A POYA nono, pi mang’eny miwuoro ne opong’o bur matut mikunyoe kite mag mirni (coal) e dala mar Pittsburgh, Pennsylvania, Amerka. Pigno ne odinone jokunyo ochiko, ei bur madiny, fut 240 e bwo lowo. Bang’ odiechienge adek, ne gin oko, ka gingima maber. Ne oresgi nade?

Ka gikonyore gi map mar jokunyo kod masin mar setlait, joresgi nokunyo bur ma lachne romo inj 30 machiegni gi kanyo, mi giloro gir ywayogi nyaka kama jokunyogo ne oyudo ochokoree. Ne oywa jokunyogo oko achiel achiel, mi giwuok kama ne dobedo liendgi. Giduto ne gimor, chunygi nogonyore, kendo ne gipwoyo ahinya kaka ne oresgi.

Ng’enywa ok bi moko e bwo lowo kaka jokunyo ochikogo, kata romo gi masira maduong’ makelowa machiegni gi tho. Kata kamano, waduto dwarore ni oreswa, nimar ok wanyal tony kuom tuoche, tiyo, kae to gikone tho. Ayub jaduong’ ma noluoro Nyasaye nowacho kama: ‘Dhano ma dhako onyuolo ndalone nok, kendo ochandore pile. Owuok kaka maua, kendo igole oko, oringo ka tipo, mi ok osik.’ (Ayub 14:1, 2) Sani, bang’ higini madirom 3,500, wechenego pod gin adier, nimar ng’ano kuomwa manyalo yombo tho? Kata bed ni wadak kanye, kata ni warito ngimawa e yo maber machalo nade, podi dwarore mondo oreswa kuom obadho mag chandruok, ti, koda tho.

Josayans koda joma moko, tiyo matek mondo gichor ngima dhano okal higini ma wadakgo sani. Riwruok moro wacho ni migawo mare maduong’ en mar “tieko tho” kendo “konyo joge otim duto ma ginyalo mondo kik githo ngang’.” Kata kamano, lony e sayans kaachiel gi kinda kende ok osechwalo ngima dhano ma okalo higini 70 kata 80 ma Musa nowacho higini 3,500 mosekadho.—Zaburi 90:10.

Kata bed ni iyie kata ok iyie gi gima Ayub nowacho kuom ngima koda tho, adiera en ni, kaka higini medo sudo, in bende ibiro ‘ringo ka tipo,’ nyaka e thoni, ma iwe osiepeni, joodu, jo dalau, kaachiel gi duto misetimo. Suleman Ruodh Israel machon nondiko kama: “Ni mar jo mangima ging’eyo ni gibiro tho: to jo motho ok ging’eyo gi moro, mi pok giongego kendo; ni mar wi ji owil gi parogi.”—Eklesiastes 9:5.

Kaluwore gi Muma, adiera malit en ni, tho ‘oselocho,’ kaka ruoth marach e wi oganda dhano. Ee, tho e jasigu maduong’ie moloyo madwarore oresie oganda dhano. (Jo Rumi 5:14; 1 Jo Korintho 15:26) Onge jotich motieg maber kamoro amora e piny mangima, kendo ma nigi gik konyo ji e seche mag masira, manyalo resi chuth kuom tho. Kata kamano, Jehova Nyasaye, Jachwech dhano, osetimo chenro mar resi kamano.