Noa kod Ataro mar Pi​—En Sigana Madier, Ok Mochwogi

BE IGOMBO dak e piny maber​—piny ma ng’ato ka ng’ato odakie gi kuwe kod wadgi? piny ma lweny, tim mahundu, kata sando jomoko onge? Ka en kamano, inyalo yudo jip kuom sigana moro manyalo bedo ni ing’eyo maber. En sigand Noa, ng’at ma ne ber gadier, ma nogero yie mi oresogo ngimane koda mar joode kuom ataro mar pi ma nokwako piny mangima, mi oketho jomaricho.

Mana sigendini matin kende ema ong’ere ahinya kaka mar Noa. Sigana mar gima ne otimore ne Noa, yudore e bug Muma mar Chakruok, sula 6 nyaka 9. Bende iwuoyo kuome e bug Koran koda e sigendini ma ji mang’eny gano e piny mangima. Be Ataro ne otimore adier, koso en mana sigana moro mochwogi mondo ojiw ji otim gik makare? Josomo mag weche din koda josayans, osebedo ka yware e wachni kuom higini mang’eny. Kata kamano, Muma, ma en Wach Nyasaye, keto wachno ayanga​—Ataro notimore adier, ok en mana sigana mochwogi. Non ane adiera maluwogi:

Weche mondiki e bug Chakruok, nyisowa ratiro, higa, dwe, koda odiechieng’ ma Ataro ne ochakoree, onyisowa bende chieng’ ma ne yie ogowo, kama ne ogowoe, koda kinde ma piny nobedo motuwo. Weche manyiso kaka yie ne chalo bende oket ayanga​—chalne duto, kaka norom e borne, lachne, koda gik gedo ma ne otigo. Sigendini mochwogi, to kinde mang’eny ok nyis weche ayanga.

Kuonde ariyo ei Muma, mochanie nyinge mag anyuola, nyiso ni Noa ne en ng’at ma nodak adier. (1 Weche mag Ndalo 1:4; Luka 3:36) Ezra kaachiel gi Luka, ma nochano nyingego, ne gin jotim nonro molony. Luka chano nyinge mag anyuola Yesu nyaka e Noa.

Janabi Isaya kod Ezekiel kaachiel gi jaote Paulo kod Petro, nowuoyo e wi Noa koda e wi Ataro.​—Isaiah 54:9; Ezekiel 14:14, 20; Jo Hibrania 11:7; 1 Petro 3:19, 20; 2 Petro 2:5.

Yesu Kristo nowuoyo kuom Ataro kane owacho kama: ‘Kaka nobedo e ndalo mag Noa e kaka nobed e ndalo mag Wuod dhano. Ne gichiemo, ne gimetho, ne gikendo, ne ikendogi, nyaka chieng’ ma ne Noa odonjo e yie, kendo ataro mar pi nobiro, motiekogi duto.’ (Luka 17:26, 27) Ka Ataro ne ok otimore, kare weche ma Yesu nowacho kuom “ndalo mag Wuod dhano” nyalo bedo ma onge tiendgi.

Jaote Petro nokoro ni, “jong’a wach” nobi, ma ne dhi chayo gik ma Muma wacho. Petro nondiko ni, ‘gitamore luwo wachni, ni ne oketh piny [mar ndalo Noa], ka pi motak noime.’ Be onego ‘watamre luwo wachno’? Ooyo ngang’! Petro ne omedo kama: “Polo ma kawuono kod piny ma kawuono okan ni mach, koketgi ni chieng’ bura kod tho mar jo ma ok luor Nyasaye.”​—2 Petro 3:3-7.

Kaluwore gi ndikoni, Nyasaye biro ketho jomaricho kendo, to kendo nitie joma biro tony. Kuom luwo ranyisi mar Noa, wanyalo bedo achiel kuom joma kare ma ibiro resi, ma dag e piny maber.