Be Ineno Jomoko Kaka Jehova Nenogi?

“Ringruok kik opogre, . . . fuonde duto obed ma konyore kaachiel.”​—1 KOR. 12:25.

1. Ne iwinjo nade kane ichako bedo e kind oganda Jehova?

KANE waweyo piny marachni mi wachako bedo e riwruok mar oganda Jehova, nyaka bed ni ne wamor ahinya kuom yudo joma dewo jowetegi, kendo ma nigi hera e kindgi. Mano kaka ne waneno pogruok maduong’ e kind ogandani kod jogo mohero sigu, ywaruok, kendo joma Satan ema chiko! Ne wadonjo e paradis mar ranyisi kama kuwe, kod winjruok ogundhoe.​—Isa. 48:17, 18; 60:18; 65:25.

2. (a) Ang’o manyalo miyo kik wane jomoko e yo mowinjore? (b) Nyalo dwarore ni mondo watim ang’o?

² Kata kamano, kaka kinde medo kalo, wanyalo chako neno owetewa e yo ma ok owinjore nikech wan joma onyuol e richo. Bedowa joricho nyalo miyo wajimb nyawo mag owetewa kar ng’iyo kido mabeyo ma gin-go kaka jogo maluwo chike Nyasaye. Koket e yo mayot, wiwa wil nenogi kaka Jehova nenogi. Ka mano timorenwa, ma e sa mar nono kaka onego wanegi, kendo loko pachwa mondo wabed joma neno jomoko kaka Jehova.​—Wuok 33:13.

Kaka Jehova Neno Owetewa

3. Muma wacho ni kanyakla mar Jokristo chalo gang’o?

³ Kaka ondiki e 1 Jo Korintho 12:2-26, jaote Paulo ne owacho ni kanyakla mar Jokristo mowal kuom roho, chalo gi ringruok man gi “fuonde mang’eny.” Mana kaka fuonde mag ringruok opogore opogore, jokanyo mag kanyakla bende nigi kido koda nyalo mopogore opogore. To ema Jehova oyie gi pogruokgo duto. Ohero kendo omor gi ng’ato ka ng’ato kuomgi. Omiyo, Paulo jiwowa ni jokanyo mag kanyakla onego “obed ma konyore kaachiel.” Timo mano nyalo bedo matek nikech kido mag jomoko nyalo pogore gi magwa.

4. Ang’o momiyo nyalo dwarore ni walok pachwa kuom kaka waneno owetewa?

⁴ Bende wanyalo bedo mana joma ohero ng’iyo ahinya nyawo mag owetewa. Timo kamano miyo wachalo gi jago picha ma neno mana kama tin kende. Kata kamano, Jehova to neno kama lach, mariwo gima onenono kaachiel gi alworane duto. Wan wanyalo yiero mana ng’iyo gima ok wahero kuom ng’ato, Jehova to neno ng’ano kaka en oduto, koda ka kido mage mabeyo duto. Kaka wamedo temo  bedo kaka Jehova, e kaka wanyalo miyo chuny mar hera koda winjruok omedre ei kanyakla.​—Efes. 4:1-3; 5:1, 2.

5. Ang’o momiyo ok en tim mowinjore ng’ado bura ne jomoko?

⁵ Yesu ne ong’eyo maler ni dhano monyuol e richo ohero ng’ado bura ne jowetegi. Ne osiemo kama: “Kik ung’ad bura, mondo bura kik ong’adnu.” (Math. 7:1) Yesu wacho kanyo ni: “Kik ung’ad bura.” Ne ong’eyo ni thoth jowinjone nohero tim ng’ado ne jomoko bura. Be nyalo bedo ni wan gi kido ma kamano? Ka en kamano, onego watim matek mondo walokre, eka mondo kik obi ong’adnwa bura marach. Kuom adier, ere ratiro ma wan-go mar ng’ado bura ne ng’at ma Jehova tiyogo e migawo moro, kata mar wacho ni ng’atno ok owinjore obed ei kanyakla? Owadwa moro nyalo bedo gi nyawo moko, to ka podi Jehova oyie kode, be nyalo bedo gima ber ka wan to wakwede? (Joha. 6:44) Be wan gi yie ni Jehova ema tayo kanyakla mar joge, kendo ni ka nitie lokruok moko monego tim, to obiro kawo okang’ e kinde mowinjore?​—Som Jo Rumi 14:1-4.

6. Jehova neno nade jotichne?

⁶ Gima ber ahinya kuom Jehova en ni onyalo neno ber ma Jakristo ka Jakristo nyalo bedogo bang’ ka osegol mbala duto mag richo e piny manyien. Ong’eyo bende dongruok ma gisetimo e luwo wachne. Omiyo, Jehova onge gi gima miyo ni nyaka ong’i mana nyawo ka nyawo mar ringruok. Wasomo kama e Zaburi 103:12: “Kaka kor wuok chieng’ obor gi kor podho chieng’, e kaka ogolo timwa mwabayogo, moketogi ku ma bor kodwa.” Mano kaka ng’ato ka ng’ato kuomwa nyalo goyo erokamano nikech wachno!​—Zab. 130:3.

7. Ang’o ma wapuonjre kuom kaka Jehova ne neno Daudi?

⁷ Ei Ndiko, waneno kaka Jehova nigi nyalo maduong’ mar ng’iyo ber kuom ng’ato. Nyasaye noluongo Daudi ni, “jatichna Daudi, ma norito chikna, kendo ma noluwa gi chunye duto, kotimo gi malong’o e wang’a.” (1 Ruo. 14:8) En adier ni, wang’eyo ni Daudi ne otimo gik moko ma ne ok beyo. To pod Jehova ne oyiero neno kido mabeyo ma Daudi ne nigo, nikech ne ong’eyo ni chuny Daudi ne nikare.​—1 Weche 29:17.

Ne Oweteni Kaka Jehova Nenogi

8, 9. (a) Wanyalo bedo kaka Jehova e yo mane? (b) En ranyisi mane mwanyalo tiyogo kuom wachni, to omiyowa puonj mane?

⁸ Jehova nyalo ng’eyo gima nie chuny ng’ato, to wan ok wanyal. Mani en achiel kuom gimomiyo ok onego wang’ad bura ne jomoko. Ok wang’eyo duto kuom paro ma jomoko nigo. Onego watem luwo ranyisi mar Jehova ma ok wang’i mana nyawo monyuolgo dhano, ma gin gik ma gikone biro rumo. Donge nyalo bedo gima ber bedo kaka Jehova kuom wachni? Timo kamano biro medo winjruok ma nigi kuwe e kindwa gi owete koda nyiminewa.​—Efes. 4:23, 24.

⁹ Kuom ranyisi, par ane ot mokethore​—tado chuer, kendo dirisene okethore. Thoth ji nyalo ng’iyo odno ma giwach ni owinjore ogoye piny; nikech ok omor wang’. Kata kamano, ng’at machielo to nyalo neno odno e yo mopogore. Onyalo ng’iyo odno ka ok ong’i mana kethruokneno kende, mi one ni gik ma ogergo odno podi beyo, kendo ni odno inyalo losi machak bed maber kendo. Ong’iewo odno kendo ochako loso kouro kuondene mokethore, mi odno chak neno maber. Bang’e, ji makalo wuoro kaka odno koro ber. Be wanyalo bedo kaka ng’at ma noloso ot ma ne okethoreno? Kar ng’iyo mana nyawo mag owetewa ma nenre gi oko, be wanyalo fwenyo kidogi mabeyo kaachiel gi nyalo ma gin-go mag medo timo dongruok e wach Nyasaye? Ka watimo kamano, wabiro hero owetewa nikech kidogi mabeyo e wach Nyasaye, mana kaka Jehova bende timo.​—Som Jo Hibrania 6:10.

10. Puonj mayudore e Jo Filipi 2:3, 4 nyalo konyowa nade?

¹⁰ Jaote Paulo nochiwo puonj manyalo konyowa bedo gi winjruok maber gi ji duto ei  kanyakla. Ne ojiwo Jokristo kama: “Kik piem bedie kata sungruok, to kubet mamuol, ng’ato ka ng’ato okwanre ni jo moko oloye gi ber. Ng’ato ka ng’ato kik one mana gige owuon to one mag jo moko bende.” (Fili. 2:3, 4) Bolruok biro konyowa neno jomoko e yo mowinjore. Dewo gigo makonyo jomoko kendo neno ber kuomgi bende biro konyowa nenogi kaka Jehova nenogi.

11. Gin lokruok mage mosetimore e kanyakla moko?

¹¹ E kinde mosekalo machiegni, dongruok matimore e piny mangima osemiyo ji mang’eny odar. Taonde moko oting’o ji mowuok e pinje mopogore opogore. Moko kuom ji ma gin welo kuonde ma wadakie oserwako adiera mar Muma, mi giseriwore kodwa e lamo Jehova. Giwuok e “pinje duto, gi dhoudi duto, gi ogendini duto, gi dhok duto.” (Fwe. 7:9) Mano osemiyo thoth kanyakla magwa sani oting’o ji mowuok e pinje mopogore opogore.

12. Onego wamed neno ng’ato gi nyawadgi e yo mane, to ang’o momiyo mano nyalo bedo gima ok yot seche moko?

¹² E kanyaklawa, nyalo dwarore wamed nono kaka wanyalo bedo gi paro mowinjore kuom kaka wanenore ng’ato gi nyawadgi. Mano miyo waketo puonj mar jaote Petro e paro, ni mondo wabed joma ‘oherre ma onge miganga kaka owete’ kendo “waherre ng’ato gi ng’ato gi chuny duto chuth.” (1 Pet. 1:22) Nyago hera madier e kind ji ma a e pinje mopogore opogore nyalo bedo gima ok yot. Jokristo wetewa nyalo bedo gi kit ngima, kit somo, chalgi mar yuto kaachiel gi kido mag dhoudi, mopogore gi magwa. Be iyudo ni tekni ng’eyo pachgi koda yo ma gitimogo gik moko? Nyalo bedo ni gin bende giparo kamano kuomi. Kata kamano, waduto ichikowa kama: “Heruru owete duto.”​—1 Pet. 2:17, Luo NT 2003.

13. Gin lokruok mage manyalo dwarore watim e paro?

¹³ Nyalo dwarore ni watim lokruok moko e pachwa mondo omi wamed yawo chunywa e hero owetewa duto. (Som 2 Jo Korintho 6:12, 13.) Be nitie seche moko ma wanyalo wacho gimoro kaka “An ok achayo jomoko, . . . ” kae to kendo wachako kwano kido moko maricho ma waparo ni yudore ahinya kuom oganda moro? Paro kaka mago nyalo nyiso ni dwarore wagol achaye moro amora ma dipo ni podi wamako e chunywa. Wanyalo penjore kama, ‘Be pile atimo kinda mondo ang’e jogo mawuok e kit ngima mopogre gi mara?’ Nonruok e yo ma kamano nyalo konyowa dhi nyime rwako owetewa mawuok e pinje duto kendo bedo mamor kodgi.

14, 15. (a) Chiw ane ranyisi mag jogo ma ne oloko pachgi kuom kaka ne gineno jomoko? (b) Wanyalo luwo ranyisigi nade?

¹⁴ Muma chiwonwa ranyisi mabeyo mag jogo ma ne otimo lokruok kuom wachni, ma achiel kuomgi ne en jaote Petro. Kaka Ja-Yahudi, Petro ne ok nyal donjo e dala joma ok Jo-Yahudi. Par ane kaka ne owinjo kane owachne ni mondo odhi e dala Kornelio, ng’at ma ne ok Ja-Yahudi kendo ma ok ne oter nyangu! Petro notimo lokruok, kofwenyo ni ne en dwach Nyasaye mondo ji ma a e ogendini duto bende obed e kanyakla mar Jokristo. (Tich 10:​9-35) Saulo, ma bang’e nobedo jaote Paulo, bende ne otimo lokruok kuom achaye ma ne en-go. Ne oyie ni ne en gi sigu kuom Jokristo mochopo e okang’ ma ‘nosando ahinya ruok kanisa mar Nyasaye, kotemo kethogo.’ Kata kamano, kane Ruoth orieyo Paulo, ne otimo lokruok madongo e ngimane mi bende ne ochako yie ni mondo ochike gi jogo ma ne osando chon.​—Gala. 1:13-20.

¹⁵ Onge kiawa ni wanyalo timo lokruok e pachwa, kokalo kuom roho mar Jehova. Ka wayudo ni nitie kido mag achaye mopondo ei chunywa, onego waked mondo watiekgi chuth, kendo ‘rito bedowa e riwruok achiel mar roho ka watuere gi kuwe.’ (Efes. 4:3-6) Muma jiwowa ni mondo ‘wabed gi hera; en e ratego ma tueyo kendo chopo wechego duto.’​—Kolo. 3:14.

 Luwo Ranyisi Jehova e Tijwa mar Lendo

16. Dwaro mar Nyasaye en ang’o ne ji?

¹⁶ Jaote Paulo nondiko ni: “Nyasaye ok dew wang’ ji.” (Rumi 2:11) Dwaro mar Jehova en ni mondo ji mowuok e ogendini duto odonj e chenro mare mar lamo. (Som 1 Timotheo 2:3, 4.) Mondo omi mano otimre, oseloso chenro mondo ‘wach maber mochwere’ oland ne “pinje duto, kod dhoudi duto, gi dhok duto, gi ogendini duto.” (Fwe. 14:6) Yesu nowacho kama: “Puodho en piny ngima.” (Math. 13:38) Mano nyiso ang’o kuomi kaachiel gi joodi?

17. Wanyalo konyo nade ji duto mopogore opogore?

¹⁷ Ji duto ok nyal dhi kuonde maboyo e piny ka gitero wach Pinyruoth ne jomoko. Kata kamano, wanyalo bedo gi nyalo mar tero oteni ne ji modak e alworawa moa kuonde duto e piny. Be waikore kawo thuolo mar lendo ne ji mawuok e ogendini duto, to ok mana jogo ma waselendoni kuom higini? Ang’o ma moni timo kinda mondo ilend ne jomoko ma podi ok oselendni e yo maber chuth?​—Rumi 15:20, 21.

18. Yesu ne onyiso nade ni odewo ji?

¹⁸ Yesu ne gombo ahinya konyo ji. Ne ok olend mana kamoro achiel kende. Kan moro ei Muma wachonwa ni “Yesu ne wuotho e mier madongo gi matindo, kopuonjo.” Kae to, “ka noneno oganda, nokechogi” mokonyogi.—Math. 9:35-37.

19, 20. Gin yore mage ma wanyalo nyisogo ni wadewo ji mowuok e pinje moko kaka Jehova kod Yesu timo?

¹⁹ Gin yore kaka mage ma inyalo nyisogo kido ma kamano? Jomoko osetimo kinda mar lendo kuonde moko e alworagi ma ok thor lendoe. Magi nyalo riwo kuonde mag ohala, yueyo, stend mag mtokni, kata mier mochiel ma donjo ok yot. Moko to osetimo kinda mar puonjruok dhok machielo mondo omi gilend ne jogo mawuok e dhoudi mamoko ma koro odak e alworagi, kata lendo ne jomoko ma ok oselendni ahinya e kinde mokalo. Puonjruok kaka inyalo moso jogo e dhogi nyalo konyo ahinya e nyiso ni idewogi. Ka ok wanyal puonjruok dhok machielo, be wanyalo jiwo jogo matimo kamano? Kuom adier, ok wadwar nyoso chuny jogo matimo kamano kata wuoyo marach kuom kinda ma gitimo e lendo ne ji mowuok e piny machielo. Ngima dhano duto duong’ e wang’ Nyasaye, kendo wadwaro neno gik moko e yo ma kamano.—Kolo. 3:10, 11.

²⁰ Neno ji kaka Nyasaye nenogi bende dwaro ni walend ne ji duto, ma ok wang’i chalgi. Moko kuomgi nyalo bedo ni onge kar dak, gilil, kata nyalo nenre maler ni gidak e ngima mar terruok. Ka jomoko ok nyiswa ng’wono, mano ok onego omi wabed gi paro marach kuom piny, dhoot, kata anyuola ma giwuokie. Jomoko ne otimo ne Paulo marach, to mano ne ok omiyo oweyo lendo ne ji ma ne a e dhoodno. (Tich 14:5-7, 19-22) Ne ogeno ni jomoko ne nyalo rwako wach gi mor.

21. Neno jomoko kaka Jehova nenogi nyalo konyi nade?

²¹ Koro nenore maler moloyo ni neno ji e yo mowinjore—mana kaka Jehova nenogi​—en gima dwarore e kindwa gi owetewa ei kanyakla, owetewa mowuok e pinje moko, koda joma walendoni. Kaka wamedo neno jomoko e yo ma Jehova nenogigo, e kaka wabiro miyo kuwe kod winjruok omed dhi nyime. Kendo mano biro miyo wakony jomoko hero Jehova, ma en Nyasaye ma ok ‘osedewo wang’ ji,’ to ohero ji duto, nimar “giduto gin tich luete.”​—Ayub 34:19.

Be Inyalo Dwoko?

• En yo mane ma ok onego wane godo owetewa?

• Wanyalo luwo ranyisi mar Jehova nade kuom kaka waneno owetewa?

• Gin puonj mage ma iseyudo kuom kaka onego wane owetewa ma wuok e pinje duto?

• Wanyalo luwo nade ranyisi mar Jehova ka walendo?

[Penjo mag Puonjruok]