Jehova Rito Maber Jotichne Moseti

“Nyasaye en ng’a makare, kendo wiye ok diwil kod tichu gi hera ma usenyiso ni uherogo nyinge.”​—HIBR. 6:10.

1, 2. (a) Neno ng’ama nigi lwar nyalo paroni wach mane? (b) Jehova neno nade Jokristo moti?

SAMA ineno jo moseti ma nigi lwar ei kanyakla, donge mano paroni wach moro manie bug Daniel ei Muma? E fweny moro ma nomiyo Daniel, Jehova Nyasaye nonyiso ni en owuon en Jal ma yie wiye rachar. Daniel nondiko kama: ‘Nang’iyo nyaka noket kombe mag ruodhi, kendo Ng’ama Hike Ng’eny nobet piny. Lepe ne rachar ka theluji, mi yie wiye ne chal gi yie rombo maler.’​—Dan. 7:9.

² Pile, yie rombo rachar. Omiyo, bedo ni Nyasaye nigi lwar, kendo oluongore ni ‘Ng’ama Hike Ng’eny’ paronwa kaka en Nyasaye ma nyaka nene, kendo ma riekone ng’eny, to ng’eyo mano dwaro ni wanyise luor matut. Kare ere kaka Ng’ama Hike Ng’eny, ma en Jehova, neno chwo gi mon moti, to osechung’ motegno e tiyone? Wach Nyasaye wacho ni,  ‘lwar en osimbo mar duong’ konwang’e e yor tim makare.’ (Nge. 16:31) Ee, kapo ni ochopo kama Jakristo mochung’ motegno nigi lwar, ng’at ma hike ng’eny kamano nigi duong’ e wang’ Nyasaye. Be ineno owete koda nyimine moseti kaka Jehova nenogi?

Ang’o Momiyo Ohergi Ahinya?

3. Ang’o momiyo Jokristo wetewa moti gin joma wahero ahinya?

³ Moko kuom jo moseti ma gin jotich Nyasaye mogen, gin kaka jokanyo mag Bura Maduong’ mar Joneno mag Jehova, jorit malworo gie sani koda machon, jopainia, koda jolendo motegno mag Pinyruoth, ma gin owete gi nyimine matiyo matek ei kanyakla mopogore opogre. Nyalo bedo ni ing’eyo moko kuomgi mosebedo kalando wach maber gi kinda, kendo ma ranyisi ma giketo maber osekonyo ahinya e jiwo joma tindo kendo rieyo ngimagi. Jokristo wetewa moko makoro oseti, oseting’o ting’ mapek, kendo gisenano e bwo sand nikech wach maber. Jehova kaachiel gi “jatichno mogen, kendo mariek,” mor ahinya gi tich ma gisetimo koda mapod gitiyo sani e tij Pinyruoth.​—Math. 24:45.

4. Ang’o momiyo onego wami Jokristo moti luor, kendo walamnegi?

⁴ Jotich Jehova Nyasaye mamoko, onego onyis jo moseti kaka mago luor ka gipuoyogi, nikech gisebedo ka gichung’ motegno. Kuom adier, Chik ma Nyasaye nomiyo Musa nyiso ni, dewo kendo miyo jo moti luor, en tim manyiso ni ng’ato miyo Jehova luor. (Lawi 19:32) Pile onego waket Jokristo mogen-gi e lamo, ka wadwoko ne Jehova erokamano kuom kinda ma gisenyiso e tijegi mag hera. Jaote Paulo nolamo ne jotich wetene, ma pod ne gin joma tindo koda moseti.​—Som 1 Jo Thessalonika 1:2, 3.

5. Ere kaka wanyalo yudo konyruok kuom bedo kanyachiel gi jotich Jehova moseti?

⁵ E wi mano, ji duto ei kanyakla nyalo yudo kony kuom bedo kanyachiel gi Jokristo makoro oseti. Kokalo kuom gik ma gisepuonjore koda ma giseneno, kaachiel gi gik mosetimore e ngimagi, jotich Jehova makoro oseti nigi lony kod ng’eyo e wi gik mang’eny. Gisepuonjore bedo joma hore mos, ka gikecho jomoko, kendo giyudo mor kuom puonjo tieng’ maluwo gigo ma giseng’eyo. (Zab. 71:18) Un joma tindo, nyisuru rieko ka utuomo rieko kuom jo motigi, mana kaka inyalo tuomo pi e soko mokuny matut.​—Nge. 20:5.

6. Ere kaka inyalo nyiso jo moseti ni iherogi gadier?

⁶ Be itimo gik mamiyo jo moti ng’eyo ni iherogi kaka Jehova oherogi? Yo achiel minyalo timogo kamano en wachonegi kaka iherogi ahinya nikech chung’ margi motegno, kendo ni igeno paro ma gichiwo. E wi mano, kuom luwo puonj ma gichiwo, mano nyiso ni luor mimiyogi en luor madier. Thoth Jokristo masani koro oti nyalo paro puonj mariek ma ne giyudo kuom jotich Nyasaye ma noyudo oseti e kindegi, kendo kaka puonjgo osekonyogi e ngimagi duto. *

Nyis Ni Iherogi e Yore Makelonegi Kony

7. Gin jomage ma Jehova miyo ting’ mokwongo mar rito jo moti?

⁷ Nyasaye oketo mondo ting’ mokwongo mar rito jo moti obed mar joodgi. (Som 1 Timotheo 5:4, 8.) Jehova mor sama joot chopo ting’ margi mar rito wedegi moseti, ka ginyiso ni gidewogi mana kaka en owuon odewogi. Nyasaye riwo lwedo joot ma kamago, kendo ogwedhogi nikech kinda koda duto ma gichiwore timo. *

8. Ang’o momiyo kanyakla onego onyis chuny mar konyo Jokristo makoro oseti?

⁸ Kamano bende, Jehova bedo mamor sama kanyakla konyo jo moseti mochung’ motegno, to joodgi manie yie onge, kata ma joodgi ok nyis chuny mar konyogi. (1 Timo. 5:3, 5, 9, 10) Kuom timo mano, kanyaklago nyiso ni gin gi chuny mar ‘kechruok, hero  owete, gi chuny mang’won,’ kuom jo moseti. (1 Pet. 3:8) Chuny ma ginyiso mar konyo jo moseti ma gin jokanyo mag kanyakla, en gima Paulo chiwoe ranyisi maber sama owacho ni kapo ni fuon achiel mar ringruok neno masira, “fuonde duto neno masira kode.” (1 Kor. 12:26) Kawo okang’ manyalo konyo, kendo kecho jo moseti en gima nyiso maler tiend puonj ma Paulo nochiwo niya: “Kawuru ting’ mar ng’ato gi ng’ato, eka unuchop chik mar Kristo.”​—Gala. 6:2.

9. Gin pek mage ma tiyo nyalo kelo kuom ng’ato?

⁹ Gin pek mage ma jo moseti nigo? Thothgi ol piyo. Ginyalo yudo ka loyo yore mapile, kaka dhi neno laktar, ndiko barua, tero chudo moko kuonde madwarore, luoko ot, tedo​—bedo gik mateknegi. To nikech gombo mar chiemo kata modho pi jadok chien kaka ng’ato medo ti, ginyalo paro ni ok ochuno ni gichiem kata gimodh pi kaka chon. Mano bende nyalo timorenegi kuom wach pidhruok e wach Nyasaye. Bedo gi wang’ koda it makoro ok ti maber nyalo miyo bednegi matek somo kendo winjo puonj michiwo e chokruoge mag Jokristo, kata mana ikruok ne chokruogego. Kuom mano, en ang’o ma jomamoko nyalo timo ne jo moti kaka mago?

Kaka Inyalo Konyo

10. En ang’o ma jodongo nyalo timo mondo gine ni jo moseti yudo kony madwarore?

¹⁰ Ei kanyakla mang’eny, jo moseti irito e yo maber ahinya. Owete koda nyimine nyiso hera kuom dhi negi e duka, konyogi e tedo, koda luoko gik moko. Gikonyo jo moseti e timo puonjruok, ikruok ne dhi e chokruoge, kendo konyogi bedo joma tiyo tij lendo pile. Joneno ma pod tindo dhi lendo kodgi, kendo gichiwonegi kony mondo gichop kuno. Kapo ni jo moseti ok nyal wuok pacho, itimonegi chenro mar miyo giwinj chokruok kokalo kuom simo, kata imakonegi weche e tep. Kuonde manyalore, jodongo temo mondo gine ni otim chenro mar konyo jogo moseti ei kanyaklagi kuom gigo madwarore. *

11. Ler ane kaka joot moro ne okonyo owadwa moro ma ne oseti.

 ¹¹ Jokristo mamoko bende nyalo nyiso chuny mar chiwo koda mar rwako welo. Bang’ tho mar chi owadwa moro moti, ne koro ok onyal chulo ot ka onge pes aer (pension) ma chiege ne yudo. Ne oyudo en kaachiel gi chiege gisepuonjo joot moro Muma​—moting’o wuoro, miyo, kod nyiri ariyo ma rowere​—to joodno ne nigi ot maduong’. Ne gimiyo owadwa motino rumbe ariyo mondo odagie. Kuom higini 15, ne gichiemo kanyachiel, ne gibedo gi kinde mag mor kanyachiel ka ginyisore hera mar owete. Rowerego ne opuonjore ahinya kuom yie mare, koda lony ma ne en-go mang’eny e ngima, kendo en bende ne omor kuom bedo kodgi. Owadwa ma jaduong’ni ne odak kodgi nyaka nochopo kama othoe ka ojahigini 89. Joodno pod dwoko ne Nyasaye erokamano kuom gweth mang’eny ma ne giyudo kuom bedo kanyachiel kode. Kuom bedo ni gisekonyo achiel kuomgi, mabende en japuonjre Yesu Kristo, podi ‘ok gilalo pokgi’.​—Math. 10:42. *

12. En ang’o minyalo timo mondo inyis ni idewo owete koda nyimine moseti?

¹² Nyalo bedo ni ionge gi nyalo mar konyo owadwa kata nyaminwa moseti e yo machalo gi kaka joodno ne otimo, kata kamano inyalo konyo jo moseti dhi e chokruok koda e tij lendo. Bende inyalo gwelogi e odi kata gwelogi sama udhi e wuoth moro machuok mar mor gi yueyo. Inyalo limogi, to moloyo e kinde ma gituwo. E wi mano, kinde duto inyalo, kendo onego itimnegi gik moko kimiyogi luor kaka joma dongo. Kinde duto ma pach Jokristo moseti pod tiyo maber, ber winjo kuomgi kodok korka weche duto ming’ado manyalo mulo ngimagi. Moko kuomgi manyalo bedo ni koro pachgi ok ti maber, podi nyalo ng’eyo ka itimonegi gik moko e yo manyiso luor.

Wi Jehova Ok Nowil gi Tichu

13. Ang’o momiyo dewo paro manie chuny Jokristo moseti en gima dwarore ahinya?

¹³ Nyiso ni wadewo paro manie chuny jo moseti en gima dwarore ahinya. Pile jo moseti winjo malit seche ma ok ginyal timo duto ma ne gitimo chon e kinde ma ne gin rowere ma ngimagi ber. Kuom ranyisi, nyaminwa moro ma notiyo ne Jehova kuom higini madirom 50, kendo ma nosebedo painia mapile, noyudo tuwo moro ma nyoso dende, omiyo dhi e chokruoge nobedone matek ahinya. Kane oparo kaka ne otiyo ne Nyasaye chon gi chal mare ka koro notuwo, ne ochako ywak. Nokulo wiye koywak, kowacho kama, “Onge kata tich malong’o matimo sani.”

14. En jip mane ma jotich Jehova moseti nyalo yudo e weche manie bug Zaburi?

¹⁴ Ka in ng’at makoro oseti, be isebedoe gi paro ma kamano? Koso nitie kinde mise kata paro ni nyalo bedo ni Jehova osejwang’i? Nyalo bedo ni jandik-zaburi nobedo gi paro ma kamago e kinde makoro noseti, nimar nosayo Jehova kama: “Kik iwita chieng’ kaseti; kik ijwang’a ka tekra opuch. . . . Kata kaseti mabedo ralwar, A Nyasaye, kik ijwang’a.” (Zab. 71:9, 18) En adier ni, Jehova ok ne dhi jwang’o jandik-zaburino, to in bende Jehova ok bi jwang’i. E zaburi machielo, Daudi nonyiso geno motegno ma ne en-go kuom kony ma Nyasaye chiwo. (Som Zaburi 68:19.) Bed gadier ni, ka in Jakristo moseti, to ichung’ motegno, Jehova nikodi, kendo obiro dhi nyime konyi odiechieng’ kodiechieng’.

15. En ang’o manyalo konyo jo moseti mondo gisiki ka gin gi paro mowinjore kendo majiwo?

¹⁵ Un Joneno mag Jehova moseti, gik moko duto musetimo koda mutimo gie sani mondo umi Nyasaye duong’, nie pache. Muma wacho niya: “Nyasaye en ng’a makare, kendo wiye ok diwil kod tichu gi hera ma usenyiso ni uherogo nyinge.” (Hibr. 6:10) Kuom mano, tang’ kik ibed gi paro ma ok  owinjore, kiparo ni nikech iseti, koro ok ilong’o ni Jehova. Tem mondo ibed gi paro mowinjore majiwi, kar bedo gi mago ma nyoso chunyi. Bed mamor kuom gweth misebedogo, koda kuom geno mari mar kinde mabiro! Wan gi gik ma ‘wanyalo geno bang’e’, ma gin gik mabeyo moloyo​—kendo Jachwechwa osingo ni gigi biro timore gadier. (Yere. 29:11, 12; Tich 17:31; 1 Timo. 6:19) Par matut kuom geno ma in-go, ti matek mondo isiki ka in rawera ei chunyi koda e pachi, kendo kik item paro ngang’ ni bedo mari ei kanyakla en kanono! *

16. Ang’o momiyo owadwa moro moti ne oparo ni onego owe migawone mar bedo jaduong’-kanyakla, to jodong-kanyakla ne ojiwe nade?

¹⁶ Ne ane ranyisi mar Johan, masani jahigini 80, to orito Sannie chiege, ma koro onge nyalo. * Nyimine wilore e rito Sannie mondo eka Johan oyud thuolo mar dhi e chokruok koda lendo. Kata kamano, nyocha Johan owinjo ka chunye ool ahinya, mochako paro ni ok owinjore odhi nyime e migawone mar bedo jaduong’-kanyakla. Nopenjore ka pi wang’e chwer kama: “Ere tiende dhi nyime bedona jaduong’-kanyakla? Onge gima long’o ahinya ma tinde atimo ei kanyakla.” Jodongo wetene ne ojiwe kawachone ni, lony ma ne en-go mar higini mang’eny en gima pod ne dwarore ahinya. Ne gijiwe mondo odhi nyime e migawono, kata obedo ni koro ok nonyal timo mang’eny. Nikech jip ma ne omiyeno, Johan dhi nyime e migawone kaka jaduong’-kanyakla, kendo mano en gweth ne kanyakla.

Kuom Adier Jehova Dewo Jo Moti

17. Gin weche mage machiwo geno ma Muma miyo Jokristo moseti?

¹⁷ Ndiko nyiso maler ni joma oseti nyalo dhi nyime yudo nyak maber e tij Jehova kata obedo ni koro hikgi ng’eny. Jandik-zaburi ne oyango kama: ‘Jo mosepidh kaka yien e od Jehova, pod gininyak kata ka giseti, pi yath nopong’gi, mi ginibedi mang’ich.’ (Zab. 92:13, 14) Jaote Paulo, ma nenre ni ne kedo gi chandruok moro e ringre, ne ‘ok onyosore kata obedo ni ringrene ne rumo.’​—Som 2 Jo Korintho 4:16-18.

18. Ang’o momiyo Jokristo wetewa moseti koda jogo maritogi dwarore oyud kony koa kuom jomamoko?

¹⁸ Ranyisi mang’eny mandalogi nyiso maler ni jo moseti nyalo dhi nyime bedo gi ‘nyak.’ Kata kamano, chandruok mag tuoche koda tiyo, nyalo bedo matek ahinya, kata mana ne jo moti ma nigi joot ma ritogi maber. Jogo marito jo moti bende nyalo ool. Kanyakla nigi thuolo majaber koda ting’ mar nyiso heragi e tim, kuom jogo moseti koda ne jogo maritogi. (Gala. 6:10) Kony ma kamago nyiso ni ok watem mana wacho ne jogo mondo odhi ‘orwak lewini kendo giyieng’,’ ka ok watimnegi gima nyalo konyogi.​—Jak. 2:15-17.

19. Ang’o momiyo Jokristo mochung’ motegno to oseti nyalo bedo gi geno kuom kinde mabiro?

¹⁹ Bedo moti nyalo kelo lokruok kuom gigo ma Jakristo nyalo timo, kata kamano bedo ni ng’ato oti ok dwok chien hera ma Jehova oherogo jotichne momakore kode. Mopogore gi mano, Jokristogi duto mochung’ motegno, oher ahinya gi Nyasaye kendo ok obi jwang’ogi ngang’. (Zab. 37:28; Isa. 46:4) Jehova biro ritogi, kendo tayogi e kindego duto ma giti.​—Zab. 48:14.

[Weche moler piny]

Inyalo Dwoko Nade?

• Ang’o momiyo in ikawo Jokristo moseti kaka joma onego oher ahinya?

• Ere kaka wanyalo nyiso ni wadewo Jokristo wetewa moseti?

• Ang’o manyalo konyo jotich Jehova moseti mondo gibed gi paro mowinjore kendo majiwogi?

[Penjo mag Puonjruok]

[Piche manie ite mar 23]

Jokanyo mag kanyakla ohero kendo dewo ahinya jo moseti