Bed gi Paro Mawinjore gi Ndiko e Weche Thieth

“Her [Jehova] Nyasachi . . . gi riekoni duto, kendo gi tekoni duto.”​—MARI. 12:30.

1. Dwaro mar Nyasaye ne dhano ne en mane?

DWARO mar Jehova Nyasaye ok ne en ni mondo dhano mochweyo obed matuwo kendo otho. Noketo Adam gi Hawa e puodho mar Eden, ‘mondo gilose kendo girite,’ to ok mana kuom higini 70 kata 80 kende, to mondo gitim kamano nyaka chieng’. (Chak. 2:8, 15; Zab. 90:10) Dine bed ni dichwo gi dhako mokwongo owinjo Jehova mi gibolore e bwo loch mare, dine ok gibedo matuwo, moti, kendo tho.

2, 3. (a) Bug Eklesiastes wuoyo nade kuom kinde ma dhano ti? (b) Tho ma ji yudo koa kuom Adam en tich mar ng’ano, to ibiro tiek nade tho?

² Eklesiastes sula 12 nyisowa maler kaka kinde ma dhano ti, gin kinde ma ‘onenoe rach.’ (Som Eklesiastes 12:1-7.) Yier marachar iporo gi “yadh lozi.” Tielo iwacho ni chalo gi “chuo marateke” makoro dolore kendo ok otegno. Joma dhi e dirisa ka gimanyo ler to giyudo mana mudho, en ranyisi maler mar wenge makoro ok nen maber. To nimar moko kuom leke koro onge, chalo ka gima “jorego ling’ ni kech ginok.”

³ Kuom adier, Nyasaye ne ok dwar mondo dhano obed gi tielo maok otegno, wang’ maok nen maber, kod leke ma onge. E wi mano, tho ma dhano yudo koa kuom Adam en achiel kuom “tich Satan,” ma Wuod Nyasaye biro ketho kokalo kuom Pinyruodh Mesia. Jaote Johana nondiko niya: “Wuod Nyasaye nofwenyore nikech wachni, mondo oketh tich Satan.”​—1 Joh. 3:8.

Bedo gi Parruok Kuom Wach Tuoche Ok Rach

4. Ang’o momiyo ok rach ka jotich Jehova bedo gi parruok mowinjore kuom wach tuoche, to en ang’o ma ging’eyo maber?

⁴ Gie sani, moko kuom jotich Jehova yudo tuoche koda tiyo, mapile yudo oganda dhano duto ma joricho. Bedo gi parruok mowinjore kuom kaka ngimawa chalo korka weche tuoche ok en gima rach, kendo timo kamano nyalo kata mana konyowa. Donge wadwaro tiyo ne Jehova ‘gi tekowa duto’? (Mari. 12:30) Kata kamano, kata obedo ni wadwaro ni wabed gi ngima maonge tuoche, onego wabed gi paro makare kendo mowinjore, ka wang’eyo bende ni onge gima duong’ mwanyalo timo mondo omi wageng’ tiyo, kata tuoche duto.

5. En puonj mane mwanyalo yudo kuom kaka jotich Nyasaye osebedo ka nyagore gi chandruok mag tuoche?

⁵ Thoth jotich Jehova osebedo ka nyagore gi chandruok mag tuoche. Epafrodito ne en achiel kuomgi. (Fili. 2:25-27) Timotheo, jal ma jaote Paulo ne jadhigo e wuodhene, ne jabedo gi chandruok mag ich, omiyo Paulo nokone mondo okonyore gi “divai matin.” (1 Tim. 5:23) Paulo owuon bende ne nigi  ‘gima chwowo ringre,’ manyalo bedo ni ne en tuwo mar wang’, kata tuwo moro amora mar del ma ne onge yadhe e kindego. (2 Kor. 12:7; Gal. 4:15; 6:11) Kuom wach ‘gino ma ne chwowo ringrene,’ Paulo nosayo Jehova ahinya. (Som 2 Jo Korintho 12:8-10.) Nyasaye ne ok otimo hono mondo ogol ‘gino ma ne chwowo ringre’ Paulo. Kar mano, Nyasaye ne otege mondo obed gi teko mar nano. Kuom timo mano, teko mar Jehova nofwenyore ayanga e nyawo mar Paulo. Be gima ne otimore ne Paulono nyalo miyowa puonj moro?

Kik Ibed gi Parruok Ahinya Kuom Weche Thieth

6, 7. Ang’o momiyo ok onego wabed gi parruok ahinya kuom weche thieth?

⁶ Mana kaka ing’eyo, Joneno mag Jehova ok tamre manyo thieth e osiptal, kata tiyo gi yore mamoko mag thieth. Pile gasedwa mar Amkeni! jating’o sula mawuoyo kuom weche thieth. To kata obedo ni ok wapwodh ne ng’ato yor thieth moro amora, wanyiso erokamano kuom kony gi winjruok maber ma laktache gi nase nyiso e rito jotuwo. En adier ni wang’eyo ni bedo gi ngima makare chuth maonge tuoche pod ok nyalre. Kuom mano, wang’eyo ni ok en gima owinjore ka wach rito ngimawa kuom tuoche ema siko bedonwa gima duong’ moloyo. Ok onego wabed gi chuny kaka mar jogo ma ‘onge geno,’ maparo ni ngima masani e ngima kende, mamiyo ginyalo tiyo gi yo moro amora mar thieth maok gidewo. (Efe. 2:2, 12) Wang’ado ei chunywa ni ok wabi ketho winjruokwa gi Jehova mana ni mondo wares ngimawa masani, nimar wang’eyo maber ni ka wamakre motegno gi Nyasaye, to wanayud “ngima ma en ngima mar adier,” tiende ni ngima mochwere e bwo chenro manyien ma osesingo.​—1 Tim. 6:12, 19; 2 Pet. 3:13.

⁷ Nitie gimachielo bende mamiyo ok wabed gi parruok ahinya kuom weche thieth. Bedo gi parruok ahinya kuom wechego nyalo miyo wabed joma ng’iyo mana dwachwa wawegi. Paulo nochiwo siem kuom wachni kane ojiwo Jo Filipi ni, ‘kik gine mana gigegi giwegi, to gine mag jomoko bende.’ (Fili. 2:4) Rito ngimawa kuom tuoche e okang’ mowinjore en gimakare, kata kamano hera matut ma wan-go kuom owetewa koda kuom jogo ma walandonegi ‘wach maberni mar pinyruoth’ biro konyowa kik wabed gi parruok ahinya kuom chal mar ngimawa mar ringruok.—Math. 24:14.

8. Bedo gi parruok ahinya kuom weche thieth nyalo miyo wachak timo ang’o?

⁸ Bedo gi parruok ahinya kuom weche thieth en gima Jakristo nyaka tang’ godo, nimar mano nyalo miyo ojwang’ tij Jehova. Mano bende nyalo miyo wachak chuno jomoko gi pachwa kuom weche mag thieth koda weche chiemo mowinjore. Kuom wachni, ne ane puonj manie weche ma Paulo nowacho niya: ‘Yieuru kod weche makare, kamano unubed maler ma onge bura e chieng’no mar Kristo.’​—Fili. 1:10.

Ang’o Madwarore Moloyo?

9. Achiel kuom gik madwarore moloyo maok onego wajwang’ en ang’o, to nikech ang’o?

⁹ Ka waluwo gik makare madwarore moloyo, wabiro temo ahinya mondo wakony ji obed gi winjruok maber gi Nyasaye. Wanyalo konyogi kuom lendonegi, kendo puonjogi Wach Nyasaye. Tich majaberni en tich makonyowa, kendo okonyo jogo mwapuonjo. (Nge. 17:22; 1 Tim. 4:15, 16) Kinde ka kinde, gasede mag Ohinga mar Jarito koda Amkeni! hinyo ting’o sula moko mawuoyo kuom owete koda nyiminewa ma nigi tuoche madongo. Seche moko sulago hinyo lero kaka jogo nyagore gi chandruogego, kata mana kaka gihinyo temo golo pachgi kuom chal margi, ka gikonyo jomoko ng’eyo Jehova koda gweth mabeyo mosesingo. *

10. Ang’o momiyo onego wakaw mapek wach yiero mwatimo korka weche mag thieth?

 ¹⁰ Sama Jakristo ma en ng’ama duong’ oyudo chandruok mar tuwo moro, “nyaka oting’ ting’ne owuon” e yiero yor thieth modwaro. (Gal. 6:5) Kata kamano, onego wang’e ni yiero mwatimo kuom weche thieth en gima Jehova nono. Mana kaka luor ma wan-go kuom puonj gi chike manie Muma miyo ‘waritre ni remo,’ kamano bende, luor matut ma wan-go kuom Wach Nyasaye, onego omi kik waluw yore thieth manyalo miyo waketh chike Jehova, kata winjruokwa kode. (Tich 15:20) Yore moko mag thieth dwaro mana chalo gi timbe juok. Jehova ne odagi Jo-Israel ma ne ong’anjo, nikech ne giluwo “tim mamono,” kata timbe juok. Ne owacho ayanga kama: ‘Kik ukel kendo chiwo manono; ubani chunya osin-go; dwe mopor kod sabato, luongo ji mondo chokruok obedie​—ok ayie gi tim mamono gi chokruok mar lamo.’ (Isa. 1:13) Kuom adier, kinde ma watuwo, mano ok onego omi watim gimoro manyalo mono Nyasaye winjo lamowa, kata gima nyalo ketho winjruokwa kode.​—Yua. 3:44.

Dwarore Ahinya ni “Wawuoth Kwaritore”

11, 12. Ere kaka ‘wuotho ka waritore’ dwarore sama wayiero yore mag thieth?

¹¹ Sama watuwo, ok wanyal geno ni Jehova biro changowa e yor hono, kata kamano, wanyalo lamo ka wakwaye rieko mar yiero yor thieth maber. Onego wati gi rieko kendo wawe mondo puonj koda chike manie Ndiko ema otawa sama watimo yiero. Kapo ni ng’ato ni e chal marach ahinya, nyalo bedo maber ka odhi kuom ng’at machielo molony ka mano nyalore, mana kaka Ngeche 15:22, wacho ni: “Ka onge jong’ad rieko ji ok yud gi ma gidwaro; to ka nitie jong’ad rieko mang’eny, giyudogi.” Jaote Paulo nojiwo Jokristo wetene mondo ‘giwuoth ka giritore, kendo gibed makare, ka giluoro Nyasaye e piny ndaloni.’​—Tito 2:12.

¹² Ji mang’eny nie chal kaka mar dhako moro ma ne tuwo e ndalo Yesu. E Mariko 5:25, 26, wasomo kama: “To dhako moro, ma ne iye ochuer higini apar gariyo, nosechandore malit e luet jothieth mang’eny, kendo notieko gik moko duto ma en go; ne ok okonyore, to tuone nojimbore.” Yesu nochango dhakono, kendo ne okeche. (Mari. 5:27-34) Jokristo moko osetemo yiero yore moko mag thieth maok winjore gi lamo maler, mana nikech gin marach kendo ok ging’eyo gima onego gitim gie sano.

13, 14. (a) Ere kaka Satan nyalo tiyo gi yiero mwatimo e manyo thieth kodwaro ni waketh chik Nyasaye? (b) Ang’o momiyo onego wabed mabor gi gimoro amora motudore gi timbe juok?

¹³ Satan oikore tiyo gi yo moro amora mondo omonwa luwo lamo madier. Mana kaka otiyo gi terruok koda gombo mag mwandu mondo omi jomoko olwar, e kaka otemo miyo jomoko oketh chike Nyasaye, kokalo kuom luwo yore mag thieth maok owinjore,  kaka mag timbe juok. Walamo mondo Jehova oreswa kuom ‘ng’a marachno’ kendo “a e ketho duto.” Omiyo ok onego wadonj e obadho mag Satan kuom timo gik manyalo miyo wadonj e timbe juok.​—Math. 6:13; Tito 2:14.

¹⁴ Jehova nokwero Jo-Israel ni kik gidonj e timbe juok. (Rapar 18:10-12) Paulo wacho ni “timbe jwok” en achiel kuom “tim mag ringruok.” (Gal. 5:19, 20) E wi mano, “jojuogi” ok nodonji e chenro manyien mar Jehova. (Fwe. 21:8) Kuom mano, gimoro amora manyalo bedo gi timbe juok e iye, en gima Jehova osin-go.

“Weuru Parou Makare Ong’ere Ni Ji Duto”

15, 16. Ang’o momiyo rieko en gima dwarore sama wayiero yore mag thieth, to bura maduong’ e kinde Jokristo mokwongo nochiwo puonj mane?

¹⁵ Kaluwore gi gik ma wasewuoyoe, kapo ni wan gi kiawa kuom yo moro mar thieth, nyalo bedo gima ber ka wawere gi yorno. Kata kamano, bedo ni wan wawegi ok wanyal lero kaka yor thieth moro tiyo, ok koro nyis ni yorno nigi tudruok moro gi timbe juok. Bedo gi paro mawinjore gi Ndiko kuom weche thieth, en gima dwaro ni wabed gi rieko moa kuom Nyasaye, kendo dwarore wang’ad paro e yo makare. E Ngeche sula 3, ijiwowa kama: “Gen Jehova gi chunyi duto, kendo kik iketri kuom lony gi weche mayoreyore ma ingo iwuon. Yie kuome e yoreni duto, mi nomi yoreni bedo mochikore tir. . . . Rit rieko makare, gi lony kuom pogo weche mayoreyore; kik iyie gilalni. Kamano nomii ibedi mangima.”​—Nge. 3:5, 6, 21, 22.

¹⁶ Omiyo, sama watemo kar mwanyalo mondo wasiki ka wan gi del mangima, nyaka watang’ mondo kik waketh winjruokwa gi Nyasaye e kinde ma wanyagore gi tuwo kata tiyo. Kuom weche thieth, mana kaka e weche mamoko bende, onego wawe ‘parowa makare ong’ere ni ji duto,’ ka wadak kaluwore gi puonj koda chike manie Muma. (Fili. 4:5, NW) E barua moro ma noting’o weche mapek ahinya, bura maduong’ e kinde Jokristo mokwongo, nochiko Jokristo mondo owere gi nyiseche manono, remo, kod terruok. Baruano bende nojiwo kama: “Kuritoru ni magi, nutim maber.” (Tich 15:28, 29) E yo mane?

Rito Ngimawa e Okang’ Mowinjore Kwageno Ngima Makare Chuth

17. Ere kaka luwo puonj manie Muma osekonyowa bedo gi del mangima?

¹⁷ Ber ka ng’ato ka ng’ato kuomwa openjre niya, ‘Be ang’eyo ber mago ma aseyudo kuom luwo chutho puonj koda chike manie Muma korka wach remo koda terruok? ’ Par ane bende kuom ber mago mwaseyudo nikech kinda mwatimo mondo omi “walwokre a e chido mar ringruok kendo mar chuny.” (2 Kor. 7:1) Sama waluwo chike manie Muma kuom wach ler mar del gi kuonde mwadakie, wageng’o tuoche mang’eny. Weche dhinwa maber nikech ok wati gi ndawa koda yedhe mamero, ma gin gik ma chido del kendo mono ng’ato bedo gi winjruok maber gi Nyasaye. Par bende ber mabedoe e dend ng’ato, kochiemo kata metho ma ok okal tong’. (Som Ngeche 23:20; Tito 2:2, 3.) Kata obedo ni gik moko kaka yueyo koda rieyo del nyalo konyowa bedo gi ngima maber, dwarore wang’e ni gima  duong’ momiyo dendwa koda winjruokwa gi Nyasaye dhi maber, en nikech waseyie luwo puonj manie Ndiko.

18. En ang’o monego wapar moloyo, to wanyalo geno neno ka weche mage ma ne okor chopo?

¹⁸ To moloyo, onego waritre e wach Nyasaye kendo tego winjruokwa gi Wuonwa me polo, nimar en e Soko mar “ngimani kod ngima ma biro bende” e piny manyien mosesingo. (1 Tim. 4:8; Zab. 36:9) E piny manyien mar Nyasaye, bedo gi winjruok maber chuth kode, koda bedo gi ngima maonge tuoche chuth nobedie mana kuom ng’wono ne ji richogi, kokalo kuom rawar mar misango Yesu. Nyarombo mar Nyasaye, ma en Yesu Kristo, biro tayowa “e sokini mag pi ngima,” kendo Nyasaye noywe pi wang’ duto e wengewa. (Fwe. 7:14-17; 22:1, 2) Gie kindeno bende, wanane kaka weche mokorgi chopo niya: “Japiny ok nowachi [ni], ‘Atuwo.’”​—Isa. 33:24.

19. Sama warito ngimawa kuom tuoche e okang’ mowinjore, wanyalo bedo gadier kuom ang’o?

¹⁹ Wan gadier ni warruokwa chiegni, kendo warito odiechieng’no ma Jehova notiek tuoche koda tho mayudo dhano. To ka kindeno podi, wan gadier ni Wuonwa ma jahera biro konyowa nano e bwo chandruok koda rem, nimar ‘oparowa.’ (1 Pet. 5:7) Kuom mano, kinde duto ma warito ngimawa kuom tuoche, weuru watim kamano kwaluwo weche moler maber ei Wach Nyasaye mokudh gi muche!

[Weche moler piny]

E Yor Nwoyo

• Ang’o momiyo ji bedo matuwo, to en ng’ano mabiro gonyowa kuom chandruok mag richo?

• Kata obedo ni ok en gimarach bedo gi parruok kuom chal mar ngimawa, en ang’o monego wewerego?

• Ang’o momiyo yiero mwatimo kuom weche thieth en gima Jehova nono?

• Kuom wach ngimawa, wanyalo yudo ber nade kuom luwo puonj koda chike manie Muma?

[Penjo mag Puonjruok]

[Picha manie ite 24]

Ne ok ochwe dhano mondo obed matuwo kendo obed moti

[Picha manie ite 26]

Kata obedo ni gin gi chandruok mag tuoche, oganda Jehova yudo mor mang’eny e tij lendo