Resruok Kokalo Kuom Pinyruodh Nyasaye Chiegni!

“Pinyruodhi mondo obi, gi midwaro mondo otimre e piny kaka e polo.”​—MATH. 6:10.

1. Wach maduong’ ma Yesu ne puonjo ne en mane?

KANE Yesu Kristo golo Twak mare mar Got, ne owuoyo bende kuom lamo mar ranyisi, ma ne keto e yo machuok wach maduong’ ma ne opuonjo. Ne opuonjo jolupne mondo olam Nyasaye kama: “Pinyruodhi mondo obi, gi midwaro mondo otimre e piny kaka e polo.” (Math. 6:9-13) Yesu ‘ne wuotho e mier madongo kod matindo, koyalo kendo kolando wach maber mar pinyruodh Nyasaye.’ (Luka 8:1) Kristo ne ojiwo jolupne niya: “Dwaruru mokwongo pinyruodhe, gi wachne [Nyasaye] makare.” (Math. 6:33) Sama ipuonjri sulani, many yore minyalo tiyogo gi puonj man kae, e tiji mar lendo. Kuom ranyisi, non kaka inyalo dwoko penjogi: Ang’o momiyo wach Pinyruoth dwarore ahinya? Dwarore ores dhano kuom ang’o? To Pinyruodh Nyasaye biro reso dhano nade?

2. Ang’o momiyo wach Pinyruoth en wach maber ahinya?

² Yesu nokoro kama: ‘Wach maberni mar pinyruoth nolandre e pinje duto, mondo obed ranyis ni ogendini duto, eka giko nobi.’ (Math. 24:14) Wach maber mar Pinyruodh Nyasaye en wach madwarore ahinya. Kuom adier, en e wach maduong’ie moloyo e piny mangima! E kanyakla mag Joneno mag Jehova mokalo 100,000 e piny mangima, jotich Nyasaye machiegni milion abiriyo, tiyo tij lendo, e okang’ mamalo moloyo, ka ginyiso jomoko ni Pinyruoth osechungi. Chungo pinyruodhno en wach maber, nikech mano nyiso ni Nyasaye oseketo sirkal e polo mondo obed gi loch chuth e wi piny. E bwo loch mar Pinyruoth, dwaro mar Jehova biro timore e piny kaka e polo.

3, 4. Ang’o ma notimre e kinde ma dwaro mar Nyasaye nobed katimore e piny?

³ Ang’o ma notimre ne dhano e kinde ma dwaro mar Nyasaye nobed katimore e piny? Jehova “noywe pi wang’ duto e wengegi; tho ok nobedie kendo, kata ywak, kata nduru kata rem ok nobedie.” (Fwe. 21:4) Dhano ok nobed matuwo kata tho nikech richo mar Adam. Jo motho manie kitap paro mar Nyasaye, biro bedo gi thuolo mar dak nyaka  chieng’, nikech Muma singo kama: “Nobedie chier mar jo makare kod jo ma ok kare.” (Tich 24:15) Lweny, midekre, kata kech, ok nobedie ngang’, kendo piny noloki mabed paradis. Kata mana le masani kwiny, biro dak gi kuwe kod dhano koda e kindgi giwegi.​—Zab. 46:9; 72:16; Isa. 11:6-9; 33:24; Luka 23:43.

⁴ To nikech mago gin gwedh mabeyo ahinya mabiro bedoe kokalo kuom loch mar Pinyruoth, ok kawwa giwuoro ka Muma wuoyo kuom kaka ngima biro chalo e kindeno, kotiyo gi weche mahoyo chuny kama: “Jo mamuol ginicham piny; kendo ginimor moloyo kuom kwe mang’eny.” To nade jogo mamiyo tungini bedoe? Ndiko koro kama: “Podi kinde matin, kendo ng’a marach obiro onge.” To “jogo ma kiyo Jehova ginicham piny.”​—Zab. 37:9-11.

5. Ang’o mabiro timore ne piny masani?

⁵ Mondo omi mago duto otimre, pinyni kaachiel gi chenro mag sirkandene mopong’ gi ywaruok, dinde, kod chenro mag ohala, nyaka gol oko. To chutho, mano e gima sirkand polo biro timo. Nyasaye notelone janabi Daniel e koro kama: “E ndalo ma ruodhigo nobedie [mantie sani], Nyasaye manie polo nochung piny ruoth moro [e polo] ma ok norum nyaka chieng’, onge oganda moro ma nobedi gi loch kuom piny ruodhno; to enong’iny pinje ruodhigi [masani] duto, mi notiekgi, kendo nobedie nyaka chieng’.” (Dan. 2:44) Bang’e, Pinyruodh Nyasaye, ma en sirkal manyien e polo​—biro locho e wi oganda dhano manyien. Kindeno, “polo manyien, gi piny manyien, kama wach makare odakie” biro betie.​—2 Pet. 3:13.

Sani Dwarore Ahinya Ores Dhano

6. Muma wacho ang’o kuom richo matimore e piny marachni?

⁶ Kane Satan, Adam, kod Hawa ong’anjo ne Nyasaye, ka gidwaro ni gin giwegi ema giyier gima ber kod gima rach, mano ne en chakruok mar chandruok ne oganda dhano. Higini 1,600 bang’e, ka Ataro mar pi ne podi, “tim maricho mag dhano nogundho e piny, kendo paro duto mar chunye ne rach pile.” (Chak. 6:5) Higini 1,300 bang’ Ataro, Suleman noyudo ka tim dhano osebedo marach ahinya, mi nondiko kama: ‘Napako joma koro osetho moloyo jo ma podi ngima. Naparo ni jalo ma pok onyuol, ma pok oneno weche maricho motimore e piny e bwo wang’ chieng’, oloyo gi ber [ji] ariyogo.’ (Ekle. 4:⁠2, 3) Medo higini moko madirom 3,000, kelowa nyaka e kindewagi, ma en kinde ma richo podi medo nya.

7. Ang’o momiyo dwarore ahinya mondo Nyasaye ores dhano?

⁷ Kata obedo ni richo osebedoe kuom kinde malach, sani ema dwarore ahinya mondo Pinyruodh Nyasaye okel resruok. Chal mar ngima dhano osebedo marach ahinya kuom higini 100 mosekalo, kendo ngima  medo kethore ahinya. Kuom ranyisi, riwruok miluongo ni, Worldwatch Institute wacho kama: “Kwan mag joma ne otho e lweny e higini mag [1900-1999], oloyo nyadidek kwan joma ne otho e lweny e kind higini mag 1-1899 E Ndalowa.” Chakre higa mar 1914, ji makalo milion 100 oselalo ngimagi e lwenje! Encyclopedia moro wacho ni, nyalo bedo ni ji madirom milion 60  ne otho e Lweny mar Ariyo mar Piny. Bedo ni pinje moko sani omanre gi gik lweny mar nyuklia, dhano nigi nyalo mar ketho dichiel ngima mar ji mang’eny modak e piny. Kendo kata obedo ni nitie dongruok e sayans, higa ka higa, tuoche kod kech, nego nyithindo madirom milion abich.​—Ne sula mar 9 e bug Ang’o ma Muma Puonjo Kuom Adier?

8. Higini gana mang’eny mag loch dhano osenyiso adiera mane?

⁸ Kinda mar dhano ok osetieko gik maricho. Riwruoge mag siasa, ohelni, koda mag din e pinyni, ok osechopo dwaro mar dhano mar bedo gi kuwe, tieko dhier, kendo miyo ngima obed maonge tuoche. Kar tieko chandruoge madongo masani yudo dhano, riwruogegi osemiyo chandruogegi omedore. Kuom adier, higini gana mang’eny ma dhano oselochogo osemiyo adiera mar weche maluwogi onenore ayanga: “Dhano ok nyal chweyo chunye owuon, dhano onge gi teko yiero yore mowuothoe.” (Yere. 10:23) Ee, “ng’ato obedo gi teko kuom machielo mondo ohime.” (Ekle. 8:9) E wi mano, “chuech duto chur kaachiel, kendo neno rem.”​—Rumi 8:22.

9. Jokristo madier geno neno gik mage e ‘ndalo mag gikogi’?

⁹ Kuom wach kindewagi, Muma nokoro kama: “Kinde mag chandruok nobi e ndalo mag giko.” Bang’ lero kaka gik moko ne dhi bedo e ndalo giko e bwo loch dhano, wach mokorno nyiso kama: “Ji maricho gi jo ma wuondore nomed bedo marach moloyo.” (Som 2 Timotheo 3:1-5, 13.) Mano e gima Jokristo geno neno katimore, nikech ‘piny duto obedo e teko mar ng’a marachno,’ ma en Satan. (1 Joha. 5:19) Kata kamano, wach maber en ni, Nyasaye chiegni reso jo mohere. Ibiro resgi kuom piny, masani medo bedo marach moloyo.

Kamoro Achiel Kende ma Resruok Wuokie

10. Ang’o momiyo Jehova kende ema nyalo kelo resruok?

¹⁰ Sama ilando wach maber, ler ni Jehova kende ema nyalo kelo resruok gadier. En kende ema en gi teko koda gombo mar reso jotichne a e chal moro amora marach. (Tich 4:24, 31; Fwe. 4:11) Wanyalo bedo gadier ni kinde duto Jehova biro reso joge, kendo chopo dwaro mage, nimar osesingore kama: “Kaka aseparo e kaka notimre.” Wachne ‘ok  noduog ire nono.’​—Som Isaiah 14:24, 25; 55:10, 11.

11, 12. Nyasaye singo ang’o ne jotichne?

¹¹ Jehova osesingore ni obiro reso jotichne sama okumo jomaricho. Kane ooro janabi Jeremia mondo owuo gi chir kosiemo jomaricho, Nyasaye nowacho kama: “Kik iluor.” Nikech ang’o? “Ni mar an kodi mondo agoli e chandruok.” (Yere. 1:8) Kamano bende, kane Jehova chiegni ketho Sodom kod Gomorra, ne ooro malaike ariyo mondo ogol Lut gi joode wuok kama ne idhi kethno. Kae to ‘Jehova nomiyo mach gi kibiriti ochwe kuom Sodom gi Gomorra.’​—Chak. 19:15, 24, 25.

¹² Jehova nyalo reso jogo matimo dwaro mare, kata ka timo kamano dwarore e piny mangima. Kane oketho piny machon e Ataro, ‘norito Noa, jayal wach makare, gi ji abiriyo moko.’ (2 Pet. 2:5) To Jehova kendo biro reso joma tir sama oketho piny marachni. Omiyo Wachne nyisowa kama: “Dwaruru Jehova, un jo mamuol duto mag piny . . . dwaruru gi modhi kare, dwaruru muolo: miti dipandu e ndalo mar mirimb Jehova.” (Zef. 2:3) Nikech kethruokno mabiro timore e piny mangima, ‘jo matir nodag e piny, kendo nogol jo maricho oko.’​—Nge. 2:21, 22.

13. Ere kaka ibiro res jotich Jehova mosetho?

¹³ Kata kamano, thoth jotich Nyasaye osetho nikech tuoche, sand, kata nikech gik mamoko. (Math. 24:9) Omiyo, ere kaka jogi duto ibiro resi? Mana kaka osenyis motelo, “nobedie chier mar jo makare.” (Tich 24:15) Mano kaka en gima hoyo chuny, ng’eyo ni onge gima nyalo mono Jehova reso jotichne!

Sirkal Makare

14. Ang’o momiyo wan gadier ni Pinyruodh Nyasaye en sirkal makare?

¹⁴ E tiji mar lendo, inyalo lero ni Pinyruodh Jehova mar polo, en sirkal makare. En kamano nikech sirkandno miyo kido mabeyo mag Nyasaye nenore, kido kaka ng’ado bura kare, tim makare koda hera. (Rapar 32:4; 1 Joha. 4:8) Nyasaye oseketo Pinyruodhno e lwet Yesu Kristo, ma e jal ma chutho owinjore locho e wi piny. Dwaro mar Jehova bende en golo e piny, Jokristo 144,000 mowal kuom roho, kendo chierogi ne ngima mar polo mondo gilochi e wi piny kanyachiel gi Kristo.​—Fwe. 14:1-5.

15. Nyis pogruok manie kind loch Pinyruodh Nyasaye kod loch mar dhano.

¹⁵ Mano kaka loch Yesu kaachiel gi Jokristo mowal kuom roho, nopogre chuth gi loch dhano ma joricho! Kinde mang’eny, joloch mag pinyni oselocho gi gero, kendo giserwako joma nie bwogi e lwenje mosenego ji milion mang’eny. Omiyo, Ndiko jiwowa ni kik waket genowa kuom dhano, “ma onge gi gik ma digikonygo,” kata kelo warruok! (Zab. 146:3) To mano kaka Kristo to biro locho gi chuny mar hera! Yesu nowacho ni, “biuru ira, un duto mujony kendo mugangoru mapek, to anamiu yueyo. Rwakuru lota kuomu, kendo puonjreuru kuoma, nikech amuol, kendo adembora e chuny. Nikech lota yom, kendo ting’na yot.”​—Math. 11:28-30.

Ndalo mag Giko Chiegni Rumo!

16. Ndalo mag gikogi norum nade?

¹⁶ Chakre higa mar 1914, pinyni osebedo e kinde mag giko, kata e “giko mar ndalo.” (Math. 24:3) E kinde masani chiegni ahinya, gima Yesu noluongo ni “masira maduong’,” biro timore. (Som Mathayo 24:21.) Masirano ma en masira maduong’ie moloyo duto, biro tieko piny Satan duto. Masira maduong’no nochakre nade? To norum nade?

17. Ang’o ma Muma nyiso ni nobed chakruok mar masira maduong’?

¹⁷ Masira maduong’ nochakre apoya. Ee, “chieng’no mar Ruoth” nobi apoya, “ka ji wacho ni, ‘kuwe nitie, kendo weche ni kare!’” (Som 1 Jo Thessalonika 5:⁠2, 3.) Masira ma ne okorno biro chakore sama pinje paro ni koro gichiegni loyo moko kuom chandruogegi madongo. Kethruok mapoya mar  ‘Babulon Maduong’,’ tiende ni dinde duto mag miriambo manie piny, biro poyo piny. Ruodhi koda jomamoko biro wuoro ahinya sama iketho Babulon Maduong’.​—Fwe. 17:1-6, 18; 18:9, 10, 15, 16, 19.

18. Jehova biro timo nade kuom monj ma Satan biro monjogo joge?

¹⁸ Kinde biro chopo ma, “ranyisi nobed e wang’ chieng’ gi due gi sulue,” kendo “ranyis mar Wuod dhano nonere e polo.” Omiyo bang’e, ‘wanang’i malo, kendo ting’o wiwa, nikech warruok marwa chiegni.’ (Luka 21:25-28; Math. 24:29, 30) Satan, mabende en Gog kaachiel gi oganda lweny mage, biro monjo jo Nyasaye. Kata kamano, kuom wach jogo ma monjo ogandane mochung’ motegno, Jehova luwo kama: ‘En ma mulou omulo mana tong wang’a.’ (Zek. 2:8) Omiyo, Satan ok bi locho e temo ketho jo Nyasaye. Nikech ang’o? En nikech Ruoth Jehova, biro kawo okang’ mapiyo mar reso jotichne.​—Ezek. 38:9, 18.

19. Ang’o momiyo wanyalo bedo gadier ni oganda lweny mag Nyasaye biro ketho piny Satan?

¹⁹ Sama Nyasaye biro kawo okang’ ne ogendini, ‘gining’e ni en e Jehova.’ (Ezek. 36:23) Obiro oro ogandane mag lweny​—tara gi tara mag malaike kotelnegi gi Yesu Kristo​—mondo giketh gimoro amora modong’ e piny mar Satan. (Fwe. 19:11-19) Ka waparo kaka ne okawo mana malaika achiel kende e otieno achiel nego “ji gana mia achiel gi gana piero aboro gabich” ma ne gin wasik Nyasaye, wanyalo bedo gadier ni jolweny mag polo biro ketho gik moko duto mag piny Satan e sama Har–Magedon muoch, bang’ masira maduong’. (2 Ruo. 19:35; Fwe. 16:14, 16) Satan kod jochiendene ibiro twe kuom higini gana achiel. Gikone, ibiro kethgi.​—Fwe. 20:1-3.

20. Ang’o ma Jehova biro chopo kokalo kuom Pinyruoth?

²⁰ Kuom mano, ibiro gol gik maricho duto a e piny, kae to dhano makare nodag e pinyni nyaka chieng’. Kuom timo mano, Jehova biro nyiso ni adier, en e Jares Maduong’ mar dhano. (Zab. 145:20) Kokalo kuom Pinyruoth, obiro nyiso ni lochne ema owinjore, enopuodh nyinge, kendo chopo dwaro mare maduong’ ne piny. Mad iyud mor maduong’ e tiji mar lendo, kilando wach maber kendo konyo jogo “duto ma noyier [“chunygi oikore,” NW ] ni ngima mochwere” ong’e ni resruok kokalo kuom Pinyruodh Nyasaye koro chiegni ahinya!​—Tich 13:48.

Be Iparo?

• Yesu ne ojiwo nade gimomiyo Pinyruoth dwarore ahinya?

• Ang’o momiyo sani resruok dwarore ahinya moloyo kinde moro amora mosekalo?

• Gin gik mage ma wanyalo geno neno e kinde mar masira maduong’no?

• Ere kaka Jehova nyiso gadier ni en e Jares Maduong’?

[Penjo mag Puonjruok]

[Picha manie ite mar 16]

Wach Nyasaye nokoro ni tij lendo ne dhi timore e okang’ maduong’ moloyo, e kindewagi

[Picha manie ite mar 18]

Mana kaka ne oreso Noa gi joode, Jehova nyalo resowa

[Picha manie ite mar 20]

Jehova “noywe pi wang’ duto . . . , tho ok nobedie kendo.”—⁠Fwe. 21:4