Rit ‘Hera Mokwongo’ ma ne In-go

“Mak matek gino ma in godo.”​—FWE. 3:11.

1, 2. Ne iwinjo nade bang’ ng’eyo ni gima ne ipuonjri e wi Jehova ne en adier?

BE IPARO kinde ma ne ikwongo ng’eyo wach geno majaber, ma Jehova osesingo ne dhano moluore? Kapo ni ne in e din machielo, ne iwinjo nade kane olerni dwaro mag Nyasaye kaluwore gi Muma, kata kane olerni puonj moko ma chon ne tekni winjo tiendgi? Nyalo bedo ni ne ifwenyo ni kare ne ok osepuonji adiera. To mano kaka imor sani nikech iseng’eyo adiera! Kane opidhi gi jonyuol ma Jokristo, be iparo kaka ne iwinjo bang’ yie ni gigo ma ne ipuonjri e wi Jehova ne gin adiera, mi iyiero dak kaluwore kodgi?​—Rumi 12:2.

² Thoth oweteni manie kanyakla biro nyisi ni ne gimor ahinya, ne giwinjo ka gin machiegni gi Jehova, kendo ne gipuoyo ahinya ni ne oywayogi. (Joha. 6:44) Mor ma ne gin-go ne omiyo gichako tiyo tije mag Jokristo. Ne gimor ahinya, mi ne gidwaro nyiso ji duto kaka ne giwinjo. Be gima kamano ne otimoreni in bende?

3. En ang’o ma ne dhi nyime e kanyakla ma ne ni Efeso kane Yesu owuoyo kodgi?

³ Kane owuoyo gi kanyakla mar Jokristo  mokwongo manie Efeso, Yesu noloso kuom ‘heragi mokwongo.’ Jo-Efeso ne nigi kido mang’eny mabeyo, to kata kamano hera ma ne oyudo gin-go kuom Jehova ne osedok chien. Omiyo, Yesu nowachonegi kama: “Ang’eyo timbeni, gi chandruokni, gi kindani, kendo ang’eyo ni ok inyal yie gi jo maricho; nitemo jogo ma luongore ni joote, to ok gin joote, kendo ninwang’o ka gin jomiriambo. In gi kinda, kendo ne idhil nikech nyinga, kendo ok iseol. To an kodi gi wach, ni, iseweyo herani mokwongo.”​—Fwe. 2:2-4.

4. Ang’o momiyo ote mar Yesu ne Jo-Efeso nyalo konyo e kindegi?

⁴ Weche ma Yesu nowacho e bug Fweny ne Jo-Efeso koda ne kanyakla mamoko, osebedo katiyo kuom Jokristo mowal kaluwore gi gik ma ne otimorenegi kuom kinde, chakre higa mar 1914 ka dhi nyime. (Fwe. 1:10) Kata kamano, kata mana gie sani, Jokristo moko nyalo lalo ‘hera mokwongo’ ma ne gin-go kuom Jehova, koda kuom adiera. Ka wan gi wechego e paro, we wanon ane kaka paro matut kuom gik ma osetimore e ngimani iwuon, nyalo konyi dhi nyime medo jiwo hera koda kinda ma ne ikwongo bedogo, kuom Nyasaye koda kuom adiera.

Ang’o ma Nomiyo Iyie Niyudo Adiera?

5, 6. (a) En ang’o ma Jakristo ka Jakristo nyaka kwongo ng’e owuon? (b) Ang’o ma nomiyo iyie ni Joneno mag Jehova puonjo adiera? (c) Ang’o manyalo konyo ng’ato mondo ochiew hera ma ne en-go mokwongo?

⁵ Ng’ato ka ng’ato machiwo ngimane ne Jehova, nyaka kwong ‘ong’e [owuon] gino ma Nyasaye dwaro, gima ber, malong’o, molony.’ (Rumi 12:1, 2) Timo kamano dwaro ni ng’ato opuonjre adiera manie Muma. Gima miyo ng’ato achiel yie ni Joneno mag Jehova puonjo adiera nyalo pogore gi gima miyo ng’at machielo timo kamano. Jomoko nyalo paro ni gima duong’ ma noloko pachgi ne en bang’ somo nying’ Nyasaye ei Muma, kata ng’eyo chal mar jomotho. (Zab. 83:18; Ekle. 9:5, 10) Jomoko to hera manie kind oganda Jehova ema ne oywayogi. (Joha. 13:34, 35) Moko to ne ofwenyo ni ne giyudo adiera, bang’ ng’eyo gimomiyo Jokristo ok gin mag piny. Ne ginwang’o ni kuom adier Jokristo ok nyal donjo e ywaruok mag siasa, kata donjo e lwenje mag oganda moro amora.​—Isa. 2:4; Joha. 6:15; 17:14-16.

⁶ Kuom ji mang’eny, weche mowach malogo kaachiel gi weche mamoko, ema ne omiyo gichako bedo gi heragi mokwongo kuom Nyasaye. Kaw ane kinde mondo ipar gino ma ne omiyo iyie ni iyudo adiera. Chal mar ng’ato ka ng’ato e ngima, opogore gi chal mar jomoko, kendo ji opogore e kitgi, omiyo, gigo ma  nomiyo ihero Jehova mi iketo yie kuom gik mosingo, nyalo pogore gi mag jomoko. Nyalo bedo ni weche ma ne ikawo kaka adierago, pod ikawogi kamano nyaka sani. Adiera ok oselokore. Kuom mano, keto wechego e paro kendo, nyalo chiewo hera ma ne in-go mokwongo kuom adiera.​—Som Zaburi 119:151, 152; 143:5.

Jiw ‘Hera Mokwongo’ Ma Ne In-go

7. Ang’o momiyo dwarore wajiw hera ma ne wan-go mokwongo ne adiera, to wanyalo timo kamano nade?

⁷ Nyalo bedo ni lokruok mang’eny osetimore e ngimani nyaka a ichiwri ne Jehova. Hera ma ne in-go mokwongo ne adiera ne en gima duong’ ahinya, to kaka kinde ne medo kalo, ne dwarore mondo herani omedre eka iked gi tembe manyien mag yie. Kata kamano, Jehova osebedo ka konyi. (1 Kor. 10:13) Omiyo, gik misekaloe kuom higini mogwaro, bende ok gin gik monego okaw matin. Gisekonyi medo jiwo hera mokwongo ma ne in-go, kendo gisebedo yo machielo minyalo nyisogo ni ing’eyo iwuon gino maber, malong’o ma Nyasaye dwaro.​—Josh. 23:14; Zab. 34:8.

8. Jehova ne ofwenyore owuon nade ne Musa, to Jo-Israel nomedo ng’eyo Nyasaye ahinya nade?

⁸ Kuom ranyisi, non ane chal ma Jo-Israel ne obetie, kane Jehova onyisogi wach dwaro mare mar resogi kuom bedo wasumbini Misri. Nyasaye ne ofwenyore owuon ne Musa kowacho niya: “Anabed gino madwarore abed.” (Wuok 3:7, 8, 13, 14, NW ) Tiend gima Jehova ne wacho en ni ne onyalo lokore mobed gimoro amora ma ne dwarore mondo omi ogony joge. Kaluwore gi gik ma ne otimore bang’e, Jo-Israel ne oneno kaka Jehova nonyiso kido mopogore opogore ma en-go​—kaka, Wuon Nyalo Duto, Jang’ad Bura, Jatelo, Jares, Jakedo, kendo Jachiwo.​—Wuok 12:12; 13:21; 14:24-31; 16:4; Neh. 9:9-15.

9, 10. En ang’o manyalo miyo ng’ato ong’e Jehova, to ang’o momiyo ber paro gik ma kamago?

⁹ Gik matimoreni opogore gi gik ma ne otimore ne Jo-Israel. Kata obedo ni en kamano, nitie gik mosetimore e ngimani, mamiyo ibedo gadier ni Nyasaye oheri, odewi, kendo gigo ne ojiwo yie mari. Nyalo bedo ni Jehova osenyisore e ngimani kaka Jachiwo, Jahoch, kata Japuonj. (Som Isaiah 30:20b, 21.) Kata nyalo bedo ni iseneno maler dwoko mar kwayoni moro e lamo. Nyalo bedo ni ne in e chandruok moro, mi Jakristo wadu okonyi. Kata nyalo bedo ni puonjruok mitimo kendi, oseparoni ndiko moko madwarore, mi ndikogo okonyi.

¹⁰ Dibed ni sama inyiso jomoko weche ma kamago, nyalo bedo ni moko kuomgi ok kawgi kaka gik madongo. Nimar adier gigo ok gin honni. Kata kamano, into ikawo gigo kaka gik makende ahinya. Ee, Jehova ne olokore mobedoni gino ma ne dwarore kuomi mi okonyi. Ng’i ane chien kuom higini mago misebedogo e adiera. Be inyalo paro e ngimani kinde mang’eny miseneno iwuon kaka Jehova orito ngimani? Ka en kamano, paro kaka ne iwinjo e chunyi e kinde ma kamago, nyalo jiwo ei chunyi hera ma ne in-go kuom Jehova e kindego. Ket e chunyi gik mabeyo ma ne otimorenigo, ma ok ikawgi mayot. Par matut kuomgi. Gigo nyiso ni Jehova oheri, odewi, kendo onge ng’ama nyalo mayi adiera ma in godono.

Nonri Ane Iwuon

11, 12. Ka hera ma Jakristo ne nigo kuom adiera osedok chien, ang’o manyalo bedo ni ne otimre, to en siem mane ma Yesu nochiwo?

¹¹ Ka iwinjo ni herani kuom Nyasaye kendo kuom adiera opogore gi kaka ne en mokwongo, mano ok nyis ni Jehova olokore. Jehova ok lokre ngang’. (Mal. 3:6; Jak. 1:17) Kaka ne oheri kodewi e kindeno, e kaka podi oheri gie sani. Kapo ni nitie gimoro mosemiyo lokruok obedoe e winjruok manie kindi gi Jehova, gino dibed ni en ang’o? Be nyalo bedo ni iwinjo ka in gi pek moko momedore, kata winjo ka ngimani opong’ gi parruok  mang’eny? Nyalo bedo ni chon ne iwuoyo gi Nyasaye e lamo gi kinda, ne ipuonjori ahinya, kendo ne ibedo gi kinde momedore mag paro matut kuom gigo ma ne ipuonjori. Be ne in gi kinda e tij lendo, kendo ne idhi e chokruok ma ok ibari, maloyo kaka itimo sani?​—2 Kor. 13:5.

¹² Nyalo bedoni matek fwenyo ni nitie lokruok ma kamago kuomi iwuon, to kapo ni ifwenyo ni nitie, ang’o ma ne omiyo lokruokgo obedoe? Be nyalo bedo ni parruok ma in-go, kaka pidho joodi kata rito ngimani, ma kuom adier gin ting’ madwarore, gi mamoko machalo kamago, osemiyo iweyo bedo motang’ ni odiechieng’no mar Jehova chiegni? Yesu nowacho ne jootene kama: “Ritreuru uwegi, dipo ka chunyu opong’ gi ich lach, kod mer, gi parruok mag ngimani, mi ndalono upo kochopo kuomu kaka obadho; nikech ndalono nobi opo ji duto modak e piny ngima. To rituru kusayo pile, mondo uyud teko mar tony e magi duto ma nobi.”​—Luka 21:34-36.

13. Jakobo ne onyiso ni Wach Nyasaye chalo gang’o?

¹³ Kotelne gi roho mar Nyasaye, Jakobo jandik Muma, nojiwo Jokristo wetene mondo ononre giwegi kaluwore gi gima Wach Nyasaye wacho. Jakobo nondiko kama: “Beduru jo ma winjo wach kendo timo, ok jo ma winjo kende, kuwuondoru uwegi. Nikech ka ng’ato winjo wach, to ok otim, ochalo gi dhano ma ngi’yo wang’e e rang’i. Ong’iyore, kendo odhiyo, to gikanyono wiye owil kaka ochalo. To en ma nono chik makare, ma miyowa bedo thuolo, kosiko kotimo kamano, kendo ok obed ng’at ma winjo wach, mi wiye wilgo, to en jatim tich; noguedh jali e tichne.”​—Jak. 1:22-25.

14, 15. (a) Muma nyalo konyi nade timo dongruok kaka Jakristo? (b) Gin penjo mage minyalo paro kuomgi matut?

¹⁴ Ng’ato nyalo ng’iyore e rang’i mondo obed gadier ni orwakore maber. Kuom ranyisi, ka dichwo oneno ka tayi morwako ok nikare, onyalo rieyogo. Ka dhako oneno ka yie wiye ok ochanore maber, onyalo losogi. Kamano bende, Ndiko konyowa ng’eyo gima wan. Ka wapimo chal marwa kod kaka Muma wacho ni onego wabed, to mano nyiso ni watiyo kode kaka rang’i. Ere kony mwanyalo yudo ka watiyo gi rang’i, to ok watim lokruok kuom gima ok ber ma ne waneno? En nyiso rieko timo kaluwore gi gima waneno e “chik makare” mar Nyasaye, kwabedo ‘jotim tich’ mag chikno. Omiyo, ng’ato ang’ata ma fwenyo ni hera mokwongo ma ne en-go kuom Jehova koda kuom adiera osedok chien, nyalo timo maber nono penjogi: ‘Gin pek mage ma ayudo e ngima, to atimo nade kuomgi? Ne ajatimo nade kuomgi e kinde mokalo? Be nitie gima oselokore?’ Ka nonruok e yo makamano nyiso ni nitie kuonde ma waremie, kik wawe ma ok wakawo okang’. Ka lokruok moko dwarore, tim duto minyalo mondo ilosgi mapiyo.​—Hibr. 12:12, 13.

¹⁵ Paro matut e yo makamano bende nyalo konyi keto chenro mowinjore mag timo dongruok kaka Jakristo. Kotelne gi roho mar  Nyasaye, jaote Paulo ne ochiwo puonj ma ne dhi konyo Timotheo jatich wadgi, otim dongruok e tije mar lendo. Paulo ne ojiwo rawerano kama: “Par wechegi, ket chunyi kuomgi chuth, mondo ji one dongo mari e yore duto.” Wan bende watimo maber ka waparo matut, kaluwore gi gima Wach Nyasaye wacho, kuom dongruok mwanyalo timo.​—1 Timo. 4:15.

16. En ang’o madwarore itang’ kik timre sama inonri iwuon kaluwore gi gima Ndiko wacho?

¹⁶ Ka inonri maber gadier, ibiro fwenyo ni kare irem kuonde moko. Mano nyalo nyoso chuny ng’ato, kata kamano kik iwe mano mondo otimreni. En adier ni, nonruok e yo makamano, en ni mondo omi wafweny kuonde madwarore watimie lokruok. Kuom adier, Satan to dwaro ni mondo Jakristo one ni ok owinjore e wang’ Nyasaye nikech nyawo ma en-go. Osetemo wacho ni Nyasaye ok kaw kinda ma ji tiyonego kaka gima duong’. (Ayub 15:15, 16; 22:3) To mano en miriambo ma kata Yesu owuon nokwero ahinya; Nyasaye geno kendo ohero ng’ato ka ng’ato kuomwa. (Som Mathayo 10:29-31.) Ng’eyo ni nitie kuonde ma waremie, onego omi wabolre ka wang’ado e chunywa mar timo lokruok kokalo kuom kony ma Jehova chiwo. (2 Kor. 12:7-10) Kapo ni midekre kata bedo moti, ema miyo ok inyal timo mang’eny, to kare chan timo gik maluwore gi nyaloni, to kik idog chien kata weyo herani mondo odog chien.

Gik Mang’eny Monego Wanyisie Erokamano

17, 18. Gin ber koda gweth mage mabedoe kuom jiwo hera mokwongo ma ne in-go?

¹⁷ Inyalo yudo ber koda gweth mang’eny kuom dhi nyime gero kendo jiwo hera mokwongo ma ne in-go. Ng’eyo miseyudo e wi Nyasaye koda erokamano minyiso kuom hera moherigo, nyalo medore. (Som Ngeche 2:1-9; 3:5, 6.) Jandik-zaburi nowacho ni, ‘nitie pok maduong’ kuom rito [buche ma Jehova ng’ado].’ Nomedo wacho ni, “weche ma Jehova nyiso, chung’ matek, ma chiwo rieko ni jo ma riekogi tin.” E wi mano, “gin johawi jo mobedo kare e yor Jehova, ma wuotho e chikne.”​—Zab. 19:7, 11; 119:1.

¹⁸ Kuom adier, ibiro yudo ni nitie gik mang’eny monego inyisie erokamano. Kuom ranyisi, ing’eyo gimomiyo gik maricho timore e piny gie sani. Iyudo kony kuom yore ma Nyasaye rito kendo dewogo joge e kindewagi. Onge kiawa ni imor bende ni Jehova oseywayi morwaki e kanyaklane mar piny mangima, kendo osemiyi thuolo mar bedo achiel kuom Joneno mage. Yaw wang’i ine gweth mang’eny ma in-go! Kapo ni inyalo ndiko piny gwethgo duto, ginyalo bedo mang’eny ahinya. Onge kiawa ni timo kamano kinde ka kinde, biro konyi luwo weche maluwogi: “Mak matek gino ma in godo.”​—Fwe. 3:11.

19. Mopogore gi paro matut kuom winjruok manie kindi gi Nyasaye, gin ang’o bende madwarore itim?

¹⁹ Paro matut kuom kaka yieni osebedo ka dongo kuom higini, en mana achiel kuom okang’ manyalo konyi mako matek gino ma in godo. Gasedni osebedo kawuoyo nyadinwoya kuom gik mamoko madwarore e konyo ng’ato dhi nyime bedo gi winjruok maber e kinde gi Nyasaye. Moko kuomgi gin, lamo, dhi e chokruoge mag Jokristo kendo chiwo paro majiwo ji kuno, koda tiyo tij lendo gi kinda. Timo gigi nyalo konyi chiero herani, kendo konyi dhi nyime jiwo hera mokwongo ma ne in-go.​—Efes. 5:10; 1 Pet. 3:15; Juda 20, 21.

Inyalo Dwoko Nade?

• Ere kaka gigo ma nomiyo ichako hero Jehova nyalo jiwi gie sani?

• Paro kuom gigo mosebedo katimore e ngimani kuom higini, nyalo miyo ibed gadier kuom wach mane?

• Ang’o momiyo onego inon hera ma in-go kuom Nyasaye?

[Penjo mag Puonjruok]

[Picha manie ite mar 29]

En ang’o ma ne oywayi kendo omiyo iyie ni iyudo adiera?

[Picha manie ite mar 31]

Be nitie gik moko ma ineno kuomi madwarore itimie lokruok?