Ng’ano Manyalo Ng’eyo Gik Mabiro Timore?

“An e Nyasaye . . . , manyiso ji ka wach moro ochako timore kaka obiro bet achien; e ndalo machon nakoro weche ma pok otimore.”​—Isaiah 46:9, 10.

E KINDE ma ngima tekiegi, jonon weche siasa, weche yuto, gi chal mar dak mar oganda dhano, temo nono gik ma nosetimore chon koda gik matimore sani, mondo okonygi ng’eyo gik mabiro timore. To jomoko madwaro ng’eyo ahinya kaka ngimagi giwegi biro bedo, hinyo dhi ir ajuoke. Kinde mang’eny, joma kamago ok yud kony ma gimanyo. Be en gima tek ahinya ng’eyo gik mabiro timore ne pinyni, ne jo utewa, kata ne wan wawegi? Kuom adier, be nitie ng’at manyalo ng’eyo chuth kinde mabiro?

E weche ma nowacho ne janabi Isaya kaka oket malo, Jehova Nyasaye Manyalo Duto, nyiso ni en gi nyalo mar ng’eyo kinde mabiro. Kokalo kuom Isaya, Nyasaye nokoro ni ne odhi gonyo Jo-Israel a e twech mar Jo-Babulon, kendo dwokogi mondo gichak giger kendo Jerusalem gi hekalu. Ere kaka weche ma ne okorgo ne ochopo e wang’e chuth? Chiegni higini 200 motelo, Isaya nokoro ratiro nying’ jalo ma ne dhi loyo Babulon, ma en Kuro. E wi mano, Isaya ne onyiso rieko ma Kuro ne dhi tiyogo e loyo Babulon, tiende ni baro Aora Efrata, ma ne lworo ka geng’o dalano. Ne okoro bende ni Kuro ne dhi yudo ka dho rangeye madongo mag dalano owe thuolo, kendo mano ne dhi miyo Kuro olochi e yo mayot.​—Isaiah 44:24–45:7.

Ka opime gi Nyasaye, dhano onge gi teko mar ng’eyo kinde mabiro. Suleman Ruoth ma ne riek, nondiko kama: ‘Kik iwuorri kuom kiny; nikech ikiya gima ndalo achiel nokelni.’ (Ngeche 27:1) Wachno podi en adier. Onge dhano moro amora manyalo ng’eyo kata mana gima kiny notimrene owuon. Ang’o momiyo Nyasaye to opogore gi dhano? En nikech ong’eyo chuth gigo duto mosechweyo, moriwo nyaka kit dhano koda chunye maiye. Nitie kinde ma ka Nyasaye oyiero, to onyalo neno ratiro kaka ng’ato ka ng’ato, kata kaka oganda mangima biro timo. E wi mano, Nyasaye nigi nyalo maonge giko mar chiko kaka gik moko biro timore. Sama okoro kokalo kuom jonabi mage ni gimoro biro timore, en owuon obedo Jalo “mamiyo wach jatichne teko, matimo kaka rieko ma joote ong’ado obet.” (Isaiah 44:26) Jehova Nyasaye kende ema nyalo wacho kamano.

Isaya ne odak higini mokalo 700, kapok ne onyuol Yesu, ma en Mesia. Kata kamano, Isaya ne okoro wach biro mar Mesia. To chakore higini mag 1700, jokwed Muma, osebedo ka kwedo weche manie bug Isaya.  Gisetemo wacho ni weche ma ne Isaya okoro ne ondiki mana bang’ kane gisetimore, ni jandiko ne ndiko mana gik ma ne osetimore. Be mano en adier? E higa 1947, ne oyud bug Isaya, kanyachiel gi buge mamoko modol, e bur moro machiegni gi Nam Kado. Josomo manono weche mag Muma, ne oyudo ni bugno ne olos higini mokalo 100 kapok ne onyuol Mesia, tiende ni Kristo ma ne osingi. Ee, Muma nokoro gik ma ne biro timore!

Isaya kaachiel gi jondiko mamoko mag Muma, ne ok nyal koro gik moko kaluwore mana gi rieko ma margi giwegi. Kar mano, ‘ne giwacho weche moa kuom Nyasaye, kaka roho maler ne telonigi.’ (2 Petro 1:21) E sula maluwo, wabiro nono weche moko ma ne Isaya okoro kuom ngima Yesu. Bang’e, wabiro nono weche ma Yesu kod jopuonjrene nokoro ni ne dhi timore e kindewagi, koda e kinde mabiro.