Ng’e Migawo Makende ma Yesu Nigo e Dwaro mar Nyasaye

“An e yo, kendo an e adiera, kendo an e ngima; ng’ato ok bi ka wuoro ma ok okadho kuoma.”​—JOH. 14:6.

1, 2. Ang’o momiyo onego wang’e migawo makende ma Yesu nigodo e chopo dwaro mar Nyasaye?

KUOM kinde duto ma dhano osebedoe, ji mang’eny osetemo ahinya mondo gibed joma opogore gi joma nie alworagi, to jo manok kende ema osenyalo. Kendo mana joma tin kende ema nyalo wacho gadier ni gin gipogore gi jomoko e yore manenre ayanga. Kata kamano, Yesu Kristo, Wuod Nyasaye, opogore gi ji e yore mang’eny.

² Ang’o momiyo en gima ber ng’eyo migawo makende ma Yesu nigo? En nikech bedo gi winjruok maber gi Wuonwa me polo ma en Jehova, otenore kuom ng’eyo wachno e yo maler! Yesu nowacho kama: “An e yo, kendo an e adiera, kendo an e ngima; ng’ato ok bi ka Wuoro ma ok okadho kuoma.” (Joh. 14:6; 17:3) We wanon ane moko kuom migepe makende ma Yesu nigo. Timo kamano biro miyo wamed ng’eyo maber migawo ma Yesu nigodo e chopo dwaro mar Nyasaye.

“Wuowi ma Miderma”

3, 4. (a) Ang’o momiyo wanyalo wacho ni Yesu en ng’at makende e migawone kaka Wuowi ma miderma? (b) Ere kaka migawo mar Yesu korka chwech ne en migawo makende?

³ Yesu ok luong mana ni, ‘wuod Nyasaye.’ Mano e kaka Satan noluongo Yesu sama ne oteme. (Math. 4:3, 6) Yesu iluongo e yo mowinjore ni, “Wuowi ma miderma mar Nyasaye.” (Joh. 3:16, 18) E dho-Grik, wach molok ni “miderma,” tiende en ni, “achiel kende,” “onge machal kode,” kata ni en “makende.” Jehova nigi yawuote ma malaike tara gi tara. Kare tiende ang’o wacho ni Yesu en wuowi achiel “maonge machal kode”?

⁴ Yesu en wuowi makende nimar en kende ema ne ochweye achiel kachiel gi Wuon mare. En e Wuowi makayo. Kuom adier, en e “kayo ne chwech duto.” (Kol. 1:15, Luo, 2003) En e “chakruok mar chwech Nyasaye.” (Fwe. 3:14, NW ) Wuowi ma miderma bende nigi migawo makende kodok korka tij chwech. Yesu ok ema ne en Jachwech, kata Wuon chwech. Kata kamano, Jehova notiyo kode kaka jatich e chweyo gik mamoko duto. (Som Johana 1:3.) Jaote Paulo nondiko kama: “Wan to, wan gi Nyasaye achiel, e Wuoro; ma gik moko duto oa kuome, kendo wantie nikech en; kendo nitie Ruoth achiel, Yesu Kristo, momiyo gik moko duto nitie, kendo omiyo wantie.”​—1 Kor. 8:6.

5. Ndiko nyiso nade migepe malero ni Yesu en ng’at makende?

⁵ Kata kamano, nitie migepe mamoko mang’eny mamiyo Yesu bedo ng’at makende. Ndiko luonge gi nyinge mang’eny mag telo, manyiso migawo makende ma en-go e chopo dwaro mar Nyasaye. Weuru wanon ane nyinge moko abich miluongego e Ndiko mag Dho-Grik mag Jokristo. *

En e “Wach”

6. Ang’o momiyo en gimowinjore luongo Yesu ni “Wach”?

⁶ Som Johana 1:14. Ang’o momiyo Muma  luongo Yesu ni “Wach,” kata ni Logos? Nying’no nyisowa tich mosebedo kotiyo nyaka a ne chwe malaike koda dhano. Jehova notiyo gi Wuode e kowo weche koda chike matayo chwech mamoko manie polo, mana kaka Nyasaye notiyo gi Wuodeno e chiwo otene ne dhano e piny. Bedo ni Yesu e Wach, kata Jal mawuoyo e lo Nyasaye, nenore maler kuom gima Kristo nowacho ne jowinjone ma Jo-Yahudi niya: “Puonjna ok mara, to mar Jal ma noora. Ng’at moyie timo gi ma en odwaro, e ma nopog wach kuom puonjni, ka en mar Nyasaye, kata ka awacho wachna awuon.” (Joh. 7:16, 17) Podi iluongo Yesu ni, “Wach Nyasaye” kata mana bang’ dokne e migawone ma nigi duong’ e polo.​—Fwe. 19:11, 13, 16.

7. Ere kaka wanyalo luwo ranyisi mar bolruok kaka Yesu timo e migawone kaka “Wach”?

⁷ Par ane gima nying’no nyiso. Kata obedo ni Yesu e chwech mariekie moloyo kuom chwech duto mag Jehova, ok ogen kuom riekone owuon. Owuoyo mana kaka Wuon mare chike. Kinde duto omiyo Jehova duong’, to ok en owuon. (Joh. 12:50) Mano kaka Yesu en ranyisi maber ndi monego waluw! Wan bende osemiwa tich moyiedhi mar ‘yalo weche mabeyo.’ (Rumi 10:15) Ng’eyo kaka Yesu noketo ranyisi maber mar bolruok, onego omi kik wawach wechewa wawegi. Kodok korka nyiso ji wach ote manie Ndiko manyalo reso ngimagi, dwarore ni ‘kik wakadh weche ma nondiki.’​—1 Kor. 4:6.

En e “Amina”

8, 9. (a) Tiend “amina” en ang’o, to ang’o momiyo iluongo Yesu ni “Amina”? (b) Ere kaka Yesu nochopo migawone kaka “Amina”?

⁸ Som Fweny 3:⁠14. Ang’o momiyo Muma luongo Yesu ni “Amina”? “Amina,” en wach molok kogol e dho-Hibrania, to tiende en ni, “obed kamano,” kata ni “adier en kamano.” Tiend wachno sie gi dho-Hibrania en ni, “ma adier” kata “minyalo gen.” Wachno bende itiyogo kiwuoyo kuom Jehova kaka ja adiera. (Rapar 7:9; Isa. 49:7) Kuom mano, Yesu en ng’a makende nade sama iluonge ni “Amina”? Ne ane kaka 2 Jo Korintho 1:19, 20 dwoko kama: “Wuod Nyasaye, Yesu Kristo, ma . . . ne wayalo e dieru, ne ok en Ee gi Ooyo: to Ee ni kuom en. E singruok duto mag Nyasaye, Ee ni kuom Kristo. E momiyo kuom en bende wawacho Amina ni Nyasaye nikech duong’ mare.”

⁹ Yesu e “Amina” kuom singo duto mag Nyasaye. Ngimane makare ma ne onge ketho e piny, kaachiel gi thone mar misango, noyawo thuolo mar chopo singo duto mag Jehova Nyasaye. Bende, kuom chung’ne motegno, Yesu nonyiso ayanga ni Satan en jamiriambo, kane Satan temo wacho ni, jotich Nyasaye nyalo jwang’o Nyasaye ka gin e bwo sand gi tembe malit, mana kaka weche manie bug Ayub nyiso. (Ayub 1:6-12; 2:2-7) Kuom chwech duto mag Nyasaye, Wuowi makayo ne nyalo chiwo dwoko malong’o chuth kuom wachno ma ne odonjnie jotich Nyasaye. E wi mano, Yesu nonyiso maber chuth ni oriwo Wuon mare lwedo kuom wach ratiro ma Jehova nigodo mar bedo jaloch e wi gik moko duto.

10. Ere kaka wanyalo luwo ranyisi mar Yesu ka en e migawone makende kaka “Amina”?

¹⁰ Ere kaka wanyalo luwo ranyisi mar Yesu ka en e migawone makende kaka “Amina”? Wanyalo timo kamano kuom chung’ motegno korka Jehova, kendo riwo lwedo ratiro ma en-go mar bedo gi loch e wi gik moko duto. Timo kamano biro nyiso ni wachopo kwayo manie Ngeche 27:11 mawacho niya: “Wuoda, bedi mariek, kendo mi chunya mor; mondo aduok wach ni jalo makwera.”

En e “Jagach” mar Singruok Manyien

11, 12. Ere kaka migawo mar Yesu kaka Jagach en migawo makende?

¹¹ Som 1 Timotheo 2:5, 6. “E kind Nyasaye kod ji nitie jagach achiel,” ma en Yesu. En e “jagach” mar singruok manyien. (Hib. 9:5; 12:24) Kata kamano, Musa bende ne iwuoyo kuome kaka jagach​—tiende ni jagach mar singruok mar Chik. (Gal. 3:19) Kare migawo mar Yesu kaka Jagach en migawo makende e yo mane?

¹² E dhok machon, wach molok ni “jagach,” en wach mihinyo tigo e weche mag chik. En wach manyiso ni Yesu en kaka Jagach e bwo chik mar singruok manyien, ma ne omiyo onyuol oganda manyien, tiende ni, “Israel mar Nyasaye.” (Gal.  6:⁠16) Ogandani gin Jokristo mowal kuom roho, kendo gin ema giloso “dolo mag Ruoth” e polo. (1 Pet. 2:9; Wuok 19:6) Kata obedo ni Musa ne tiyo kaka jagach mar singruok mar Chik, ne ok onyal nyago oganda ma kamano.

13. Migawo mar Yesu kaka Jagach, oriwo gik mage?

¹³ Migawo mar Yesu kaka Jagach oriwo gik mage? Mokwongo, Jehova tiyo gi teko mar remb Yesu kuom jogo mirwako e singruok manyien. E timo mae, Jehova ketogi kare kaka chik dwaro. (Rumi 3:⁠24; Hib. 9:15) Bang’ mano, Nyasaye koro nyalo rwakogi e singruok manyien mamiyo gibedo gi geno mar bedo ruodhi koda jodolo e polo! Ka en kaka Jagach margi, Yesu konyogi rito winjruok maber kendo maler e nyim Nyasaye.​—Hib. 2:16.

14. Kata bed ni gin gi geno mane, ang’o momiyo Jokristo duto onego onyis erokamano kuom migawo mar Yesu kaka Jagach?

¹⁴ To nade jogo ma ok nie singruok manyien, jogo ma nigi geno mar dak nyaka chieng’ e piny, to ok e polo? Kata obedo ni ok gin jokanyo mag singruok manyien, singruogno konyogi. Singruogno miyo iweyonegi richogi kendo iketogi kare kaka osiepe Nyasaye. (Jak. 2:23; 1 Joh. 2:1, 2) Kata bed ni wan gi geno mar dhi e polo, kata mar dak e piny, ng’ato ka ng’ato kuomwa nigi gimomiyo onego onyis erokamano kuom kony ma Yesu chiwonwa e migawone kaka Jagach mar singruok manyien.

En e ‘Jadolo Maduong’ ’

15. Ang’o momiyo migawo mar Yesu kaka Jadolo Maduong’ opogore gi mag chwo mamoko duto mosetiyo kaka jodolo madongo?

¹⁵ Chwo mang’eny nosetiyo kaka jodolo madongo e kinde machon, kata kamano migawo mar Yesu kaka Jadolo Maduong’ en migawo makende. E yo mane? Paulo lero niya: “En ok onego otim kaka jodolo mamoko timo; ok ochiw misango pile pile, mokwongo ni richone owuon, eka ni richo mar oganda; to notimo misango dichiel kende, ka nochiwore owuon. Chik keto ji ma nyawo obembo obed jodolo madongo, to  weche mag kuong’ruok, ma nobiro achien bang’ Chik, keto Wuowi, mobedo jadolo makare nyaka chieng’.”​—Hib. 7:27, 28. *

16. Ang’o momiyo kuom adier misango ma Yesu nochiwo en misango makende?

¹⁶ Yesu ne en dhano makare maonge richo, ne en kaka Adam kane Adam pok otimo richo. (1 Kor. 15:45) Nikech mano, Yesu ema ne en dhano kende ma ne nyalo chiwo misango makare chuth​—misango ma ne ok dhi dwarore ni ochak onwo kendo. E bwo Chik Musa, misengini ne ichiwo pile ka pile. Misenginigo duto koda tije ma jodolo ne timo, ne gin mana tipo mar gima Yesu ne dhi chopo. (Hib. 8:5; 10:1) Omiyo, migawo mar Yesu kaka Jadolo Maduong’ en migawo makende nikech gigo mochopo oloyo mag jodolo mamoko machon, kendo migawoneno en migawo masiko.

17. Ang’o momiyo onego wanyis erokamano kuom migawo mar Yesu kaka Jadolo Maduong’, to wanyalo timo kamano nade?

¹⁷ Gigo ma Yesu chopo kaka Jadolo Maduong’ gin gik makonyowa bedo gi winjruok makare e nyim Nyasaye. To mano kaka wan gi Jadolo Maduong’ maber ndi! Paulo nondiko kama: “Wan gi jadolo maduong’ ma nyalo bedo mang’won gi nyawowa, nikech en jal ma notem e weche duto, kaka wan bende itemowa, to ne oonge gi richo.” (Hib. 4:15) Kuom adier, ng’eyo wachni malong’o onego omi ‘kik wabed mangima ne wan wawegi, to ni en ma ne othonwa.’​—2 Kor. 5:14, 15; Luka 9:23.

En e ‘Kodhi’ ma Ne Okor Wachne

18. En wach mane ma ne okor bang’ Adam timo richo, to ang’o ma ne oler bang’e kuom wach ma ne okorno?

¹⁸ Chon e puodho mar Eden, kane koro nenre ni dhano oselalo gik moko duto​—tiende ni, lalo winjruok maber gi Nyasaye, ngima ma nyaka chieng’, mor, koda Paradis​—Jehova Nyasaye nokoro wach jal ma ne dhi bedo Jawar. Ne oluong jalo ni ‘kodhi.’ (Chak. 3:15) Wach Kodhi ma ne ok ohul nyingeno, ema ne obedo wach maduong’ kuom weche mang’eny ma Muma nokoro, a kanyo ka dhi nyime. Ne onego owuog e anyuola mar Ibrahim, Isaka, kod Jakobo. Bende ne onego oa e libamba Ruoth Daudi.​—Chak. 21:12; 22:16-18; 28:14; 2 Sam. 7:12-​16.

19, 20. (a) Kodhi ma ne osingi en ng’a? (b) Ang’o momiyo inyalo wach ni kodhi ma ne okor wachne oriwo jomamoko bende ma ok mana Yesu kende?

¹⁹ Kodhi ma ne osingno ne en ng’a? Wanyalo yudo dwoko mar penjoni e Jo Galatia 3:⁠16. (Som.) Kata kamano, e sula nogono bang’e, jaote Paulo medo wacho ne Jokristo mowal kuom roho kama eri: “To ka un mag Kristo, eka un koth Ibrahim, kendo un jocham gikeni mar singruokno.” (Gal. 3:29) Ka Kristo e Kodhi ma ne osingi, ere kaka jomamoko bende iwacho ni gin kodhino?

²⁰ Dhano tara gi tara temo wacho ni gin jo anyuola mar Ibrahim, kendo moko kuomgi ketore kata ni gin jonabi. Nitie dinde moko ma ketore ni jonabi maggi nowuok e anyuola mar Ibrahim. Kata kamano, be jogi duto gin Kodhi ma ne osingi? Ooyo. Mana kaka jaote Paulo nyiso ka otelne gi roho, ok ji duto mawuok e anyuola mar Ibrahim ema loso Kodhi ma ne osingi. Koth Ibrahim ma ne oa kuom yawuote mamoko, ok ne oti godo e gwedho oganda dhano. Kodhi mar gwedho oganda dhano ne onego oa e libamba mar Isaka kende. (Hib. 11:18) Gikone, mana ng’ato achiel kende, Yesu Kristo, ma ne owuok e anyuola mar Ibrahim kaka onyis ei Muma, ema ne dhi bedo bat-maduong’ mar kodhi ma ne okor wachne. *  Jomamoko duto ma bang’e bedo bat-matin mar koth Ibrahim, bedo kamano mana nikech gin “mag Kristo.” Ee, migawo mar Yesu e chopo weche mokorgi, en migawo makende.

21. En ang’o mamori kuom yo ma Yesu osebedo ka chopogo migawo makende ma en-go e dwaro mar Jehova?

²¹ Ang’o ma wasepuonjore kuom nono machuok migawo makende ma Yesu nigo e chopo dwaro mar Jehova? Chakre ne chweye ka dhi nyime, Wuod Nyasaye ma miderma osebedo Wuowi makende gadier. Kata kamano, Wuod Nyasaye makendeni, ma nobiro mobedo Yesu, kinde duto osebedo kanyiso bolruok e timo gik moko kaluwore gi dwaro mar Wuon mare, maok omany duong’ mare owuon. (Joh. 5:41; 8:50) Mano kaka noketo ranyisi maber ahinya monego waluw ndalogi! Mana kaka Yesu, weuru watim kinda mondo omi ‘watim gik moko duto ne duong’ mar Nyasaye.’—1 Kor. 10:31.

[Weche moler piny]

Be Iparo?

• Ang’o misepuonjri kuom migawo makende ma Yesu nigo kaluwore gi nyinge mag telo ma en-go? (Ne sanduk.)

• Ere kaka inyalo luwo ranyisi mar Wuod Jehova makende?

[Penjo mag Puonjruok]

[Sanduk/Picha manie ite 23]

Moko Kuom Nyinge mag Telo Manyiso Migawo Makende ma Yesu Nigo e Dwaro mar Nyasaye

▪ Wuowi ma Miderma. (Joh. 1:3) Yesu kende e chwech ma ne ochwe achiel kachiel gi Wuon mare.

▪ Wach. (Joh. 1:14) Jehova tiyo kod Wuode kaka Jal mawuoyo e loye konyiso chwech mamoko weche koda chike Nyasaye.

▪ Amina. (Fwe. 3:14) Ngima mar Yesu kochung’ motegno e piny, moriwo nyaka thone mar misango, ne onyiso maler chuth ni singo mag Jehova Nyasaye nyaka timre.

▪ Jagach mar Singruok Manyien. (1 Tim. 2:5, 6) Ka en kaka Jagach e bwo chik mar singruok manyien, Yesu osemiyo onyuol oganda manyien, ma en “Israel mar Nyasaye,” ma gin Jokristo maloso “dolo mag Ruoth” e polo.​—Gal. 6:16; 1 Pet. 2:9.

▪ Jadolo Maduong’. (Hib. 7:27, 28) Yesu kende e dhano ma ne nyalo chiwo misango makare chuth, misango ma ne ok nyal nwo. Onyalo puodhowa kuom richo kaachiel gi tho.

▪ Kodhi Manosingi. (Chak. 3:15) Mana dhano achiel kende, tiende ni Yesu Kristo, e bat-maduong’ mar kodhi ma ne okor wachne. Jomamoko duto ma bang’e ne obiro mobedo bat-matin mar koth Ibrahim, giduto gin “mag Kristo.”​—Gal. 3:29.