Ikwanogi ni Giwinjore Donjo e Pinyruoth
Ikwanogi ni Giwinjore Donjo e Pinyruoth
“Mago e ranyisi maratiro mag bura makare mar Nyasaye, kendo e gikone nokwanu ni un jo mowinjore donjo e pinyruodh Nyasaye.”—2 THES. 1:5.
1, 2. Dwaro mar Nyasaye en ang’o kuom wach ng’ado bura, to ng’ano moseketo mabiro ng’ado burano?
KAR higa mar 50 E Ndalowa, jaote Paulo ne ni Athene. Nikech neno kaka tim lamo nyiseche manono ne onya ahinya e dalano, chunye ne ochandre, mi ne ochune chiwonegi neno mong’ith. Notieko twakne kotiyo gi weche manyaka bed ni nomako pach jowinjo mage ma ne lamo nyiseche manono. Nowachonegi niya: “To koro [Nyasaye] ochiko ji duto kuonde duto ni mondo gilok chunygi, nikech oseketo chieng’ ma jalo moseyiero nong’adie ni piny bura makare; kendo osemiyo ji duto singo, kochiere a kuom jo motho.”—Tich 17:30, 31.
2 Mano kaka ng’eyo ni Nyasaye oseketo odiechieng’ mobiro ng’adoe bura ne dhano, en wach mamako pachwa ahinya! Burano nong’adi gi jal ma Paulo ne ok ohulo nyinge e twak ma nochiwo e dala Athene, to en jal mwang’eyo ni en Yesu Kristo ma Nyasaye nochiero. Bura ma Yesu biro ng’ado nokel ngima kata tho.
3. Ang’o momiyo Jehova notimo singruok gi Ibrahim, to ng’ano machopo migawo makende e singruogno?
3 Odiechieng’no mar Bura nokaw higini 1,000. Yesu biro locho kuom higinigo e nying’ Jehova ka en Ruoth mar Pinyruodh Nyasaye, to kata kamano ok noloch kende. Jehova yiero jomoko kuom oganda dhano mondo oloch kod Yesu, kendo ging’ad bura ne dhano e kinde mag odiechieng’no ma nokaw higini gana achiel. (Pim gi Luka 22:29, 30.) Chiegni higini 4,000 mosekalo, Jehova noketo mise mar Odiechieng’ Burano, kane otimo singruok gi Ibrahim jatichne ma nochung’ motegno. (Som Chakruok 22:17, 18.) Nenre ni singruogno nochako tiyo e higa mar 1943 Ka Ndalowa Podi. Kuom adier, Ibrahim ne ok ong’eyo maber gima singruogno ne dhi timo ne oganda dhano. Kata kamano, kaluwore gi winjruok mar singruogno, e ndalowagi wanyalo neno ni koth Ibrahim chopo migawo makende e dwaro mar Nyasaye kuom wach ng’ado bura ne oganda dhano.
4, 5. (a) Ng’ano ma e bat-maduong’ mar koth Ibrahim, to nowacho ang’o kuom Pinyruoth? (b) Geno mar bedo jokanyo mag Pinyruoth ne oyaw kinde mane?
4 Bat-maduong’ mar koth Ibrahim nobedo Yesu, jal ma ne owal kuom roho maler e higa 29 E Ndalowa, mobedo Mesia manosingi, kata Kristo. (Gala. 3:16) Yesu ne dhi kawo higini adek gi nus kolando wach maber mar Pinyruoth ne oganda Jo-Yahudi. Bang’ kane osemak Johana Jabatiso, Yesu nonyiso ni jomoko bende ne dhi bedo gi geno mar locho e Pinyruodhno kane owacho kama: “Nyaka a ndalo mag Johana Jabatiso nyaka chil kawuono, pinyruodh polo ilaro gi teko, kendo joteko yake.”—Math. 11:12.
5 En gima ber ng’eyo ni mapiyo kapok nowuoyo kuom jogo ma ne dhi ‘yako’ Pinyruodh polo, Yesu nowacho kama: “Adier awachonu niya, kuom jo ma mon onywolo, pok owuok ng’a maduong’ moloyo Johana Jabatiso; to ng’a matin mogik e pinyruodh polo e ma oloye gi duong’.” (Math. 11:11) Nowacho kamano nikech ang’o? En nikech geno mar bedo jokanyo e Pinyruodhno, ne pok oyaw chuth ne jogo moluoro Nyasaye, nyaka nochopo chieng’ ma ne opong’gi gi roho maler e Pentekost mar higa 33 E Ndalowa. E kinde ma mano ne timore, Johana Jabatiso noyudo osetho.—Tich 2:1-4.
Koth Ibrahim Ikawo ni Gin Joma Kare
6, 7. (a) Koth Ibrahim ne dhi bedo “ka sulwe me polo” e yo mane? (b) Ibrahim noyudo gweth mane, to kothe yudo gweth machal gi mare e yo mane?
6 Ne onyis Ibrahim ni kothe ne dhi medore mabed mang’eny “ka sulwe me polo,” kendo kaka kwoyo manie dho nam. (Chak. 13:16; 22:17) Mano tiende ni, e kinde ma Ibrahim ne ngima, dhano ne ok nyal ng’eyo ni ji adi ma ne dhi loso kodhini. Kata kamano, kwan sie mar koth Ibrahim mowal kuom roho nofwenyore bang’e. Ne gin ji 144,000 kaachiel gi Yesu.—Fwe. 7:4; 14:1.
7 Kaluwore gi yie ma Ibrahim nonyiso, Wach Nyasaye wacho kama: “[Ibrahim] noyie Jehova; mi nokwanone ka gi modhi kare.” (Chak. 15:5, 6) Kuom adier, onge dhano makare chuth. (Jak. 3:2) Kata kamano, nikech Ibrahim nonyiso yie motegno ahinya, Jehova nokwane kaka ng’at makare, kendo noluonge ni osiepne. (Isa. 41:8) Jogo mowal kuom roho, magin koth Ibrahim kanyachiel gi Yesu, gin bende ikawogi ni gin jo makare, kendo gibedo gi gweth mang’eny moloyo gwethgo ma Ibrahim noyudo.
8. Gin gweth mage ma jokanyo mag koth Ibrahim yudo?
8 Jokristo mowal kuom roho ikawo ni gin jo makare nikech giketo yie e misango Yesu mar rawar. (Rumi 3:24, 28) E wang’ Jehova, gin joma osegony a e richo, kendo inyalo walgi kuom roho maler mondo gibed yawuot Nyasaye kuom roho, mi gibed owete Yesu Kristo. (Joha. 1:12, 13) Gidonjo e muma kata e singruok manyien kendo giloso oganda manyien, ma en “Israel mar Nyasaye.” (Gala. 6:16; Luka 22:20) To mano kaka giyudo duong’ miwuoro! Kaluwore gi gigo ma Nyasaye osetimonegi, Jokristo mowal kuom roho ok nigi geno mar dak nyaka chieng’ e piny. Giweyo geno mar dak e piny, mondo giyud gweth ma ok nyal pim gi gimoro amora, ma en bedo gi Yesu e kinde Odiechieng’ Bura, kendo locho kode e polo.—Som Jo Rumi 8:17.
9, 10. (a) Ne okwong walo Jokristo kuom roho e higa mane, to ang’o ma Satan ne dhi timonegi? (b) Jokristo mowal kuom roho ne oyudo kony mane?
9 Chieng’ Pentekost mar higa 33 E Ndalowa, kwan matin mar joma kare ne omi thuolo mar bedo joma ne dhi locho gi Yesu e kinde mar Odiechieng’ Bura. Jolup Yesu madirom 120 ne obatisi gi roho maler, mi gibedo Jokristo mokwongo mowal kuom roho. Kata kamano, mano ne en mana okang’ mokwongo. Chakre kindeno, ne nyaka ginyis ni gichung’ motegno e nyim Jehova, kata obedo ni ne gidhi yudo tembe mang’eny moa kuom Satan. Ne nyaka gichung’ motegno nyaka e tho mondo eka giyud osimbo mar ngima me polo.—Fwe. 2:10.
10 Omiyo, Jehova nochiwo kony kod jip ma ne Jokristo mowal kuom roho onego oyudi kotiyo gi Wachne koda kanyakla mar Jokristo. Kuom ranyisi, jaote Paulo nondiko ne Jokristo mowal kuom roho ma ne ni Thessalonika kama: “Ne wabedo kod ng’ato ka ng’ato kuomu kaka wuoro bet gi nyithinde owuon. Ne wajiwou, ne wahoyo chunyu, kendo ne wachikou mondo uwuoth mowinjore ni Nyasaye, ma luongou udonj e pinyruodhe, kendo e duong’ne.”—1 Thes. 2:11, 12.
11. Gin ndiko mage ma Jehova nomiyo ondikne jokanyo mag “Israel mar Nyasaye”?
11 Higini moko bang’ kane oseyier jokanyo mokwongo mag kanyakla mar Jokristo mowal kuom roho, Jehova noneno ni owinjore ondik weche masiko manyiso kaka Yesu notiyo tij lendo e piny, kaachiel gi puonj koda tudruok ma ne nie kinde gi Jokristo mokwongo mowal kuom roho. Omiyo, Jehova nomiyo ondik Ndiko mag Dho-Grik mag Jokristo, kimedogi e wi Ndiko mag Dho-Hibrania ma ne oyudo nitie, kendo ma bende nondiki kuom muche. Ndiko mag Dho-Hibrania nokwong ndiko ne oganda mar Jo-Israel masie, e kindego ma podi ne gin gi winjruok makende gi Nyasaye. To Ndiko mag Dho-Grik mag Jokristo nondiki moloyo ahinya, ne “Israel mar Nyasaye,” jogo mowal kuom roho kaka owete Kristo kendo yawuot Nyasaye kuom roho. Mano ok nyis ni ogendini ma ne ok gin Jo-Israel ok ne nyal yudo kony maduong’ kuom puonjruok Ndiko mag Dho-Hibrania. Kamano bende, Jokristo ma ok owal kuom roho yudo kony mang’eny miwuoro kuom puonjruok, kendo dak kaluwore gi puonj manie Ndiko mag Dho-Grik mag Jokristo.—Som 2 Timotheo 3:15-17.
12. Paulo ne oparo ne Jokristo mowal kuom roho wach mane?
12 Jokristo mokwongo ne okaw kaka joma kare, mi owalgi kuom roho eka mondo giyud gikeni mar polo. Walogi kuom roho ok nong’awogi gibedo ruodhi e wi Jokristo wetegi ma bende ne owal kuom roho to podi ne nie piny. Nenore ni moko kuom Jokristo mokwongogo ne ok oparo wachno, mi ne gichako dwaro bedo gitelo ma ok owinjore e kind owetegi ei kanyakla. Omiyo, Paulo nopenjogi niya: “To koro useyieng’! usedoko jo moko! usedoko ruodhi kwaonge! To mad ne ubed ruodhi mondo wan bende wabed ruodhi kodu.” (1 Kor. 4:8) Kuom mano, Paulo ne oparo ne Jokristo mowal kuom roho ma nodak kindeno kama: “Wan ok wabedo joloch mag yieu to wan jotich kaachiel kodu kuom mor maru.”—2 Kor. 1:24.
Pong’o Kwan ma Nokor
13. Ere kaka luong mar Jokristo mowal kuom roho ne odhi nyime bang’ higa 33 E Ndalowa?
13 Kwan mar Jokristo 144,000 mowal kuom roho, ne ok opong’ duto e kinde Jokristo mokwongo. Luong mar Jokristo mowal kuom roho ne odhi nyime e kinde duto mag joote, kae to kuom higini mang’eny ji manok kende ema ne iyiero. Kata kamano, yierono osebedo ka timore nyaka e ndalogi. (Math. 28:20) Gikone, bang’ ka Yesu nosechako locho e higa mar 1914, gik moko nochako timore mapiyo ahinya.
14, 15. En ang’o mosetimore e kindewagi kuom wach yiero Jokristo mowal kuom roho?
14 Mokwongo, Yesu nopuodho polo ka ogolo oko jogo duto ma ne kwedo loch Nyasaye. (Som Fweny 12:10, 12.) Bang’e nochako choko jokanyo ma ne odong’ mag jogo mabiro loso sirkal mar Pinyruodhe, mondo gipong’ kwan mar 144,000. Kar higa mar 1935, nenore ni tij yierono ne chiegni chopo e gikone, kendo ng’eny jogo ma ne koro rwako wach maber ok ne nigi gombo mar dhi e polo. Roho ne ok dok janeno e chunygi ni gin nyithind Nyasaye. (Pim gi Jo Rumi 8:16.) Kar mano, ne ginwang’o ni gin e kweth mar “rombe moko,” ma nigi geno mar dak nyaka chieng’ e paradis e piny. (Joha. 10:16) Omiyo, bang’ higa mar 1935, tij lendo ne jiwo ahinya choko “oganda mang’ongo,” ma jaote Johana noneno e fweny kaka jogo ma ne dhi tony e “sand maduong’no.”—Fwe. 7:9, 10, 14.
15 Kata kamano, chakre higini mag 1930, nitie jo manok moseyier mondo obed gi geno mar dhi e polo. Nikech ang’o? Nyalo bedo ni moko kuomgi ne iyiero mondo okaw kar jogo ma ne onwang’o oseyier to oweyo yie. (Pim gi Fweny 3:16.) Kata mana Paulo nowuoyo kuom jomoko ma ne ong’eyo, ma noweyo luwo adiera. (Fili. 3:17-19) Gin ng’a gini ma Jehova ne nyalo yiero mondo okaw kar jogo? Onge kiawa ni mano en yiero ma Nyasaye owuon timo. Kata kamano, en gima nenore ni Nyasaye ok nyal yiero ng’ato ma eka yande olokore, to mana jogo ma Yesu nowuoyo kuomgi kane ochako nyasi mar Rapar, tiende ni jogo mosenyiso kuom kinde ni gichung’ motegno e yie. *—Luka 22:28.
16. Kuom wach Jokristo mowal kuom roho, en wach mane ma wamorgo, to kendo wanyalo bedo gadier kuom wach mane?
16 Kata kamano, nenore ni ok jogo duto ma osewal kuom roho chakre higini mag 1930, gin mana joma kawo kar Jokristo mowal moseweyo yie. Nenore ni Jehova biro weyo Jokristo mowal kuom roho obed e kindwa, kuom ndalo duto mag giko pinyni, nyaka chop kinde ma ikethoe ‘Babulon Maduong’.’ * (Fwe. 17:5) Wanyalo bende bedo gadier ni kwan mar 144,000 biro pong’ e kinde ma Jehova ema oseketo, kendo ni gikone, giduto gibiro locho e sirkal mar Pinyruoth. To bende, wanyalo yie gi Wach mokor manyiso ni oganda mang’ongo masani kwan-gi medore, biro dhi nyime chung’ motegno ka gin oganda. Kinde mokayo machiegni, ogandano biro ‘wuok e sand maduong’’ mibiro kel e wi piny ma Satan oteloeni, kendo gibiro donjo gimor e piny manyien mar Nyasaye.
Chiegni ni Sirkand Nyasaye e Polo Osepong’!
17. Kaluwore gi 1 Jo Thessalonika 4:15-17 kod Fweny 6:9-11, ang’o mosetimore ne Jokristo mowal kuom roho mosetho kochung’ motegno?
17 Chakre higa mar 33 E Ndalowa, gana gi gana mag Jokristo mowal kuom roho osenyiso yie, kendo gisechung’ motegno nyaka e tho. Osekwan-gi ni giwinjore yudo Pinyruoth, kendo nenore ni giseyudo michgi mar polo chakre ndalo mag bedoe mar Kristo e loch.—Som 1 Jo Thessalonika 4:15-17; Fweny 6:9-11.
18. (a) Jogo mowal kuom roho ma pod odong’ e piny, nigi adier kuom wach mane? (b) Jogo manie kweth mar rombe mamoko neno nade owetegi ma gin Jokristo mowal kuom roho?
18 Jokristo mowal kuom roho ma pod odong’ e piny, nigi adier chuth ni ka gichung’ motegno e yiegi, to gibiro yudo michgi mar polo e kinde mokayo machiegni. Kaka tara gi tara mag rombe mamoko medo paro matut kuom yie ma owetegi mowal kuom roho nyiso, gin bende giyie kod weche ma jaote Paulo nowacho kuom owete mowal kuom roho ma ne ni Thessalonika kama: “Wan wawegi wapwoyou ni kanise mag Nyasaye ni utimo kinda, kendo urito yie e sand gi chandruok mudhilie. Mago e ranyisi maratiro mag bura makare mar Nyasaye, kendo e gikone nokwanu ni un jo mowinjore donjo e pinyruodh Nyasaye, ma uneno masira nikech wachne.” (2 Thes. 1:3-5) Bang’ ka jakanyo mogik e kweth mowal kuom roho osetho mowuok e piny, sirkand Nyasaye manie polo biro pong’ chuth. Mano kaka mor gi ilo biro bedoe—e polo koda e piny!
[Weche moler piny]
^ par. 15 Ne Ohinga mar Jarito (Kiswahili) mar Mach 1, 1992, ite mar 20, paragraf 17.
^ par. 16 Ne “Maswali Kutoka kwa Wasomaji” e Ohinga mar Jarito (Kiswahili) mar Mei 1, 2007.
Be Inyalo Lero?
• En ang’o ma Nyasaye nonyiso Ibrahim ma ne mulo wach Odiechieng’ Bura?
• Ang’o momiyo ne okaw ni Ibrahim ne en ng’at makare?
• Jogo mosekaw ni gin jo makare ma gin koth Ibrahim, nigi geno mane?
• Jokristo duto nigi adiera kuom wach mane?
[Penjo mag Puonjruok]
[Picha manie ite mar 24]
Yesu nojiwo jolupne mondo oked ne Pinyruoth
[Picha manie ite mar 25]
E Pentekost higa 33 E Ndalowa, Jehova nochako yiero jogo ma gin bat-matin mar koth Ibrahim
[Picha manie ite mar 26]
Rombe mamoko mor ni Jokristo mowal kuom roho osebedo kodgi e kinde mag ndalo giko