Gik Mabiro Timore e Kinde Mokayo Machiegni

KANE owuoyo kuom kinde mabiro e wi dhano koda piny, jaote Petro nondiko kama: ‘To kaka singruok Nyasaye obet, warito polo manyien, gi piny manyien, ka ma wach makare dakie.’ (2 Petro 3:13) Singo mar “polo manyien gi piny manyien,” ne okwong chiwo kokalo kuom janabi Isaya.  (Isaiah 65:17; 66:22) Kuom nwoyo wach ma ne okorni, Petro nonyiso ni e ndalone, wachno ne pok ochopo chuth.

Bang’e, e kar higa 96 E Ndalowa, Fweny ma ne ochiw kokalo kuom jaote Johana ne otudo wach “piny manyien” kod gweth ma ne dhi bedoe e bwo Pinyruodh Nyasaye. (Fweny 21:1-4) Weche ma Yesu koda ma jaote Paulo nowacho e wi gik ma ne dhi timore e piny kapok Pinyruodh Nyasaye obiro, sani dhi nyime kachopo. Kuom mano, wanyalo bedo gi geno ni e kinde mokayo machiegni, Pinyruodh Nyasaye biro kelo piny manyien. Piny manyienno nochal nade? Bug Isaya ei Muma nyisowa.

Gweth Manobedie e Piny Manyien

Kuwe e Piny Duto koda Lamo Moriwo Ji Te. ‘Ginikau ligengini ma gin-go eka ginilosgo leu kwer, kod tongegi ginithedh ratonge, oganda ok noting’ ligangla noganda machielo, kendo ok ginipuonjre wach lweny nyaka chieng’.’​—Isaiah 2:2-4.

Kuwe e Kind Dhano kod Le. ‘Ondieg sidhe, nodag gi nyarombo, kendo kwach nonind kod nyadiel; kendo roya kod nyathi sibuor kod dhiang’ mamiyo nobedi kanyachiel; to nyathi notelnigi. Kendo dhiang’ gi ondiek ginichiem kanyachiel, nyithindgi gininind kanyachiel: kendo sibuor nocham lum kaka dhiang’ mabuoch. Ok ginitim marach kata ketho gi moro e goda maler ngima, nimar ng’eyo Jehova nopong’ piny kaka pige opong’o nam.’​—Isaiah 11:6-9.

Chiemo Modhuro Ne Ji Duto. “Jehova mar ogendini mag lueny nolos e godno ni ji duto sawo moro mar gik mamiyo, sawo mar divai mosebudho, sawo mar gik mamiyo matimo ondhundho, mar divai mosebudho modhing’ore maber.”​—Isaiah 25:6.

Tho Ok Nobedie Kendo. ‘Nyasaye nogol tho nyaka chieng’ kendo Ruoth Nyasaye noyue pi wang’ kuom wenge duto; kendo nomi piny duto weyo charo joge, nikech Jehova osewacho mano.’​—Isaiah 25:8.

Jomotho Nochier. ‘Jogi mosetho nobedi mangima; kitundini mag joga nochier. Jo modak e buch lowo nochier kendo wer. Mi piny nogol jo motho oko.’​—Isaiah 26:19.

Mesia Nobed Jang’ad-Bura Makare. ‘Ok enong’ad bura kogeno gima wang’e oneno, kata kwero ji kogeno gi ma ite owinjo, to nong’ad buch jochan gi tim makare, kendo nokwer ji ni jo mamuol  me piny koluwo tim mowinjore.’​—Isaiah 11:⁠3, 4.

Nochangi Mwofini gi Rodinde. “Wang’ mwofini noyepi, kendo it jo ma itgi odinore noyaure.”​—Isaiah 35:5.

Piny Mowe Nonyag. “Thim kod piny mowe nomor; mi gweng’ motuwo ma onge gi moro motwi noil, mi maua kaka ondanyo nobedie. Maua mang’eny nobedie, mor to nomor kower.”​—Isaiah 35:1, 2.

Piny Manyien. “Achweyo polo manyien, [sirkal manyien mar polo] kod piny manyien [oganda dhano manyien]: mi wi ji nowil gi weche machon, ok ginipargi. To un, moruru, iluru, ndalo duto kuom gino machweyo. . . . [joma nodag e piny manyien ma Nyasaye osingo] giniger udi, ginidagie; ginipidh puothe mag muzabibu, ginicham olembgi. Giniger udi, to ng’at machielo ok nodagie; ginichuo, to ng’at machielo ok nochamgo; ni mar kaka ndalo mag yath obet e kaka ndalo mag joga nobedi, kendo jogo mayiedho nomor kuom tich luetegi ndalo mang’eny. Ni mar ok giniti nono, kata nyuolo nyithindo matho gi tho muorruok; ni kech gin koth jogo ma Jehova osegwedho, kaachiel gi nyithindgi. Mi notimre ni ka pok giluongo anaduok wach; kendo ka podi giwuoyo, anawinj.” “ ‘Kaka polo manyien kod piny manyien, mabiro loso, nosiki e nyima, e kaka kothu kod nyingu nosiki,’ Jehova owacho.”​—Isaiah 65:17-25; 66:22.

Ng’eyo Wach Kinde Mabiro Majaber

Bug Isaiah ok e buk kende ei Muma makoro wach gweth manobedie e kinde mabiro. Muma opong’ gi weche mokor manyiso gik mabeyo ma Nyasaye biro timo kokalo kuom Pinyruodhe e lwet Kristo. * Be diher dak e paradis kama gik mabeyo ogundhoe kamano? Ee, inyalo dakie! Tem mondo ing’e in iwuon gik ma Muma puonjo kuom adier e wi dwaro mabeyo mag Nyasaye, kendo ing’e kaka inyalo bedo achiel kuom joma noyud ber kuomgi. Joneno mag Jehova diher mar konyi.

[Footnotes]

[Picha manie ite 8]

Dhano nobed gi kuwe e kindgi giwegi koda gi le

[Picha manie ite 9]

Jomotho nodagi kendo

[Picha manie ite 10]

Piny duto nobed paradis