Loyo Pek Mabedoe e Tij Lendo mar Ot-ka-Ot

‘Ne watimo chir kuom Nyasachwa mondo wahulnu wach maber mar Nyasaye, ka wan e lweny mager.’​—1 THES. 2:2.

1. Jeremia ne oromo gi pek mage, to ne onyagore kodgi nade?

JEREMIA ne en mana dhano kaka wan. Kane Jehova omiye migawo mar bedo “janabi ni ogendini,” ne oywak kama: “A Ruoth Nyasaye! ne, ok anyal wuoyo, ni kech an nyathi.” Kata kamano, nikech noketo geno kuom Jehova, ne oyie timo migawo ma ne omiyeno. (Yere. 1:4-10) Kuom higini mokalo 40, Jeremia ne koro wach e kind joma chunygi ne ok dew, jo achaye gi jo jaro, koda e kind joma ne ger ma goye kata. (Yere. 20:1, 2) Ne nitie kinde ma nodwaro kata mana weyo migawone. Kata kamano, ne onano e tij lando ote ma ji mang’eny ne ok dwarno. Kokalo kuom teko Nyasaye, Jeremia notimo gik mang’eny ma dine ok otimo mana gi tekone owuon.​—Som Yeremia 20:7-9.

2, 3. Jotich Nyasaye masani romo nade gi pek machalo gi ma Jeremia noyudo?

² Thoth jotich Nyasaye masani, bende romo gi gik ma Jeremia ne oromogo. Sama ne jomoko kuomwa paro wach lendo ot ka ot, ne giwacho ni, ‘Mano tich ma an ok anyal tiyo ngang’.’ To bang’ fwenyo ni dwaro mar Jehova en ni mondo waland wach maber, ne waloyo luoro ma ne wan-go, mi wachako bedo modich e tij lendo. Kata kamano, thothwa ne oromo gi pek moko e ngima, ma nomiyo tij lendo obedonwa matek, kata kane en mana kuom kinde manok. En adier ni, chako lendo ot ka ot, kendo timo kamano nyaka giko, ok en gima yot.​—Math. 24:13.

³ Nade kisebedo kipuonjori Muma gi Joneno mag Jehova, kendo isebedo kidhi e  chokruoge mag kanyakla kuom kinde, to podi iluor chako tij lendo ot ka ot? To nade ka in Janeno ma osebatisi, to iyudo ka lendo mar ot ka ot en tich ma tekni, kata obedo ni in gi nyalo mar timo kamano? Bed gadier ni, ji mawuok e kit ngima duto, loyo pek mago mabedoe e tij lendo mar ot-ka-ot. Kokalo kuom kony ma Jehova chiwo, in bende inyalo loyogi.

Timo Chir

4. Ang’o ma nokonyo Paulo hulo wach maber gi chir?

⁴ Onge kiawa ni ing’eyo ni tij lendo mitimo e piny mangima, timore, ok nikech teko kata rieko mar dhano, to kokalo kuom roho mar Nyasaye. (Zek. 4:6) To mano bende en adier kuom lendo mar Jakristo ka Jakristo. (2 Kor. 4:7) Ne ane ranyisi mar jaote Paulo. Koparo kinde ma jo akwede ne sande kaachiel gi jo misonari wetene, nondiko kama: ‘Yande waseneno masira, kendo otimnwa malit, e dala mar Filipi. Ne watimo chir kuom Nyasachwa mondo wahulnu wach maber mar Nyasaye, ka wan e lweny mager.’ (1 Thesa. 2:2; Tich 16:22-24) Nyalo bedonwa matek paro ni jalendo ma jakinda kaka Paulo, ne nyalo yudo ka lendo en lweny mager kata tich matek. Kata kamano, mana kaka waduto onego watim, Paulo ne nyaka gen kuom Jehova mondo eka ohul wach maber gi chir. (Som Jo Efeso 6:18-20.) Wanyalo luwo ranyisi mar Paulo nade?

5. Yo achiel mwanyalo yudogo chir mar lendo en mane?

⁵ Yo achiel mwanyalo yudo godo chir mar lendo, en lamo. Painia moro nowacho kama: “Ahinyo lemo mondo omi awuo gi chir, mondo omi weche mawacho omul chuny ji, kendo mondo ayud mor e tij lendo. Nimar kuom adier, tijni en mar Jehova, to ok en marwa wawegi, omiyo ok wanyal chope ka ok okonyowa.” (1 Thes. 5:17) Waduto onego wasiki ka wakwayo kony mar roho maler mar Nyasaye, mondo omi walendi gi chir.—Luka 11:9-13.

6, 7. (a) En fweny mane ma Ezekiel noyudo, to tiende ne en ang’o? (b) En puonj mane ma fweny mar Ezekiel miyo jotich Nyasaye ndalogi?

⁶ Bug Ezekiel fwenyonwa gimachielo manyalo konyowa lendo gi chir. E fweny moro, Jehova nomiyo Ezekiel buk modol ma iye kod ng’eye oting’o “weche mag yuagruok,” kendo nokone ni ocham, kowachone ni: “Wuod dhano, cham achama pienni modolore mamiyi nyaka iyieng’.” Tiend fwenyni ne en ang’o? Ezekiel nonego ong’e chuth wach ote ma ne dwarore oter ne ji. Oteno ne onego omul chunye koda pache owuon. Janabino dhi nyime wacho kama: “Nachame, nobedo ka mor kich e dhoga kuom mitne.” Lando ote mar Nyasaye e lela, ne kelo ne Ezekiel mor maduong’—mana ka bilo mor kich. Nokawo migawo mar tiyo ne Jehova, kendo chopo ote ma Nyasaye ne omiye kaka migawo majaber ahinya, kata obedo ni tero oteno ne oriwo nyaka chiwo weche mag kum ne joma ne ok dwar winjo.—Som Ezekiel 2:8–3:4, 7-9.

⁷ Fwenyni oting’o puonj maduong’ ahinya ne jotich Nyasaye mandalogi. Wan bende wan gi ote moting’o weche mag kum, monego water ne joma pile ok dew kinda mwanyiso. Mondo omi wadhi nyime kawo tij Jokristo mar lendo kaka tich majaber ahinya ma Nyasaye omiyowa, nyaka wadhi nyime somo kendo puonjruok wach Nyasaye. Timo puonjruok ma ok waketoe chunywa, kata ka wasiko wabare, ok bi miyo wang’e Wach Nyasaye e yo matut. Be inyalo timo dongruok e yo misomogo Muma, koda e yo mipuonjorigo Muma in iwuon, kitimo kamano ma ok ibari? Be inyalo medo paro matut kuom gigo misomo?​—Zab. 1:2, 3.

Kaka Inyalo Chako Wuoyo Kuom Muma

8. En yo mane mosekonyo jolendo moko mag Pinyruoth e chako mbaka kuom weche Muma ka gilendo ot-ka-ot?

⁸ Kuom thoth jolendo, gima teknegi ahinya e lendo mar ot-ka-ot, en yudo weche monego  gichakgo mbaka. En adier ni, kuonde moko, chako mbaka gi ji en gima tek. Jolendo moko yudo ni yotnegi wuoyo gi ji e dhoot, ka gichako gi weche ma giseyiero maber, kae to gimiyo wuon ot trakt, kaka onyis e sanduk man piny. Wi wach moket e ng’e trakt, kata picha manie iye, nyalo ywayo pach wuon-ot, to mano miyowa thuolo mar nyise e yo machuok gimomiyo walime, kendo penje wach moro. Pogruok mantie e tiyo gi yorni en ni, omiyowa thuolo mar nyiso wuon-ot trakt adek kata ang’wen mopogore opogore, kae to wagwele mondo oyier achiel ma more. En adier ni dwarowa ok en mana miyo ji trakt, kata tiyo kodgi e udi duto, dwarowa maduong’ en chako mbaka kuom weche Muma e yo mamiyo gikone watimo ji jopuonjre Muma.

9. Ang’o momiyo timo ikruok maber dwarore?

⁹ Kuom yo moro amora miyiero tiyogo, ikruok maber biro konyi dimbo wach kinyiso ilo e lendo mar ot-ka-ot. Painia moro nowacho kama: “Ajawinjo ka an gi ilo ahinya seche ma aikora maber. Ikruok miyo abedo gi gombo mar tiyo gi weche ma aseiko.” Painia machielo to nowacho ni, “Ka aseng’eyo gik ma buge ma adhi tiyogo oting’o, abedo moil kadwaro ni mondo ati kod wechego.” Kata obedo ni nwoyo weche ma idhi tiyogo ei chunyi en gima ber, ji mang’eny yudo ni ber moloyo  ka gitimo kamano gi dwol. Timo kamano konyogi tiyo ne Jehova gi chunygi duto.​—Kolo. 3:23; 2 Timo. 2:15.

10. En ang’o minyalo tim mondo omi romo mag chano dhi lendo obed maber kendo makonyo?

¹⁰ Romo moik maber mag chano dhi lendo, nyalo konyo e miyo wabed gi ilo, kendo wachop tijwa mar lendo ot-ka-ot. Ka ndiko monego onon e odiechieng’no wuoyo achiel kachiel kuom tij lendo, inyalo some kiwuoyo kuome machuok. Kata kamano, owadwa matayo romo mar chano dhi lendo, onego oti gi thuolo moromo e wuoyo kuom ranyisi moro mayot mowinjore gi alwora ma ji dhiye, kata timo ranyisino, kata onyalo wuoyo kuom weche mamoko mowinjore minyalo ti godo e lendo e odiechieng’no. Timo kamano biro konyo joma nitie e romono, omed bedo moikore ne chiwo neno e yo maber. Kuom timo ikruok maber chon, jodongo koda jomamoko momi migawo mar tayo romogi, nyalo chopo wachni, mi podi gitiek romoni ma ok gikalo sa moketi.​—Rumi 12:8.

Kaka Chiko Itwa Nyalo Konyo

11, 12. Chiko itwa ka wakecho ji nyalo konyowa nade mulo chuny ji gi wach maber? Chiw ane ranyisi.

¹¹ Chako mbaka kuom weche Muma kendo mulo chuny ji gi wach mwalando, ok dwar mana timo ikruok maber kende, to dwarore bende ni wabed gi hera matut e yo manyiso ni wadewo ji. Yo achiel mwanyalo nyisogo mano, en kaka wachiko itwa. Jarit moro malworo nowacho kama: “Horruok mos, kendo bedo moikore chiko itwa ne ji, konyo ahinya e miyo ji owinj wach maber, kendo en ranyisi maber ahinya ni wadewogi gadier.” Chiko itwa e yo manyiso ni wakecho ji, nyalo bedo ni e gima dwarore mondo omi wayaw chuny wuon ot, mana kaka ranyisi maluwoni konyowa neno.

¹² E barua ma ne ondiki ne ng’at moro, mi bende ochak ogo baruano e gaset mar Le Progrès, mar dala Saint-Étienne, e piny France, dhako moro nowuoyo kuom limbe mar ji ariyo, ma ne odwong’o dhoode mapiyo bang’ kane oyudo oselalo nyare ma ja dweche adek e tho. Nondiko kama: “Gikanyono nafwenyogi ni gin Joneno mag Jehova. “Naikora mar riembogi e yo mang’won, to naneno brosua ma ne oyudo gichiwo ne ji. Brosuano ne wuoyo kuom gimomiyo Nyasaye oweyo mondo chandruok obedie. Omiyo, nang’ado ni mondo arwakgi e ot eka mondo ayud thuolo mar kwedo wechegi. . . . Jonenogo ne obet kuom kinde makalo sa achiel kama. Ne gichikona itgi, ka gikecha e yo maduong’ ahinya, kendo sama ne koro gia, ne awinjo ka chunya ogonyore ahinya ni ne ayienegi mondo gichak gilima kendo.” (Rumi 12:15) Bang’ kinde, dhakoni ne oyie puonjore Muma. Wanyalo yudo puonj kuom ng’eyo ni gima duong’ ma ne omulo chuny dhakono kuom limbe jonenogo, ok ne en weche ma nyiminewago nowacho, to ne en kuom bedo ni ne gichiko itgi ka giwinje.

13. Ere kaka wanyalo timo lokruok madwarore mondo omi waland wach maber ne jogo ma waromogo?

¹³ Sama wachiko itwa ne ji ka wakechogi, mano miyo giwachonwa gimomiyo gidwaro ni mondo Pinyruoth obi. Timo kamano miyo waikore maber moloyo, mar landonegi wach maber. Nyalo bedo ni isenwang’o ni jolendo mayudo nyak maber, pile gin jolendo mago mong’eyo chiko itgi maber. (Nge. 20:5) Ginyiso gadier ni gidewo jogo ma giromogo e tij lendo. Gindiko piny, ok mana nyinge gi kuonde ma jogo odakie kende, to bende gindiko gigo ma jogo ohero koda dwaro mag jogo. Kapo ni ng’ato dwaro ng’eyo wach moro makende, gitimo nonro kae to gidok mapiyo lero wach ma giseyudo. Mana kaka jaote Paulo, gitimo lokruok madwarore mondo omi giland ne jogo ma giromogo wach Pinyruoth. (Som 1 Jo Korintho 9:19-23.) Hero kendo dewo ji kamano, ywayogi kuom wach maber, kendo miyo wanyiso ng’wono ka “ng’wono mar Nyasachwa.”​—Luka 1:78.

 Dhi Nyime Bedo gi Paro Mowinjore

14. Sama watiyo tijwa mar lendo, wanyalo nyiso nade kido mag Jehova?

¹⁴ Jehova osenyiso ni ogenowa kaka dhano kuom miyowa nyalo mar timo yiero. Kata obedo ni en Nyasaye Manyalo Duto, ok ochun ng’ato mondo otine, to ji tiyone nikech hera, kendo ogwedho jogo makawo okang’ mar tiyo gi puonj mabeyo mochiwo. (Rumi 2:4) Kaka jotichne, onego waikre mar lando wach maber e yo mawinjore gi dwaro mar Nyasachwa mang’won, kinde duto mwatiyo tij lendo. (2 Kor. 5:20, 21; 6:3-6) Mondo omi watim mano, dwarore wadhi nyime bedo gi paro mowinjore kuom jogo mwalendoni e alworawa. Ang’o manyalo konyowa timo kamano?

15. (a) Yesu nochiko jootene mondo otim ang’o kapo ni ji otamore rwako wach? (b) Ang’o manyalo konyowa keto chunywa kuom manyo jogo mowinjore?

¹⁵ Yesu nochiko jolupne ni kik giparre ahinya kapo ni jomoko otamore rwako wach, to kar mano giket chunygi kuom manyo jogo mowinjore. (Som Mathayo 10:11-15.) Keto chenro mar timo gigo ma wanyalo, kata obedo ni ok gin gik madongo, nyalo konyo. Owadwa moro wacho ni en ochalo kaka jakuny dhahabu. Gima osiko owacho e chunye en ni, “Ageno tiyo tij kunyo mi nyaka ayudie dhahabu kawuono.” Owadwa machielo nigi gombo mar “romo gi ng’at achiel juma ka juma manyalo rwako wach, kendo dok gero wachno bang’ odiechienge manok.” Jolendo moko temo mondo gisom ne wuon ot ka wuon ot, ndiko moro achiel kanyalore. En chenro mane mowinjore kodi, ma in iwuon inyalo keto?

16. Gin ang’o mamiyo wadhi nyime tiyo tij lendo?

¹⁶ Bedo ni ji rwako kata ok rwak wach e alworawa, ok e gima duong’ manyiso ni tijwa mar lendo ot-ka-ot dhi maber. En adier ni, tij lendo konyo ahinya kuom wach warruok mar joma chunygi nikare, to kata kamano, nitie gik mamoko madwarore ahinya mabende tijni chopo. Tij lendo mar Jokristo miyowa thuolo mar nyiso hera ma wan-go kuom Jehova. (1 Joha. 5:3) Timo tijno miyo ok wabed gi buch remo. (Tich 20:26, 27) Tijni chiwo siem ne joma ok oluoro Nyasaye ni “sa mong’adoe bura osechopo.” (Fwe. 14:6, 7) To moloyo duto, kokalo kuom tij lando wach maber, nying’ Jehova yudo pak e piny duto. (Zab. 113:3) Omiyo, bed ni ji rwako wach kata ok girwak, nyaka wadhi nyime lando wach Pinyruoth. Kuom adier, kinda duto mwanyiso e lando wach maber en gima long’o e wang’ Jehova.​—⁠Rumi 10:13-15.

17. Biro chuno ji fwenyo ang’o e kinde mokayo machiegni?

¹⁷ Kata obedo ni thoth ji ok dew tijwa mar lendo, e kinde mokayo machiegni, gibiro fwenyo wach tijni e yo machielo. (Math. 24:37-39) Jehova nosingo ne Ezekiel ni ka buche mag kum ma ne olando otimore adier, jong’anjo mag dhood Israel ne dhi ‘ng’eyo [ni] janabi nosebedo e kindgi.’ (Ezek. 2:5) Kamano bende, sama Nyasaye biro kelo buche mag kum kuom piny masani, biro chuno ji fwenyo ni kuom adier wach ma Joneno mag Jehova ne lando e lela koda e ot ka ot, ne en wach moa kuom Nyasaye madier, ma en Jehova, kendo gining’e ni kuom adier Joneno ne tiyo tich ma en ema noorogi. Mano kaka wan gi thuolo majaber mar ting’o nyinge kendo lando otene e kinde makendegi! Kokalo kuom kony mochiwo, wadhiuru nyime loyo pek mago mabedoe e tij lendo mar ot ka ot.

Inyalo Dwoko Nade?

• Wanyalo yudo nade chir mar lendo?

• Ang’o manyalo konyowa chako mbaka kuom weche Muma e tij lendo mar ot-ka-ot?

• Wanyalo nyiso nade ni wadewo jomoko gadier?

• Ang’o manyalo konyowa dhi nyime bedo gi paro mowinjore kuom ji manie alworawa?

[Penjo mag Puonjruok]

[Sanduk/Picha manie ite 17]

Yo Achiel mar Chako Mbaka Kuom Weche Muma

Kaka Inyalo Chako:

▪ Bang’ moso wuon ot, inyalo miye trakt kae to iwachone ni, “Gimomiyo alimi kawuononi en ni mondo anyisie paro moro manyalo jiwowa e wi puonj ma ji onego ong’e ahinyani.”

▪ Kata inyalo chiwo trakt kae to iwacho ni, “Atimo limbe machuok kawuono nimar daher ng’eyo paro ma in-go kuom wachni.”

Ka ng’ato oyie kawo trakt:

▪ Ma onge deko, penj penjo moro mayot mar ng’eyo paro ma wuon ot nigo e wi wach ma trakt oting’o.

▪ Chik iti maber, ka in-gi chuny mar dwaro ng’eyo pach wuon-ot. Gone erokamano kuom paro mochiwo ka bende iketo parogo e pachi sama uwuoyo.

Mondo idhi nyime gi mbaka:

▪ Som kendo wuo kuom ndiko achiel kata mokalo achiel, kitemo mondo iwuo kuom gigo mamulo dwaro mag jalo.

▪ Ka ng’ato orwako wach, chiwne buk kata gaset, kendo kanyalore nyise kaka wajatimo puonjruok mar Muma gi ji. Tim chenro mar dok.