1, 2. Ka luwore gi gima jaote Johana nowacho, ere kaka Nyasaye osenyisowa yo mar here?

YO MABERIE mogik ma wuoro nyalo puonjogo nyithinde en kuom ketonegi ranyisi monego giluw. Jaote Johana nondiko niya: “Wanyiso hera nikech [Nyasaye] e ma nokwongo herowa.” (1 Joh. 4:19) Omiyo, nenore maler ni Jehova oseketonwa ranyisi maber kuom herowa kaka nyithinde to mano konyowa mondo wan bende wahere.

² Nyasaye “nokwongo herowa” e yore mage? Jaote Paulo nowacho niya: “Nyasaye nyiso hera moherowago kama: ni kane pod wan joricho, Kristo ne othonwa.” (Rumi 5:8) Kane Jehova oyie chiwo Wuode obed misango mar rawar ne dhano ma winje, nokonyowa neno kaka ng’ato nyalo nyiso hera madier. Hera en gima inyiso gi tim, ma ok wagen ni ochulwa, kendo ka wamor chiwo gigewa. Gima duong’ ma Nyasaye notimonwano noyawonwa yo mar sudo machiegni kode mondo wabi wayud gueth, kendo miyowa thuolo mar nyiso ni wan bende wahere.—1 Joh. 4:10.

3, 4. Ere kaka wanyiso ni wahero Nyasaye?

³ Hera e kido maduong’ ma Jehova nigo. Mano konyowa ng’eyo gimomiyo Yesu nonyiso ng’at moro ma ne dwaro ng’eyo chik maduong’ e chike Nyasaye duto niya: “Nyaka  iher Jehova Nyasachi gi chunyi duto, gi ngimani duto, gi pachi duto, kendo gi tekoni duto.” (Mar. 12:30) Weche ma Yesu nowachogo, fwenyonwa ni hero Nyasaye en gima nyaka chakre e chunywa. Jehova ok ohero ng’at ma tiyone gi chuny ma nus nus. Kata kamano, ndikono bende nyiso ni nyaka waher Nyasaye gi ngimawa duto, pachwa duto, kod tekowa duto. Mano nyiso ni hero Nyasaye gadier oriwo gik mathoth moloyo mana winjo e chunywa ni wahere. Mopogore gi hero Nyasaye kowuok e chunywa, gik ma waparo kod ma watimo onego onyis ni wahere. Ka luwore gi janabi Mika, mano e gima Jehova dwaro ni watim.—Som Mika 6:8.

⁴ Ere kaka wanyalo nyiso ni wahero Wuonwa manie polo gadier? Onego wahere gi chunywa duto. Mana kaka Yesu nonyiso, onego waher Nyasaye gi ngimawa duto kod gik moko duto ma wan-go. E sula mokalo, ne waneno yore ang’wen ma Jehova nyisogo ni ohero nyithinde. Koro wanon ane kaka wanyalo nyiso ni wahero Jehova kod kaka wanyalo medo here ka watimo kamano e yore moyiego.

5. En ang’o maber monego watim kwanyisogo ni wamor gi gik moko duto ma Jehova osetimonwa?

⁵ Sama ng’ato omiyi mich moro itimoga ang’o? Donge igoga erokamano? E wi mano, ibiro tiyo gi michno e yo maber kinyiso ni imorgo. Jakobo nondiko niya: “Mich mabeyo duto gi chiwo malong’o duto a malo. Gilor piny ka giwuok kuom Wuonwa ma wuon gik ma chiwo ler manie polo, jal ma ok lokre kata ma ok sud kaka tipo.” (Jak. 1:17) Kinde duto Jehova miyowaga gik ma wadwaro mondo wabed mangima kod ma miyo wabedo mamor. Donge mano chwalowa mondo wan be wahere?

6. Ang’o ma ne Jo-Israel nyaka tim mondo gidhi nyime yudo gueth mag Jehova?

⁶ Kuom higni miche, Jehova noguedho Jo-Israel e yo maber miwuoro kuom miyogi gige ringruok kendo konyogi gibed gi winjruok maber kode. (Rapar 4:7, 8) To mondo ne gidhi nyime yudo guethgo, ne nyaka gidhi nyime luwo Chike Nyasaye, ma noriwo golo ne Jehova “cham mabeyoe moloyo” ma ne gikwongo kayo. (Wuok 23:19, Luo, 1976) Omiyo, Jo-Israel ne dhi nyiso ni ne gikawo mapek gueth ma Jehova nomiyogi ma ne nyiso ni oherogi.—Som Rapar mar Chik 8:7-11.

7. Ere kaka wanyalo tiyo gi ‘gigewa’ mondo wanyis ni wahero Jehova?

⁷ To nade wan? Kata obedo ni tinde ok wagol misengni mag le kendo ok wagol cham kaka chiwo, en gima long’o kendo mowinjore nyiso ni wahero Nyasaye kuom ‘miye duong’ ka wachiwone gigewa.’ (Nge. 3:9) Gin yore mage ma wanyalo timogo kamano? En adier ni wanyalo tiyo gi gigewa mag ringruok mondo wariwgo lwedo tije mag Pinyruoth ma itimo e pinjewa kod piny mangima. Ma en yo maber ahinya mar nyiso ni wahero Jehova bed ni wan gi gik mang’eny kata matin. (2 Kor. 8:12) Kata kamano, nitie yore mamoko ma wanyalo nyisogo Jehova ni wahere.

8, 9. Ere kaka geno singo mag Jehova otudore gi hera ma waherego? Chiw ane ranyisi.

⁸ Par ni Yesu nonyiso jolupne ni kik giparre ne chiemo gi lewni to giket Pinyruodh Nyasaye obed mokwongo. Nowacho ni Wuonwa ong’eyo gik ma wachando gadier. (Mat. 6:31-33) Okang’ ma wagenogo singoni nyiso ayanga okang’ ma waherogo Jehova nimar, hera  kod geno dhi kanyachiel. Ok wanyal hero ng’at ma ok wageno. (Zab. 143:8) Omiyo wanyalo penjore kama: ‘Be gik ma adwaro timo e ngimana gi yo ma adakgo nyiso ni ahero Jehova adier? Be gik ma atimo pile ka pile nyiso ni agene mondo ochiwna gik mochuno e ngima?’

⁹ Jakristo moro miluongo ni Mike nonyiso ni ohero Nyasaye kendo ogene e yo ma kamano. Kane pod otin, Mike ne gombo ahinya tiyo ne Nyasaye e piny machielo. Nokendo ma ginyuolo nyithindo ariyo, kata kamano, gomboneno ne ok olal. Nikech sula kod ripode ma wuoyo e wi kuonde ma jolendo dwaroree ahinya nojiwe, en kaachiel gi joode ne ging’ado mar keto ngimagi obed mayot. Ne giuso odgi ma gidhi dak e ot matin. Mike ne nigi ofis ma ne mako tije mang’eny mag timo ler. Noweyo mako tije mang’eny kae to opuonjore tayo tijno ka en e piny machielo kotiyo gi Intanet. Nodar gi joode mi gidhi e piny machielo, kendo ne gimor ahinya gi tij lendo kuno. Bang’ tieko higni ariyo kuno Mike nowacho niya: “Ne waneno kaka weche ma Yesu nowacho e Mathayo 6:33 gin adier.”

10. Mana kaka Ruoth Daudi notimo, paro matut kuom gik ma wasepuonjore e wi Jehova nyalo konyowa nade?

¹⁰ Chiegni higni 3,000 mosekalo, Ruoth Daudi ne mor ahinya gi gik ma noneno e polo. Nondiko kama: “Polo ohulo duong’ mar Nyasaye; kendo kuonde ma malo malach onyiso tich lwetene.” To nikech Chike Nyasaye nomore ahinya, nowacho niya: “Chik mar Jehova ni kare, ma duogo chuny: weche ma Jehova nyiso, chung’ matek, ma chiwo rieko ni jo ma riekogi tin.” Paro matut kuom gik ma Nyasaye nochueyo kod chikene nokonye nade? Daudi nodhi nyime wacho kama: “Mi weche me dhoga gi paro mabudhogo e chunya obedi mimorgo, A Jehova, lwandana kod jawara.” Onge kiawa ni Daudi nobedo gi winjruok maber ahinya gi Nyasaye.—Zab. 19:1, 7, 14.

11. Hera ma waherogo Nyasaye jiwowa mondo watim ang’o gi adiera ma opuonjowa e kindegi? (Ne picha manie chak sulani.)

¹¹ Kindegi, wasepuonjore mathoth e wi gik ma Jehova nochueyo, kendo wang’eyo kaka ochopo dwache. Piny jiwo ji mondo oluw somo ma malo kod lony momedore. Kata kamano, luwo somo ma malo osemiyo ji mathoth oweyo bedo gi yie kuom Nyasaye ma giweyo here. Kata kamano, Muma jiwowa ni wamany rieko kendo weche odonjnwa to ok mana medo puonjruok kende. Mano tiende ni onego wati gi gik ma Nyasaye osepuonjowa eka mondo gigo okonywa kendo wakonygo jomamoko. (Nge. 4:5-7) Dwach Nyasaye en ni “ji mopogore opogore duto onego ores kendo gibed gi ng’eyo malong’o chuth e wi adiera.” (1 Tim. 2:4) Wanyiso ni wahero Jehova sama walando ne ji duto wach maber mar Pinyruoth gi chunywa duto kendo konyogi ng’eyo dwach Nyasaye ne dhano.—Som Zaburi 66:16, 17.

12. Rawera moro nonyiso nade ni omor gi chiemb chuny ma Jehova miyowaga?

¹² Kata mana joma tindo nyalo nyiso ni gihero Jehova kuom nyiso ni gimor gi chiemb chuny ma omiyogi. Shannon paro kinde moro kojahigni 11 ma nodhiye e Chokruog-Distrikt moro ma ne wiye wacho ni “Godly Devotion” ka en gi nyamin-gi ma ne jahigni 10 kaachiel gi jonyuolgi. Ne okwa rowere duto mondo obed kamoro ma ne oyangnegi. Ne bet oluor to nodhi adhiya. Kane omi rowere  duto buk ma jaber miluongo ni Maswali Ambayo Vijana Huuliza—Majibu Yafanyayo Kazi nobedo mamor malich. Bugno nomiyo Shannon obedo gi paro mane e wi Jehova Nyasaye? Owacho kama: “Kanyo e kama nahango fwenyoe ni Jehova nitie adier kendo ni ohera ahinya.” Shannon medo wacho kama: “To mano kaka wamor ni Jehova Nyasachwa miyowaga mich mabeyo beyo miwuoro!”

13, 14. Yo ma warwakogo siem ma Jehova miyowa nyiso nade okang’ ma waherego?

¹³ Muma paronwa niya: “Jehova okwero ng’a ma chunye ohero; mana kaka wuon nyathi otimo ni wuode mohero.” (Nge. 3:12) To onego wane nade siem ma omiyowa? Jaote Paulo nowacho adier ka nondiko kama: “Onge kum ma nenore ni kelo mor gie seche michiwee, to obedo malit.” Mano ne ok nyis ni Paulo ne wacho ni kum ok owinjore kata ni ok kony, nimar nomedo wacho niya: “Kata kamano, achien onyago olemb kuwe ma en yor ngima makare kuom joma kumno osetiego.” (Hib. 12:11) Ka wahero Jehova adier, ok wabi fwayo siem ma omiyowa kendo iwa ok bi wang’. Rwako siem nyalo bedo gima tek ne jomoko to hera ma waherogo Nyasaye nyalo konyowa rwako siemgo.

¹⁴ E kinde Malaki, thoth Jo-Yahudi ne ok rwak siem ma Nyasaye ne miyogi. Ne ging’eyo gima ne Chik wacho e wi misengni ma nonego bed ni gigolo, to ne ok gidewo wachno mochuno ni Jehova omigi siem mager. (Som Malaki 1:12, 13.) Gik ma ne gitimo ne rach ma romo nade? Nee gima Jehova nonyisogi: “Anaornu kwet, mi nakwong’ hapu: ee, asekwong’ogi chon, nikech ok uket [chikna] e chunyu.” (Mal. 2:1, 2) Nenore maler ni bedo gi tim mar tamruok rwako siem ma Jehova miyowa kata weyo timo kamano goyiem nyuolo mana rach lilo.

15. En paro mane ma ji mang’eny nigo e piny sani monego watang’go?

¹⁵ E kindegi ma ji oherore mana kendgi  giwegi, ok yot wuoyo e wi siem kod kum, to rwako siem to koro tekie moloyo. Kata mana joma nenore ni rwako siem, timoga kamano mana ni ochunogi. Kata kamano, Muma to jiwo Jokristo ni giwe “luwo kit ngima mar joma odak e ndaloni.” Nyaka wang’e kendo waluw “dwaro maber mar Nyasaye.” (Rumi 12:2) Jehova tiyo gi riwruokne mondo omiwago siem e kinde mowinjore e wi gik ma mulo ngimawa kaka, osiepe monego wabedgo, yore ma wamanyogo mor, kod luor monego obedie e kind chwo gi mon. Ka wayie luwo puonjgo kendo tiyo kodgi, wanyiso ni wamor gi kaka otayowa kendo ni wahere gi chunywa duto.—Joh. 14:31; Rumi 6:17.

16, 17. (a) Ang’o momiyo onego wanon dwach Jehova sama wadwaro ng’ado paro e wi wach moro? (b) Jo-Israel nonyiso nade ni ok gihero Jehova kendo ni ok gigene?

¹⁶ Sama nyithindo oneno gimoro marach, giringoga ir jonyuolgi mondo okonygi. Ka gisebedo madongo, gipuonjore ng’ado paro kendgi giwegi kendo timo gik moko kaluwore gi pachgi giwegi. Mano nyiso ni gisechako bedo joma dongo. Kata kamano, nyithindo mohero jonyuolgi kendo man thuolo kodgi temoga ng’eyo paro ma jonyuolgi nigo kapok ging’ado paro moro amora. Mano bende e gima jatimore e kindwa gi Nyasaye. Jehova osemiyowa rohone ma miyowa “teko kod gombo mar timo duto mohero.” Kata kamano, sama watimo yiero ma ok waketo e paro dwach Nyasaye, mano nyiso ni ok wahere kendo ok wagene.—Fil. 2:13.

¹⁷ Kinde moro e ndalo mag Samuel, Jo-Filistia nokedo gi nyithind Israel ma giloyogi. E kindego, oganda Nyasaye ne dwarore ni okony kendo omi rit. Ne ging’ado mar timo ang’o? Ne giwacho niya: “We waomuru ark mar muma mar Jehova a e Shilo obi kuomwa, mondo obi e dierwa kendo oreswa e luet jowasikwa.” Nobedo nade bang’e? “Ne nitie nek maduong’ ahinya; nikech jo monegi ma Jo-Israel ne ji gana piero adek ma newuotho gi tiendgi. Kendo ark mar Nyasaye nokaw.” (1 Sam. 4:2-4, 10, 11) Kane Jo-Israel odhi gi ark e lweny, nyalo bedo ni ne gigeno ni Jehova dhi konyogi. To ne ok en kamano nimar ne ok gipenjo Jehova wach; kar mano ne gitiyo gi pachgi giwegi, to mano nokelonegi chandruok maduong’.—Som Ngeche 14:12.

18. Onego wane nade manyo kony koa kuom Jehova?

¹⁸ Jandik-zaburi moro nonyiso ni en gi paro mowinjore ka nowacho niya: “Gen kuom Jehova; nimar pod anapake kuom konyrwok mayudo kuome. A Nyasacha, chunya ti okuyo: e momiyo aparoi.” (Zab. 42:5, 6) To mano kaka nohero Jehova! Be wan bende wahero kendo wageno Wuonwa me polo kamano? Kapo ni iparo ni en kamano, inyalo medo gene ka luwore gi gima Muma nyisowa kama: “Gen Jehova gi chunyi duto, kendo kik iketri kuom lony gi weche mayoreyore ma ingo iwuon. Yie kuome e yoreni duto, mi nomi yoreni bedo mochikore tir.”—Nge. 3:5, 6.

19. Gin yore mage ma diher timoe kinda e nyiso ni ihero Jehova?

¹⁹ Nikech Jehova e ma nokwongo herowa, nonyisowa kaka onego wahere. Weuru wapar kinde duto kaka osenyiso ni oherowa malich. Kendo weuru wadhi nyime nyiso ni wahero Jehova ‘gi chunywa duto, gi ngimawa duto, gi pachwa duto, kendo gi tekowa duto.’—Mar. 12:30.