CHIEGNI higini 2,000 mosekalo e Pasaka mar Jo-Yahudi mar higa 33 E Ndalowa, ng’at moro ma ne onge ketho ne otho eka mondo jomoko oyud ngima. Jalo ne en ng’a? Ne en Yesu ja Nazareth. To ng’a gini mabiro yudo gweth kuom tim ma jaber ma ne otimono? Gin oganda dhano duto. Ndiko moro mong’ere ahinya ei Muma keto wach chiwruokno e yo machuok kama: “Nyasaye nohero piny ahinya, omiyo nochiwo Wuode ma miderma, mondo ng’a ma oyie kuome kik lal, to obed gi ngima mochwere.”​—Johana 3:16.

Kata obedo ni ji mang’eny ong’eyo ndikono, ji manok kende ema winjo tiende gadier. Giwuoro niya, ‘Ang’o momiyo misango mar Kristo dwarore? Ere kaka tho mar ng’ato achiel nyalo reso oganda dhano a e kum mar tho ma nyaka chieng’?’ Muma chiwo dwoko mag penjogi e yo maler kendo ma kweyo chuny.

Jomoko paro ni ne ochwe dhano mana mondo odag kuom kinde machuok e piny, gibed e bwo tembe koda chandruok, giyudie mor matin kae to githo kendo giwuogi gidhi kama ber moloyo. Kaluwore gi paroni, ji neno ni tho dhano en achiel kuom dwaro mag Nyasaye. Kata kamano, Muma to nyiso ni tho yudo dhano nikech gimoro machielo mopogore. Owacho kama: “Richo nobiro e piny kuom ng’at achiel, kendo tho nobiro e piny kuom richo, kamano bende tho nobiro ni ji duto, nikech ji duto ne otimo richo.” (Jo Rumi 5:⁠12) Ndikoni nyiso ni ji tho nikech richo. To kare “ng’at achiel” ma oganda dhano duto yudo tho kokalo kuom richone en ng’a?

Buk miluongo ni The World Book Encyclopedia wacho ni thoth josayans oyie ni dhano duto nowuok kamoro achiel, kendo Muma fwenyo maler ni kamoro achielno​—en ‘ng’ato achielno.’ E Chakruok 1:​27, wasomo ni: “Nyasaye nochweyo dhano gi kite owuon, nochweye e kido machalo kode; nochweyogi dichwo gi dhako.” Kuom mano, Muma nyiso ni dhano ariyo mokwongogo ne gin chwech manyiso duong’ mar Nyasaye Manyalo Duto.

Bug Chakruok bende medo lero weche moko kuom ngima dhano bang’ ka Jehova Nyasaye nosechweyo dhano mokwongo. Ber ng’eyo ni, e wechego duto Nyasaye ne ok owuoyo kuom tho, to notimo kamano mana konyiso ni tim ng’anjo ema ne nyalo kelo tho. (Chakruok 2:16, 17) Ne odwaro ni dhano mondo odag kama ber e paradis e piny, ka gin gi mor ma onge tuoche nyaka chieng’. Ne ok odwar ni mondo gibed moti kendo gikone githo. To kare ere kaka tho nobedo jaloch e wi dhano duto?

Chakruok sula 3 nyiso kaka dichwo gi dhako mokwongo ne ong’anjo goyiem ne Jachiw-Ngima margi, ma en Jehova Nyasaye. Nikech mano, Nyasaye ne ochiwo kum ma noyudo osenyisogi motelo. Ne  owacho ne dichwo ni: “In buru, kendo inidogi ni buru.” (Chakruok 3:19) Mana kaka Nyasaye nosewacho, gikone dhano ariyo ma nong’anjogo ne otho.

Kata kamano, chandruok koda tho ne ok oyudo mana dhano ariyo mokwongogo kende. Timgi mar ng’anjo ne oketho ne kothgi geno mar ngima makare chuth ma ne digibedogo. Bende, Jehova ne oriwo dhano ma ne pok onyuolgo e dwarone, kane owacho ne Adam gi Hawa kama: “Nyuoluru, kendo medreuru, upong’ piny, kendo ubedi gi loch kuome; kendo mondo ubedi gi teko kuom rech ma ni e nam, kendo kuom winy mahuyo e kor polo, kendo kuom gik mangima duto mawuotho e piny.” (Chakruok 1:28) Bang’ kinde, oganda dhano ne dhi pong’o piny ka gidak e ngima mamor sidang’ ma onge tho. Kata kamano, Adam kwargi—’ng’at achielcha’​—ne ong’iewogi mi gibedo wasumbini mag richo, ka mano kelonegi mana tho. Jaote Paulo, ma en koth dhano mokwongono nondiko ni: “An dhand ringruok, moseng’iew abet e loch richo.”​—Jo Rumi 7:14.

Mana kaka kindegi joma richo oseketho gik ma nengogi tek goyiem, kuom timo richo, Adam noketho chwech Nyasaye maber miwuoro​—oganda dhano. Nyithind Adam ne obedo gi nyithindgi giwegi, bang’e nyikwagi, kamano kamano. Ne onyuol tieng’ ka tieng’ ma ne oluwo, mi gidongo, ginyuolo nyithindgi, kae to gikone githo. Ang’o momiyo giduto gisetho? En nikech giduto gin koth Adam. Muma wacho ni: “Ji mang’eny ne otho kuom richo mar ng’at achiel.” (Jo Rumi 5:15) Tuoche, tiyo, chuny mar timo gik ma ok kare, kaachiel gi tho, ne obedoe nikech Adam ne ondhogo joode owuon. Joodno oriwo nyaka wan waduto.

E barua mare ne Jokristo ma ne ni Rumi, jaote Paulo nondiko kowuoyo kuom chal marach ma dhano ma joricho nitiere, moriwo nyaka en bende, koda ka lweny matek mar richo mwakedogo. Ne oywak ni: “Yaye, an ng’at ma chandore! Ng’ano ma biro resa e ringruokni mar tho?” Donge mano en penjo maber? En ng’ano ma ne dhi reso Paulo​—kaachiel gi jomoko duto ma gombo resruok​—kuom bedo wasumbini mag richo  kod tho? Paulo owuon chiwo dwoko ni: “Erokamano ni Nyasaye kuom Yesu Kristo Ruodhwa!” (Jo Rumi 7:14-25) Ee, Jachwechwa oseloso chenro mar resowa kokalo kuom Wuode Yesu Kristo.

Yesu ne olero migawone e reso dhano a e twech marach ahinya mar richo. Ne owacho niya: ‘Wuod dhano nobiro mondo ochiw ngimane odok rawar ni ji mang’eny.’ (Mathayo 20:28) Ere kaka ngima Yesu bedo kaka rawar? To thone konyowa nade?

Muma wuoyo kuom Yesu kaka jal ma ne ‘onge richo’ kendo “mopogi gi joricho.” E kinde duto mag ngimane, Yesu noluwo Chik Nyasaye chuth ma onge both. (Jo Hibrania 4:15; 7:26) Kuom mano, tho mar Yesu ok ne en nikech richo kata ng’anjo, kaka tho mar Adam. (Ezekiel 18:4) Kar mano, Yesu ne oyie tho ma ne ok owinjore yudo, mondo omi otim dwach Wuon mare, mar reso dhano kuom richo kod tho. Mana kaka osenyis malo, Yesu noyie biro “mondo ochiw ngimane odok rawar.” Nikech hera ma ne en-go ma dhano ne pok onyisoe kuom ndalo duto, Yesu noyie ‘bilo tho ni ji duto.’​—Jo Hibrania 2:9.

Ngima ma Yesu nochiwo kaka misango ne romre chuth gi ngima ma Adam ne olalo kane otimo richo. Tho mar Yesu nokelo ang’o? Jehova ne oyie ni misangono “obed rawar ni ji duto.” (1 Timotheo 2:6) Tiende ni, Nyasaye ne otiyo gi nengo mar ngima Yesu e ng’iewo, kata e waro oganda dhano a e twech mar richo koda tho.

Muma wuoyo nyadinwoya kuom tim hera maduong’ni, ma Jachwech dhano notimo. Paulo noparo ne Jokristo ni ‘noseng’iewgi gi nengo.’ (1 Jo Korintho 6:20; 7:23) Petro nondiko ni, Nyasaye ne ok otiyo gi dhahabu kata fedha, to notiyo gi remb Wuode e waro Jokristo a e kit ngima ma ne dhi terogi e tho. (1 Petro 1:18, 19) Kokalo kuom misango Kristo mar rawar, Jehova noloso chenro mar reso dhano a e tho ma nyaka chieng’.

Kowuoyo kuom kony mago ma rawar kelo, jaote Johana nondiko kama: “[Yesu Kristo] e misango mar richowa; to ok mar richowa kende to richo mag piny duto bende.” (1 Johana 2:2) Ee, misango mar Kristo en mar oganda dhano duto. Be mano nyiso ni ng’ato ka ng’ato biro yudo konyruok mar rawarni nyalhodia? Ooyo. Par ane kaka ne ores jokunyo mowuo kuomgi e sula motelo ne mae. Joma ne temo konyo jokunyo ma nomoko  e bur, ne oloro negi gir ywayogi, to kata kamano chwogo wegi ne nyaka donj ei gino. E yo machalo kamano, jogo madwaro yudo konyruok kuom misango Kristo mar rawar ok nyal bet abeta karito gweth Nyasaye. Onego gikaw okang’.

En okang’ mane ma Nyasaye dwaro? Johana 3:36 wachonwa kama: “Ng’a ma oyie kuom Wuowi en gi ngima ma nyaka chieng’; to ng’a ma ok winj Wuowi ok none ngima, to mirimb Nyasaye osiko kuome.” Nyasaye dwaro ni waket yie kuom misango mar Kristo. Nitie gimachielo madwarore. “Kwamako chikne, wayango ni wang’eye [Yesu].” (1 Johana 2:3) Omiyo, nenore maler ni gik madwarore ahinya mondo omi oreswa a e richo koda tho en keto yie kuom rawar mar Kristo kendo mako chikene.

Yo achiel maduong’ mar nyiso yie kuom rawar mar Yesu en nyiso erokamano ka watimo rapar mar thone kaka nochiko. Kane pok otho, Yesu nochako chiemo mar ranyisi kaachiel gi jootene ma nochung’ motegno, mi owachonegi niya: “Timuru ma, uparago.” (Luka 22:19) Joneno mag Jehova ogeno ahinya osiep manie kindgi gi Wuod Nyasaye, kendo giluwo chikno. Higani, Rapar mar tho Yesu Kristo notimre Ngeso Mach 22, bang’ podho chieng’. Wagweli gi chunywa duto mondo ibi e chokruok makendeni kiluwo wach ma Yesu nochiko. Joneno mag Jehova manie alworau nyalo nyisi sa koda kama ibiro timie raparno. E Raparno, ibiro puonjri mang’eny kuom gik madwarore itim mondo omi rawar mar Kristo ogonyi kuom gik makelo tho ma richo Adam kelo.

Sani, mana ji manok kende ema ong’eyo maber wach misango maduong’ ma Jachwechgi kaachiel gi Wuode osetimo mondo omi ogonygi a e kethruok. Jogo ma keto yie e misangono bedo gi mor makende. Jaote Petro nondiko ne Jokristo wetene kama: ‘Uyie kuome [Yesu] kendo kuyie, umor kuome gi mor modhiero wacho, kendo man gi duong’, nimar yieu kelo gir tichne, en warruok mar chunyu.’ (1 Petro 1:⁠8, 9) Kuom hero Yesu Kristo kendo keto yie kuom misangone mar rawar, ngimani biro pong’ gi mor gie sani, kirito yudo warruok a e richo kod tho.