Ka Podi In Rawera, Yier Tiyo ne Jehova
Ka Podi In Rawera, Yier Tiyo ne Jehova
“Siki e wechego misepuonjori, kendo ming’eyo ni adier.”—2 TIMO. 3:14.
1. Jehova neno nade tich ma Jonenone ma rowere tiyo?
JEHOVA neno tich maler ma rowere tiyo kaka gima duong’ ahinya, omiyo nochiko mokor weche kuomgi. Jandik-zaburi nowero kama: “Jogi biro chiwore ka giyie e odiechieng ogandani mar lweny. E duong’ mar ler, a e ich mar ru piny, in gi chwo ma rowere mana kaka tho maton.” (Zab. 110:3, NW ) Ee, Jehova geno ahinya, kendo omor gi rowere moyie tiyone.
2. Rowere ma ndalogi, yudo paro mage kuom jopiny e wi kinde mabiro?
2 Un rowere manie kanyakla mar Jokristo, be usechiworu ne Jehova e lamo? Thoth rowere nyalo yudo ni yiero tiyo ne Nyasaye madier en gima tek. Jotend ohala, jopuonj, to seche moko kata anyuola koda osiepe, jiwo rowere mondo oket motelo wach manyo mwandu. Sama rowere luwo yore mag lamo, kinde mang’eny jopiny jarogi. Kata kamano, adiera en ni, tiyo ne Nyasaye madier, e ngima maberie moloyo ma ng’ato nyalo luwo. (Zab. 27:4) Kaluwore gi wachni, non ane penjo adekgi: Ang’o momiyo onego iti ne Nyasaye? Ere kaka inyalo dhi nyime dak maber e ngima mar chiwruok ne Nyasaye, ma ok idew gik ma jomoko nyalo wacho kata timo? Gin thuolo mage mabeyo ahinya manyalo yaworeni e tiyo tich maler?
Tiyo Ne Jehova e Gima Ber Moloyo
3. Gik ma Jehova ochweyo onego omi watim ang’o?
3 Ang’o momiyo onego iti ne Nyasaye madier, mangima? Fweny 4:11 nyiso gima duong’ momiyo: “Yaye Ruodhwa kendo Nyasachwa, iwinjori nwang’o duong’ gi pak gi teko; nikech in e ma nichueyo gik moko duto, kendo dwaroni omiyo gintie, kendo nochuegi.” Jehova e Jachwech maber miwuoro mar gik moko duto mantie. Mano kaka piny mochweyo ber ndi! Yien, maua, le, nembe, gode, aoche—Jehova ema ne olosogi duto. Zaburi 104:24 wacho kama: “Mwanduni [Nyasaye] opong’o piny.” Mano kaka wamor nikech kokalo kuom herane, Jehova osemiyowa del gi rieko mamiyo wawinjo maber dak e piny ka wamor gi gik manie iye! Donge mor ma wan-go kuom gik mochwe, onego omi wadwar tiyone?
4, 5. Gin gik mage ma Jehova notimo, mi omiyo Joshua osudo machiegni kode?
4 Gima chielo momiyo onego iti ne Jehova yudore e weche mag Joshua jatend Israel. Ka nochomo e giko ngimane, Joshua nowacho ne jo Nyasaye kama: “Ung’eyo e chunyu duto kendo e parou duto ni, gimoro ne ok orem kuom gik mabeyo duto ma ne Jehova Nyasachu owacho kuomu; duto osetimorenu.” Ang’o mane nyalo miyo Joshua wach kamano?—Josh. 23:14.
5 Kane pod en nyathi e piny Misri, nyaka bed ni Joshua nong’eyo wach singruok Jehova mar miyo Jo-Israel pinygi giwegi. (Chak. 12:7; 50:24, 25; Wuok 3:8) Bang’e Joshua noneno kaka Jehova nochako chopo singono, seche ma nokelo Masiche Apar e wi Misri, kendo chuno Farao jal ma toke ne tek mondo ogony nyithind Israel odhi. Joshua ne en achiel kuom joma ne ores kakalo Nam Makwar, mi bang’e noneno kaka namno nomuonyo Farao gi jolwenyne. Kane gin e wuodhgi mabor makalo e “thim maduong’ kendo malich” mar Sinai, Joshua noneno kaka Jehova nochiwo gigo duto ma ne dwarore Jo-Israel obedgo. Onge kata ng’ato achiel kuomgi ma ne otho nikech riyo kata kech. (Rapar 8:3-5, 14-16; Josh. 24:5-7) Kane ochopo kinde ma Jo-Israel ne onego oked gi ogendini mag Kanaan ma ne tek e lweny, eka mondo gikaw Piny Manosingi, Joshua noneno kaka Nyasachgi ma ne gilamo, ne osirogi e tijno.—Josh. 10:14, 42.
6. Ang’o mabiro konyi bedo gi gombo mar tiyone Nyasaye?
6 Joshua nong’eyo ni Jehova nosebedo karito singruok mage. Omiyo, Joshua nowacho e lela niya: “An kod jooda, wanati ni Jehova.” (Josh. 24:15) To nade in? Ka iparo kuom singo mago ma Nyasaye madier osechopo, koda mago ma warito mondo ochopi, be igombo tiyone kaka Joshua?
7. Ang’o momiyo batiso mar pi en okang’ madwarore ahinya mondo ng’ato okaw?
7 Paro matut kuom tije Jehova mag chwech koda gik mabeyo mosesingo ni nyaka timre, onego omi itim chiwruok ne Jehova, to ok mana mano kende, to bende dwarore inyis chiwruokni e batiso mar pi. Batiso en okang’ madwarore ahinya, ma joma dwaro tiyo ne Nyasaye onego okaw. Yesu ketonwa Ranyisi ma nenore maler kuom wachni. Kane podi ok ochako tije kaka Mesia, nodhi ir Johana Jabatiso, mondo obatise. Ang’o momiyo Yesu nokawo okang’ ma kamano? E kinde moro bang’e nowacho kama: “Nalor a e polo, ok ni mondo atim dwarona awuon, to dwaro mar Jal ma noora.” (Joha. 6:38) Mondo onyis chiwruokne mar timo dwach Wuon mare, Yesu ne obatisi.—Math. 3:13-17.
8. Ang’o momiyo Timotheo ne oyiero lamo Nyasaye, to ang’o manyalo dwarore itim?
8 Par ane bende ranyisi mar Timotheo, rawera ma Jakristo ma bang’e Jehova ne omiyo tije koda migawo mang’eny. Ang’o momiyo Timotheo noyiero lamo Nyasaye madier? Muma nyisowa ni ne ‘osepuonjore weche, mi ong’eyo ni [gin] adier.’ (2 Timo. 3:14) Ka isepuonjri Wach Nyasaye, kendo iseng’eyo ni puonjgo gin adier, ichal gi Timotheo. Koro onego itim yiero. Ang’o mamoni wuoyo gi jonyuolni kuom gima igombo timo? Jonyuolni kaachiel gi jodong-kanyakla, nyalo konyi ng’eyo gigo madwarore itim kapok obatisi.—Som Tich Joote 8:12.
9. Jomoko nyalo winjo nade ka ikawo okang’ mar batiso?
9 Ka obatisi, mano biro bedo okang’ maber mar chako tiyo ne Nyasaye madier. Kuom kawo okang’ ma kamano, ichako ng’wech mabor ma michne en ngima manyaka chieng’, koda mor mayudore kuom timo dwach Nyasaye gie sani. (Hibr. 12:2, 3) Bende ibiro kelo mor ne joodu koda ne osiepeni manie kanyakla mar Jokristo, ma bende osedonjo e ng’wech ma kamano. To maduong’ moloyo, ibiro moro chuny Jehova. (Som Ngeche 23:15.) En adier ni, jomoko ok nyal ng’eyo gimomiyo iyiero lamo Jehova, kendo ginyalo wacho ni gima iyierono ok ni kare. To ginyalo kata mana kwedi. Kata kamano, podi inyalo loyo chandruogegi duto.
Sama Ji Penji Kata Kwedi
10, 11. (a) Gin penjo mage ma ji nyalo penji kuom wach yiero tiyone Nyasaye? (b) Ang’o minyalo puonjri kuom yo ma Yesu ne dwokogo penjo e wi wach lamo madier?
10 Yiero mari mar tiyo ne Jehova nyalo weyo jo skul weteni, joma odak e alworau, kaachiel gi wedeni, ka wuoro. Ginyalo penji gimomiyo iyiero ngima ma kamano, kendo noni kuom yie mari. Onego idwok nade? En adier ni, onego inon paro koda gima in iwuon ineno, eka mondo iler gimomiyo itimo yiero makamano. To sama idwoko penjo e wi yie mari, donge ranyisi maber ahinya monego iluw en mar Yesu?
11 Kane jotend din mar Jo-Yahudi nono Yesu kuom wach chier, ne otero pachgi e ndiko moro ma ne pok giparo kuome. (Wuok 3:6; Math. 22:23, 31-33) Kane jal moro ma jandiko openje wach chik maduong’ie moloyo, Yesu noluwone ndiko machiwo dwoko ei Muma. Jalo ne opwoyo Yesu kuom dwokono. (Lawi 19:18; Rapar 6:5; Mari. 12:28-34) Yo ma Yesu ne wuoyogo kaachiel gi timne mar tiyo gi Ndiko, ‘nopogo oganda,’ kendo mano nomiyo joma ne kwede ok ne nyal hinye. (Joha. 7:32-46) Sama idwoko penjo e wi yie mari, ti gi Muma, kitimo kamano ‘gi muolo kod luor.’ (1 Pet. 3:15) Ka ok ing’eyo dwoko mar penjo, yie ni ok ing’eyo, kendo nyisgi ni ibiro timo nonro. Bang’e, tim nonro e Watch Tower Publications Index kata Watchtower Library e CD-ROM. Ka itimo ikruok maber, to ibiro ‘ng’eyo kaka owinjore idwok ng’ato ka ng’ato.’—Kolo. 4:6.
12. Ang’o momiyo ok onego iwe sand mondo onyos chunyi?
12 Bende inyalo romo gi gik mamoko ma ok mana penjo ma ji penji e wi yie mari. Adier en ni, jasik Nyasaye, ma en Satan kendo Jachien, ema chiko piny. (Som 1 Johana 5:19.) Ok dibed paro makare geno ni ji duto biro puoyi, kata yie kodi, kendo inyalo romo gakwede. Jomoko nyalo ‘hangi’ kata wuoyo marach kuomi, kendo ginyalo dhi nyime timo kamano. (1 Pet. 4:4) Kata kamano, ng’e ni ok in kendi. Yesu Kristo bende ne osand. Jaote Petro bende ne oyudo sand, mi nondiko kama: “Joherana, kik uwuor temruok mar mach ma bironu mondo otemu, ni gimoro malich timorenu; to moruru kaka jo moriwore gi Kristo e masiche.”—1 Pet. 4:12, 13.
13. Ang’o momiyo Jokristo nyalo bedo mamor sama isandogi?
13 Ka ng’ato nano e bwo sand kata e bwo akwede nikech en Jakristo, mano en gima kelo mor. Nikech ang’o? En nikech kapo ni piny yie kodwa, mano nyalo nyiso ni wadak kaluwore gi kaka Satan chiko—to ok kaka Nyasaye chiko. Yesu ne osiemo kama: “Yaye, nodoknu malit, ka ji duto pakou, nikech e kaka kweregi ne timo ni jonabi mariambo.” (Luka 6:26) Sand en gima nyiso ni Satan kaachiel gi pinye, nigi mirima kodi nikech itiyo ne Jehova. (Som Mathayo 5:11, 12.) To ‘ka ichayi nikech nying Kristo’ mano en gima onego omi ibed mamor.—1 Pet. 4:14.
14. Gin ber mage manyalo betie ka ng’ato chung’ motegno korka Jehova?
14 Sama in e bwo sand to idong’ kichung’ motegno korka Jehova, mano nyago gik moko ang’wen mabeyo. Ichiwo neno e wi Jehova koda Wuode. Chung’ mari motegno jiwo owete koda nyimineni ma Jokristo. Joma moko ma ok ong’eyo Jehova to bende neno, nyalo chako manyo Jehova. (Som Jo Filipi 1:12-14.) Kendo sama ineno kaka Jehova chiwo teko mar nano e bwo tembe, herani kuome medore.
‘Dhoot Malach’ Oyaworeni
15. “Dho ot malach” ma ne oyaw ne jaote Paulo ne en mane?
15 Kowuoyo kuom tije mar lendo e Efeso, Paulo nondiko niya: “Oyawna dho ot malach mar tich.” (1 Kor. 16:8, 9) Mano ne en dhoot mamiye thuolo malach mar lando wach maber, kendo timo ji jopuonjre e dalano. Kuom yie tiyo gi thuolono, Paulo nokonyo ji mang’eny ng’eyo Jehova, kendo Lame.
16. Jokristo mowal kuom roho ma pod odong’ e piny, nodonjo nade e “dho ot moyaw” e higa 1919?
16 E higa mar 1919, Yesu Kristo ma ne koro osemi duong’ e polo, ne oketo “dho ot moyaw” e nyim Jokristo mowal kuom roho ma pod odong’ e piny. (Fwe. 3:8) Ne gikalo e dhoot ma ne oyawno, mi gichako lando wach maber, kendo puonjo ji adiera mar Muma ka gin gi kinda mamalo moloyo. Gin nyak mage ma osebetie nikech tijgi mar lendo? Wach maber koro osechopo e tung’ piny, kendo ji madirom milion abiriyo nigi geno mar yudo ngima mochwere, e piny manyien mar Nyasaye.
17. Inyalo donjo nade e “dho ot malach mar tich”?
17 “Dho ot malach mar tich,” podi oyawore ahinya ne jotich Jehova duto. Jogo madonjo e dhoodno yudo mor gi chuny mokuwe, seche ma gitimo mang’eny e lando wach maber. Un rowere matiyo ne Jehova, ukawo nade migawo makendeni, mar konyo jomoko keto ‘yie kuom wach maber’? (Mari. 1:14, 15) Be iseparo bedo painia mapile, kata painia makonyo? Moko kuom thuolo manyalo yawore ne thothu, gin kaka tiyo tij gero Ute Romo, tiyo e Bethel, bedo painia makende, kata misonari. To nikech piny marach mar Satan dhi ka rumo, donjo e migawo kaka magi mag tiyo tij Pinyruoth en gima dwarore mapiyo sani. Be ibiro donjo e ‘dhoot malachno’ ka kinde podi nitie?
“Rang Kendo Ne Ka Jehova Ber”
18, 19. (a) Ang’o ma nokonyo Daudi bedo gi gombo ahinya mar tiyo ne Jehova? (b) Ang’o manyiso ni Daudi ne ok oywago ang’e nikech tiyo ne Nyasaye?
18 Ka otelne gi roho mar Nyasaye, jandik zaburi ne ogwelo jomoko mondo ‘orang kendo gine ka Jehova ber.’ (Zab. 34:8) Kane Daudi Ruodh Israel pod rawera ma jakwath, Jehova ne orese kuom le mag bungu. Nyasaye ne okonye ka nokedo gi Goliath, kendo ne orese kuom masiche mamoko mang’eny. (1 Sam. 17:32-51; Zab. 18) Nikech Nyasaye ne onyise hera mang’won e yo malach, Daudi nondiko kama: “A Jehova Nyasacha, honini misetimo ging’eny, gi wecheni bende miparo kuomwa: otamore chanogi e nyimi.”—Zab. 40:5.
19 Hera mar Daudi kuom Jehova ne omedore ahinya, kendo ne odwaro pako Jehova gi chunye koda riekone duto. (Som Zaburi 40:8-10.) Kaka higini ne medo sudo, Daudi ne ok oywago ang’e nikech tiyo gi ngimane duto e lamo Nyasaye madier. Chiwruok chuth ne Nyasaye ne en gima duong’ ahinya e ngimane—ne en gima kelone mor ma ok nyal pim gi gimoro. Sama koro ne oseti, Daudi nowacho kama: ‘In ema ageni, A Jehova Nyasaye, aketo chunya kuomi nyaka aa e rawera. Kata kaseti mabedo ralwar, A Nyasaye kik ijwang’a.’ (Zab. 71:5, 18) Osiep koda geno ma Daudi ne nigo kuom Jehova nomedo bedo motegno, kata obedo ni tekone mar ringruok ne koro osedok chien.
20. Ang’o momiyo tiyo ne Nyasaye e yo maberie moloyo mar tiyo gi ngimani?
20 Ngima ma Joshua, Daudi, kod Timotheo nodakie, medo nyiso ni tiyone Jehova ema en ngima maberie moloyo. Ber ma ng’ato nyalo yudo sani kuom tiyo tije mag ringruok, ok romre gi ber mosiko ma iyudo kuom ‘tiyo ne Jehova gi chunyi duto kendo gi tekoni duto.’ (Josh. 22:5) Ka podi ok isechiwori ne Jehova e lamo, penjri kama, ‘En ang’o ma mona bedo achiel kuom Joneno mag Jehova?’ Ka osebatisi kaka jatich Jehova, be diher medo bedo mamor e ngima? Ka en kamano, to kare med timo mang’eny e tij Nyasaye, kendo med timo dongruok kaka Jakristo. Sula maluwo biro nyisi kaka inyalo timo dongruok e yoregi kiluwo ranyisi mar jaote Paulo.
Inyalo Dwoko Nade?
• Chiw gik moko ariyo manyiso gimomiyo onego wati ne Nyasaye.
• Ang’o ma nokonyo Timotheo yiero mar tiyo ne Nyasaye?
• Ang’o momiyo onego ichung’ motegno e bwo sand?
• Gin migawo mage mag tiyo ne Nyasaye manyalo yaworeni?
[Penjo mag Puonjruok]
[Picha manie ite mar 22]
Tiyo ne Jehova e ngima maberie moloyo
[Picha manie ite mar 23]
Be inyalo dwoko penjo kuom yie mari?