Jogo ‘ma Chunygi Oikore,’ Rwako Adiera

“Duto ma noyier [“ma chunygi noikore,” “NW ”] ni ngima mochwere noyie.”​—TICH 13:48.

1, 2. Jokristo mokwongo nokawo nade gima Yesu nokoro konyiso kaka wach maber ne idhi landi e piny duto?

BUG Muma mar Tich Joote oting’o weche mabeyo manyiso kaka Jokristo mokwongo nokawo gima Yesu nokoro konyiso ni wach maber mar Pinyruoth ne idhi landi e piny duto. (Math. 24:14) Jolendo ma notiyo gi kinda ne oketo ranyisi maber ne jogo duto ma ne dhi luwogi bang’e. Kokalo kuom lendo gi kinda ma jolup Yesu notimo e Jerusalem, gana mang’eny, moriwo nyaka “ji mang’eny kuom jodolo,” nodonjo e kanyakla mokwongo.​—Tich 2:41; 4:4; 6:7.

² Jo misonari mokwongo, nomedo konyo ji mathoth mobedo Jokristo. Kuom ranyisi, Filipo ne odhi Samaria, kama ji mang’eny nowinjoe wechene. (Tich 8:5-8) Paulo ne odhi kuonde mang’eny kanyachiel gi jomamoko, ka gilando ote mar Jokristo e Kupro, kuonde moko e gweng’ mar Asia Matin, Makedonia, Grik, kod Italia. Ji mang’eny kuom Jo-Yahudi gi Jo-Grik nobedo Jokristo e gwenge ma Paulo nolendoe. (Tich 14:1; 16:5; 17:4) Tito notimo ote ma nomiye e Krete. (Tito 1:5) Petro to ne odich e Babulon, kendo ka nochopo kinde ma ne ondiko barupe mokwongo, chiegni higini mag 62-64 E Ndalowa, tij Jokristo ne ong’ere ahinya e Ponto, Galatia, Kappadokia, Asia, kod Bithunia. (1 Pet. 1:1; 5:13) Mano kaka mago ne gin kinde mabeyo ndi! Jokristo mokwongogo ne gin jokinda ahinya mochopo kama jowasikgi nowacho ni gin jo “moseketho piny” gi tij lendo.​—Tich 17:6; 28:22.

3.Gin dongruok mage ma jolendo mag Pinyruoth yudo e tijegi mag lendo, to mano miyo iwinjo nade?

³ E kindegi bende, kanyakla mar Jokristo osegwedhi moyudo dongruok ahinya. Donge en wach majiwo chunyi kisomo ripot mar higa ka higa mar Joneno mag Jehova, kendo neno dongruok matimore e piny mangima? Donge en wach mamoro chunyi ng’eyo ni jolendo mag Pinyruoth ne opuonjore Muma gi ji makalo milion auchiel e higa 2007 mar tij Nyasaye? E wi mano, kwan mar jogo ma nobiro e Rapar mar tho Yesu Kristo higa mokalo, nyiso ni ji madirom milion apar ma ok gin Joneno mag Jehova nohero wach maber mi gibiro e rapar maduong’ni. Mani nyiso ni tich pod ng’eny.

4. Gin jomage marwako wach Pinyruoth?

⁴ E kindegi, mana kaka e kinde Jokristo mokwongo, jogo ‘duto ma oyier [‘ma chunygi oikore,’ NW ] ne ngima mochwere’ rwako adiera. (Tich 13:48) Jehova yuayo joma kamago e riwruok mar ogandane. (Som Haggai 2:7.) En  chuny mane monego wamed nyiso e tijwa mar Jokristo eka mondo wati tij choko ji e yo mowinjore?

Lend Maok Ibuon Jomoko

5. Gin joma nade ma Jehova yie godo?

⁵ Jokristo mokwongo nong’eyo ni “Nyasaye ok odewo wang’ ji; to kuom ogendini duto ng’at moluore, kendo ma timo tim makare, e moyiego.” (Tich 10:​34, 35) Ng’at madwaro bedo gi winjruok maber gi Jehova, nyaka ket yie e misango Yesu mar rawar. (Joha. 3:​16, 36) Kendo en dwaro mar Jehova ni “mondo ji duto okwo, kendo ging’e adiera chuth.”​—1 Timo. 2:3, 4.

6. En ang’o ma jolendo mag Pinyruoth ok onego otim ngang’, to nikech ang’o?

⁶ Nyalo bedo gima ok kare ka joland wach maber ng’ado bura ne ji kaluwore gi oganda ma jogo wuokie, yuto margi, kaka ginenore gi oko, din ma giwuokie, kata chal moro amora. Par ane wachni: Donge imor ni ng’at ma nokwongo nyisi wach adiera manie Ndiko ne ok oyiero ni iwuok kanye? Omiyo, en ang’o ma dimoni lendo ne ng’ato ang’ata moikore winjo ote manyalo reso ngima?​—Som Mathayo 7:12.

7. Ang’o momiyo ok onego wang’ad bura ngang’ ne jogo ma walendoni?

⁷ Jehova oseketo Yesu kaka Jang’ad Bura; omiyo, ok wan gi ratiro mar ng’ado ne ng’ato ang’ata bura. Mani en gima owinjore nikech, mopogore gi Yesu, wanyalo mana ng’ado bura kaluwore gi ‘gima wengewa neno’ kata ‘gima itwa winjo,’ Yesu to nyalo ng’eyo paro ma iye koda weche manie chuny ng’ato.​—Isa. 11:1-5; 2 Timo. 4:1.

8, 9. (a) Saulo ne en ng’at machalo nade kapok nobedo Jakristo? (b) Gima ne otimore ne jaote Paulo onego opuonjwa ang’o?

⁸ Chiegni ni ji mawuok e ogendini duto osebedo jotich Jehova. Ranyisi maber ahinya en mar Saulo Ja-Tarso, ma bang’e nobedo jaote Paulo. Saulo, ma bende ne Ja Farisai, ne en ja akwede mager mar Jokristo. Paro motegno ma ne en-go ni yie mar Jokristo ne ok nikare, ne omiyo osando kanyakla mar Jokristo. (Gala. 1:13) Kaluwore gi dhano, ne tek paro ni Saulo ne nyalo bedo Jakristo. To kata kamano, Yesu noneno gimoro maber e chuny Saulo, mi noyiere chopo ote makende. Omiyo, Saulo nobedo achiel kuom jokanyo motegno kendo ma jokinda ahinya, e kanyakla mar Jokristo mokwongo.

⁹ En puonj mane ma wayudo kuom gima ne otimore ne Paulo? E alworawa, nyalo bedo ni nitie jomoko ma nenre ni ok dwar rwako wach ma walando. Kata obedo ni nenre ni ok ginyal bedo Jokristo madier ngang’, ok onego wawe ma ok watemo wuoyo kodgi. Seche moko, kata mana jogo ma waparo ni ok nyal rwako wach ngang’, achien winjo. Ote momiwa en siko kwalendo ni ji duto ma onge ‘weyo.’​—Som Tich Joote 5:42.

Gweth Orito Jogo Malendo Ma Onge ‘Weyo’

10. Ang’o momiyo ok onego wawe ma ok walendo ne jogo ma nenre ni ger? Chiw ranyisi mosetimore e alworau.

¹⁰ Nenruok ma oko nyalo wuondo wang’ ng’ato. Kuom ranyisi, Ignacio, * nochako puonjore Muma gi Joneno mag Jehova ka en e jela e piny moro mar Amerka ma Milambo. Ji ne oluore nikech ne oger. Omiyo, mabuse ma ne loso kendo uso gik moko ne jowetegi, ne tiyo gi Ignacio e choko gope kuom jogo ma ne ok chud piyo. Kata kamano, kaka Ignacio ne medo puonjore Muma kendo tiyo gi weche ma ne opuonjre, jal ma ne ger chonni, ne obiro mobedo ng’at mamuol. Onge ng’ama tiyo kode kendo e choko gope, to ema Ignacio mor ni adiera mag Muma kaachiel gi roho mar Nyasaye osekelo lokruok e kite. Bende oduoko erokamano ne jolendo mag Pinyruoth ma notimo  kinda e puonjruok kode ma ok gidewo chalne.

11. Ang’o momiyo wamedo dok limo ji?

¹¹ Achiel kuom gigo mamiyo wamedo dok limo jogo mwaselandoni wach maber, en nikech chalgi koda paro manie chunygi nyalo lokore, kendo en adier ni chalgi koda parogi jolokore. Nyaka a walimgi mogik, nyalo bedo ni moko kuomgi osebedo matuwo ahinya, oselalo tich, kata ng’atgi ma gihero osetho. (Som Eklesiastes 9:11.) Chandruoge manie piny nyalo miyo ji ochak paro matut kuom ngimagi mabiro. Gigo nyalo miyo ng’at ma ne ok rwak wach chon kata ma ne kwedo, ochak rwako wach. Omiyo, ok onego wawe ma ok walando wach maber ne jomoko sa asaya ma thuolo onenoe.

12. Onego wabed gi paro mane kuom jogo ma walendoni, to nikech ang’o?

¹² Nenre ni dhano nigi kido mar keto ji e okang’ mopogore opogore kaluwore gi chalgi, kendo ng’ado negi bura. Kata kamano, Jehova to ng’iyo ji kaka gin ng’ato ka ng’ato. Oneno kido mabeyo man kuom ng’ato ka ng’ato. (Som 1 Samuel 16:7.) Wan bende onego watem ahinya timo kamano e tijwa mar lendo. Thoth gik mosene, nyiso gimomiyo ber bedo gi paro makare kuom jogo duto ma walendoni.

13, 14.(a) Ang’o ma nomiyo painia moro obedo gi paro ma ok kare kuom dhako moro ma noromogo e tij lendo? (b) Ang’o ma wanyalo puonjore kuom gima notimoreno?

¹³ Sandra, nyaminwa ma painia, ne lendo ot ka ot e chula mar Karibbea kane oromo gi Ruth, ma nohero ahinya tugo e nyasi mag miel. Ruth noyudo oseloyo osimbo ma malo mogik mar pinygi e nyasigo nyadiriyo. Ne en gi gombo makende mar winjo weche ma Sandra ne wacho, omiyo ne gichano puonjruok mar Muma. Sandra paro kama: “Kane adonjo e od Ruth mar budho, naneno pichane maduong’ korwako nanga mar nyisruok e nyasino kaachiel gi osimbo ma ne oloyo. Ne aparo marach ni ng’at ma rahuma kamano kendo ma ne omakre gi weche nyasi mag miel, ne ok nyal rwako adiera. Omiyo ne aweyo dhi lime.”

¹⁴ Kinde moro bang’e, Ruth nobiro e Od Romo, to kane chokruok oserumo nopenjo Sandra niya, “Ang’o momiyo iweyo biro puonjri koda?” Sandra ne okwaye ng’wono, mi gichano mondo gichak puonjoruok kendo. Ruth notimo dongruok mapiyo, nogolo pichene mag nyasi, mochako dhi e chokruoge duto mag kanyakla, tiyo tij lendo, mi nochiwo ngimane ne Jehova. En adier ni bang’e Sandra noduogo ofwenyo ni paro ma ne en-go mokwongo ne ok nikare.

15, 16. (a) Ang’o ma ne otimore bang’ jal moro lendo ne watne? (b) Ang’o momiyo kit ngima ma watwa moro odakie ok onego omonwa lendone?

¹⁵ Bende, gik mabeyo osetimore ne thoth jogo ma oselendo ne joodgi ma ok nie yie, kata obedo ni joodgi ne nenre ni ok nyal rwako wach. Kaw ane ranyisi mar Joyce, ma en nyaminwa ma Jakristo modak e piny Amerka. Chwor nyamin matin, nosebedo ka itweyo kinde ka kinde e jela chakre obed rawera. Joyce wacho niya, “Ji nosebedo kawacho ni ngimane koro osekethore chuth nikech ne otiyo gi yedhe mamero, ne en jakuo, kendo ne otimo timbe moko maricho. Kata kamano, kata obedo ni ne ok yot, ne adhi nyime wuoyo kode kuom adiera mag Muma kuom higini 37.” Nano koda kinda ma Joyce notimo ne onyago ber kane chwor nyamin-gino oyie puonjruok Muma gi Joneno mag Jehova, motimo lokruok madongo e ngimane. Chwor nyamin-gino nyocha obatisi e chokruok mar distrikt ma ne otim California, e piny Amerka ka koro en ja higini 50. Joyce wacho kama: “Pi wang’a ne omol nikech mor. Amor ahinya nimar chunya ne ok ool kode!”

¹⁶ Inyalo bedo maluor lando adiera mag Muma ne wedeni moko nikech kit ngima  ma gidakie. Joyce to ok noweyo gimoro amora mondo omone wuoyo gi chwor nyamin-gi. Kuom adier, onge kaka ng’ato nyalo ng’eyo gima nie chuny ng’at machielo. Nyalo bedo ni ng’atno manyo adiera gi chuny mar dwaro ng’eyo Nyasaye. Omiyo, kik iluor lendone ng’ato ang’ata ka thuolo oneno.​—Som Ngeche 3:27.

Buk Makonyo Ahinya e Puonjruok Muma

17, 18. (a) Ripode mawuok e alwora mar piny nyiso ang’o kuom ber mayudore ei bug Ang’o ma Muma Puonjo Kuom Adier? (b) Gin gik mage mabeyo miseneno kuom tiyo gi bugni?

¹⁷ Ripode mawuok e alwora mar piny nyiso ni ji mang’eny ma chunygi nikare rwako wach kokalo kuom puonjruok Muma gi bug Ang’o ma Muma Puonjo Kuom Adier? Penni, nyaminwa ma painia e piny Amerka, nochako puonjo jomoko Muma kotiyo gi bugni. Ariyo kuomgi ne gin joma hikgi osegwaro, kendo ne gin jokanyo motegno e kanisegi. Penni ne ok ong’eyo kaka ne gidhi kawo wach adiera mag Ndiko ma ne yudore e bug Muma Puonjo. Kata kamano, ondiko ni: “Nikech yo maler kendo moriere milerogo adiera ei bugno, nomiyo giyie ni gik ma ne gipuonjore gin adiera, ma ok gimino wach.”

¹⁸ Pat, ma en jalendo e piny Ingresa, nochako puonjruok Muma gi dhako moro ma noyudo oringo oa e piny moro manie Asia. Nochuno dhakono ringo a e pinygi bang’ kane chwore gi yawuote adek omak gi jolweny mag wasigu, mi ok nochako onenogi kendo. Ngimane ne ni kama rach, dalane ne owang’, kendo chieng’ moro chwo mang’eny nonindo kode gi thuon. Magi duto nomiyo okawo ngimane kanono, kendo kuom kinde moko ne osetemo kata mana negore owuon. Kata kamano, puonjruok Muma ne omiye geno. Pat ndiko kawacho kama: “Yo mayot milerogo weche koda ranyisi ei bug Muma Puonjo nomulo chunye ahinya.” Japuonjreno notimo dongruok mapiyo, mowinjore bedo jalendo ma podi ok obatisi, kendo nonyiso ni ogombo mondo obatise e chokruok mar alwora ma ne luwo. To mano mor manade mabedoe kuom konyo jogo ma chunygi nikare ng’eyo kendo hero geno ma Ndiko chiwo!

“Kik Waol gi Timo Maber”

19. Ang’o momiyo tij lendo dwarore otim mapiyo moloyo?

¹⁹ Odiechieng’ kodiechieng’ makalo, miyo otewa mar lendo gi timo jopuonjre bedo gima dwarore mapiyo moloyo. Ji tara gi tara ma chunygi nikare rwako wach ma walando higa ka higa. Kata kamano, “ndalo maduong’ mar Jehova ochiegni,” to mano nyiso ni jogo madong’ e mudho ma ok ong’eyo Nyasaye ‘biro tho.’​—Zef. 1:14; Nge. 24:11.

20. Ng’ato ka ng’ato kuomwa onego ong’ad e chunye timo ang’o?

²⁰ Podi wanyalo konyo joma kamago. To mondo omi watim kamano, dwarore waluw ranyisi mar Jokristo mokwongo, ma ‘ne ok oweyo puonjo kendo yalo ni Yesu en Kristo.’ (Tich 5:42) Luw ranyisi margi kinano kata mana e bwo chandruok, kiketo chunyi kuom ‘lony’ e puonjo, kendo kilendo ma ok iyier ng’ato! “Kik waol gi timo maber,” nikech ka wanano, to wabiro kayo gweth mogundho mag bedo jo mowinjore e wang’ Nyasaye.​—2 Timo. 4:2; som Jo Galatia 6:9.

[Weche moler piny]

Inyalo Dwoko Nade?

• Gin jo mage marwako wach maber?

• Ang’o momiyo ok onego wang’ad bura ne jogo ma walendoni?

• Gin ang’o mosetimore kuom tiyo gi bug Ang’o ma Muma Puonjo Kuom Adier?

[Penjo mag Puonjruok]

[Picha manie ite mar 17]

Tara gi tara mag joma chunygi nikare rwako wach