Ere Kaka Ng’eyo Adiera Kuom Wach Mach Nyalo Konyi?

JOGO mapuonjo ni nitie kar mach misandoe ji, gin joma jiwo puonj maok nyis adier kuom chal Jehova Nyasaye koda kido mage. En adier ni, Muma wacho ni Nyasaye biro ketho joma richo. (2 Jo Thessalonika 1:6-9) Kata obedo ni Nyasaye nyiso mirima makare, mirima ok e kido maduong’ ma en-go.

Nyasaye ok nigi kido mar hinyo ji. Bende openjo kama: “Ka ng’a marach otho, omiya mor koso?” (Ezekiel 18:23) Ka Nyasaye ok mor gi tho mar ng’a marach, ere kaka dobed mamor neno joma richo kisando nyaka chieng’?

Kido maduong’ ahinya ma Nyasaye ni godo en hera. (1 Johana 4:8) Kuom adier, ‘Jehova timo maber ne ji duto; kendo kechne maber ni kuom tijene duto.’ (Zaburi 145:9) Kuom mano, Nyasaye dwaro ni wahere gi chunywa duto.​—Mathayo 22:35-38.

Luoro Kar Mach Koso Hero Nyasaye​—Mane Machiko Ngimani?

Puonj mar ni isando chunje e mach, en puonj mamiyo dhano bedo gi luoro marach kuom Nyasaye. Mopogore gi mano, ng’at mosepuonjore adiera e wi Nyasaye, kendo mohere, biro nyago luor mowinjore kuom Nyasaye. Zaburi 111:10 lero kama: ‘Luoro Jehova en chakruok mar rieko; joma timo kamano weche donjonigi maber.’ Luor ma kamano ok en luoro mamiyo ng’ato tetni, to en chiwo luor matut mowinjore ne Jachwech. Timo kamano miyo waluoro timo gima ok more.

Par ane kaka ng’eyo adiera kuom wach mach nokonyo Kathleen ma jahigini 32, machon ne tiyo gi yedhe mamero. Nohero ahinya dhi kuonde manyo mor, timbe gero koda anjawo. Nowacho ayanga kama: “Seche moko ne ajabet piny kang’iyo nyara ma jahiga achiel, ma apenjra niya, ‘Ma to koro ang’o ma atimo e nyim nyathina yawa! Chieng’ moro ibiro wang’a e kar mach misandoe ji nikech timnani.’” Kathleen notemo weyo tiyo gi yedhe mamero, to kata kamano ok ne onyalo. Owacho niya: “Ne agombo bedo ng’at maber, to kata kamano, gik moko duto e ngimana koda e piny, ne richo. Ok ne ane gimomiyo nonego abed ng’ama ber.”

Bang’e Kathleen ne oromo gi Joneno mag Jehova. Owacho kama: “Ne apuonjora ni onge kar mach miwang’oe ji. Ndiko noketo wachno e yo mawinjorena kare. Ng’eyo ni ne ok dhi wang’a e mach, nokweyo chunya ahinya.” Bende ne opuonjore kuom singo mar Nyasaye ni dhano biro dak nyaka chieng’ e piny maler ma gik maricho onge. (Zaburi 37:10, 11, 29; Luka 23:43) Owacho gimor  niya: “Koro nayudo geno madier​—geno mar dak nyaka chieng’ e Paradis!”

Be Kathleen dine oweyo tiyo gi yedhe mamero nikech luoro mach misandoe ji? Owacho kama: “Sa asaya ma ne agombo ahinya tiyo gi yedhe mamero, ne alamo Jehova Nyasaye kasaye mondo okonya. Ne aparo kaka oneno timbe mochidogi, kendo ne ok adwar ni mondo achwanye. Ne odwoko lamo maga.” (2 Jo Korintho 7:1) Luoro chwanyo Nyasaye ema nokonyo Kathleen weyo tiyo gi yedhego.

Ee, hero Nyasaye, kendo nyise luor mowinjore​—to ok luoro mach misandoe ji​—ema nyalo jiwowa watim dwaro mar Nyasaye mondo omi wabed gi mor mochwere. Jandik-zaburi nondiko kama: “Ojahawi ng’ato ka ng’ato ma luoro Jehova, ma wuotho e yorene.”​—Zaburi 128:1.

[Sanduk/Picha manie ite 9]

NG’A GINI MIBIRO GONY OWUOGI KAR MACH (HELL)?

Loko moko mag Muma chocho ji kuom loko Geʹen·na kod Haiʹdes magin weche ariyo mopogore e dho-Grik, ka gitiyo gi wach achiel ni, “kar mach misandoe ji” kata hell. Ei Muma, Geʹen·na en wach mitiyogo kiwuoyo kuom ketho gimoro chuth, maonge kendo geno mar chier. Mopogre gi mano, jogo manie Haiʹdes, kata Hades, nigi geno mar chier.

Omiyo, bang’ ka Yesu ne otho mi ochiere, jaote Petro nowacho gi jing’o konyiso jowinjo mage ni Yesu “ne ok owe e hell” kata kar jomotho. (Tich Joote 2:27, 31, 32; Zaburi 16:10; King James Version) Wach molok ni “hell” ei ndikogi kaluwore gi Mumano, en Haiʹdes e dho-Grik. Yesu ok ne odhi e kar mach mager. Hades, kata “hell,” ne en liel. Kata kamano, ok Yesu kende ema Nyasaye gonyo kowuok e Hades.

Kowuoyo e wi wach chier, Muma wacho kama: “Tho gi hell nogonyo jo motho manie igi.” (Fweny 20:13, 14, KJ) Golo oko jo motho man e “hell,” (liel) tiende en chiero jogo duto ma Nyasaye neno ni owinjore oyud ngima. (Johana 5:28, 29; Tich Joote 24:15) Mano kaka geno mar neno jo motho kichiero en geno majaber ndi! Jehova, Nyasaye ma herane osiko, biro timo mae.