Dhano ne Oa Kanye?

ANG’O MOMIYO DWOKO MAR PENJONI DWARORE AHINYA? Ji mang’eny ipuonjo ni ngima e piny nosieko kende nono. Inyisogi ni kokalo kuom gik moko ma ne otimore kendgi, dhano nosieko ma ok ochweye mi obedo gi nyalo mar paro, bedo gi rieko, koda dwaro mar lamo.

Kata kamano, par ane wachni: Ka en adier ni ne wasieko ma ok ochwewa, kendo ni Jachwech onge, to kare dhano gin kiye. Dhano dikoro onge gi kama ginyalo yudoe rieko mamalo moloyo manyalo tayogi, kendo dikoro waonge gi ng’at manyalo konyowa loyo chandruoge. Dikoro chunowa keto geno kuom rieko mag dhano e geng’o kethruok mar alwora ma wadakie, e tieko ywaruok mag siasa, kendo e loyo chandruogewa ng’ato ka ng’ato.

Be keto geno kuom rieko mag dhano en gima keloni kuwe e pachi? Ka ok en kamano, ng’e ni nitie ng’at ma nigi rieko mamalo chuth moloyo dhano. Ng’eyo mano ok en mana wach ma morowa kende, to bende en paro manyiso rieko.

Gima Muma Wacho

Muma puonjo ni dhano en chwech Nyasaye. Ok ne wasieko kendwa nono. Kar mano, wan nyithind Wuoro ma jahera kendo mariek. Ne ane weche ma Muma leronwa.

Chakruok 1:27. “Nyasaye nochweyo dhano gi kite owuon, nochweye e kido machalo kode; nochweyogi dichwo gi dhako.”

Zaburi 139:14. “Anagoni erokamano; nimar ne ochweya malich ma miya wuoro: Tije magi gin honini; kendo chunya ong’eyo ma maber ahinya.”

Mathayo 19:4-6. “Pok usomo ni nyaka a chakruok Jachuech nochueyogi dichwo gi dhako? Kendo nowacho niya, ‘Nikech wachno ng’ato nowe wuon mare gi min mare, kendo nopadre gi chiege, mi ji ariyogo nobed ringruok achiel.’ Emomiyo ok pod gin ji ariyo, to gin ringruok achiel. Omiyo gi ma Nyasaye oseriwo, kik dhano opogi.”

Tich Joote 17:24, 25. “Nyasaye ma nochueyo piny gi gik moko duto manie iye, en Ruodh polo gi piny, kendo ok odak e ut lemo molos gi lwedo; kata ok tine gi lwet ji, ka ng’a mochando gimoro, nikech en owuon e mochiwo ni duto ngima, gi muya, gi gik moko duto.”

Fweny 4:11. “Yaye Ruodhwa kendo Nyasachwa, iwinjori nwang’o duong’ gi pak gi teko; nikech in e ma nichueyo gik moko duto, kendo dwaroni omiyo gintie, kendo nochuegi.”

Kaka Dwoko ma Muma Chiwo Kelo Kuwe Madier e Paro

Ng’eyo ni ‘gik moko duto manie piny ochakore kuom’ Nyasaye, miyo waloko yo ma wanenogo jomoko. (Jo Efeso 3:15) Bedo gi ng’eyo ma kamano bende konyowa bedo gi paro makare kuomwa wawegi koda kuom chandruogewa. Pachwa biro lokore e yore maluwogi.

Sama ng’ado paro matek ochomowa, ok wabi bedo gi kibaji sama jomoko chiwo paro mopogore. Kar mano, wabiro geno chuth kuom puonj mag Muma. Nikech ang’o? En nikech “Ndiko duto mowuok kuom much Nyasaye, konyo kuom puonjo ji, kuom kwero gik maricho, kuom rieyo ji, kendo kuom tiego ji mondo gibed jo makare, mondo ng’at Nyasaye obed molony, kendo moikore chuth ni tich mabeyo duto.”​—2 Timotheo 3:16, 17.

 En adier ni, luwo puonj mag Muma dwaro kinda koda horruok. Seche moko puonj manie Muma nyalo kata dwaro ni watim mopogore gi gombo manie chunywa. (Chakruok 8:21) Kata kamano, ka wayie ni ne ochwewa gi Wuoro ma jahera manie polo, kare en gima nyiso rieko ng’ado ni ong’eyo yo maber moloyo monego waluw. (Isaiah 55:9) Omiyo Wachne jiwowa kama: ‘Gen Jehova gi chunyi duto, kendo kik iketri kuom lony gi weche mayoreyore ma in-go iwuon. Yie kuome e yoreni duto, mi nomi yoreni bedo mochikore tir.’ (Ngeche 3:5, 6) Ka waluwo puonjno, to parruok ma wabedogo sama wayudo chandruoge, kata sama wang’ado paro, biro rumo.

Sama ji kwedowa nikech oganda ma wawuokie, chunywa ok bi chandore ka waparo ni wan joma ni piny ahinya, kendo paro ni wan joma nono kopimwa gi oganda machielo. Kar mano, wabiro bedo gi paro mowinjore kuomwa wawegi. Nikech ang’o? En nikech, Jehova Nyasaye, ma en Wuonwa, “ok odewo wang’ ji; to kuom ogendini duto ng’at moluore, kendo ma timo tim makare, e moyiego.”​—Tich Joote 10:34, 35.

Ng’eyo wachno bende biro miyo kik wabed gi paro mar kwedo jomoko nikech oganda ma giwuokie. Wabiro nwang’o ni onge tiende bedo gi paro ni wabeyo maloyo joma wuok e oganda machielo, nikech “kuom ng’at achiel [Nyasaye] nochueyo ogendini duto mag ji, mondo gidag e piny duto.”​—Tich Joote 17:26.

Kuom adier, ng’eyo ni ne ochwewa, kendo ni Jachwechwa dewowa, miyo wayudo kuwe madier e paro. Kata kamano, nitie gik ma podi dwarore mondo eka wadhi nyime bedo gi kuwe e paro.

[Weche manie ite mar 4]

Be dhano ne osieko kendgi ma ok ochwegi?