Jehova Winjo Ywakwa mag Kwayo Kony

“Wang’ Jehova omanyore gi jo matir, kendo ite oyawore ni ywakgi.”​—ZAB. 34:15.

1, 2. (a) Ji mang’eny winjo nade e ndalogi? (b) To ang’o momiyo ok wawuor wachno?

BE IN e chandruok? Ka en kamano, to ng’e ni ok in kendi. Nitie ji mang’eny ma kedo gi chandruoge manie piny marachni. Kuom jomoko, kedo gi chandruogegi en gima teknegi ahinya. Giwinjo matek mana kaka Daudi jandik-zaburi nondiko kama: “Anyosora kendo denda oriemo malit; aseywak nikech hum me i chunya. Adundona gwecho, tekra opuch: To chia wang’a oselalna bende.”​—Zab. 38:8, 10.

² Wan kaka Jokristo, chandruoge mag ngima ok gin gik ma kawowa gi wuoro. Wang’eyo ni “masiche malit” en achiel kuom ranyis ma ne okor mar kinde bedoe mar Yesu. (Mari. 13:8; Math. 24:3) Tiend wach ma ne olok ni “masiche malit” chalo gi muoch mager ma dhako bedogo sa nyuol. Mano kaka wachno nyiso adimba lit momedore ma ji nigo e kindegi mag “chandruok” mager!​—2 Timo. 3:1.

Jehova Ong’eyo Chandruoge Mwayudo

3. En ang’o ma oganda Jehova ong’eyo maber?

³ Oganda Jehova ong’eyo maber ni gin bende chandruoge yudogi, kendo nenre maler ni gibiro medo bedo marach moloyo. E wi chandruoge ma dhano duto yudo, jotich Nyasaye bende nigi ‘jaskigi, Satan,’ madwaro ketho yiewa. (1 Pet. 5:8) Omiyo nyalo bedo mayot winjo kaka Daudi, ma nowacho kama: ‘Akwede osenyoso chunya, kendo denda pek ahinya. Kendo nakiyo mondo jomoko otim ng’wono, to ne onge ng’ato, kod johoch, to ne ok anwang’o ng’ato’!​—Zab. 69:20.

4. En ang’o ma hoyowa seche mwayudo chandruok?

⁴ Be Daudi ne nyiso ni noonge geno moro amora chuth? Ooyo. Ne ane wechene maluwo e zaburino: ‘Jehova winjo jochan, mi ok ochayo joge motwe.’ (Zab. 69:33) Kinde mang’eny wanyalo neno ni wachalo jo motwe e chandruok. Nyalo nenre ni jomoko ok ong’eyo chal marwa gadier, to seche moko en kamano. To mana kaka Daudi, wayudo hoch kuom ng’eyo ni Jehova ong’eyo chandruogewa e yo maber chuth.​—Zab. 34:15.

5. Ruoth Suleman ne nigi adier kuom ang’o?

⁵ Suleman wuod Daudi nojiwo wachni sama ne iwalo hekalu e Jerusalem. (Som 2 Weche mag Ndalo 6:29-31.) Ne okwayo Jehova mondo owinj lamo mar ng’ato ka ng’ato ma chunye tir modhi Ire ka nigi “thone owuon gi chandruokne owuon.” Nyasaye ne dhi timo nade kuom lamo mag joma chandoregi? Suleman ne onyiso ni ne en gadier ni Nyasaye ne ok dhi winjo mana lamogi kende, to bende ne odhi konyogi. Nikech ang’o? En nikech Nyasaye ong’eyo gadier gik manie “chuny nyithi dhano.”

6. Ere kaka wanyalo nyagore gi parruok, to nikech ang’o?

⁶ Wan bende wanyalo dhi ir Jehova e lamo nikech ‘thowa gi chandruokwa’ wawegi. Onego wayud hoch kuom ng’eyo ni ong’eyo chandruokwa kendo odewowa. Jaote Petro noyie gi mano kane owacho kama: “Keturu parruok maru duto kuome,  nikech oparou.” (1 Pet. 5:7) Kuom adier, Jehova dewo ahinya gik matimorenwa. Yesu nojiwo kaka Jehova dewo joge gi hera, kowacho kama: “To oyundi ariyo ok ing’iewo gi hela achiel koso? Kata kamano achiel kuomgi ok nolwar piny ma ok Wuonu ong’eyo. To kata mana yie wiu osekwan duto. Kuom mano kik uluor; un uloyo winy mang’eny.”​—Math. 10:29-31.

Gen Kuom Kony ma Jehova Chiwo

7. En kony mane misingonwa?

⁷ Wanyalo bedo gadier ni Jehova oikore kendo en gi teko mar konyowa sama chandruoge odiyowa. “Nyasaye en kar bwokwa gi tekrewa, En jakony man kodwa chuth e chandrwok.” (Zab. 34:15-18; 46:1) Ere kaka Nyasaye chiwo konyno? Non ane gima 1 Jo Korintho 10:13 wacho: “Nyasaye en Jadier, kendo ok noyie mondo otemu moloyo tekreu; to e temruokno nomiugo bende yo mar wuok, mondo unyal dhilie.” Jehova nyalo chiko gik moko mondo ogol chandruok mwayudo, kata onyalo miyowa teko mar dhilie. Kata bed ni Jehova oyiero tiyo gi yo mane kuom ariyogi, obiro konyowa.

8. Wanyalo nyiso nade ni wayie gi kony ma Nyasaye chiwo?

⁸ Ere kaka wanyalo nyiso ni wayie gi konyno? Ne ni ijiwowa mondo: ‘Waket parruokwa duto kuome.’ Tiende ni wakawo ting’wa koda chandruogewa, to wamiyogi Jehova e yor ranyisi. Watemo mondo wawe parruok, kae to wahore mos ka wagene mondo ochopnwa dwarowa. (Math. 6:25-32) Geno ma kamano dwaro bolruok, ma ok wagen kuom tekrewa kata riekowa wawegi. Ka wabolore “e bwo lwet Nyasaye mantie teko,” wanyiso ni wayie gi chalwa kaka jo morem. (Som 1 Petro 5:6.) Kae to timo mano konyowa nyagruok gi gimoro amora ma Nyasaye oweyo mondo oyudwa. Wanyalo gombo ahinya mondo ogonywa kuom chandruogno, to kata kamano wan gadier ni Jehova ong’eyo chutho sa koda kaka obiro konyowa.​—Zab. 54:7; Isa. 41:10.

9. En ting’ machalo nade ma nochuno Daudi keto kuom Jehova?

⁹ Par ane weche Daudi mondiki e Zaburi 55:22 ni: “Ket ting’ mari kuom Jehova, mi nopidhi; ok noyie jo matir oyiengini nyaka chieng’.” Kane Daudi ondiko wechego, noyudo en e chandruok maduong’ ahinya. (Zab. 55:4) Wachre ni zaburini ne ondiki kane Absalom wuode ochano ling’ling’maye pinyruoth. Ahithofel, jal ma Daudi nogeno ahinya e miye paro, bende ne oriwo Absalom lwedo e wachno. Ne ochuno Daudi ringo a Jerusalem nikech ngimane. (2 Sam. 15:12-14) To kata mana e bwo chandruok ma kamago, Daudi ne odhi nyime geno kuom Nyasaye, to timo mano ne okelone ber.

10. En ang’o ma nyaka watim sama wan e chandruok?

¹⁰ Mana kaka Daudi, wan bende dwarore ahinya mondo wawuo gi Jehova e lamo kuom chandruok moro amora manyalo bedo ni wan-go. We wanon ane gima jaote Paulo nojiwowa mondo watim kuom wachni. (Som Jo Filipi 4:6, 7.) Ang’o mabiro timore ka walemo gi chunywa duto kamano? ‘Kuwe mar Nyasaye, modhierore  ng’eyo, norit chunywa gi parowa e Kristo Yesu.’

11. Ere kaka “kuwe mar Nyasaye” rito chunywa koda parowa?

¹¹ Be lamo biro loko chal mari? Ee, nyalore. Kata kamano, onego wang’e ni kinde duto Jehova ok dwok lamowa kaluwore gi kaka nyalo bedo ni wadwaro. Kata kamano, lamo konyowa bedo gi paro mowinjore mondo omi chandruok mwayudo kik mi wabed gi parruok ahinya. “Kuwe mar Nyasaye” nyalo hoyowa seche ma wan-gi parruok mang’eny. Mana kaka lang lweny momi tij rito dala mondo kik monji, “kuwe mar Nyasaye” biro rito chunywa koda parowa. Bende obiro miyo walo kiawa, luoro, kata paro manyalo olo chunywa, kendo kuwe mar Nyasaye biro geng’owa kik warikni ng’ado paro kata timo kamano e yo ma ok nyis rieko.​—Zab. 145:18.

12. Chiw ane ranyisi kaka ng’ato nyalo bedo gi paro mokuwe.

¹² Wanyalo bedo gi paro mokuwe nade sama wanie chandruok? Ne ane ranyisi moro ma dwa ket gi chal marwa. Jal moro mondik tich e kambi nyalo bedo ni tiyo e bwo maneja ma sande. Kata kamano, jalo nigi thuolo mar dhi nyiso wuon kambino, ma en ng’at mamuol, mawinjo ywak ji. Kae to wuon kambino lero ne jalo ni ong’eyo chalne, kendo onyise ni ochiegni golo maneja ma sandeno e tich. Ng’eyo mano miyo jal mondikno winjo nade? Yie gi wachno kendo ng’eyo gima chiegni timore, biro jiwe mondo odhi nyime gi tich, kata obedo ni podi obiro romo gi chandruok moko matin kapok ogol manejano. Kamano bende, wang’eyo ni Jehova ong’eyo chalwa, kendo osingonwa ni machiegni, “ibiro wito jaloch pinyni oko.” (Joha. 12:31) Mano kaka wachno hoyowa!

13. Kaachiel gi lamo, en ang’o kendo ma nyaka watim?

¹³ Be mano nyiso ni ka wasewacho ne Jehova chandruogewa e lamo to oromo aroma? Ooyo. Nitie gik ma pod dwarore. Dwarore watim kaluwore gi lamowa. Kane Ruoth Saulo ooro chwo e dala Daudi mondo ginege, Daudi nolamo kama: “A Nyasaye, gola kuom jowasika: keta malo ni jogo ma buka. Gola kuom jo ma timo mamono, kendo resa kuom jogo ji.” (Zab. 59:1, 2) Kaachiel gi lamo, Daudi nowinjo dwond chiege, mi okawo okang’ ma ne dwarore mar tony. (1 Sam. 19:11, 12) E yo machalo kamano, wanyalo lamo kwakwayo rieko manyalo konyowa kedo gi chandruokwa, kata konyowa loyogi.​—Jak. 1:5.

Kaka Wanyalo Yudo Teko mar Nano

14. Ang’o manyalo konyowa nano e bwo chandruok?

¹⁴ Nyalo bedo ni ok bi gol chandruokwa kanyo gi kanyo. Ginyalo kata mana dhi nyime kuom kinde. Ka en kamano, en ang’o mabiro konyowa nano? Mokwongo, ng’e ni ka wadhi nyime tiyo ne Jehova kwachung’ motegno kata mana e bwo chandruok, wanyiso ni wahere gadier. (Tich 14:22) Ket e pachi ni Satan nodonjo ne Ayub kopenjo ni: ‘Ayub oluoro Nyasaye nono ma ok obi yudo gi moro koso? Ok niketo chiel molwore kuonde duto, en kod dalane, gi gik moko duto ma en-go? Isegwedho gi hawi tich mar luete, mi gige omedore e piny. To koro, rie lueti, imul gik moko duto ma en-go, eka noyanyi e nyimi.’ (Ayub 1:9-11) Nikech chung’ne motegno, Ayub nonyiso ni wach ma ne idonjonegono ne en miriambo.  Ka wanano e bwo chandruok, wan bende wabedo gi thuolo mar nyiso ni Satan en jamiriambo. Kae to nano bende jiwo geno ma wan-go.​—Jak. 1:4.

15. Gin ranyisi mage manyalo jiwowa?

¹⁵ Mar ariyo, ket e pachi bende ni “masichego bende nwang’o oweteu manie piny.” (1 Pet. 5:9) Ee, “onge temruok ma osenwang’ou ma ok mano ma yudo dhano.” (1 Kor. 10:13) Omiyo, inyalo yudo teko kod chir ka iparo matut kuom ranyisi mag jomoko, kar keto pachi mana kuom chandruoge ma in-go iwuon. (1 Thes. 1:5-7; Hibr. 12:1) Kaw kinde mar paro ranyisi mag jogo ming’eyo mosechung’ motegno ka ginano kata mana e bwo chandruoge malit ahinya. Be isetimo nonro kisomo buge moting’o weche mag joma oseyudo chandruoge machalo gi mago miyudo? Inyalo yudo ni wechego jiwi ahinya.

16. Nyasaye jiwowa nade seche ma waromo gi tembe mopogore opogre?

¹⁶ Mar adek, ng’e ni Jehova en “Wuon ng’wono, kendo Nyasach hoch duto. Ohoyowa e masiche duto, mondo, kuom hoch ma Nyasaye hoyowago, wan bende wanyal hoyo jogo ma neno masira moro.” (2 Kor. 1:3, 4) Chalo ka gima Nyasaye ochung’ e bathwa mondo ojiwwa kendo otegwa, to ok mana e masichewa masani kende, to kata ‘e masichewa duto.’ Mani konyowa hoyo joma moko “ma neno masira moro” amora. Paulo wuon noneno adiera mar wechegi.​—2 Kor. 4:8, 9; 11:23-27.

17. Muma nyalo konyowa nade kedo gi chandruoge mag ngima?

¹⁷ Mar ang’wen, wan gi Muma ma en Wach Nyasaye ma “konyo kuom puonjo ji, kuom kwero gik maricho, kuom rieyo ji, kendo kuom tiego ji mondo gibed jo makare, mondo ng’at Nyasaye obed molony, kendo moikore chuth ni tich mabeyo duto.” (2 Timo. 3:16, 17) Wach Nyasaye ok mi wabed ‘molony kendo moikore ni tich mabeyo duto’ kende. To bende okonyowa kedo gi chandruoge mag ngima. Omiyowa bedo jo “molony”, kendo “moikore chuth.” Kaluwore gi dhok mokwongo, tiend wach molok ni bedo “moikore chuth” en ni, “moseketne gik madwarore.” Nyalo bedo ni wachni ne itiyogo chon kuom yie miketoe gik moko duto madwarore eka owuogi kodhi e wuoth, kata kiwuoyo kuom masin ma nigi nyalo mar timo gimoro amora midwaro kuome. Kamano bende, kokalo kuom Wachne, Jehova miyowa gigo duto madwarore mondo omi wanyagre gi gimoro amora mwanyalo romogo. Kuom mano, wanyalo wacho ni, “Ka Nyasaye oweyo chandruogno mondo odhi nyime, kare onyalo konya nanoe.”

Warruok Kuom Chandruogewa Duto

18. En ang’o bende ma ka waketo e pachwa to biro medo konyowa nano ka wachung’ motegno?

¹⁸ Mar abich: Ket pachi kinde duto kuom ng’eyo ni Jehova chiegni gonyo dhano e chandruok duto. (Zab. 34:19; 37:9-11; 2 Pet. 2:9) Gikone, warruokwa e lwet Nyasaye ok nobed mana warruok kuom chandruoge masani kende, to bende wanayud thuolo mar yudo ngima mochwere, obed e polo kaachiel gi Yesu, kata e paradis e piny.

19. Ere kaka chung’ motegno ka wanano nyalore?

¹⁹ Nyaka chop kindeno, wadhi nyime nyagruok gi chandruoge mag piny marachni. Mano kaka wagombo kindeno ma gigo ok nochak obedie! (Zab. 55:6-8) Wang’euru ni nano kwachung’ motegno nyiso ni Jachien en jamiriambo. We uru mondo wayud teko kokalo kuom lamowa kaachiel gi riwruokwa mar owete ma Jokristo, kwaketo e pachwa ni owetewa bende yudo tembe kaka magwa. Dhi nyime bedo molony kendo moikore chuth, kitiyo maber gi Wach Nyasaye. Kik iwe geno ma in-go kuom hera mang’won mar “Nyasach hoch duto” oyiengini. Ng’e ni ‘wang’ Jehova omanyore gi jo matir, kendo ite oyawore ni ywakgi.’​—Zab. 34:15.

Be Inyalo Dwoko?

• Daudi ne neno nade chandruoge ma ne oyudo?

• Ruoth Suleman nonyiso ni en gadier kuom wach mane?

• En ang’o manyalo konyowa nyagruok gi gima Jehova oweyo mondo oyudwa?

[Penjo mag Puonjruok]

[Picha manie ite mar 19]

Suleman ne nigi adier ni Jehova ne dhi konyo joge manie chandruok