Koro Wach Biro Mesia

NIKECH ne ging’eyo weche mokor ma Isaya koda jonabi mamoko ne ondiko kuom Mesia, oganda Jo-Yahudi nochako geno chon biro mare. En adier ni, kane ochopo kinde Yesu, Jo-Yahudi mang’eny ne ‘onwang’o kiyo’ biro mar Mesia makoro nokayo machiegni. (Luka 3:⁠15) Ber ng’eyo ni weche ma Muma nokoro, oting’o weche mang’eny kuom ngima Mesia. Onge dhano adhana ma ne nyalo koro wechego, kata chano mondo weche mokorgo otimre e ngima Yesu.

Weche Manyiso Nyuol Mesia. Isaya nokoro ni Mesia kata Kristo ne idhi nyuol gi nyako mapok onindo gi dichwo. Bang’ nyiso kaka nyuol Yesu ne otimore e yor hono, Mathayo nondiko kama: “Mago duto notimore mondo wach ochopi ma ne Ruoth oluwo gi dho janabi, ka owacho niya, ‘Nyako [mapok onindo gi dichwo] nobed gi ich, mi nonywol wuowi.’” (Mathayo 1:22, 23; Isaiah 7:14) Isaya bende nokoro ni Kristo ne dhi wuok e anyuola Daudi, ka ohulo ratiro nying’ wuon Daudi, ma en Jesse. Kuom adier, Yesu ne owuok achiel kaachiel e anyuola Daudi. (Mathayo 1:6, 16; Luka 3:23, 31, 32) Omiyo, kapok ne onyuol Yesu, malaika Gabriel nowacho ne Mariam niya: “Nyasaye nomiye kom Daudi kwar  mare.”​—Luka 1:32, 33; Isaiah 11:1-5, 10; Jo Rumi 15:12.

Weche Manyiso Ngima Mesia. Kane en e sunagogi e dala mar Nazareth, Yesu makoro nosebedo ng’ama duong’, ne osomo gi dwol weche ma ne Isaya okoro, moriwo koda kama wacho niya: ‘Roho mar Ruoth ni kuoma, nikech osewira gi mo mondo ayal wach maber ni jo modhier.’ Ka onyiso kaka wechego ne chopo kuome owuon, Yesu nowacho kama: “Tinende eka Ndikoni ochopo e itu.” (Luka 4:17-21; Isaiah 61:1, 2) Isaya bende nokoro kaka Yesu ne dhi nyiso ng’wono, muolo, kendo kaka ne odhi dewo jogo ma ne dwaro chang. Mathayo ndiko kama: “Ji mang’eny noluwe, kendo nochangogi duto, to nokwerogi ni kik gihule; mondo wach ochopi ma ne janabi Isaya owacho . . . ‘Ok nogo mbaka, kata koko . . . Odundu motore ok notur.’”​—Mathayo 8:16, 17; 12:10-21; Isaiah 42:1-4; 53:4, 5.

Weche Manyiso Sand ma Mesia ne Dhi Yudo. Isaya nokoro ni ji mang’eny e Israel ne ok dhi rwako Mesia, to ne odhi bedonegi mana kaka “kidi ma chwanyo ji.” (1 Petro 2:6-8; Isaiah 8:14, 15) To kuom adier, kata obedo ni Yesu notimo honini mang’eny, ji ok ‘ne oyie kuome mondo wach janabi Isaya ochopi, ma nowacho niya: “Ruoth, ng’ano moseyie wachwa?”’ (Johana 12:37, 38; Isaiah 53:1) Achiel kuom gik ma ne omiyo Jo-Yahudi ok ne ket yie kuome, ne en nikech paro moro ma ok kare ma ne onya e kindgi. Ne giparo ni Mesia ne dhi gonyogi e bwo loch Jo-Rumi mondo ochung kendo pinyruodh Daudi e piny ka. To nikech Yesu ne oyudo sand kendo tho, Jo-Yahudi mang’eny ne ok nyal yie ni en ema ne en Mesia. To kuom adier, Isaya ne oyudo osekoro ni Mesia ne dhi yudo sand kapok obedo Ruoth.

E bug Isaya, iwuoyo kuom Mesia ka gima owacho kama: “Naloko dieng’eya ni jo magoya . . . Ne ok apando wang’a ni kik gikuod wiya kata ng’ulona olau.” Mathayo nyiso gima ne otimore sama Yesu ne nie nyim kom-bura niya: “Ne ging’ulo olawo e wang’e, kendo ne gigoye adhong’; to jo moko nothale.” (Isaiah 50:6; Mathayo 26:67) Isaya ne ondiko kama: “Nosande to nobedo mamuol, mi ok noyawo dhoge.” Omiyo, kane Pilato nono Yesu kuom gigo ma ne Jo-Yahudi odonjonego, Yesu “ne ok odwoke kata wach achiel, omiyo [Pilato] nowuoro gilala.”​—Isaiah 53:7; Mathayo 27:12-14; Tich Joote 8:28, 32-35.

Weche Manyiso Wach Tho Mesia. Weche ma Isaya nokoro ne odhi nyime chopo kuom tho Yesu, kata mana bang’e. Isaya nokoro kama: “Ne gikunyone bur kar yiko jo maricho, kendo kod [jomoko], ka ne otho.” (Isaiah 53:9) Ere kaka wechegi ne dhi chopo? Kane Yesu otho, ne ogure e kind jomecho ariyo. (Mathayo 27:38) To bang’e, Josef ja Arimathaya ma ne en jamoko, ne oyiko ringre Yesu e bure owuon manyien. (Mathayo 27:57-60) Gikone, tho Yesu ne ochopo achiel kuom weche madongo ahinya ma Isaya nokoro. Kowuoyo kuom Mesia, Isaya wacho kama: ‘Jatichna makare nomi ji mang’eny bedo makare, kendo timbegi mamono nobedi mage.’ Kuom adier, tho Yesu nochiwo rawar magonyo ji duto makare kuom richo.​—Isaiah 53:8, 11; Jo Rumi 4:25.

 Weche Mokor Manyaka Chopi

Sama ne gitiyo gi Ndiko mondo omi ginyis ratiro weche ma ne nyalo miyo ji ofweny Mesia, joote kaachiel gi Yesu owuon, ne onwoyo nyading’eny weche mokor e bug Isaya, maloyo buk moro amora ei Muma. Kata kamano, bug Isaya kende, ok ema ne en buk makoro wach kinde mabiro. Weche mamoko mang’eny manie Ndiko mag Dho-Hibrania bende chopo e ngima Yesu, Pinyruodhe, kendo ginyiso gik mabeyo ma Pinyruodhno biro timo e kinde mabiro. * (Tich Joote 28:23; Fweny 19:10) En adiera mane ma ji ne nyalo bedogo ni weche mokorgo ne dhi chopo? Yesu nowacho ne jowinjone ma ne gin Jo-Yahudi kama: “Kik upar ni nabiro mondo agony Chik kata weche mag Jonabi [tiende ni Ndiko mag Dho-Hibrania]; ok nabiro mondo agonygi, to mondo achopgi. Adier awachonu niya, nyaka polo gi piny norum, nukta achiel kata dire matin achiel ok nolal kuom Chik nyaka duto nochopi.”​—Mathayo 5:17, 18.

Yesu bende ne owuoyo kuom weche ma ne oyudo osekor, ma ne timore e kindene koda ma ne dhi timore bang’e. (Daniel 9:27; Mathayo 15:7-9; 24:15) E wi mano, Yesu koda jopuonjrene nokoro weche ma ne dhi timore bang’ ndalo ma ne gidakie, moriwo nyaka gik mwaseneno ka timore e kindegi. Sula maluwo biro wuoyo kuom wechegi, koda mamoko ma Muma okoro, mapod biro timore.

[Weche moler piny]

[Picha manie ite 4]

“Nyako [mapok onindo gi dichwo] . . . nonywol wuowi”

[Picha manie ite 5]

“Ne ok apando wang’a ni kik gikuod wiya”