Yie Ibed e Bwo Teko Loch Jehova

“Hero Nyasaye en mako chikne, to chikne ok tek.”​—1 JOHA. 5:3.

1, 2. (a) Ang’o momiyo kindegi ji mang’eny ok ohero bedo e bwo teko ng’at machielo? (b) Jogo mawacho ni ok nyal chikgi, be gin kamano gadier? Ler ane.

KINDEGI, ji mang’eny ok ohero bedo e bwo “teko” mar ng’at machielo. Joma kamago nyalo wacho ni, “An onge ng’ama nyalo chika.” Kata kamano, be joma kamago ni thuolo chuth ma onge ng’ama chikogi? Ooyo ngang’! Thothgi ichiko gi kit ngima mar joma moko mang’eny, modak kaluwore gi “tim pinyni.” (Rumi 12:2) Kaluwore gi weche jaote Petro, joma kamago gin ‘wasumb top.’ (2 Pet. 2:19) Giwuotho kaluwore gi “tim jachik pinyni, ruodh teko mar kind polo,” ma en Satan kendo Jachien.​—Efes. 2:2.

² Jasomo moro ne opakre kama: ‘Ok amiyo jonyuolna, jadolo, jatend din moro amora, kata mana Muma, teko mar yierona gima ber koda.’ En adier ni, jomoko nyalo tiyo marach gi teko ma gin-go, mi monwa winjogi. Kata kamano, be tamruok chuth ni ng’at machielo kik chikwa e gima nyalo konyo? Ng’iyo e yo machuok thuond weche mindiko e gasede mag piny, nyiso ni ok en kamano. En gima lit ni, gie sani, ma dwarore ahinya mondo ota dhano, ji mang’eny ok ohero kendo ok yie mondo ochikgi.

Kaka Waneno Joma Nigi Teko mar Loch

3. Jokristo mokwongo ne onyiso nade ni ne ok giluw aluwa gigo ma joloch mag dhano ne dwaro?

³ Kaka Jokristo, yo ma wanenogo joma nigi teko mar loch opogore gi kaka jo piny neno. Mano ok nyis ni waluwo aluwa gima iwachonwa ma ok wanono. Mopogore gi mano, nitie kinde ma nyaka watamre luwo gima jomoko dwaro, kata obedo ni gin-gi teko mar loch  kuomwa. Mano bende e kaka Jokristo mokwongo notimo. Kuom ranyisi, kane ochik joote mondo owe lendo, ne ok giluoro jadolo maduong’ koda jomamoko ma ne nigi teko mar loch, mabende ne gin jokanyo mag Sanhedrin. Ne ok giweyo timo gima kare mana ni mondo giluw kaka loch mar dhano ne dwaro.​—Som Tich Joote 5:27-29.

4. Gin ranyisi mage e Ndiko mag Dho-Hibrania, manyiso ni jotich Nyasaye mang’eny ne ochung’ motegno e luwo gik makare?

⁴ Jotich Nyasaye mang’eny ma ne odak ka kinde Jokristo podi, bende ne ochung’ motegno e timo kamano. Kuom ranyisi, Musa ‘nodagi mondo kik oluonge ni wuod nyar Farao, moyiero ni mondo osande kod oganda Nyasaye,’ kata obedo ni timo kamano nokelo kuome “mirimb ruoth.” (Hibr. 11:24, 25, 27) Josef nodagi terore gi chi Potifar, kata obedo ni ne ong’eyo ni chi Potifar ne nigi teko mar chulo kuor, mi kelne hinyruok. (Chak. 39:7-9) Daniel “nosingore ei chunye ni kik ocham chiemb ruoth,” kata obedo ni ne ok yot ne jaduong’ mar jotich e Babulon yie gi singruokneno. (Dan. 1:8-14) Ranyisi kaka mago nyiso ni kinde duto, jo Nyasaye osebedo kachung’ motegno e luwo gima kare, ma onge luoro gima dhi timorenegi. Ne ok giluwo dwaro mag dhano mana ni mondo jogo oyie kodgi; wan bende onego watim kamano.

5. Yo ma waneno godo joma nigi teko mar loch, opogore nade gi kaka jopiny neno?

⁵ Chung’wa motegno gi chir ok onego onenre mana ka wich teko; kata ni mondo wanenre mana kaka jomoko ma ng’anjo nikech ok gidwar loch moro mar siasa. Kar mano, wang’ado ei chunywa ni wayie gi teko mar loch Jehova moloyo loch moro amora mar dhano. Sama chik dhano kwedo chik Nyasaye, yiero gima wabiro timo ok bed matek. Mana kaka joote e kinde Jokristo mokwongo, wawinjo Nyasaye kaka jaloch, moloyo winjo dhano.

6. Ang’o momiyo en gima ber luwo chike Jehova kinde duto?

⁶ Ang’o mosekonyowa yie mondo Nyasaye ochikwa? En nikech wayie gi weche manie Ngeche 3:5, 6 mawacho ni: “Gen Jehova gi chunyi duto, kendo kik iketri kuom lony gi weche mayoreyore ma ingo iwuon. Yie kuome e yoreni duto, mi nomi yoreni bedo mochikore tir.” Wayie ni gimoro amora ma Nyasaye dwaro ni mondo watim, gikone biro kelonwa ber. (Som Rapar mar Chik 10:12, 13.) Kuom adier, Jehova ne ofwenyore ne Jo-Israel ni en e Jal ‘mapuonjogi mondo giyud konyruok, matelonegi e yo madigidhie.’ Kendo nomedo wacho kama: “Ma di niwinjie chikna! Eka dibedo gi kuwe kaka aora, gi tim makare kaka apaka me nam.” (Isa. 48:17, 18) Wan gadier kuom wechego. Wayie ei chunywa ni, kinde duto luwo chike Nyasaye biro kelonwa ber.

7. Ang’o monego watim kapo ni ok wang’eyo chuth tiend chik moro manie Wach Nyasaye?

⁷ Wayie gi teko mar loch Jehova kendo wawinje, kata obedo ni ok wang’eyo chuth gimomiyo odwaro ni waluw moko kuom chike manie Wachne. Mano ok nyis ni wayie ayiea ma ok wanon; to watimo kamano nikech yie motegno wan-go kuom Jehova. Timo kamano nyiso ni wan gadier chuth ni Jehova ong’eyo gima ber kodwa. Winjo Jehova bende nyiso hera ma wan-go kuome, nimar jaote Johana nondiko kama: “Hero Nyasaye en mako chikne, to chikne ok tek.” (1 Joha. 5:3) Kata kamano, nitie yo machielo ma wiwa ok onego owil godo, mwanyalo nyisogo ni wayie mondo Nyasaye ochikwa.

Tiego Pachwa

8. Tiego pachwa otudore nade gi wach yie mondo Jehova ochikwa?

⁸ Muma nyisowa ni onego watieg pachwa kendo ‘wapuonjre pogo e kind gik mabeyo kod gik maricho.’ (Hibr. 5:14) Omiyo, gima wadwaro ok en mana luwo aluwa chike Nyasaye; to mopogore gi mano, wadwaro bedo gi nyalo mar paro, ka ‘wapogo e kind gik mabeyo kod gik maricho’ kaluwore gi puonj koda chike ma Jehova oseketo. Onego wafweny rieko koda ber mayudore kuom luwo yore mag Jehova,  mondo omi wawach kaka jandik-zaburi niya: “Chikni ni e i chunya.”​—Zab. 40:8.

9. Ere kaka wanyalo miyo chunywa omakre gi puonj koda chike Jehova, to ang’o momiyo dwarore watim kamano?

⁹ Mondo omi wane ber manie chike Nyasaye kaka jandik-zaburi noneno, dwarore wapar matut kuom gigo ma wasomo ei Muma. Kuom ranyisi, sama wapuonjre wach moro ma Jehova dwaro, wanyalo penjore niya: ‘Ang’o momiyo mako chikni kata puonjni en nyiso rieko? Ang’o momiyo luwogi en gima biro konya? Gin gik mage maricho moseyudo joma osetamore luwo puonj kata chike Nyasaye?’ Kuom mano, sama chunywa omakre gi yore mag Jehova, mano nyalo miyo wang’ad paro kaluwore gi dwache. Wabedo gi nyalo mar dhi nyime ‘ng’eyo gima Ruoth dwaro,’ kendo bedo joma luwo chik. (Efes. 5:17) Timo kamano ok en gima yot pile.

Satan Dwaro Miyo Teko mar Loch ma Nyasaye Nigo Kik Nenre

10. En yo mane achiel ma Satan osedwaro miyogo teko mar loch ma Nyasaye nigo kik onenre?

¹⁰ Satan osebedo ka dwaro miyo teko mar loch ma Nyasaye nigo kik nenre. Chuny ma en-go mar tamruok luwo chik, osenenore e yore mang’eny. Kuom ranyisi, ne ane kaka ji mang’eny ok osemiyo luor chenro mar kend ma Nyasaye oseketo. Chwo gi mon moko yiero dak kanyachiel ma ok gikendore kaka chik dwaro, to jomoko manyo goyiem yore mag ketho kend maggi. Jogi duto nyalo bedo ni yie gi weche jatugo moro mong’ere e tuke mag televison ma ne otwo kama: “Kendruok gi ng’at achiel kende en gima ok nyalre, kuom chwo koda mon.” Ne omedo kama: “Onge kata ng’ato achiel mang’eyo, momakre mana gi ng’ama okendorego kende, to bende ok ang’eyo ng’at madwaro timo kamano.” Koparo kend mage ma nosebedo kakethore, jatugo machielo mong’ere, bende nowacho niya: “Ok an gadier ni ne ochwewa mondo wabed mana gi ng’ato achiel e ngimawa duto.” Omiyo, onego wapenjre wawegi kama, ‘Be ayie mondo Jehova ochika kuom wach kend, koso paro mag jopiny oseketho pacha kuom wach kend?’

11, 12. (a) Ang’o momiyo nyalo bedo matek ne rowere yie mondo Jehova ochikgi? (b) Chiw ane ranyisi manyiso kaka tamruok luwo chike koda puonj Jehova en tim fuwo.

¹¹ Be in rawera manie riwruok mar oganda Jehova? Ka en kamano, Satan dwaro ahinya ni mondo ipar ni bedo e bwo teko loch mar Jehova ok en gima ber kodi. “Gombo mag yawuowi” kata rowere, kaachiel gi tembe ma a kuom mbeseni, nyalo miyo ibed gi paro ni chike Nyasaye tek luwo. (2 Timo. 2:22) Kik iwe mano otimreni. Tem ahinya mondo ine rieko mayudore kuom luwo chike Nyasaye. Kuom ranyisi, Muma nyisi ni ‘iring terruok.’ (1 Kor. 6:18, NW ) Kendo penjri niya kuom wachni: ‘Ang’o momiyo luwo chikni nyiso rieko? Luwo chikni biro konya nade?’ Nyalo bedo ni ing’eyo jomoko ma ne ok odewo puonj Nyasaye, mi bang’e gimoto e badgi. Be sani gimor gadier? Be ngimagi ber maloyo kinde mago ma ne gin kanyachiel gi riwruok mar oganda Jehova? Be giseyudo mor moro madier ma jotich Nyasaye mamoko to ok oseyudo?​—Som Isaiah 65:14.

¹² Non ane weche moko ma Jakristo moro miluongo ni Sharon nowacho: “Nikech ne ok aluwo chik Jehova, koro tuwo marach mar Ayaki  osemaka. Seche moko abetga piny to aparo higini mang’eny mosekalo ma ne ayudoe mor ka atiyo ne Jehova.” Ne ofwenyo ni ketho chike Jehova ne en tim fuwo, kendo ne onego oluor chikego e okang’ mamalo ahinya. Chike Jehova oketi mondo oritwa. Sharon ne otho jumbe abiriyo bang’ ndiko weche man malogo. Mana kaka sigand Sharon nyiso, onge gima ber ma Satan nyalo miyo jogo mabedo e achiel gi piny marachni. Kaka “wuon miriambo,” Satan singo ne ji gik mang’eny, to gigo ok chop ngang’, mana kaka nobedo kuom singo ma ne otimo ne Hawa. (Joha. 8:44) Kuom adier, yie mondo Jehova ochikwa en gima konyo ahinya kinde duto.

Tang’ Kik Ibed gi Chuny mar Tamruok Luwo Chik

13. En yo mane ma dwarore watang’ie mondo kik wabed gi chuny mar tamruok luwo chik?

¹³ Yie bedo e bwo teko loch mar Jehova, dwaro ni watang’ kik wabed gi chuny mar tamruok luwo chik. Wich teko nyalo miyo wapar ni ok onego ochikwa gi ng’at moro amora. Kuom ranyisi, wanyalo tamore rwako siem ma imiyowa gi jogo moket mondo ota jo Nyasaye. Nyasaye oseketo chenro ma kweth mar jatichno mogen kendo mariek, tiyogo e chiwo chiemb chuny e kinde mowinjore. (Math. 24:45-47) Onego wabolore mi wang’e ni mano e yo kata chenro ma Jehova ritogo joge e kindegi. Bed kaka joote ma ne ochung’ motegno. Kane chuny jopuonjre moko ochwanyore, Yesu ne openjo joote niya: “Un bende udwaro a?” Petro nodwoko niya: “Ruoth, wadhi ir ng’a? In gi weche mag ngima mochwere.”​—Joha. 6:66-68.

14, 15. Ang’o momiyo onego wabolore mondo waluw puonj mag Muma?

¹⁴ Yie bedo e bwo teko loch mar Jehova oriwo koda rwako puonj mayudore ei Wachne. Kuom ranyisi, kweth mar jatichno mogen kendo mariek, osebedo ka siemowa ni, “wanenuru, kwaritore maber.” (1 Thes. 5:6) Puonj ma kamano owinjore ahinya e kindegi mag giko, ma en kinde ma ji mang’eny gin jo “moherore giwegi, kendo jo mohero mwandu.” (2 Timo. 3:1, 2) Be paro mosenya kaka mago nyalo ketho pachwa? Ee. Keto chunywa e lawo gik piny, nyalo monowa keto winjruokwa gi Nyasaye obed motelo, kata nyalo miyo wabed gi chuny mar dwaro mwandu. (Luka 12:16-21) Omiyo, mano kaka en rieko, rwako puonj koda siem mayudore ei Muma, kendo tamruok dak e ngima mar luwo mana gik ma morowa kende, masani en tim mosenya ahinya e piny Satan!​—1 Joha. 2:16.

¹⁵ Chiemb chuny ma jatichno mogen kendo mariek chiwo, ipogo ne kanyakla kokalo kuom jodongo moseketi. Muma jiwowa kama: “Winjuru jotendu [“joma tayo,” NW ] kendo migiuru duong’; nikech girito chunyu ma ok giyue, kaka jo ma biro dwoko wach kuom tich ma gisetiyonu. To tichgi mondo gitim gi mor, ok ka gijurgo, nimar mano ok dikonyu.” (Hibr. 13:17) Be mano nyiso ni jodong-kanyakla ok nyal both? Ooyo, ok en kamano. Nyasaye neno kuonde ma giremie maloyo kaka dhano moro amora nyalo neno. To podi odwaro ni mondo wawinjgi. Riwo jodongo lwedo kata obedo ni gin mana dhano morem, nyiso ni wayie bolore e bwo teko loch mar Jehova.

Gimomiyo Bolruok Dwarore

16. Wanyalo nyiso luor nade ne Yesu kaka Wi kanyakla mar Jokristo?

¹⁶ Kinde duto nyaka wang’e ni Yesu e Wich  madier mar kanyakla. (Kolo. 1:18) Mano en achiel kuom gimomiyo wabolore ka wayie luwo yo ma jodongo moseketi tayowago, ka ‘wamiyogi duong’ ahinya.’ (1 Thes. 5:12, 13) En adier ni, jodong-kanyakla bende nyalo nyiso bolruok kuom bedo motang’ mondo gipuonj kanyakla wach Nyasaye, to ok pachgi giwegi. Ok ‘gikadh weche mondiki’ ka gilando puonjgi giwegi.​—⁠1 Kor. 4:6.

17. Ang’o momiyo chuny mar manyo duong’ en gima onego watang’ godo?

¹⁷ Ji duto ei kanyakla onego otang’ kik gimany duong’ margi giwegi. (Nge. 25:27) Nenre ni kidono ne obedo obadho ne japuonjre moro, ma jaote Johana ne oromogo. Ne ondiko kama: “Diotrefe, mohero bet jatendgi, ok oyie winjowa. E momiyo kabiro anagol weche motimo oko, kaka ochwogo weche manono kuomwa gi weche maricho.” (3 Joha. 9, 10) Nitie puonj mwayudo kindegi kuom wachno. Dwarore ni wagol chuth paro moro amora mar dwaro duong’ manyalo bedo ei chunywa wawegi. Muma wachonwa niya: “Sunga e motelo ni nek; ng’a masungore obiro podho.” Jogo mayie mondo Nyasaye ochikgi, nyaka tamre donjo e obadho mar sunga kata manyo duong’, nikech kidogo biro kelo wichkuot.​—Nge. 11:2; 16:18.

18. Ang’o mabiro konyowa yie bedo e bwo teko loch mar Jehova?

¹⁸ Ee, ng’ad e chunyi ni ibiro tamri paro mar pinyni mar tamruok luwo chik, kendo ni ibiro yie bedo e bwo teko loch mar Jehova. Kinde ka kinde, par matut kuom thuolo majaber ma ing-go mar tiyo ne Jehova. Bedo ni in achiel kuom jokanyo mag ogandane, nyiso ni Nyasaye oseywayi kokalo kuom roho mare maler. (Joha. 6:44) Kik ikaw winjruok ma in-go e kindi gi Nyasaye kaka gima tin. Tim duto minyalo e yore duto mag ngima, mondo inyis ni ikwedo chuny mar tamruok luwo chik, kendo ni iyie bedo e bwo teko loch mar Jehova.

Be Iparo?

• Yie mondo Jehova ochikwa oriwo timo gik mage?

• Tiego pachwa otudore nade gi wach yie mondo Jehova ochikwa?

• Gin yore mage ma Satan temo miyogo teko mar loch ma Nyasaye nigo kik nenre?

• Ang’o momiyo bolruok dwarore mondo ng’ato oyie bedo e bwo teko loch Jehova?

[Penjo mag Puonjruok]

[Picha manie ite mar 24]

“Onego wawinj Nyasaye moloyo winjo dhano”

[Picha manie ite mar 26]

Kinde duto luwo chike ma Nyasaye oketo en nyiso rieko