Bedoe mar Kristo—Wachno Omaki Nade?

“Ang’o ma nobed ranyis mar bedoe mari, kendo mar kinde giko mar ndalo?”​—⁠MATH. 24:3, NW.

1. Joote Yesu ne openje penjo mane maber nono?

CHIEGNI higini 2,000 mosekalo, joote ang’wen mag Yesu, ne openje penjo moro kane giwuoyo kode kar kendgi e Got Zeituni. Ne gipenje kama: “Magi notimre karang’o? To ang’o ma nobed ranyis mar biro [“bedoe” NW ] mari, kendo mar giko [“kinde giko,” NW ] mar ndalo?” (Math. 24:3) E penjono, jootego notiyo gi weche ariyo maber nono, tiende ni “bedoe mari” kod “kinde giko mar ndalo.” Weche ariyogo tiendgi ang’o?

2. Tiend wacho ni “kinde giko” en ang’o?

² Ka wachako gi wach mar ariyo, ma tiende ni “kinde giko,” wachno oloki kowuok e syn·teʹlei·a e dho-Grik. E Muma mar New World Translation, syn·teʹlei·a oloki kuonde moyudore duto ni “kinde giko,” to wach machalo gi mano bende e dho-Grik ma en, te’los, oloki ni, “giko.” Wanyalo ng’eyo pogruok manie kind weche ariyogi ka watiyo gi ranyisi mar twak migolo e Od Romo. Wanyalo wacho ni kinde giko mar twak, en sama koro jagol-twak paro ne jowinjo e yo machuok weche mosebedo kotwakie, kae to onyisogi kaka wechego nyalo tiyo e ngimagi. To giko mar twak en sama jagol-twak koro wuok e ndiri. E yo machalo kamano, kaluwore gi Muma, “kinde giko mar ndalo” en kinde ma koro giko okayo, moriwo koda ka gikono.

3. Moko kuom gik matimore e kinde bedoe mar Yesu gin mage?

³ To nade tiend wach ma joote notiyogo ni “bedoe”? Wachno oloki kowuok e  pa·rou·siʹa e dho-Grik. * Pa·rou·siʹa mar Kristo, kata bedoe mare, nochakore kane oket Yesu obed Ruoth e polo e higa 1914, kendo bedoe mareno dhi nyime kariwo nyaka “masira maduong’,” ma obiro kethoe joma richo. (Math. 24:21) Gik mang’eny mopogore opogore moriwo koda “ndalo mag giko” mar pinyni, tij choko jogo moyier, kendo chierogi e ngima mar polo, duto timore e kinde bedoe mar Yesu. (2 Timo. 3:1; 1 Kor. 15:23; 1 Thes. 4:15-17; 2 Thes. 2:⁠1) Inyalo wach ni “kinde giko mar ndalo” (syn·teʹlei·a) dhi karachiel gi kinde miluongo ni bedoe mar Kristo (pa·rou·siʹa).

En Kinde Malach

4. Bedoe mar Yesu chalo nade gi gik ma ne timore e ndalo Noa?

⁴ Bedo ni pa·rou·siʹa en kinde malach winjore gi gima Yesu nowacho kuom bedoe mare. (Som Mathayo 24:37-39.) Ne ni Yesu ne ok pim bedoe mare gi kinde machuok ma Ataro mar pi nokawo e ndalo Noa. Kar mano, ne opimo bedoe mare gi kinde malach nyaka chop Atarono. Mano noriwo kinde ma Noa nogeroe yie kaachiel gi tiyo tij lendo, nyaka nochopo e Ataro. Mago gik ma ne otimore kuom higini pieche mang’eny. E yo ma kamano, bedoe mar Kristo oriwo gik matimore kochomo e masira maduong’, kendo riwo nyaka masirano.​—⁠2 Thes. 1:6-9.

5. Weche mondiki e Fweny sula 6 nyiso nade ni bedoe mar Yesu kawo kinde malach?

⁵ Weche mamoko mokor ei Muma nyiso maler ni bedoe mar Kristo kawo kinde malach, to ok en mana birone ketho jomaricho kende. Bug Fweny wuoyo kuom Yesu kaka jal moidho ambuor marachar, kendo ka imiye osimbo. (Som Fweny 6:1-8.) Bang’ miye osimbo mobedo Ruoth e higa 1914, iwuoyo kinyiso ni Yesu dhi ka ‘locho, kendo mondo olochi [“otiek locho,” NW ] .’ Kendo Fweny medo nyiso ni iluwe gi joidh ambuoche moko ma kitgi opogre opogore. Kaluwore gi weche mokor, gichung’ne lwenje, nok mag chiemo, kod tuoche, to gigo duto osebedo katimore kuom kinde malach miluongo ni “ndalo mag giko.” Waneno kaka wach mokorno chopo e ndalowagi.

6. En ang’o ma Fweny 12 konyowa ng’eyo kuom wach bedoe mar Kristo?

⁶ Fweny sula 12 chiwo weche momedore kuom wach chungo Pinyruodh Nyasaye e polo. Kanyo, wasomo wach lweny ma ne otimore e polo. Mikael, ma en Yesu Kristo ka en e migawone mar polo, kaachiel gi malaikene kedo gi Jachien kod jochiendene. Nikech mano, Satan kendo Jachien, kaachiel gi ogandane mar lweny ibolo e piny. Kochopo kanyo, Fweny nyisowa ni Jachien nigi mirima maduong’ “kong’eyo ni ndalone tin.” (Som Fweny 12:7-12.) Kuom mano, nenre maler ni, chungo Pinyruodh Kristo e polo, iluwo gi kinde ma ‘lit’ medore ne piny gi joma odak e iye.

7. Zaburi mar 2 wuoyo kuom ang’o, to thuolo mane ma iwuoyoe e sulano?

⁷ Zaburi mar 2 bende koro kanyiso wach keto Yesu obed Ruoth e Got Sayun. (Som Zaburi 2:5-9; 110:1, 2.) Kata kamano, zaburino bende nyiso ni nitie kinde ma joloch mag piny koda jogo manie bwogi, imiyo thuolo mar yie bedo e bwo loch mar Kristo. Inyisogi mondo ‘gibed mariek,’ kendo giyie mondo ‘opuonjgi.’ Ee, e kindeno, “gin johawi giduto mogeno kuome [Nyasaye]” ka gitiyo ne Jehova kod Ruodhe moseketo. Omiyo, e  kinde bedoe mar Yesu e loch, nitie thuolo ma imiyo ji mondo otim lokruok madwarore.​—⁠Zab. 2:10-12.

Fwenyo Ranyisino

8, 9. Gin ng’a gini ma ne dhi fwenyo ranyis bedoe mar Kristo, mi giwinj tiende?

⁸ Kane Jo Farisai openje kinde ma Pinyruoth ne onego obie, Yesu nodwokogi ni Pinyruodhno ok ne dhi biro ‘ka gikiye ni obiro.’ (Luka 17:20, 21) Joma ok oyie ne ok dhi fwenyo wachno. Ne diging’e nade, ka kata mana fwenyo ni Yesu ne dhi bedo Ruodhgi ema notamogi. To kare ng’a gini ma ne dhi fwenyo ranyis bedoe mar Kristo, mi giwinj tiende?

⁹ Yesu ne odhi nyime wacho ni jopuonjrene ne dhi neno ranyisino e yo maler mana kaka ne ginyalo neno ka “mil polo rieny koa e bwo polo konchiel, nyaka komachielo.” (Som Luka 17:24-29.) Ber neno ni Mathayo 24:23-27, tudo puonjni achiel kachiel gi ranyis bedoe Kristo.

Tieng’ Maneno Ranyisino

10, 11. (a) Chon ne ilero nade wach ‘tieng’’ miwuoyoe e Mathayo 24:34? (b) Gin ng’a gini ma onge kiawa ni jopuonjre Yesu nong’eyo ni loso ‘tieng’no’?

¹⁰ Gasedni osebedo kalero ni kinde ma Yesu ne nie e piny, “Jo-Yahudi ma ok oyie ma nodak e kindeno,” ema ne loso ‘tieng’’ miwuoyoe e Mathayo 24:34. * Yo ma ne ilerogo wachno ne nenre ni nikare, nimar kuonde mamoko duto ma Yesu notiyoe gi wach ni ‘tieng’,’ ng’enyne notiyo gi wachno kowuoyo kuom rach jogo. Kuom ranyisi, nitie kama owacho ni tieng’ “marach.” (Math. 12:39; 17:17; Mari. 8:38) Omiyo, ne ineno ni kaluwore gi kaka wachno chopo kindegi, Yesu ne wuoyo kuom “tieng’” mar joma ok oyie ma ne dhi neno gigo maloso ranyis mar “kinde giko mar ndalo” (syn·teʹlei·a) kod giko wuon (teʹlos).

¹¹ En adier ni ka Yesu ne tiyo gi nying’ ni “tieng’” koracho gimoro, ne owuoyo gi joma richo, kendo e wi jomaricho ma ndalone. Kata kamano, be en adier ni mano e gima Mathayo 24:34 losoe? Par ni ang’wen kuom jopuonjre Yesu ne odhi ire “kar kendgi.” (Math. 24:3) To nikech Yesu ok notiyo gi nying mar “tieng’ni” ka oracho gimoro seche ma ne owuoyo kodgi, onge kiawa ni jootego nokawo ni gin bende ne giloso ‘tieng’’ ma ne ok dhi rumo ngang’ “ka pok magi duto otimore.”

12. Weche molworo ndikono nyiso ang’o kuom jogo ma Yesu ne wuoyo kuomgi ka notiyo gi wach ni “tieng’ni”?

¹² Ang’o manyalo miyo wang’ad ni en kamano? En nikech nono adimba weche manie kwan matindo molworo ndikono. Mana  kaka ondiki e Mathayo 24:32, 33, Yesu nowacho niya: “To puonjreuru ngero kuom ng’owo; ka bade koro odoko mayom, kendo golo pote, ung’eyo ni oro chiegni. Kamano bende, kuneno magi duto, ng’euru ni ochiegni e dho ot.” (Pim gi Mariko 13:28-30; Luka 21:30-32.) Kae to e Mathayo 24:34, wasomo kama: “Adier awachonu niya, tieng’ni ok norum ngang’ ka pok magi duto otimore.”

13, 14. Ang’o momiyo wanyalo wacho ni ‘tieng’’ ma Yesu ne wuoyo kuome ne nyaka bed ni gin jopuonjrene?

¹³ Yesu nowacho ni, jopuonjrene ma roho maler ne koro chiegni walo, ema ne onego ong’e weche moko ka gineno “magi duto” katimore. Omiyo, nyaka bed ni Yesu ne wuoyo kuom jopuonjrene kane owacho kama: “Tieng’ni ok norum ngang’ ka pok magi duto otimore.”

¹⁴ Mopogore gi joma ok oyie, jopuonjre Yesu ne ok dhi neno mana ranyisino kende, to bende ne gidhi ng’eyo tiende. Ne gidhi ‘puonjre’ kuom gigo maloso ranyisino, mi ‘ging’e’ tiendgi gadier. Ne gidhi ng’eyo gadier chuth ni “ochiegni, e dho ot.” Kata obedo ni en adier ni Jo-Yahudi ma ne ok oyie koda Jokristo moluoro Nyasaye ma ne owal kuom roho ne oneno kaka weche Yesu chopo e kinde machon, ber ng’eyo ni jolupne mowal kuom roho kende ema ne nyalo puonjre kuom gik ma ne timore, tiendeni ne ginyalo ng’eyo tiend gik ma ne gineno.

15. (a) Gin ng’a gini maloso ‘tieng’’ ma kindegi ma Yesu ne wuoyoe? (b) Ang’o momiyo ok wanyal kwano gadier chuth bor mar “tieng’ni”? (Ne sanduk manie it 29.)

¹⁵ Joma ok ong’eyo adiera mar Nyasaye e kindegi, osebedo ka paro ni ranyisi maduong’ mineno, manyiso bedoe mar Yesu onge. Giwacho ni gik moko duto dhi nyime mana kaka chon. (2 Pet. 3:4) Mopogore gi parogino, owete Kristo mandalogi mowal kuom roho, kendo manie kweth achiel gi Johana, osefwenyo ranyisini, mana ka rieny mar mil polo, kendo giseng’eyo tiende gadier. Ka gin kweth achiel, Jokristo mowalgi loso “tieng’ ” ma kindegi ma ok norum “ka pok magi duto otimore.” * Mani temo nyiso ni moko kuom owete Kristo mowal kuom  roho, podi biro bedo ka ngima e piny sama masira maduong’ ma ne okor chakore.

“Nenuru”

16. Ang’o ma nyaka jopuonjre Kristo tim?

¹⁶ Kata kamano, nitie gima dwarore moloyo mana fwenyo ranyisino. Yesu nomedo wacho kama: “To gi mawachonu awacho ni ji duto, ni: Nenuru.” (Mari. 13:37) Mani en gima dwarore ahinya kuomwa waduto ndalogi, kata bed ni wan Jokristo mowal kata manie oganda mang’ongo. Higini 90 osekalo nyaka ne ket Yesu obed Ruoth e polo e higa 1914. Kata obedo ni ok en gima yot, nyaka wanyis ni waikore, kendo siko ka waneno. Ng’eyo ni Kristo sani en Ruoth ma wang’ dhano ok ne e polo, konyowa timo kamano. Mano bende konyowa ng’eyo ni obiro ketho wasike e ‘sa ma ok wapar.’​—⁠Luka 12:40.

17. Ng’eyo wachni onego omi watim gik moko nade, to onego wang’ad mar timo ang’o?

¹⁷ Ng’eyo tiend bedoe mar Kristo, miyo watimo gik moko e yo mapiyo ka wang’eyo ni wadak e kinde mage. Wang’eyo ni Yesu osebedoe, kendo olocho ka en Ruoth e polo chakre 1914. Machiegni, nobi ketho joma richo, kendo kelo lokruok madongo e piny mangima. Omiyo, onego wamed nyiso kinda moloyo e tiyo tich ma Yesu nokoro kane owacho kama: “Wach maberni mar pinyruoth nolandre e pinje duto, mondo obed ranyis ni ogendini duto; eka giko [teʹlos] nobi.”—⁠Math. 24:14.

[Weche moler piny]

Inyalo Dwoko Nade?

• Wanyalo ng’eyo nade ni bedoe mar Yesu en gima kawo kinde malach?

• Ng’a gini ma fwenyo ranyis bedoe mar Yesu mi ging’e tiende?

• Gin jo mage ndalogi ma loso tieng’ miwuoyoe e Mathayo 24:34?

• Ang’o momiyo ok wanyal kwano bor sie mar “tieng’ni”?

[Penjo mag Puonjruok]

[Sanduk manie ite mar 29]

Be Wanyalo Kwano Bor mar Kinde “Tieng’ni”?

Pile, “tieng’” en wach mitiyogo kiwuoyo kuom jogo ma hikgi opogore opogore to odak e kinde moro achiel kata e kinde ma gimoro ne otimore. Kuom ranyisi, Wuok 1:6 nyisowa kama: “Josef notho, kod owetene duto, kod tieng’no duto.” Hik Josef kod owetene ne opogore opogre, to kata kamano, ne gidak e kinde achiel. “Tieng’no,” ne oriwo kata owete Josef moko ma ne onyuol kapok onyuole. Moko kuomgi ne odak aming’a moloyo Josef. (Chak. 50:24) Jomoko kuom “tieng’no” kaka Benjamin, ne onyuol bang’ Josef, to nyalo bedo ni ne gidhi nyime dak bang’ tho Josef.

Omiyo, ka oti kod “tieng’” kiwuoyo kuom joma odak e kinde achiel, ok yot nyiso bor mar kindeno sie, to mak mana ni kindeno nigi gikone, kendo ok obi bedo kinde mabor ahinya. Kuom mano, kane Yesu tiyo gi wach ni “tieng’ni,” e Mathayo 24:34, ok nomiyo jopuonjrene yor kwano mondo ging’e kinde ma “ndalo mag giko” ne dhi rumoe. Kar mano, Yesu nomedo jiwo ni ne ok gidhi ng’eyo “chieng’no gi sano.”⁠—⁠2 Timo. 3:1; Math. 24:⁠36.

[Picha manie ite mar 26]

Bang’ kete Ruoth e higa 1914, iwuoyo kinyiso ni Yesu dhi ‘ka locho’

[Picha manie ite mar 28]

“Tieng’ni ok norum ngang’ ka pok magi duto otimore”