Un Rowere, Paruru Jachwechu Sani

“Par bende Jachwechni ka podi in rawera.”​—EKLE. 12:1.

1. Jehova nyiso nade ni ogeno rowere malame?

JEHOVA ohero rowere ma Jokristo, kendo onenogi ka joma duogo chuny kaka tho mamoko e lum. Kuom adier, ne okoro ni e kinde lweny mar Wuode, nyiri koda yawuowi ne dhi ‘chiwore gi hera’ e tij Kristo. (Zab. 110:3) Wach ma ne okorno ne dhi chopo e kinde ma thoth ji ne dhi bedo joma ok oluoro Nyasaye, moherore giwegi, mohero pesa, kendo joma ok winj chik. Kata kamano, Jehova to nong’eyo ni rowere ma lame ne dhi bedo mopogore. Mano kaka Jehova genou, un owete koda nyimine ma rowere!

2. Paro Jehova tiende ang’o?

² Par ane mor ma Nyasaye bedogo seche moneno ka rowere pare kaka Jachwechgi. (Ekle. 12:1) En adier ni, paro Jehova ok en mana pare dichiel kende. Timo kamano dwaro ni wakaw okang’​—watim gik ma more, wawe mondo chikene koda puonjge ema otawa e ngima mapile. Bende dwarore ni waket genowa kuome, ka wang’eyo ni odwaro mondo ngimawa odhi maber chuth. (Zab. 37:3; Isa. 48:17, 18) Be kamano e kaka ineno Jachwechni?

“Gen Jehova gi Chunyi Duto”

3, 4. Yesu ne onyiso nade ni nogeno kuom Jehova, to ang’o momiyo ber geno kuom Jehova sani

³ Onge kiawa ni Yesu Kristo e ranyisi maberie moloyo mar jal ma ne ogeno kuom Nyasaye. Ne odak kaluwore gi weche manie Ngeche 3:5, 6: “Gen Jehova gi chunyi duto, kendo kik iketri kuom lony gi weche mayoreyore ma ingo iwuon. Yie kuome e yoreni duto, mi nomi yoreni bedo mochikore tir.” Kinde matin bang’ kosebatis Yesu, Satan nobiro ire kodwaro teme mondo oyie kawo teko gi duong’ mar piny. (Luka 4:3-13) Yesu ne ok oyie mondo owuonde. Nong’eyo ni “mwandu  gi duong’ gi ngima” madier, ‘e ma ng’a mamuol moluoro Jehova yudo.’​—Nge. 22:4.

⁴ Piny masani opong’ gi timbe guondo kendo ji oherore kendgi giwegi. E alwora ma kamano, wanyiso rieko ka waluwo ranyisi mar Yesu. Ng’e bende ni Satan biro timo duto monyalo mondo ogol jotich Jehova e yo madiny madhi e ngima. Odwaro neno ni ji duto luwo yo malach madhi e kethruok. Kik Satan wuondi! Kar mano, ng’ad ei chunyi mar paro Jachwechni. Gen kuome chuth, kendo mak motegno “ngima maradier,” masani chiegni kendo biro gadier.​—1 Timo. 6:19.

Un Rowere, Beduru Mariek!

5. Ineno nade kinde mabiro mar pinyni?

⁵ Rowere ma paro Jachwechgi riek moloyo rowere ma mbesegi. (Som Zaburi 119:99, 100.) Nikech gineno gik moko kaka Nyasaye neno, ging’eyo maber ni pinyni chiegni kadho. Kata mana kuom kindeu machuok musedakgo, onge kiawa ni un rowere useneno kaka luoro gi parruok mang’eny medore. Ka pod in e skul, nyalo bedo ni isewinjo wach lilo piny gi gik manie iye, wach liet ma medore e piny, bunge ma iketho, koda chandruoge ma kamago. Chuny ji chandore ahinya nikech gik matimoregi, to Joneno mag Jehova kende ema ong’eyo maler ni mago gin achiel kuom ranyisi ni giko mar piny Satan chiegni.​—Fwe. 11:18.

6. Ere kaka osewuondi rowere moko?

⁶ Gima lit en ni moko kuom jotich Nyasaye ma rowere oseweyo bedo motang’, kendo wigi osewil gi kaka kinde modong’ mar pinyni nok ahinya. (2 Pet. 3:3, 4) Moko osewuondi modonjo e richo madongo nikech bedo gi osiepe maricho kod neno piche mag nindruok. (Nge. 13:20) Mano kaka nyalo bedo gima lit ketho winjruokwa gi Nyasaye e kindegi makoro giko okayo machiegni ahinya! Kar mano, puonjri kuom gima ne otimore ne Jo-Israel e higa mar 1473 Ka Ndalowa Podi, kinde ma ne gin e pawe mag Moab, kane gichiegni ahinya donjo e Piny Manosingi. Ang’o ma ne otimore negi kuno?

Ne Gilwar Kane Gichiegni Chopo

7, 8. (a) Satan ne otiyo gi rieko mane e pawe mag Moab? (b) To otiyo gi rieko mane sani?

⁷ E kindeno, Satan ne dwaro ahinya geng’o Jo-Israel kik yud gik ma ne osinginegi. Nikech kuong’o Jo-Israel kotiyo gi Balam ne osetame, Satan notiyo gi yo moro mariek; ne otemo miyo Jo-Israel otim gima ne dhi mono Jehova gwedhogi. Ne otiyo gi mond Jo-Moab ma nigi chia mondo osergi, kendo yorno ne otiyo maber ne Jachien. Ji ne ochako terore gi nyi Moab kendo kulore ne Baal-Peor! Kata obedo ni gikeni maber, ma en Piny Manosingi, ne koro chiegni ahinya, Jo-Israel ma kwan-gi dirom ji 24,000 ne olalo ngimagi. Mano kaka ne en masira maduong’!​—Kwan 25:1-3, 9.

⁸ Gie sani, wasudo machiegni ahinya gi piny mosingi maber moloyo, tiende ni piny manyien. Mana kaka osebedo kotimo, Satan kendo tiyo gi terruok e ketho jo Nyasaye. Timbe ji osebedo maricho ahinya mamiyo tim terruok ikawo mana kaka gima pile, kendo tim nindruok e kind chwo gi chwo ikawo mana kaka gima ng’ato owuon yiero. Nyaminwa moro ma Jakristo wacho kama, “Pacho koda e Od Romo kende e kuonde ma nyithinda puonjoree ni tim nindruok chwo gi chwo, koda nindruok oko mar kend, richo e wang’ Nyasaye.”

9. Ang’o manyalo timore e kinde ma gombo mag nindruok ng’eny ahinya kuom rowere, to ginyalo timo ang’o?

⁹ Rowere ma paro Jachwechgi, ong’eyo ni nindruok en mich maler motudore gi wach chiwo ngima. Omiyo, ging’eyo ni nindruok onego otimre e yo ma Nyasaye ne ochiko​—ei chenro mar kend. (Hibr. 13:4) Kata kamano, kinde ma gombo mag nindruok ng’eny ahinya kuom rowere manyalo monogi ng’ado paro makare​—nyalo bedo matek mondo ng’ato odong’ kaler. (1 Kor. 7:36) Ang’o minyalo timo seche ma paro ma ok kare odonjo e wiyi? Kwa Jehova kony gi kinda mondo iket pachi kuom gik mabeyo. Kinde duto Jehova winjo jogo madhi ire gi chuny ma tir. (Som  Luka 11:9-13.) Wuoyo kuom gik ma gero yie bende nyalo konyowa duoko pachwa kuom gik mabeyo.

Ti gi Rieko e Yiero Gik Midwaro Timo e Ngima!

10. En paro mane ma ok owinjore ma ok onego wabedgo, to gin penjo mage monego wapenjre?

¹⁰ Achiel kuom gik mamiyo rowere mang’eny ma jopiny luwo gombo koda mor mag ringruok en nikech nitie gima pok ‘ofwenyorenegi,’ tiende ni ng’eyo ma Nyasaye chiwo, kata geno mar kinde mabiro. (Nge. 29:18) Gichalo gi Jo-Israel ma ne oweyo luwo Nyasaye e kinde Isaya, ka gidak gi “il gi mor, . . . chamo ring’o kod madho divai.” (Isa. 22:13) Kar gombo ngima ma joma kamago odakie, ang’o ma moni keto e pachi geno majaber ahinya ma Jehova oseketo ne joge moluore? Ka in jatich Jehova ma pod rowera, be igombo piny manyien gi chunyi duto? Be itimo kinda duto mondo omi ‘iwuoth kiritori, ka irito gweth migeno yudo’ ma Jehova oseketo e nyimi? (Tito 2:12, 13) Dwoko ma in-go kuom penjogo, biro miyo inon gik ma idwaro timo e ngima koda gik ma iketo obed mokwongo.

11. Ang’o momiyo rowere ma Jokristo ma podi nie skul onego oti matek?

¹¹ Jo pinyni dwaro ni rowere oket tekogi duto e luwo yore mag ringruok. En adier ni un rowere ma pod nie skul onego uti matek mondo uyud somo madwarore. Onego ing’e ni, gima idwaro ok en mana yudo tich maber kende, to bende en ni mondo ibed ng’at makonyo kanyakla kendo ma jakinda e lando wach Pinyruoth. Mondo omi itim mano, dwarore ing’e wuoyo maber, ipar e yo maber, kendo ing’e kaka inyalo chano wach adimba kimiyo jomoko luor. Kata kamano, rowere mapuonjore Muma kendo luwo puonj manie iye, yudo somo koda tiegruok maber moloyo, ma ketonegi mise mar yudo ngima maber ma nyaka chieng’.​—Som Zaburi 1:1-3. *

12. Joot ma Jokristo onego oluw ranyisi mane?

¹² E Israel, miyo nyithindo somo ne en ting’ ma jonyuol kawo kaka gima duong’ ahinya. Jonyuol ne puonjo nyithindgi chiegni yore duto mag ngima, to moloyo ne gipuonjogi lamo Nyasaye koda luwo chikene. (Rapar 6:6, 7) Omiyo, rowere ma Jo-Israel ma ne winjo jonyuolgi kaachiel gi jo mamoko madongo ma noluoro Nyasaye, ok ne bed gi ng’eyo kende, to bende ne gibedo gi rieko, ng’eyo pogo weche, ng’eyo tiend weche, koda paro e yo mowinjore​—ma gin kido ma ok yudre mayot, to gibedoe mana kokalo kuom somo  ma Nyasaye chiwo. (Nge. 1:2-4; 2:1-5, 11-15) Joot ma Jokristo ndalogi bende onego okaw wach somo e yo ma kamano.

Winj Jogo Moheri

13. Gin paro mage ma rowere moko yudo, to ang’o momiyo onego gibed motang’?

¹³ Rowere yudo paro kuom joma kitgi opogore opogore​—moriwo nyaka joma oket ni mondo ochiw paro matayo nyithindo e skunde, ma kinde mang’eny chiwo paro mana kuom wach yudo ber mag ringruok mag pinyni. Wakwayi mondo ilam kinono paro ma gichiwogo kaluwore gi Wach Nyasaye kaachiel gi buge mogo gi jatichno mogen kendo mariek. Kokalo kuom puonjruokni mar Muma, iseng’eyo ni Satan dwaro ahinya wuondo rowere nikech podi ok gilony e ngima. Kuom ranyisi, e puodho mar Eden, Hawa ma ne podi ok olony ahinya ne owinjo Satan, jal ma ne wendo e wang’e, kendo ma pok ne onyiseye hera kata mana matin. Mano kaka weche ne dobedo mopogore ka dine bed ni owinjo Jehova, jal ma ne oyudo osenyise hera e yore mang’eny!​—Chak. 3:1-6.

14. Ang’o momiyo onego wawinj Jehova kaachiel gi jonyuolwa ma lame?

¹⁴ Jachwechni oheri in bende, kendo otimo kamano gi chuny maler chuth. Odwaro ni ibed mamor nyaka chieng’, to ok mana gie sani kende! Omiyo, kokalo kuom hera mamuol ma en-go kaka janyuol madewo, owachoni, kaachiel gi jogo duto malame kama: “Ma e yo, wuothieuru.” (Isa. 30:21) Ka in gi jonyuol mohero Jehova gadier, mano en gweth momedore. Winj puonj ma gichiwo kinyisogi luor seche miyiero gik monego iket mokwongo kaachiel gi gigo midwaro timo e ngima. (Nge. 1:8, 9) Bende gidwaro ni mondo iyud ngima, ma en gima duong’ moloyo mwandu kata duong’ ma ng’ato nyalo bedogo e pinyni.—Math. 16:26.

15, 16. (a) Wanyalo bedo gadier mane kuom Jehova? (b) En puonj mane maduong’ ma wayudo kuom gima ne otimore ne Baruk?

¹⁵ Jogo ma paro Jachwechgi keto ngimagi obed mayot, ka gin gadier ni Jehova ‘ok nojwang’gi ngang’’ kata ‘weyogi ngang’. (Som Jo Hibrania 13:5.) To nikech chuny ma kamano ok winjre gi paro mar pinyni, nyaka wabed motang’ mondo kik wawe paro mar pinyni ochikwa. (Efes. 2:2) Kaluwore gi wachni, par ane ranyisi mar Baruk, jandiko mar Jeremia, ma ne odak e kinde mag chandruok mag giko Jerusalem, kochomo e kethruok mar dalano e higa 607 Ka Ndalowa Podi.

¹⁶ Nyalo bedo ni Baruk ne dwaro ni ngimane omed bedo maber kuom choko mwandu. Jehova ne oneno mano mi nomiyo Baruk siem e yo mamuol mondo kik omanyre gi “gik madongo.” Baruk nonyiso rieko koda bolruok nimar nowinjo Jehova mi otony e kethruok mar Jerusalem. (Yere. 45:2-5, NW) Mopogore gi mano, joma nodak e kinde Baruk mobedo gi “gik madongo” e yor ringruok ka giweyo keto Jehova obed mokwongo, mapiyo nono ne gilalo mwandugi e lwet Jo-Babulon. Thothgi bende ne olalo ngimagi. (2 Weche 36:15-18) Gima ne otimore ne Baruk konyowa neno ni bedo gi winjruok maber gi Nyasaye ema ber maloyo bedo gi mwandu kata huma e pinyni.

Luw Ranyisi Mabeyo Moloyo

17. Ang’o momiyo Yesu, Paulo, kod Timotheo gin ranyisi mabeyo ne jotich Jehova masani?

¹⁷ Mondo okonywa luwo yo madhi e ngima, Wach Nyasaye chiwonwa ranyisi mang’eny mabeyo mag jogo monego waluw. Kuom ranyisi,  kuom dhano duto mosedak e piny, Yesu ema ne en jal ma nigi lony duto madwarore, to ema podi noketo chunye e gino ma ne dhi konyo ji nyaka chieng,’ tiende ni lando ‘wach maber mar Pinyruoth.’ (Luka 4:43) Mondo omi oti ne Jehova maber chuth, jaote Paulo ne oweyo luwo tich ma ne dhi miyo oyud ber e yor ringruok, mi otiyo gi thuolone koda tekone duto e yalo wach maber. Timotheo, ma ne en ‘nyathi adier kuom yie,’ noluwo ranyisi maber ma Paulo noketo. (1 Timo. 1:2) Be Yesu, Paulo, kod Timotheo noywago ang’e bang’e nikech ngima ma ne giyiero? Ooyo ngang’! Kuom adier, Paulo nowacho ni ne oneno gigo manie piny kaka “gik miwito oko” kata yugi mang’eny, kopimgi gi gweth mar tiyone Nyasaye.​—Fili. 3:8-11.

18. Gin lokruok mage madongo ma owadwa moro marawera notimo, to ang’o momiyo ok oywag ang’e?

¹⁸ Sani, rowere mang’eny ma Jokristo luwo yie ma Yesu, Paulo, kod Timotheo nonyiso. Kuom ranyisi, owadwa moro ma rawera ma ne oyudo tiyo tich ma chudone ber nondiko kama: “Nikech adak kaluwore gi puonj mag Muma, mapiyo nono ne aidho ngas ka tich. Kata obedo ni ne ayudo pesa mang’eny, ne awinjo ka achalo gi ng’ama ringo ka lawo yamo. Kane adhi ir komiti jotelo mag tich mi anyisogi gombo ma ne an-go mar tiyo ne Nyasaye kuom thuolona duto, mapiyo ne gidwaro mar meda pesa ka gigeno ni abiro yie dong’ e tijno. Kata kamano, ne aseng’ado ni aweyo tijno. Ji mang’eny ne ok nyal ng’eyo gimomiyo naweyo tich maber kamano mondo ati ne Nyasaye kuom thuolona duto. Dwoko mara ne en ni, nadwaro dak kaluwore gi chiwruok mara ne Jehova gadier. To nikech koro ngimana odich gi tiyo ne Nyasaye, ayudo mor gi chuny mokuwe ma onge pesa kata huma manyalo kelonago.”

19. Gin yiero mage manyiso rieko mijiwo rowere mondo otim?

¹⁹ E piny mangima, tara gi tara mag rowere osetimo lokruok manyiso rieko kaka mano. Omiyo, un rowere, sama uparo kindeu mabiro, keturu odiechieng’ mar Jehova machiegni e pachu. (2 Pet. 3:11, 12) Kik ugomb kit ngima mag jogo ma tiyo gi piny masani chuth. Kar mano, winjuru jogo ma oherou gadier. Kano ‘mwandu e polo’ e keno maberie moloyo ma unyalo timo kendo en kende ema okelo ber masiko nyaka chieng’. (Math. 6:19, 20; som 1 Johana 2:15-17.) Ee, dhi nyime paro Jachwechni. Kendo sama itimo mano, Jehova biro gwedhi.

[Weche moler piny]

Be Inyalo Paro?

• Wanyiso nade ni wageno kuom Nyasaye?

• Somo kata tiegruok maber moloyo en mane?

• Gin puonj mage ma wanyalo yudo kuom Baruk?

• Ng’a gini ma keto ranyisi mabeyo monego waluw, to nikech ang’o?

[Penjo mag Puonjruok]

[Picha manie ite mar 21]

Jehova chiwo somo makelo tiegruok maber moloyo