo wakwayo mondo Nyasaye okonywa, ka bende watimo duto ma wanyalo e tij Nyasaye, wabiro bedo mamor kendo wanayud gueth mathoth kata mana e ndalo mag gikogi. (Som Ngeche 10:22.) To nade genowa mar kinde mabiro? Seche moko nitie kama chunywa gombo ni wabi wadagie e piny manyien, mak mana ni inyalo kwawa ni wadhi wadag kamachielo. Wanyalo bedo gadier ni wabiro bedo mamor dak e piny manyien kata bed ni wadak kanye kata ni watiyo tich mane.—Neh. 8:10.

9, 10. (a) Gin gik mage ma biro dwarore ni wabedie gi horuok e piny manyien? (b) Wanyalo nyiso nade ni wan joma hore?

⁹ E piny manyien, nitie kinde ma biro dwarore ni wabed joma hore. Kuom ranyisi, wanyalo winjo ni moko kuom joma ne otho ochier, kendo osiepegi kaachiel gi wedegi mor miwuoro. Kata kamano, e kindego samoro biro dwarore ni warit kapok waneno jowa mwahero ka ichiero. Kapo ni otimore kamano, be wabiro bedo mamor gi jomamoko kendo nyiso horuok sama warito? (Rumi 12:15) Ka wapuonjore bedo gi horuok sani sama pod warito mondo Jehova ochop singoge, mano biro konyowa wabed joma hore e kindego.—Ekl. 7:8.

¹⁰ Wanyalo ikore ne dak e piny manyien kuom bedo joma hore kodok korka adiera ma imedo elnwa. Be wan gi kinda mar puonjruok kendo be wan joma hore sama wamedo lony gi adiera mag Muma ma imedo lernwa mos mos e kindewagi? Ka watimo kamano, bedo gi horuok ok bi bedonwa matek e piny manyien e kinde ma Jehova biro medo elonwae gik mochano ne dhano.—Nge. 4:18; Joh. 16:12.

11. En ang’o ma Jehova puonjowa kuom wach bedo gi winjruok maber gi jowetewa, to mano biro konyowa nade e piny manyien?

¹¹ Kido machielo ma biro konyowa ikore ne dak e piny manyien en puonjruok bedo joma weyo ne jomoko kethogi. E kinde Loch Kristo mar Higni Aluf Achiel, biro kawo kinde malach mondo moko kuom joma kare kod joma ok kare ma ochier ogol kido moko maricho ma gin-go. (Tich 24:15) Be wabiro hero jowetewa kendo weyonegi kethogi? Ka wapuonjore weyo ne jomoko kethogi kendo geng’o mondo kik wabed joma mako kodgi sigu sani, biro bedonwa mayot bedo gi kidogo e kindego.—Som Jo-Kolosai 3:12-14.

12. Yo ma wadakgo sani otudore nade gi kaka wabiro dak e piny manyien?

¹² Dak e piny manyien ok nyis ni koro wabiro yudo ayuda gik moko duto ma wadwaro e sa ma wadwarogieno. Kar mano, biro dwarore ni wabed joma goyo erokamano kendo mamor gi gik ma wan-go e chal moro amora, ka wadhi nyime neno ber mar bedo joma bolore e bwo loch Jehova. Biro dwarore ni wanyis kido mopogore opogore ma Jehova puonjowa ni wabedgo sani. Ka  wapuonjore sani dak kaka wageno dak e piny manyien, wapuonjore bedo gi kido ma biro dwarore wabedgo nyaka chieng’. Wamedo tego yiewa ne gik ma biro timore e “piny ma biro.” (Hib. 2:5; 11:1) E wi mano, wanyiso ni wan gi siso ahinya mar dak e piny manyien kama gik moko biro betie makare. Kuom adier, waikore dak nyaka chieng’ e piny manyien ma Nyasaye osingonwa.

13. En ang’o ma wabiro keto obed mokwongo e piny manyien?

¹³ Ne ane yo machielo ma wanyalo ikorego ne ngima madier. Kata obedo ni osingnwa e piny manyien ni wabiro bedo gi chiemo mathoth kod gik mamoko mochuno, gima biro kelonwa mor mogundho en bedo gi winjruok maber gi Nyasaye. (Mat. 5:3) Gima wabiro keto mokwongo e ngimawa biro bedo timo tije Jehova Nyasaye, kendo chunywa nobed mamor kode. (Zab. 37:4) Omiyo, kuom keto tiyo ne Jehova obed mokwongo e ngimawa sani, wanyiso ni waikore ne ngima madier e kinde mabiro.—Som Mathayo 6:19-21.

14. Gin chenro mage mag tiyo ne Nyasaye ma nyalo konyo rowere omed keto pachgi kuom ngima mochwere?

¹⁴ Ere kaka wanyalo medo mor ma wan-go mar tiyo ne Nyasaye? Yo achiel en bedo gi chenro mag tiyo ne Nyasaye. Kapo ni in rawera kendo in gi chenro mar tiyo ne Jehova, donge nyalo bedo maber nono moko kuom weche ma yudore e bugewa ma wuoyo kuom yore mopogore opogore mag tiyo ne Nyasaye gi thuolowa duto kendo yiero achiel kuomgi ma diher timo? * Inyalo wuoyo gi owadwa kata nyaminwa mosebedo ka tiyo ne Nyasaye gi thuolone duto kuom kinde malach. Kiyiero tiyo ne Nyasaye, inyiso ni iikori dhi nyime tiyone e piny manyien, kama tiegruok miseyudo e tije Nyasaye kod lony ma in-go biro konyo ahinya.

15. Gin chenro mage mag tiyo ne Nyasaye ma joland Pinyruoth nyalo bedogo?

¹⁵ Kaka joland wach Pinyruoth, gin chenro mage mag tiyo ne Nyasaye ma wanyalo bedego? Wanyalo bedo gi chenro mar medo lony marwa e yo moro mar lendo. Kata wanyalo timo kinda mar medo ng’eyo puonj manie Muma kod kaka wanyalo tiyo kodgi. To nade timo dongruok mondo wasom e yo mong’ith e nyim ji, wagol twege e yo maber, kendo wachiw paro mochwiny e chokruoge? Inyalo paro yore mamoko bende. Wach maduong’ en ma: Bedo gi chenro  mar gik ma diher timo e tij Nyasaye, biro medi siso mar tiyone, to mano biro konyi iikri dak e piny manyien.

16. Ang’o momiyo tiyo ne Jehova e gima berie mogik ma ng’ato nyalo timo?

¹⁶ Be tiyo gi thuolowa ka waikore ne dak e piny manyien ma Nyasaye osingonwa nyiso ni nitie ngima moro maber ma bayowa sani? Ooyo ngang’! Onge ngima moro maber ma inyalo pim gi tiyo ne Jehova. Ok watine mana nikech ochunwa kata mana ni mondo wabi watony e kinde masira maduong’. Nochuewa gi gombo mar tiyo ne Nyasaye, to mano e gima kelo mor e ngima dhano. Bedo ni Jehova tayowa kendo oherowa ber moloyo dak e ngima ma ng’ato ok ong’eyoe Nyasaye. (Som Zaburi 63:1-3.) Mano ok nyis ni warit nyaka e piny manyien eka Jehova ochak guedhowa nikech watiyone gi chunywa duto, nimar oguedhowa kata sani! Moko kuomwa osebedo ka yudo guethgo kuom higni pieche, kendo wang’eyo malong’o ni onge kit ngima machielo ma kelo mor moloyo mano.—Zab. 1:1-3; Isa. 58:13, 14.

17. En ang’o ma ok wabi keto mokwongo e Paradiso?

¹⁷ E piny manyien, wabiro yudo thuolo mar timo gik ma wahero kendo ma morowa ng’ato ka ng’ato. Donge Jehova e ma nochueyowa gi gombo mar timo gik mopogore opogore mabeyo kendo ma morowa? Dine bed ni ok odwar ni watim gigo e yo makare chuth, dine ok ochueyowa kamano! (Ekl. 2:24) Mano en achiel kuom yore ma Jehova biro chopogo dwaro mag “gik mangima duto.” (Zab. 145:16) Timo gik ma kelonwa mor nigi sechegi. Kata kamano, mor ma wayudo kuomgi biro medore ka waketo winjruokwa gi Jehova obed motelo e ngimawa. Kamano e kaka weche biro chalo e Paradiso. En gima nyiso rieko puonjore ng’eyo seche mowinjore watimie gik ma kelonwa mor ka koni waketo weche Pinyruoth obed mokwongo kendo keto pachwa kuom gueth ma jotich Jehova yudo e kindegi.—Mat. 6:33.

18. Ere kaka wanyalo nyiso ni waikore ne ngima mochwere e Paradiso?

¹⁸ E Paradiso, wabiro bedo mamor gi mor ma pok ne wabedogo nyaka nene. Mad wanyis ni wan-gi siso ahinya mar yudo ngima madier e kindego kuom timo ikruok sani. We wapuonjre bedo gi kido ma Nyasaye morgo kendo waland wach Pinyruoth gi kinda. Weuru wayud mor kuom keto tije Jehova obed mokwongo e ngimawa. Kendo ka waketo yie kuom singo mag Jehova, mad wadhi nyime dak sani ka warito piny manyien!