“Tamuru Satan” Kaka Yesu Notimo

“Tamuru Satan, mi noringu.”​—JAK. 4:7.

1. En akwede mane ma Yesu nong’eyo ni nodhi yudo e piny, to ang’o mane dhi timore gikone?

YESU KRISTO nong’eyo ni ne odhi yudo akwede mowuok kuom Jachien. Mani ne onenore maler kaluwore gi gima Nyasaye nowacho ne malaika marach ma nong’anjo, kendo ma nowuoyo katiyo gi thuol. Nyasaye nowachone niya: “Anaket sigu e kind in gi dhako [bad riwruok mar oganda Jehova me polo], kendo e kind kothi gi kothe: [Yesu Kristo] enoketh wiyi, kendo in niketh ofunj tiende.” (Chak. 3:⁠14, 15; Fwe. 12:9) Ketho ofunj tiend Yesu nyiso ni ne odhi sandore mana kuom kinde manok ka inege e piny, nimar Jehova ne dhi chiere mondo oyud duong’ e polo. Kata kamano, ketho wi thuol nyiso ni Jachien ne idhi kethi chuth ma ok nochak obedie kendo.​—Som Tich Joote 2:31, 32; Jo Hibrania 2:14.

2. Ang’o momiyo Jehova ne nigi adier ni Yesu ne dhi kwedo Jachien?

² Jehova ne nigi adier chuth ni Yesu ne dhi chopo migawo mare e yo maber ka en e piny, kendo kwedo Jachien. Ang’o momiyo Jehova ne nigi adier chuth kuom wachni? En nikech ne oyudo osechweyo Yesu higini tara gi tara motelo, mi noseneno kaka ochalo, kendo nong’eyo ni Yesu ma en “jatich molony,” kendo ‘wuode ma nokwongo betie, manie wi chuech duto,’ ne en jadier mochung’ motegno. (Nge. 8:⁠22-31; Kol. 1:⁠15) Omiyo kane ooro Yesu e piny, kae to oyiene Satan mondo  oteme nyaka e thone, Nyasaye ne nigi adiera chuth ni Wuode ma midermano ne dhi locho.​—⁠Joh. 3:16.

Jehova Rito Jotichne

3. Jachien neno nade jotich Jehova?

³ Yesu noluongo Jachien ni “jaloch pinyni,” kendo nosiemo jolupne ni ne idhi sandgi mana kaka en bende ne osande. (Joh. 12:31; 15:20) Piny manie teko Satan Jachien, osin kod Jokristo madier nikech gitiyo ne Jehova, kendo gin joland wach makare. (Math. 24:9; 1 Joh. 5:19) To ahinya wuon, Jachien osin gi Jokristo mowal kuom roho modong’ e piny, ma gikone biro locho gi Kristo e Pinyruodhe me polo. Satan bende osin gi Joneno mag Jehova ma nigi geno mar dak nyaka chieng’ e paradis e piny. Wach Nyasaye siemowa kama: “Jasiku, Satan, bayo ka sibuor ma goyo asumbi, kodwaro ng’a ma dongam.”​—1 Pet. 5:8.

4. Ang’o manyiso gadier ni oganda Nyasaye osekwedo Satan e ndalowagi?

⁴ Wan kaka riwruok mar oganda ma Jehova Nyasaye rito, wasekwedo Jachien. Par ane weche mosetimoregi: Kuom higini 100 mosekalo, moko kuom joloch maricho ahinya e pinyni, osetemo tieko chuth Joneno mag Jehova. Kata kamano, kwan mar Joneno medore, kendo sani gin ji chiegni 7,000,000 e kanyakla mokalo 100,000 e piny mangima. Joloch maricho ma ne sando oganda Jehova ema sani oselal nono!

5. Ere kaka weche manie Isaiah 54:17 osebedo adier kuom wach jotich Jehova?

⁵ Kowuoyo kuom kanyakla mar Jo-Israel machon kaka “dhako” ma chiege, Nyasaye nosingo kama: ‘Onge gir lweny mothedh mar kedo kodi ma dinyal timo gi moro; kendo ng’ato ka ng’ato mawacho marach kuomi e bura, ning’adne bura in. Ma e gikeni mar jotich Jehova, ma bende e tim makare ma gin-go moa kuoma.’ (Isa. 54:11, 17) Singono osebedo adier kuom oganda Jehova e piny mangima e “ndalo mag giko” mwadakiegi. (2 Tim. 3:1-5, 13) Wadhi nyime kwedo Jachien, kendo onge gir lweny mothedh mabiro tiyo, monyalo temo kedogo mondo otiek oganda Nyasaye, nimar Jehova nikodwa.​—Zab. 118:6, 7.

6. Wach ma Daniel nokoro nyisowa ang’o kuom gima biro timore ne loch mar Jachien?

⁶ E giko mar piny marachni, masani okayo machiegni, gik moko duto motudore gi loch Satan, ibiro tiek chuth. Kotelne gi Nyasaye, janabi Daniel nokoro kama: “E ndalo ma ruodhigo nobedie [mantiere e ndalowagi], Nyasaye manie polo nochung piny ruoth moro [e polo] ma ok norum nyaka chieng’, onge oganda moro ma nobedi gi loch kuom piny ruodhno; to enong’iny pinje ruodhigi duto [mantiere sani], mi notiekgi, kendo nobedie nyaka chieng’.” (Dan. 2:44) E kinde ma mano notimre, loch Satan koda mar dhano ma joricho, biro lal chuth. Gimoro amora motudore gi piny marach ma Jachien oteloeni, ok nobedie kendo nyaka chieng’, to Pinyruodh Nyasaye biro locho e wi piny, ma onge loch moro amora makwede.—Som 2 Petro 3:7, 13.

7. Ere kaka wanyalo ng’eyo ni ng’ato ka ng’ato kuom jotich Jehova nyalo kwedo Jachien?

⁷ Onge kiawa ni riwruok mar oganda Jehova ibiro riti, kendo ogandano biro nya maber nikech gweth mag Nyasaye. (Som Zaburi 125:1, 2.) To nade wan kaka ng’ato ka ng’ato? Muma wachonwa ni wanyalo kwedo Jachien, mana kaka Yesu ne otimo. Kuom adier, weche mokor ma Kristo nochiwo kokalo kuom jaote Johana, nyiso ni kata bed ni Satan kelo akwede, “oganda mang’ongo” mar jogo ma nigi geno mar dak e piny, biro tony e giko mar piny marachni. Kaluwore gi Ndiko, gikok gi dwol maduong’ niya: “Warruok en mar Nyasachwa mobedo e kom duong’, kendo mar Nyarombo [Yesu Kristo].” (Fwe. 7:9-14) Iwuoyo kuom Jokristo mowal kuom roho kaka joma loyo Satan, kendo ‘rombe mamoko’ ma gin jowetegi, bende dhi nyime  kwedo Satan. (Joh. 10:16; Fwe. 12:10, 11) Kata kamano, kwedo Satan dwaro ni watim kinda kendo wasiki ka walamo mondo Nyasaye ‘oreswa kuom ng’a marachno.’​—Math. 6:13.

Ranyis Makare Chuth e Kwedo Jachien

8. En tem mane mokwongo mondiki ma Jachien notemogo Yesu e thim, to Kristo ne otimo nade?

⁸ Jachien ne oketo Yesu e tem. Kane en e thim, Satan notiyo gi tembe mopogore opogore, kodwaro mondo Yesu oketh chik Jehova. Kata kamano, Yesu noketo ranyisi makare chuth e kwedo Satan. Bang’ tweyo kuom ndalo 40 odiechieng’ gotieno, onge kiawa ni Yesu ne gombo ahinya chiemo. Satan nowachone niya: ‘Ka in wuod Nyasaye, chik kitegi mondo gidok kuonde.’ Kata kamano, Yesu ne odagi tiyo gi teko ma Nyasaye ne omiye, mana mondo okonyrego owuon. Kar mano, Yesu nodwoko kama: “Nondiki niya, ‘Dhano ok nobed mangima gi kuon kende, to gi weche duto mowuok e dho Nyasaye.’”​—Math. 4:1-4; Rapar 8:3.

9. Ang’o momiyo nyaka wakwed tembe ma Satan kelo kodwaro ni wati e yo marach gi gombo monyuolwago?

⁹ E kindegi, Jachien temo wuondo jotich Jehova mondo giti e yo marach gi gombo monyuolgigo. Kuom mano, nyaka watim duto mwanyalo mondo wakwed gombo maricho mag nindruok, masani opong’ e piny marachni. Wach Nyasaye wacho ratiro kama: “Koso ok ung’eyo ni jo ma ok kare ok nocham gikeni mag pinyruodh Nyasaye? Kik uwuondru; jochode, kata jolam nyiseche manono, kata jo ma terore, kata chwo ma terore gi chwo . . . ok ginicham gikeni mag pinyruodh Nyasaye.” (1 Kor. 6:⁠9, 10) Kuom mano, nenore maler ni joma odak e ngima mar anjawo, kendo madagi loko timbegi ok bi yienegi dak e piny manyien mar Nyasaye.

10. Kaluwore gi Mathayo 4:⁠5, 6, en tem mane machielo ma Satan notiyogo e temo Yesu?

¹⁰ Ndiko wacho e wi tem moro ma Yesu ne oyudo e thim, kama: “Satan notere e dala maler, mi nochunge e wi osuri mar Hekalu, mokone ni, ‘Ka in wuod Nyasaye, dirri piny; nikech nondiki niya, “Nochikni malaika mage, mi giniting’i e luetegi, mondo kik ichwany tiendi e kidi.”’” (Math. 4:5, 6) Kuom timo kamano, Jachien ne dwaro mondo Yesu onyisre e yo miwuoro ni en e Mesia. Kata kamano, kuom adier, mano ne dobedo tim ma ok kare, manyiso wang’ teko, tim ma Nyasaye ne ok dhi yiego kata riwo lwedo. E temni bende, Yesu nochung’ motegno e nyim Jehova, kendo notiyo gi ndiko e kwedo Jachien. Nowacho kama: “Kendo nondiki niya, ‘Kik item Ruoth Nyasachi.’”​—Math. 4:7; Rapar 6:16.

11. Satan nyalo temowa nade, to mano nyalo kelo ang’o?

 ¹¹ Satan nyalo temowa kodwaro mondo wamany duong’ e yore mopogore opogore. Bende onyalo temowa mondo waluw kit rwakruok kaka mag jopiny, kata donjo e yore mag manyo mor manyalo bedo ni ok winjre gi Ndiko. To kapo ni wanyalo weyo luwo puonj koda siem ma Muma chiwo nikech wadwaro luwo kit piny, be wanyalo geno ni jo malaika biro ritowa kuom gik maricho manyalo yudowa sama waluwo yore makamago? Kata obedo ni Ruoth Daudi ne oloko chunye bang’ timo richo gi Bathsheba, Nyasaye ne ok ogeng’e kuom gik maricho ma bang’e ne oyude nikech richoneno. (2 Sam. 12:9-12) Weuru kik waket Jehova e tem kuom luwo yore ma ok kare, kata kuom mako osiep gi piny.​—Som Jakobo 4:4; 1 Johana 2:15-17.

12. En tem mane miwuoyoe e Mathayo 4:⁠8, 9, to Wuod Nyasaye notimo nade?

¹² Tem machielo ma Jachien notiyogo kuom Yesu ne en singone ni ne odhi miye teko mar loch. Satan nonyiso Yesu pinjeruodhi duto mag piny koda duong’gi, mowachone kama: “Gigi duto anamiyi, kipodho ilama.” (Math. 4:8, 9) Mano kaka Satan nonyiso wang’ matek kotemo ni mondo oyud lamo monego odhi ne Jehova kende, kendo kotemo miyo Yesu oketh winjruokne gi Nyasaye! Nikech ne en gi gombo mar ni mondo olame, malaikano machon ne kare, nolokore mobedo Satan Jachien, jatem kendo jawuond maduong’. (Jak. 1:14, 15) Kata kamano, Yesu to ne dwaro chung’ motegno e nyim Wuon mare me polo, omiyo nowacho ayanga kama: ‘Aye, Satan! Nikech nondiki niya, “Ruoth Nyasachi ema nilam, kendo en kende ema nitine.”’ Kae bende Yesu nokwedo Jachien mi ok nomiye thuolo ngang’. Wuod Nyasaye ne ok dwar bedo mar piny ma Satan oteloeni, kendo ne ok onyal lamo ng’a marachno ngang’!​—Math. 4:10; Rapar 6:13; 10:20.

“Tamuru Satan, Mi Noringu”

13, 14. (a) Kuom nyiso Yesu pinjeruodhi duto mag piny, ang’o ma Jachien ne temo miyo Yesu? (b) Ere kaka Satan temo njawowa?

¹³ Kuom nyiso Yesu pinjeruodhi duto mag piny, Jachien ne temo miyo Yesu teko mar loch dhano. Satan nogeno ni gik ma Yesu nonenogo ne dhi moro chunye, kendo ne dhi miyo Yesu oyie bedo jatend siasa ma nigi teko moloyo dhano duto. E ndalogi, Jachien ok temwa kosingonwa pinjeruodhi, to otemowa kuom njawo chunywa kokalo kuom gik mwaneno, mwawinjo koda madonjo e pachwa.

¹⁴ Jachien chiko pinyni. Kuom mano, ochiko yore ma ji nwang’o godo weche. Omiyo ok kawwa gi wuoro, ni gi gik ma ji neno, winjo, kendo somo e piny, opong’ ahinya gi anjawo koda timbe gero. Joland weche ohala temo keto ei chunywa gombo mag gik mang’eny ma kuom adier ok ochuno e ngimawa. Kokalo kuom yore makamago, Jachien siko ka temowa gi gombo mag gik ringruok manyalo lombo wang’wa, itwa, koda pachwa. To ka wadagi neno, winjo, kata somo gigo ma Ndiko kwero, kuom adier mano biro chalo ka gima wawacho ni: ‘Aye, Satan! ’ Kuom timo kamano, wanyiso ni waluwo ranyisi mar Yesu, jal ma ne ochung’ motegno e kwedo piny maok ler ma Satan oteloeni. Bedo ni ok wan mar pinyni, bende nenore kokalo kuom chir ma wan-go mar hulo ni wan Joneno mag Jehova kendo wan jolup Yesu, kar tich, skul, kuonde mwadakie, koda e kind wedewa.​—Som Mariko 8:38.

15. Ang’o momiyo kwedo Satan dwaro ni wabed motang’ kinde duto?

¹⁵ Kane tem mar adek ma Jachien notemogo Yesu ok notiyo, “Satan noweye.” (Math. 4:⁠11) Kata kamano, Satan ne ok ogik gi kanyo, nimar Ndiko wachonwa kama: “Ka ne Satan osetieko tem duto [e thim], noweye nyaka kinde moro.” (Luka 4:⁠13) Kinde duto ma wakwedo Jachien mi waloye, onego  wagone Jehova erokamano. Kata kamano, bende dwarore wasik kwamanyo kony kuom Nyasaye, nimar Jachien biro duogo ma temwa kendo e kinde machielo mowinjorene​—kinde manyalo bedo ni ok wapar kata. Kuom mano, nyaka wabed motang’ kinde duto, ka waikore nano e tiyo ne Jehova tich maler, kata bed ni waromo gi tembe machalo nade.

16. En teko mane ma Jehova miyowa, to ang’o momiyo onego wakwa mondo wayude?

¹⁶ Mondo omi wakwed Jachien, onego walam kwakwayo mondo Nyasaye omiwa teko maloyo teko duto e piny koda e polo​—tiende ni roho mare maler. Tekono biro miyowa watim gik moko, ma pile ok wanyal timo gi tekowa wawegi. Yesu bende nosingo ne jolupne ni ginyalo yudo roho maler mar Nyasaye, kowacho kama: “Ka un jo maricho [dhano morem] ung’eyo miyo nyithindu mich mabeyo, Wuoru me polo ok nochiw mokadho roho maler ni jo ma kwaye koso! ” (Luka 11:13) Weuru wadhi nyime kwayo Jehova mondo omiwa roho mare maler. Ka wan-gi teko maduong’ ahinyani, mategowa e kwedo Jachien, onge kiawa ni wabiro locho. E wi kwayo mwatimo pile e lamo, dwarore bende ni warwak gi lwenje duto mag Nyasaye, mondo omi ‘watam wuond mariek mag Satan.’​—Efe. 6:11-18.

17. En mor mane ma nomiyo Yesu okwedo Jachien?

¹⁷ Nitie gimoro machielo ma nokonyo Yesu e kwedo Jachien, to wan bende gino nyalo konyowa. Muma wacho kama: “Nodhil e [yadh-sand, NW ] kochayo wich kuotne nikech mor ma noketi e nyime; to koro osebet piny e bat korachwich mar kom Nyasaye.” (Hib. 12:2) Wan bende wanyalo bedo gi mor makamano sama wachung’ motegno e riwo lwedo loch mar Jehova, kwamiyo nyinge duong’, kendo keto mich mar ngima mochwere e pachwa kinde duto. Mano mor manade ma wanabedgo e kinde ma ibiro tiek Satan kaachiel gi tijene duto nyaka chieng’, kinde ma ‘joma muol nocham piny kendo ginimor moloyo kuom kuwe mang’eny’! (Zab. 37:11) Kuom mano, wadhiuru nyime tamo kendo kwedo Jachien, mana kaka Yesu notimo.​—Som Jakobo 4:7, 8.

Inyalo Dwoko Nade?

• Ang’o mosetimore manyiso ni Jehova rito joge?

• Ere kaka Yesu noketo ranyisi maber e kwedo Satan?

• Inyalo kwedo Jachien e yore mage?

[Penjo mag Puonjruok]

[Picha manie ite 30]

Mako osiep gi piny miyo wabedo wasik Nyasaye

[Picha manie ite 32]

Yesu nodagi pinjeruodhi mag pinyni ma Satan ne dwaro miye