Kinda mar Manyo Dwoko

“Bang’ ng’eyo ‘kaka’ wanyalo manyo pesa marito ngimawa, kendo yudo gik mabeyo ma yande chunywa gombo, kaka dak e ngima maber miwuoro, winjo thumbe mamit, kendo chiemo kaka chunywa dwaro​—pod wapenjore niya, ‘ang’o momiyo’ wangima? Ang’o momiyo dhano piem ahinya e ngima? Ere tiende?”​—David G. Myers, profesa mapuonjo kaka pach dhano tiyo e Kolej mar Hope, Holland, Michigan, Amerka.

INYALO dwoko nade penjo ma profesano penjogo? Jomoko nyalo wuoro kabe en gima owinjore manyo dwoko mag penjogo. Kata kamano, weyo manyo dwoko mag penjogo, chal gi weyo ma ok igolo ge modonjoni ei wuoche. Inyalo medo wuotho, to kata kamano ok ibi bedo mamor e wuodhino.

Kapo ni isepenjorie gimomiyo dhano ngima, ng’e ni ok in kendi. Kaluwore gi nonro moro maduong’ mosetim miluongo ni World Values Survey, ne oyud ni e pinje mang’eny, nitie kwan momedore mag joma dwaro ng’eyo “tiend ngima koda gimomiyo dhano ngima.”

Ka idwaro bedo gi paro mokuwe gadier, dwarore iyud dwoko kuom penjo moko adek madongo.

Dhano ne oa kanye?

Ang’o momiyo dhano ngima?

Kinde mabiro nochal nade?

Dwoko madier kendo migeno kuom penjo madongogi nyalo yudore kanye? Kar chiwo mana dwoko miparo apara, weche manie it maluwogi biro chiwo dwoko mowuok e Muma ma en Wach Nyasaye. Wagweli mondo iyaw, kendo ine iwuon gima Muma mari wacho.