WE WAWUO ane kuom tiend bedo gi nyiego. Be kinde moko iseyudo ka tekni hero ng’at moro nikech jomoko pake ka giwacho ni ober, dende ber, kendo orwakore maber? *​—Mano e gima nyalo timore sama in gi nyiego kuom ng’ato.

Nyiego nyalo bedoe e ot kapo ni jonyuol timo ne nyathi moro e yo maber maloyo machielo. Muma wuoyo kuom joot moro ma nobedo gi chandruok maduong’ nikech nyiego. We wanon ane chandruok ma ne obedoeno, koda puonj mwanyalo yudo kuom gima ne otimoreno.

Josef ne en wuowi mar 11 kuom yawuot Jakobo, kendo owetene nobedo gi nyiego kuome. Be ing’eyo gimomiyo?​— Ne en nikech Jakobo wuon-gi nohere moloyo owetene. Kuom ranyisi, Jakobo ne otwang’o nanga maber ne Josef. Jakobo nohero Josef, to moloyo, “nikech ne en wuode mar tiyone,” kendo ne en wuowi ma nokwongo nyuolo gi chiege ma ne ohero ahinya miluongo ni Rahel.

Muma wacho ni, ‘kane owetene oneno kaka wuon-gi nohere moloyo jowetene duto, ne gisin kod Josef.’ Kae to chieng’ moro Josef ne owacho ne joodgi ni, lek nobirone ni giduto nyaka wuon-gi, nende gikulorene. Muma wacho kama: “Ich lit nomako owetene nikech en,” kata mana wuon Josef ne odhaw kode nikech wacho lek ma kamano.​—Chakruok 37:1-11.

Bang’ kinde moko, kane Josef jahigini 17, owetene ne odhi kwayo rombe gi diek kuma bor. Omiyo Jakobo ne ooro Josef mondo odhi one kaka owetene ne chalo. Be  ing’eyo gima ng’eny owetene ne dwaro timo bang’ nene ka obiro?​—Ne gidwaro nege! Kata kamano, ariyo kuom owetene, Reuben kod Juda, to ne ok dwar ni onege.

Kane jo ohala moko kalo ka gichomo Misri, Juda nowacho kama: “Wang’iewe.” Omiyo, ne ging’iewe. Bang’ mano, ne ginego diel kendo ne giling’o nanga Josef e remb diendno. Bang’e, sama ne ginyiso wuon-gi nangano, ne oywak matek kama: ‘Ondiek marach osechamo Josef!’​—Chakruok 37:12-36.

Bang’ kinde, Farao ruodh Misri ne nochako hero Josef ahinya. Mano ne en nikech Nyasaye nokonyo Josef lero tiend lek moko ariyo ma Farao noleko. Lek mokwongo ne en mar dhok abiriyo machwe, gi dhok abiriyo modhero. Lek mar ariyo ne en mar it ngano abiriyo mabeyo kendo machwe, kod ngano abiriyo maricho mopadore. Josef ne owacho ni, lek ariyogo duto ne nyiso ni ji ne dhi kayo cham mang’eny ahinya kuom higini abiriyo, to bang’ mano higini abiriyo mag kech ne dhi luwoe. Farao ne ochiko mondo Josef obed jatelo e wi wach kano chiemo e kindego ma cham ne dhi bedo mang’eny.

Kane kech obiro, joodgi Josef, ma ne odak e piny mabor, ne dwaro chiemo. Jakobo ne ooro owete Josef madongo apar e piny Misri, mondo gimany chiemo. Ne gibiro ma gichung’ e nyim Josef, to ne ok gifwenye. Ma ok onyisogi ni en ng’a, Josef ne dwaro ng’eyo ka bende ne giseloko chunygi, kendo nofwenyo ni kare ne ok gimor gi gima ne gitimone chon. Bang’e Josef ne ofwenyorenegi. To mano kaka ne gimor ahinya kuom romo kendo!​—Chakruok, sula mag 40 nyaka 45.

En ang’o minyalo puonjri kuom nyiego kaluwore gi sigand Mumani?​— Nyiego nyalo kelo chandruok maduong’, kata mana miyo ng’ato odwar hinyo owadgi! We wasom Tich Joote 5:17, 18 kod Tich Joote 7:54-59 mondo wane kaka nyiego nomiyo ji otimo marach ne jopuonjre Yesu.​— Bang’ somo wachni, be inyalo neno gimomiyo nyaka wabed motang’ kuom bedo gi nyiego?​—

Josef nodak kuom higini 110. Ne opidho nyithindo, kendo nyithindego nonyuolone nyikwayo, mi bang’e nyikwaye bende nobedo gi nyithindgi. Wanyalo bedo gadier ni kinde mang’eny Josef ne puonjogi mondo giherre ng’ato ka ng’ato, kendo kik gibed gi nyiego.​—Chakruok 50:22, 23, 26.